Ezekiyele 11:1-25
11 Hiloko moya wu ndzi tlakula wu ndzi yisa enyangweni ya le vuxeni ya yindlu ya Yehovha, nyangwa leyi languteke evuxeni.+ Kwalaho enyangweni ndzi vone vavanuna va 25 naswona exikarhi ka vona a ku ri na Yazaniya n’wana wa Azuri na Pelatiya n’wana wa Benaya, lava nga tihosana ta vanhu.+
2 Hiloko A ku eka mina: “N’wana wa munhu, lava i vanhu lava kunguhataka swilo swo homboloka, lava byelaka vanhu ku endla swilo swo biha emutini lowu.
3 Va ri, ‘Xana lowu a hi wona nkarhi wa leswaku hi aka tiyindlu?+ Muti lowu i poto ro sweka hi rona+ naswona hina hi nyama.’
4 “Hikwalaho profeta u va tshinya. Profeta n’wana wa munhu.”+
5 Hiloko moya wa Yehovha wu fika ehenhla ka mina,+ a ku eka mina: “Vula u ku, ‘Yehovha u ri: “Leswi mi swi vuleke i ntiyiso, n’wina yindlu ya Israyele naswona ndza swi tiva leswi mi swi anakanyaka.
6 Mi endle leswaku vanhu vo tala va dlayiwa emutini lowu naswona mi tate switarata swa wona hi mitsumbu.”’”+
7 “Hikwalaho Yehovha Hosi Leyi Tlakukeke u ri: ‘Mitsumbu leyi mi yi hangalaseke emutini i nyama naswona muti i poto ro sweka hi rona.+ Kambe n’wina mi ta humesiwa eka wona.’”
8 “‘Banga ma ri chava+ kambe ndzi ta mi tisela rona,’ ku vula Yehovha Hosi Leyi Tlakukeke.
9 ‘Ndzi ta mi humesa emutini ndzi mi nyiketa eka valuveri, ndzi mi avanyisa.+
10 Mi ta dlayiwa hi banga.+ Ndzi ta mi avanyisa endzilakaneni wa Israyele+ naswona mi ta swi tiva leswaku hi mina Yehovha.+
11 Muti a wu nge he vi poto ro sweka hi rona eka n’wina naswona n’wina a mi nge he vi nyama endzeni ka rona; ndzi ta mi avanyisa endzilakaneni wa Israyele,
12 kutani mi ta swi tiva leswaku hi mina Yehovha. Hikuva swileriso swa mina a mi swi yingisanga naswona a mi fambanga hi ku landza ku avanyisa ka mina,+ kambe mi tekelele matiko lawa mi akelaneke na wona.’”+
13 Loko ndzi heta ku profeta, Pelatiya n’wana wa Benaya a fa, hiloko ndzi wa xikandza xa mina xi languta ehansi, ndzi huwelela hi rito lerikulu ndzi ku: “Yehovha Hosi Leyi Tlakukeke! Xana u ta lovisa Vaisrayele lava saleke?”+
14 Yehovha a tlhela a vulavula na mina a ku:
15 “N’wana wa munhu, vamakwenu, vamakwenu lava nga ni mfanelo yo tlhela va xava ndhawu ni Vaisrayele hinkwavo, va byeriwe leswi hi vaaki va le Yerusalema, ‘Fambani mi ya ekule na Yehovha. Tiko i ra hina; hi nyikiwe rona tanihi ndzhaka.’
16 Hikwalaho vula u ku, ‘Yehovha Hosi Leyi Tlakukeke u ri: “Hambileswi ndzi va yiseke ekule leswaku va ya tshama exikarhi ka matiko, nileswi ndzi va hangalaseke exikarhi ka wona,+ ndzi ta va ndhawu yo kwetsima eka vona ku ringana nkarhinyana ematikweni lawa va yeke eka wona.”’+
17 “Hikwalaho vula u ku, ‘Yehovha Hosi Leyi Tlakukeke u ri: “Ndzi ta mi hlengeleta evanhwini, ndzi mi hlengeleta ematikweni lawa mi hangalasiweke eka wona, ndzi ta mi nyika tiko ra Israyele.+
18 Kutani va ta tlhelela eka rona, va fika va susa swilo hinkwaswo leswi nyangatsaka ni mikhuva leyi nyenyetsaka.+
19 Ndzi ta va nyika mbilu leyi nga ni vun’we*+ naswona ndzi ta chela moya lowuntshwa endzeni ka vona;+ ndzi ta susa mbilu ya ribye emimirini ya vona+ kutani ndzi va nyika mbilu ya nyama,*+
20 leswaku va yingisa milawu ya mina, va hlayisa swiboho swa mina swa vuavanyisi, va swi yingisa. Va ta va vanhu va mina, mina ndzi ta va Xikwembu xa vona.”’
21 “‘“Kambe loko ku ri lava timbilu ta vona ti tiyimiseleke ku endla swilo leswi nyangatsaka ni mikhuva leyi nyenyetsaka, ndzi ta va khoma hi ku ya hi leswi va swi endleke,” ku vula Yehovha Hosi Leyi Tlakukeke.’”
22 Makerubu ma yimisa timpapa ta wona, mavhilwa ma ri ekusuhi na wona+ naswona ku vangama ka Xikwembu xa Israyele ku ri ehenhla ka wona.+
23 Kutani ku vangama ka Yehovha+ ku suka emutini ku ya yima ehenhla ka ntshava leyi nga le vuxeni bya muti.+
24 Hiloko moya wu ndzi tlakula, hi ku tirhisa xivono xa moya wa Xikwembu, wu ndzi yisa eka vanhu lava nga evuhlongeni eKalidiya. Kutani xivono lexi ndzi xi voneke xi nyamalala.
25 Hiloko ndzi sungula ku byela vanhu lava nga evuhlongeni swilo hinkwaswo leswi Yehovha a ndzi kombeke swona.
Tinhlamuselo ta le hansi
^ Hi Xiheveru, “mbilu yin’we.”
^ Leswi vulaka mbilu leyi yingisaka nkongomiso wa Xikwembu.
