Petro Wa Vumbirhi 2:1-22
2 Hambiswiritano, a ku ri ni vaprofeta va mavunwa exikarhi ka vanhu va Xikwembu tanihi leswi ku nga ta va ni vadyondzisi va mavunwa exikarhi ka n’wina.+ Va ta ngungumela va nghenisa mitlawa leyi nga ni khombo, va ta landzula hambi ku ri n’wini wa vona loyi a va xaveke,+ va tivangela ku hatla va lovisiwa.
2 Ku tlula kwalaho, vo tala va ta endla manyala*+ ku fana na vona, hikwalaho ka sweswo vanhu vo tala va ta vulavula ku biha hi ndlela ya Xikwembu.*+
3 Nakambe va ta mi tlhariheta hi mavunwa hikwalaho ka leswi va nga ni makwanga. Kambe xigwevo xa vona lexi humesiweke khale+ xi ta hi ku hatlisa naswona ku lovisiwa ka vona a ku etlelanga.+
4 Kunene Xikwembu a xi tshikanga ku xupula tintsumi leti dyoheke,+ kambe xi ti hoxe eThatharasi,*+ xi ti boha hi tinketana emunyameni lowukulu kukondza ku fika nkarhi wa ku avanyisiwa.+
5 Naswona a xi tshikanga ku xupula misava ya khale,+ kambe xi hlayisa Nowa, muchumayeri wa leswo lulama+ ni van’wana va nkombo,+ loko xi tisa ndhambhi emisaveni ya vanhu lava nga xiximiki Xikwembu.+
6 Nakambe xi gweve miti ya Sodoma na Gomora hi ku yi hisa ku sala nkuma ntsena,+ xisweswo swi va xilemukiso* xa leswi nga ta endleka eka vanhu lava nga xiximiki Xikwembu.+
7 Kutani xi ponisa Lota+ munhu wo lulama, loyi a a dya mbitsi hikwalaho ka manyala* lawa a ma endliwa hi vanhu lava delelaka nawu,
8 hikuva siku ni siku wanuna yoloye wo lulama a a dya mbitsi loko a vona ni ku twa swilo swo biha leswi a va swi endla loko a ha tshama na vona.
9 Leswi swi kombisa leswaku Yehovha* wa swi kota ku va ponisa endzingweni+ vanhu lava n’wi gandzelaka hi mbilu hinkwayo, kambe lava nga lulamangiki wa va tshika leswaku va ta lovisiwa hi siku ra vuavanyisi,+
10 ngopfungopfu lava lavaka ku thyakisa mimiri ya van’wana+ va tlhela va delela lava fumaka.+
Va titshemba ngopfu naswona va titiva, a va chavi ku vulavula ku biha hi vakwetsimi,
11 kasi tintsumi, hambileswi ti va tlulaka hi ntamu ni matimba, a ti va hehli hi marito yo rhukana, hikwalaho ka leswi ti xiximaka Yehovha.*+
12 Kambe vanhu lava, lava fanaka ni swiharhi leswi nga anakanyiki leswi velekeriwaka ku khomiwa swi dlayiwa, va vulavula ku biha hi swilo leswi va nga swi tiviki.+ Va ta lovisiwa hikwalaho ka mahanyelo ya vona yo biha,
13 va kuma hakelo ya mitirho ya vona yo biha.
Va teka ku hanya hi vulovolovo+ ninhlikanhi swi ri ntsako. I swivati, va tiphina hi tidyondzo ta vona ta vuxisi va ri karhi va dya na n’wina emikhubyeni.+
14 Matihlo ya vona ma tele vuoswi+ naswona va hluleka ku tshika xidyoho, va wonga lava nga tiyangiki. Mbilu ya vona yi leteriwe ku va ni makwanga. I vana lava rhukaniweke.
15 Va hambukisiwile va tshika ndlela leyinene. Va landzele ndlela ya Balama+ n’wana wa Beyori, loyi a rhandzeke hakelo ya leswo biha,+
16 kambe u tshinyiwile hileswi a endleke leswo biha.+ Xifuwo lexi nga vulavuliki xi vulavule na yena hi rito ra munhu xi sivela muprofeta loyi ku endla swo huma endleleni.+
17 Vona i swihlovo leswi nga riki na mati ni hunguva leyi hungiwaka hi xidzedze, va vekeriwe munyama lowukulu.+
18 Va vulavula swilo swo nyanyula leswi nga riki ntiyiso. Va yenga vanhu leswaku va navela swilo leswi tsakisaka nyama+ hi mikhuva ya vona ya manyala,* va wonga vanhu lava ha ku balekelaka vanhu lava hanyaka exidyohweni.+
19 Va tshembisa vanhu ntshunxeko, kasi vona i mahlonga ya vukungundzwana;+ phela un’wana ni un’wana loyi a hluriwaka hi un’wana u va hlonga ra munhu yoloye.*+
20 Kunene loko endzhaku ko balekela swilo swa misava leswi thyakisaka+ hileswi se va tivaka ntiyiso hi Hosi tlhelo Muponisi wa hina Yesu Kreste, kutani va tlhela va ya hanya hi swilo sweswo, xiyimo xa vona xi biha ngopfu ku tlula eku sunguleni.+
21 A swi ta antswa loko a va nga yi tivanga ndlela yo lulama, ku ri ni ku yi tiva kutani endzhaku ka sweswo va tshika milawu yo kwetsima leyi va nyikiweke yona.+
22 Leswi xivuriso xa ntiyiso xi swi vuleke swi endlekile eka vona: “Mbyana yi tlhelele emahlanteni ya yona ni nguluve leyi a yi hlambisiwile yi tlhele yi ya vumbuluka endzhopeni.”+
Tinhlamuselo ta le hansi
^ Kumbe “mahanyelo ya vona lama khomisaka tingana.” I vunyingi bya rito ra Xigriki a·sel′gei·a. Vona Tinhlamuselo.
^ Hi Xigriki, “ndlela ya ntiyiso.”
^ Vona Tinhlamuselo.
^ Hi Xigriki, “xikombiso.”
^ Kumbe “mahanyelo ya vona lama khomisaka tingana.” Hi Xigriki, a·sel′gei·a. Vona Tinhlamuselo.
^ Vona Xiengetelo A5.
^ Vona Xiengetelo A5.
^ Kumbe “mahanyelo ya vona lama khomisaka tingana.” I vuyingi bya rito ra Xigriki, a·sel′gei·a. Vona Tinhlamuselo.
^ Kumbe “loyi a hluriwaka hi nchumu wo karhi, u va hlonga ra nchumu wolowo.”
