Esaya 46:1-13
46 Bele u khinsamile,+ Nebo u korhamile.
Swikwembu swa vona swi rhwariwe hi swifuwo leswi rhwalaka ndzhwalo,+Ku fana ni ndzhwalo lowu tikaka swiharhi leswi karhaleke.
2 Swi khinsamile swi tlhela swi korhama swin’we;A swi koti ku ponisa nhundzu* ya swona,Na swona swi ya evuhlongeni.
3 “Ndzi yingiseni, n’wina vandyangu wa Yakobo na n’wina hinkwenu lava saleke vandyangu wa Israyele,+N’wina lava ndzi mi wundleke ma ha ku velekiwa ndzi tlhela ndzi mi bebula ku suka ekhwirini.+
4 Hambiloko u dyuharile, a ndzi nge cinci;+Ndzi ta ku rhwala kukondza misisi ya wena yi va yo basa.
Ndzi ta ku tlakula ndzi tlhela ndzi ku ponisa hilaha ndzi endleke hakona.+
5 Xana mi nga ndzi fanisa na mani kumbe mi ndzi ringanisa na mani,+Leswaku hi fana?+
6 Ku ni lava humesaka nsuku hi vusopfa eswipachini swa vona;Va pima silivhere hi xikalo.
Va thola loyi a tirhaka hi nsimbhi, a va endlela xikwembu.+
Kutani va khinsama emahlweni ka xona va xi gandzela.+
7 Va xi rhwala hi makatla;+Va ya xi veka endhawini ya xona, xi yima xi ku whii!
A xi suki laha xi vekiweke kona.+
Va xi huwelela, kambe a xi hlamuli;A xi swi koti ku ponisa munhu emaxangwini.+
8 Tsundzukani mhaka leyi, mi va ni xivindzi.
Swi tsundzukeni, n’wina lava tlulaka nawu.
9 Tsundzukani swilo swa khale* swinene,Leswaku hi mina Xikwembu, a ku na xin’wana.
Hi mina Xikwembu, a ku na xin’wana lexi fanaka na mina.+
10 Ku sukela eku sunguleni ndzi boxa leswi nga ta humelela swi nga si humelela,Ni leswi nga si humelelaka ndzi swi vule khale.+
Ndzi ri, ‘Xikongomelo xa mina xi ta humelela,+Ndzi ta endla ku rhandza ka mina.’+
11 Ndzi vitana gama evuxeni,+Munhu loyi a humaka etikweni ra le kule, leswaku a humelerisa xikongomelo+ xa mina.
Ndzi swi vurile, ndzi ta swi endla.
Ndzi tiyimiserile, ndzi ta swi endla.+
12 Ndzi yingiseni, n’wina va timbilu to nonon’hwa,*N’wina lava nga ku tiviki ku lulama.
13 Ndzi tise ku lulama ka mina ekusuhi;A ku le kule,Ku ponisa ka mina a ku nge hlweli.+
Ndzi ta ponisa Siyoni naswona Israyele u ta vona ku saseka ka mina.”+
Tinhlamuselo ta le hansi
^ Ku nga swifaniso leswi rhwexiweke swifuwo.
^ Hi Xiheveru, “swo sungula.”
^ Hi Xiheveru, “tsindziyela.”
