Tihosi Ta Vumbirhi 22:1-20
22 Yosiya+ a a ri ni malembe ya nhungu loko a va hosi naswona u fume malembe ya 31 eYerusalema.+ Vito ra mana wakwe a ku ri Yedida n’wana wa Adaya wa le Bosikata.+
2 U endle leswinene eka Yehovha naswona u fambe etindleleni hinkwato ta Davhida kokwa wakwe,+ a nga hambukanga emahanyelweni yakwe lamanene.
3 Hi lembe ra vu-18 ra ku fuma ka Hosi Yosiya, hosi yi rhume matsalana Xafani n’wana wa Azaliya ntukulu wa Mexulama endlwini ya Yehovha+ yi ku:
4 “Famba eka muprista lonkulu Hilkiya,+ u n’wi byela leswaku a hlengeleta mali hinkwayo leyi nyikeriwaka endlwini ya Yehovha,+ leyi varindzi va nyangwa va yi hlengeleteke loko vanhu va nyikela.+
5 A va yi nyike lava hlawuriweke ku langutela ntirho endlwini ya Yehovha, kutani vona va ta yi nyika vatirhi lava nga ta lunghisa swilo leswi onhakeke endlwini ya Yehovha,+
6 ku nga lava tivaka ntirho wa mavoko, vaaki ni vavatli va maribye; naswona va ta yi tirhisela ku xava timhandzi ni maribye lama vatliweke leswaku va lunghisa yindlu.+
7 Kambe mi nga lavi ku tiva ndlela leyi mali yi tirhisiweke ha yona, hikuva va tshembekile.”+
8 Endzhaku ka nkarhi muprista lonkulu Hilkiya a byela matsalana Xafani a ku:+ “Ndzi kume buku ya Nawu+ endlwini ya Yehovha.” Hiloko Hilkiya a n’wi nyika yona, kutani Xafani a sungula ku yi hlaya.+
9 Hiloko matsalana Xafani a tlhelela eka hosi a fika a ku: “Malandza ya wena ma humese mali leyi a yi ri endlwini, ma yi nyika lava hlawuriweke ku langutela ntirho endlwini ya Yehovha.”+
10 Matsalana Xafani a tlhela a byela hosi a ku: “Ku ni buku+ leyi ndzi nyikiweke hi muprista Hilkiya.” Kutani Xafani a sungula ku yi hlayela hosi.
11 Loko hosi yi twa marito ya buku ya Nawu, yi handzula swiambalo swa yona.+
12 Hiloko hosi yi lerisa muprista Hilkiya, Ahikama+ n’wana wa Xafani, Akibora n’wana wa Mikaya, matsalana Xafani na Asaya nandza wa hosi yi ku:
13 “Fambani mi ya ndzi vutisela eka Yehovha, mi vutisela vanhu ni Vayuda hinkwavo, mayelana ni leswi tsariweke ebukwini leyi kumiweke; hikuva Yehovha u hi karihele ngopfu+ hikwalaho ka leswi vakokwa wa hina va nga yingisangiki marito ya buku leyi hi ku tsandzeka ku endla hinkwaswo leswi tsariweke mayelana na hina.”
14 Hiloko muprista Hilkiya, Ahikama, Akibora, Xafani na Asaya va ya eka muprofeta wa xisati Hulida.+ A a ri nsati wa Xalumu n’wana wa Tikwa n’wana wa Harasi loyi a a ri muhlayisi wa swiambalo naswona a a tshama eXifundzheni Lexintshwa xa Yerusalema; va fika va vulavula na yena kwalaho.+
15 Hulida a ku eka vona: “Yehovha Xikwembu xa Israyele u ri, ‘Fambani mi ya byela loyi a mi rhumeke eka mina mi ku:
16 “Yehovha u ri, ‘Ndzi ta tisa khombo endhawini leyi ni le ka vaaki va yona, hinkwaswo leswi hosi ya Yuda yi swi hlayeke ebukwini.+
17 Hikwalaho ka leswi va ndzi fularheleke naswona va hiselaka swikwembu swin’wana+ magandzelo leswaku va ndzi hlundzukisa hi mitirho ya mavoko ya vona hinkwayo,+ vukarhi bya mina byi ta pfurhela ndhawu leyi, a byi nge timeriwi.’”+
18 Kambe eka hosi ya Yuda leyi mi rhumeke ku ta vutisa Yehovha, mi fanele mi ku eka yona, “Hi leswi, leswi Yehovha Xikwembu xa Israyele a swi vulaka: ‘Mayelana ni leswi u swi tweke,
19 hikwalaho ka leswi mbilu ya wena yi oloveke u tlhela u titsongahata+ eka Yehovha loko u twa leswi ndzi swi vuleke hi ndhawu leyi ni vaaki va yona, leswaku va ta hundzuka ndzhukano naswona vanhu va ta chava hikwalaho ka leswi swi va endlekeleke, kutani u handzula swiambalo swa wena+ u sungula ku rila emahlweni ka mina, ndzi ku twile, ku vula Yehovha.
20 Kutani u ta lahliwa ni vakokwa wa wena hi ku rhula, a wu nge ma voni makhombo hinkwawo lawa ndzi nga ta ma tisa endhawini leyi.’”’” Hiloko va yisa nhlamulo eka hosi.
