Tikronika Ta Vumbirhi 8:1-18
8 Eku heleni ka malembe ya 20 lawa Solomoni a akeke yindlu ya Yehovha ni yindlu*+ yakwe ha wona,
2 Solomoni a pfuxa miti leyi Hiramu+ a n’wi nyikeke yona kutani a veka Vaisrayele leswaku va tshama eka yona.
3 Ku tlula kwalaho, Solomoni a ya eHamati-soba a wu teka.
4 Kutani a pfuxa muti wa Tadimora emananga ni miti hinkwayo leyi a ku hlayisiwa swilo+ eka yona leyi a yi akile eHamati.+
5 U tlhele a aka muti wa Beta-horoni+ wa le Henhla na Beta-horoni+ wa le Hansi, miti leyi biyeriweke leyi nga ni makhumbi, tigede ni swo goga ha swona
6 na Balata+ ku katsa ni miti hinkwayo ya Solomoni leyi a ku hlayisiwa swilo eka yona, miti hinkwayo ya makalichi,+ miti ya vagadi va tihanci ni hinkwaswo leswi Solomoni a a tsakela ku swi aka eYerusalema, eLebanoni ni le tikweni hinkwaro leri a a ri fuma.
7 Loko ku ri vanhu hinkwavo lava saleke eka Vaheti, Vaamori, Vaperezi, Vahivhi ni Vayebusi,+ lava a va nga ri Vaisrayele,+
8 vatukulu va vona lava a va sele etikweni, lava Vaisrayele va nga va lovisangiki,+ Solomoni u va endle mahlonga yakwe ku ta fikela namuntlha.+
9 Kambe loko ku ri Vaisrayele, Solomoni a nga va endlanga mahlonga entirhweni wakwe,+ hikuva a va ri masocha yakwe, tindhuna takwe ta nyimpi ni tindhuna ta lava fambisaka makalichi ni vagadi va tihanci.+
10 A ku ri ni tindhunankulu ta 250 leti a ti langutela ntirho wa Hosi Solomoni, tindhuna leti a ti langutela vanhu.+
11 Solomoni a humesa n’wana wa Faro wa nhwanyana+ eMutini wa Davhida a n’wi yisa endlwini leyi a n’wi akeleke yona,+ hikuva u te: “Hambileswi a nga nsati wa mina, a nga fanelanga a tshama endlwini ya Hosi Davhida wa Israyele, hikuva tindhawu leti Areka ya Yehovha yi ngheneke eka tona ta kwetsima.”+
12 Kutani Solomoni a endlela Yehovha magandzelo yo hisiwa+ ehenhla ka altari+ ya Yehovha leyi a yi akeke emahlweni ka rikupakupa.*+
13 A a endla tano siku ni siku naswona u endle magandzelo hilaha Muxe a vuleke hakona hi Tisavata,+ loko ku huma n’weti,+ hi nkarhi wa mikhuvo leyi a yi va kona kanharhu hi lembe,+ eNkhubyeni Wa Swinkwa Leswi Nga Riki Na Comela,+ Nkhuvo wa Mavhiki+ ni le Nkhubyeni wa Mitsonga.*+
14 U tlhele a veka mitlawa ya vaprista+ leswaku va langutela mitirho hilaha Davhida tata wakwe a vuleke hakona ni Valevhi leswaku va dzunisa+ Xikwembu ni ku tlhela va tirha emahlweni ka vaprista siku ni siku ni varindzi va tigede hi ku ya hi mitlawa ya vona etigedeni+ to hambanahambana, hikuva xexo a ku ri xileriso xa Davhida nandza wa Xikwembu xa ntiyiso.
15 A va xi fularhelanga xileriso xa hosi lexi yi xi byeleke vaprista ni Valevhi mayelana ni mhaka yin’wana ni yin’wana kumbe leyi khumbaka tindhawu leti ku hlayiseriwaka swilo eka tona.
16 Ntirho wa Solomoni hinkwawo wu fambe kahle ku sukela loko ku vekiwe masungulo ya yindlu ya Yehovha+ ku fikela loko yi hetiwa. Hi ndlela yoleyo yindlu ya Yehovha yi hetiwa.+
17 A ku ri hi nkarhi wolowo loko Solomoni a ya Esiyoni-gebere+ ni le Elata+ eribuweni ra lwandle etikweni ra Edomu.+
18 Hiramu+ a n’wi rhumela swikepe ni vavanuna lava nga ni ntokoto wo tluta va ta ni malandza yakwe. Va fambe ni malandza ya Solomoni eOfiri+ va ya vuya ni titalenta* ta nsuku+ ta 450, va ti yisa eka Hosi Solomoni.+
Tinhlamuselo ta le hansi
^ Kumbe “yindlu ya vuhosi.”
^ Kumbe “vhurandi.”
^ Kumbe “Mixaxa.”
^ Talenta a yi tika 34,2 wa tikhilogiramu. Vona Xiengetelo B14.
