Esaya 8:1-22
8 Yehovha a ku eka mina: “Teka ribye lerikulu+ ra xiphepherhele, u tsala ehenhla ka rona u ku, ‘Maherixalali-haxibasa.’*
2 Kutani ndzi ta swi tiyisekisa hi timbhoni to tshembeka, muprista Uriya+ na Zakariya n’wana wa Yeberekiya.”
3 Hiloko ndzi etlela ni nsati wa mina, loyi a nga muprofeta kutani a tika, hi ku famba ka nkarhi a veleka n’wana wa mufana.+ Endzhaku ka sweswo Yehovha a ku eka mina: “N’wi thye vito ra Maherixalali-haxibasa,
4 hikuva loko mufana a nga si tiva ku vula a ku, ‘Tatana,’ na ‘Manana,’ xuma xa le Damaska ni swilo leswi phangiweke swa le Samariya swi ta tekiwa swi ya eka hosi ya Asiriya.”+
5 Yehovha a tlhela a vulavula na mina a ku:
6 “Hikwalaho ka leswi vanhu lava va fularheleke mati ya Xilowa*+ lama khulukaka kahle,Kutani va tsakela Resini ni n’wana wa Remaliya,+
7 Hikwalaho Yehovha u ta va tisela matiYa Nambu* yo tala lama khulukaka hi matimba,Hosi ya Asiriya+ ni ku vangama ka yona hinkwako.
Yi ta famba ehenhla ka swinambyana swa yona hinkwaswoYi khapakhapa etimbuweni ta yona hinkwato
8 Yi hundza hi le Yuda.
Yi ta ri khukhula ku ya fika enhan’wini ya rona;+Timpapa ta yona ti ta phurumuka ti funengeta tiko ra wena,Wena Emanuwele!”*+
9 Lunghekani mi ta va hlasela, kambe mi ta fayeteriwa.
Yingisani, n’wina hinkwenu lava humaka ekule!
Hlomani, kambe mi ta fayeteriwa!+
Hlomani, kambe mi ta fayeteriwa!
10 Hambiloko mo boha kungu a ri nge mi pfuni nchumu!
Hinkwaswo leswi mi swi vulaka a swi nge humeleli,Hikuva Xikwembu xi na hina!*+
11 Yehovha u ndzi lemukisile hi voko rakwe ra matimba leswaku ndzi nga landzeli vanhu a ku:
12 “Leswi vanhu va swi vulaka ku xenga, wena u nga swi vuli ku xenga!
U nga chavi leswi va swi chavaka;Swi nga ku rhurhumerisi.
13 Yehovha wa mavuthu hi yena Loyi mi faneleke mi n’wi xixima hikuva wa kwetsima,+Mi fanele mi chava yena,Hi yena Loyi a faneleke a mi endla mi rhurhumela.”+
14 U ta va vutumbelo eka n’wina,Kambe u ta fana ni ribye ro phyandlasela eka ronaNi ribye leri khudlunyaka+
Eka mindyangu ya Israyele hayimbirhi,U ta fana ni xirimbana ni ntlhamuEka vanhu va le Yerusalema.
15 Vo tala va ta khudlunyeka va wa va tshoveka;Va ta yengiwa ivi va phasiwa.
16 Bohani vumbhoni bya mina;Nyikani vadyondzisiwa va mina ntsena nawu!*
17 Ndzi ta tshama ndzi langutele Yehovha,+ loyi a tumbetelaka ndyangu wa Yakobo+ xikandza xakwe naswona ndzi ta tshemba yena.
18 Yingisani! Mina ni vana lava Yehovha a ndzi nyikeke vona,+ hi fana ni swikombiso+ ni masingita eIsrayele, leswi humaka eka Yehovha wa mavuthu, loyi a tshamaka eNtshaveni ya Siyoni.
19 Loko vo tshuka va mi byela va ku: “Vutisani vangoma ni vavhumbhi lava hlevetelaka,” xana vanhu a va fanelanga va vutisa Xikwembu xa vona? Xana swi fanerile ku vutisa lava feke timhaka leti khumbaka vanhu lava hanyaka?+
20 Ku ri ni ku endla sweswo, va fanele va kambisisa nawu ni vumbhoni lebyi tsariweke!
Loko va nga landzeli leswi tsariweke a va nge voningeriwi.+
21 Loyi a nga ta hundza etikweni u ta va a khomiwe hi ndlala a hlundzukile;+ hikwalaho ka sweswo u ta rhukana hosi ni Xikwembu xakwe a langute ehenhla.
22 Kutani u ta languta misava, a vona maxangu ni munyama, ku pfilunganyeka ni mikarhi yo tika, gome ni ku dzwihala.
Tinhlamuselo ta le hansi
^ Swi nga endleka swi vula “Ku Tsutsumela Ku Phanga.”
^ Xilowa a ku ri xihlovo xa mati.
^ Ku nga Yufrata.
^ Kumbe “xileriso.”
