Tikronika Ta Vumbirhi 25:1-28
25 Amaziya a a ri ni malembe ya 25 loko a va hosi naswona u fume malembe ya 29 eYerusalema. Vito ra mana wakwe a ku ri Yowadana wa le Yerusalema.+
2 U ye emahlweni a endla leswi lulameke eka Yehovha, kambe ku nga ri hi mbilu hinkwayo.
3 Hi ku hatlisa loko mfumo wakwe wu sungula ku tiya, a dlaya malandza yakwe lama dlayeke tata wakwe loyi a a ri hosi.+
4 Kambe a nga va dlayanga vana va wona hikuva u landzele leswi tsariweke eNawini, ebukwini ya Muxe, laha Yehovha a leriseke a ku: “Vatatana a va fanelanga va fela swidyoho swa vana va vona naswona vana a va fanelanga va fela swidyoho swa vatata wa vona; kambe un’wana ni un’wana u ta fela xidyoho xakwe.”+
5 Amaziya a hlengeleta Vayuda kutani a va ava hi ku ya hi tindhuna ta mindyangu, tindhuna ta vanhu va magidi ni tindhuna ta vanhu va madzana ta va ka Yuda na Benjamini.+ A va tsarisa ku sukela eka lava nga ni malembe ya 20 ku ya ehenhla+ kutani a kuma leswaku ku ni tinhenha ta 300 000 leti leteriweke ku lwa leti a ti kota ku khoma tlhari ni xitlhangu lexikulu.
6 Amaziya a tlhela a thola tinhenha ta matimba ta Israyele ta 100 000 a ti hakela hi titalenta* ta silivhere ta 100.
7 Kambe nandza wa Xikwembu xa ntiyiso a ya eka yena a fika a ku: “Wena hosi, u nga fambi ni masocha ya tiko ra Israyele hikuva Yehovha a nga va seketeli Vaisrayele,+ hambi ku ri va ka Efrayimi.
8 Kambe famba u ri wexe, teka goza, tiyimisele ku lwa. Loko swi nga ri tano, Xikwembu xa ntiyiso xi nga endla leswaku u hluriwa hi valala va wena, hikuva Xikwembu xi ni matimba ya ku pfuna+ munhu ni ya ku n’wi wisa.”
9 Hiloko Amaziya a vutisa nandza wa Xikwembu xa ntiyiso a ku: “Kambe ku ta endleka yini hi titalenta ta 100 leti ndzi ti nyikeke masocha ya Israyele?” Kutani nandza wa Xikwembu xa ntiyiso a ku: “Yehovha a nga swi kota ku ku nyika swo tala ku tlula sweswo.”+
10 Kutani Amaziya a tlherisa masocha lama teke eka yena ma huma eka va ka Efrayimi, a ma byela leswaku ma muka. Kambe a ma n’wi hlundzukele ngopfu Yuda, hiloko ma muka ma hlundzuke ngopfu.
11 Amaziya a va ni xivindzi, a rhangela masocha yakwe va ya eNkoveni wa Munyu,+ a fika a dlaya vavanuna va 10 000 va le Seyiri.+
12 Masocha ya Yuda ma khoma vavanuna va 10 000 va ha hanya. Ma va yisa ehenhla ka ribye ma fika ma va cukumetela ehansi, hiloko va phyandlaka hinkwavo.
13 Kambe masocha lawa Amaziya a ma tlheriseke leswaku ma nga fambi na yena enyimpini,+ ma hlasele miti ya Yuda, ku suka eSamariya+ ku ya fika eBeta-horoni;+ ma dlaya vanhu va 3 000 ma tlhela ma phanga nhundzu yo tala.
14 Kambe loko Amaziya a vuya eku dlayeni ka Vaedomu, u vuye ni swikwembu swa vavanuna va le Seyiri kutani a swi endla swikwembu+ swakwe naswona a sungula ku swi khinsamela ni ku swi endlela magandzelo.
15 Hiloko Yehovha a hlundzukela Amaziya swinene, kutani a rhuma muprofeta loyi a fikeke a ku eka yena: “Hikwalaho ka yini u gandzela swikwembu leswi tsandzekeke ku ponisa vanhu va swona eka wena?”+
16 Loko muprofeta a ha vulavula, hosi yi ku: “Xana hi ku veke ku va mutsundzuxi wa hosi?+ Miyela+ loko u nga lavi ku fa.” Hiloko muprofeta a miyela, kambe a tlhela a ku: “Ndza swi tiva leswaku Xikwembu xi lava ku ku lovisa, hikuva u endle leswi naswona a wu xi yingisanga xitsundzuxo xa mina.”+
17 Endzhaku ka loko a vulavule ni vatsundzuxi vakwe, Hosi Amaziya wa Yuda a rhuma vanhu eka Yehowaxi n’wana wa Yowohazi n’wana wa Yehu hosi ya Israyele a ku: “Tana, a hi hlangane hi lwa.”+
18 Hosi Yehowaxi wa Israyele a rhumela rito eka Hosi Amaziya wa Yuda a ku: “Mfava wa mitwa wa le Lebanoni wu rhumele rito eka mukedari wa le Lebanoni wu ku, ‘Pfumelela n’wana wa wena leswaku a va nsati wa n’wana wa mina.’ Kambe xivandzana xa le Lebanoni xi hundza xi kandziyela mfava wa mitwa.
19 U tibyele u ku, ‘Ndzi hlule Edomu.’+ Naswona sweswo swi ku tlhoma tinsiva, u lava ku dzunisiwa. Kambe sweswi tshama endlwini ya wena. Hikwalaho ka yini u fanele u tivitanela khombo u wa, u wisa na Yuda?”
20 Kambe Amaziya a nga yingisanga,+ hikuva a ku ri xikongomelo xa Xikwembu xa ntiyiso leswaku va hluriwa hi valala va vona,+ hikwalaho ka leswi a va gandzela swikwembu swa le Edomu.+
21 Hiloko Hosi Yehowaxi wa Israyele a ya hlangana na Hosi Amaziya wa Yuda eBeta-xemexe+ lowu nga muti wa Yuda, kutani va sungula ku lwa.
22 Tiko ra Israyele ri hlula ra Yuda, kutani un’wana ni un’wana a balekela emutini* wakwe.
23 Hosi Yehowaxi wa Israyele a khoma Hosi Amaziya wa Yuda, n’wana wa Yehowaxi, n’wana wa Yowohazi* eBeta-xemexe. Kutani a ya na yena eYerusalema va fika va mbundzumuxa khumbi ra Yerusalema, ndhawu leyi ringanaka timitara* ta kwalomu ka 178 ku sukela eGedeni ya Efrayimi,+ ku ya fika eGedeni ya le Khonweni.+
24 A teka nsuku hinkwawo, silivhere ni swilo hinkwaswo leswi a swi ri endlwini ya Xikwembu xa ntiyiso leswi a swi khathaleriwa hi Obede-edomu ni leswi a swi ri endlwini ya hosi+ laha ku vekiwaka kona xuma ni vanhu lava khomiweke. Kutani a tlhelela eSamariya.
25 Amaziya+ n’wana wa Yehowaxi hosi ya Yuda u hanye malembe ya 15 endzhaku ka loko Yehowaxi+ n’wana wa Yowohazi hosi ya Israyele+ a file.
26 Matimu hinkwawo ya Amaziya, ku sukela eku sunguleni ku ya fikela emakumu, ma tsariwe eBukwini ya Tihosi ta Yuda ni ta Israyele.
27 Ku sukela enkarhini lowu Amaziya a fularheleke Yehovha ha wona, va n’wi bohele xikungu+ xo n’wi dlaya eYerusalema, hiloko a balekela eLakixi, kambe ku rhumiwa vanhu eLakixi leswaku va n’wi landza, va fike va n’wi dlayela kwalaho.
28 Hiloko va vuya na yena va n’wi rhwale hi tihanci naswona u lahliwe ni vakokwa wakwe emutini wa Yuda.
Tinhlamuselo ta le hansi
^ Talenta a yi tika 34,2 wa tikhilogiramu. Vona Xiengetelo B14.
^ Hi Xiheveru, “ematendeni.”
^ Hi Xiheveru, “swisungunu swa 400.” Vona Xiengetelo B14.
^ Vito ra yena rin’wana i Ahaziya.
