Vakorinto Wa Vumbirhi 6:1-18
6 Leswi hi tirhaka na xona,+ hi tlhela hi mi kombela leswaku mi nga amukeli musa lowukulu wa Xikwembu kutani mi tlanga hi wona.+
2 Hikuva xi ri: “Ndzi ku twile hi nkarhi wa kona lowunene naswona ndzi ku pfunile hi siku ra ku ponisiwa.”+ Vonani! Lowu i nkarhi wa leswaku Xikwembu xi hi komba tintswalo. Vonani! Sweswi i siku ra ku ponisiwa.
3 A hi lavi ku khunguvanyisa munhu hi ndlela hambi yi ri yihi leswaku ku nga vi na munhu loyi a vulavulaka ku biha hi ntirho lowu hi wu endlelaka Xikwembu;+
4 kambe eka xin’wana ni xin’wana lexi hi xi endlaka ha tikombisa leswaku hi malandza ya Xikwembu,+ hi ku tiyisela swilo swo tala, maxangu, ku pfumala, swiyimo swo tika,+
5 ku biwa, ku pfaleriwa emakhotsweni,+ ku hlaseriwa hi mitshungu leyi kariheke, ku tirha hi matimba, ku nga etleli ni vusiku ni ku dlawa hi ndlala mikarhi yin’wana.+
6 Hi hanya vutomi lebyi baseke, hi tiva ntiyiso, hi lehisa mbilu,+ hi ni musa,+ hi pfumelela moya lowo kwetsima wu kongomisa vutomi bya hina naswona rirhandzu ra hina a ri na vukanganyisi.+
7 Hi vulavula ntiyiso, hi tshemba matimba ya Xikwembu,+ hi khoma matlhari ya ku lulama+ evokweni ra xinene* ni ra ximatsi.*
8 Ha vangamisiwa ni ku khomisiwa tingana, ha soriwa ni ku dzunisiwa. Hi tekiwa hi ri vakanganyisi kambe hi vulavula ntiyiso,
9 hi tekiwa hi ri lava nga tiviwiki kambe ha tiviwa, hi tekiwa hi ri lava feke* kasi ha hanya,+ hi tekiwa hi ri lava xupuriwaka* kambe a hi dlayiwanga,+
10 hi tekiwa hi ri ni gome kambe hi tshama hi tsakile, hi tekiwa hi ri swisiwana kambe hi fuwisa vo tala, hi tekiwa hi ri lava nga riki na nchumu kambe hi ni swilo hinkwaswo.+
11 Hi pfule nomu wa hina leswaku hi vulavula* na n’wina Vakorinto naswona ha mi rhandza swinene.*
12 A hi tshiki ku mi komba rirhandzu+ kambe n’wina ma tshika ku hi kombisa rirhandzu.
13 Ndzi vulavula na n’wina onge hiloko mi ri vana va mina. Hi kombela mi hi khoma hilaha hi mi khomaka hakona. Na n’wina hi rhandzeni hi mbilu yo basa.*+
14 Mi nga paniwi ni lava nga riki vapfumeri.+ Hikuva xana ku lulama ni vuhomboloki swi hlangana kwihi?+ Kumbe xana ku vonakala ni munyama swi hlangana kwihi?+
15 Ku engetela kwalaho, xana Kreste na Beliyali*+ va nga tirhisana ke? Xana mupfumeri* u hlangana kwihi ni loyi a nga riki mupfumeri?+
16 Xana swikwembu swa hava swi nga tshamisa ku yini etempeleni ya Xikwembu?+ Hikuva hi tempele ya Xikwembu lexi hanyaka;+ hilaha Xikwembu xi vuleke hakona xi ku: “Ndzi ta tshama exikarhi ka vona+ ndzi tlhela ndzi famba exikarhi ka vona, naswona ndzi ta va Xikwembu xa vona kutani vona va ta va vanhu va mina.”+
17 “‘Hikwalaho humani exikarhi ka vona, mi tihambanisa na vona,’ ku vula Yehovha,* ‘naswona tshikani ku khumba xilo lexi nga basangiki’”;+ “‘kutani ndzi ta mi amukela.’”+
18 “‘Ndzi ta va tata wa n’wina,+ naswona n’wina mi ta va vana va mina va majaha ni vanhwanyana,’+ ku vula Yehovha* wa Matimba Hinkwawo.”
Tinhlamuselo ta le hansi
^ Kumbexana leswaku hi tisirhelela.
^ Kumbexana leswaku hi hlasela.
^ Kumbe “hi tekiwa hi faneriwa hi rifu.”
^ Kumbe “tshinyiwaka.”
^ Kumbe “vulavule hi tshunxekile.”
^ Kumbe “hi mi pfulele timbilu ta hina.”
^ Kumbe “na n’wina ndlandlamukani.”
^ Kumbe “munhu wo tshembeka.”
^ Ri huma eka rito ra Xiheveru leri vulaka “Loyi A Nga Pfuniki Nchumu.” Ku vuriwa Sathana.
^ Vona Xiengetelo A5.
^ Vona Xiengetelo A5.
