Vakorinto Wa Vumbirhi 7:1-16
7 Hikwalaho, varhandziwa leswi switshembiso leswi swi endliweke eka hina,+ a hi tibasiseni eka swilo hinkwaswo leswi thyakisaka nyama ni moya,+ leswaku hi ta va lava kwetsimaka ngopfu loko hi ri karhi hi chava Xikwembu.
2 Hi pfuleleni ndhawu etimbilwini ta n’wina.+ A hi dyohelanga munhu, a hi vavisanga munhu, a hi kanganyisanga munhu leswaku hi ta vuyeriwa.+
3 Leswi a ndzi swi vuleli ku mi vona nandzu. Hikuva ndzi vurile eku sunguleni leswaku mi le timbilwini ta hina hambiloko hi hanya kumbe hi fa.
4 Ndzi ni ntshunxeko lowukulu wo vulavula na n’wina. Ndzi tibuma ngopfu ha n’wina. Ndzi chaveleriwe ngopfu; emaxangwini hinkwawo ya hina ndza tsaka ndzi tsakisisa.+
5 Entiyisweni, loko hi fika eMakedoniya,+ a hi wisanga, kambe hi ye emahlweni hi xaniseka hi tindlela to hambanahambana, a ku ri ni nkaneto lowukulu ehandle ni ku chava endzeni.
6 Kambe Xikwembu lexi chavelelaka lava tshikilelekeke,+ xi hi chavelerile hi ku endza* ka Tito;
7 naswona ku nga ri hi ku endza ka yena ntsena kambe ni hikwalaho ka nchavelelo lowu a wu kumeke eka n’wina, u tlhele a hi vikela leswaku mi navela ku ndzi vona nileswaku ma vilela ha mina naswona mi ndzi twela vusiwana; sweswo swi ndzi tsakise ngopfu.
8 Hikuva hambiloko ndzi mi vangele gome hi papila ra mina,+ a ndzi tisoli. Hambiloko ndzi tisorile eku sunguleni, (hi ku vona leswaku papila leriya ri mi vangele gome, hambileswi a swi ri swa nkarhinyana),
9 sweswi ndza tsaka, ku nga ri ntsena hileswi a mi ri ni gome, kambe hikwalaho ka leswi gome rero ri endleke leswaku mi hundzuka. Hikuva a mi ri ni gome hi ndlela leyi tsakisaka Xikwembu kutani hina a hi mi vavisanga helo.
10 Hikuva ku va ni gome hi ndlela leyi tsakisaka Xikwembu swi endla leswaku munhu a hundzuka kutani a ponisiwa, a tlhela a nga tisoli;+ hambiswiritano, gome ra misava ri yisa eku feni.
11 Vonani vuyelo lebyinene lebyi veke kona eka n’wina hikwalaho ka ku va ni gome hi ndlela leyi tsakisaka Xikwembu. Swi endle leswaku mi tibasisa, mi hlundzuka, mi chava, mi navela leswinene, mi hiseka ni ku lulamisa leswi hoxeke!+ Mi tikombile leswaku mi tengile* hi tindlela hinkwato emhakeni leyi.
12 Hambileswi ndzi mi tsaleleke papila, a ndzi nga mi tsaleli hi loyi a endleke xidyoho+ kumbe loyi a dyoheriweke, kambe leswaku matshalatshala ya n’wina hi hina ma ta vonaka exikarhi ka n’wina emahlweni ka Xikwembu.
13 Hi yona mhaka leyi hi nga chaveleleka.
Kambe ku engetela eka sweswo, hi tsake ngopfu hikwalaho ka leswi Tito a a tsakile, hikuva hinkwenu mi n’wi phyuphyisile.
14 Loko ndzi tibumile eka yena hi n’wina, a ndzi khomiwanga hi tingana; hikuva swilo hinkwaswo leswi hi mi byeleke swona a swi ri ntiyiso kutani ni ku tibuma ka hina eka Tito ku tikombile leswaku i ntiyiso.
15 Nakambe, loko a tsundzuka ku yingisa ka n’wina hinkwenu+ ni ndlela leyi mi n’wi amukeleke ha yona hi ku chava ni ku rhurhumela, swi endla leswaku a mi rhandza ngopfu.
16 Ndza tsaka hi leswi ndzi mi tshembaka* eka hinkwaswo.
Tinhlamuselo ta le hansi
^ Hi Xigriki, “vukona bya.”
^ Kumbe “pfumala nandzu.”
^ Kumbexana “ndzi nga vaka ni xivindzi lexi tiyeke hikwalaho ka n’wina.”
