Tihosi To Sungula 14:1-31
14 Hi nkarhi wolowo Abiya n’wana wa Yerobuwamu a sungula ku vabya.
2 Kutani Yerobuwamu a byela nsati wakwe a ku: “Ndzi kombela u suka u yima, u tifihla va nga ku tivi leswaku u nsati wa Yerobuwamu kutani u ya eXilo. Waswivo! Muprofeta Ahiya u kwalaho. Hi yena loyi a vuleke leswaku ndzi ta va hosi ya vanhu lava.+
3 Famba ni swinkwa swa khume, makhekhe ni gula ra vulombe. Kutani u ta ku byela leswi nga ta endleka hi mufana loyi.”
4 Nsati wa Yerobuwamu u endle tano. Hiloko a ya eXilo+ a fika endlwini ya Ahiya. Ahiya a a nga ha voni hikuva a a dyuharile.
5 Kambe Yehovha a a byele Ahiya a ku: “Nsati wa Yerobuwamu u le ku teni a ta vutisa hi ta ku vabya ka n’wana wakwe. Ndzi ta ku byela leswi u faneleke u n’wi hlamula swona. Kambe loko a fika u ta tifihla leswaku u nga n’wi tivi.”
6 Loko Ahiya a twa swigingi enyangweni, u te: “Nghena nsati wa Yerobuwamu. Hikwalaho ka yini u tifihla? Ndzi rhumiwe eka wena leswaku ndzi ta ku byela mahungu yo vava swinene.
7 Famba u ya byela Yerobuwamu u ku, ‘Yehovha Xikwembu xa Israyele u te: “Ndzi ku hlawurile exikarhi ka varikwenu leswaku u va murhangeri wa vanhu va mina, ku nga Vaisrayele.+
8 Kutani ndzi handzula mfumo ndzi wu susa endlwini ya Davhida ndzi ku nyika wona.+ Kambe wena a wu fananga ni nandza wa mina Davhida, loyi a hlayiseke swileriso swa mina, a ndzi landzela hi mbilu yakwe hinkwayo a endla leswinene ntsena ematihlweni ya mina.+
9 Kambe wena u endle swilo swo biha ku tlula tihosi hinkwato leti veke kona emahlweni ka wena, u tiendlele xikwembu xin’wana ni swifaniso leswi endliweke hi nsimbhi leswaku u ndzi hlundzukisa+ naswona u ndzi fularherile.+
10 Hikwalaho ndzi tisa khombo endlwini ya Yerobuwamu, ndzi ta herisa vavanuna* hinkwavo, ku katsa ni loyi a nga riki na mupfuni ni loyi a nga pfuniki nchumu eIsrayele, naswona ndzi ta kukula ku basa endlwini ya Yerobuwamu,+ hilaha munhu a susaka vulongo hakona ku sala ku nga ha ri na nchumu!
11 Un’wana ni un’wana loyi a faka emutini a ri wa ndyangu wa Yerobuwamu u ta dyiwa hi timbyana; loyi a nga ta fela enhoveni u ta dyiwa hi swinyenyana, hikuva Yehovha u swi vurile.”’
12 “Sweswi muka. Loko u fika emutini n’wana wa wena u ta fa.
13 Tiko hinkwaro ra Israyele ri ta n’wi rila ri tlhela ri n’wi lahla hikuva hi yena ntsena eka ndyangu wa Yerobuwamu loyi a nga ta lahliwa esirheni, hikwalaho ka leswi ku nga yena ntsena endyangwini wa Yerobuwamu loyi Yehovha Xikwembu xa Israyele a kumeke nchumu lowunene embilwini ya yena.
14 Yehovha u ta tihlawulela hosi eIsrayele leyi nga ta herisa vandyangu wa Yerobuwamu+ ku sukela hi siku rero ku ya emahlweni, hambi ku ri sweswi.
15 Yehovha u ta herisa Vaisrayele ku fana ni rihlanga leri tsekatsekaka ematini, u ta simula Israyele emisaveni leyi leyinene, leyi a yi nyikeke vakokwa wa vona,+ u ta va hangalasela entsungeni wa Nambu,*+ hikuva va tiendlele timhandzi ta Axera,*+ va hlundzukisa Yehovha.
16 Naswona u ta fularhela Vaisrayele hikwalaho ka swidyoho leswi Yerobuwamu a swi endleke ni leswi a dyohiseke Israyele ha swona.”+
17 Endzhaku ka sweswo nsati wa Yerobuwamu a suka a famba a tlhelela eTirisa. Loko a fika enyangweni ya yindlu, n’wana a fa.
18 Kutani va n’wi lahla, tiko hinkwaro ra Israyele ri n’wi rila, hilaha Yehovha a vuleke hakona hi ku tirhisa nandza wakwe muprofeta Ahiya.
19 Matimu ya Yerobuwamu hinkwawo, ndlela leyi a lweke tinyimpi ha yona+ ni mafumelo yakwe, swi tsariwile ebukwini ya matimu ya tihosi ta Israyele.
20 Yerobuwamu u fume malembe ya 22, endzhaku ka sweswo a fa, a lahliwa ni vakokwa wakwe;+ kutani Nadabu n’wana wakwe a sungula ku fuma.+
21 Hi nkarhi wolowo, Rehobuwama n’wana wa Solomoni a a ri hosi eYuda. Rehobuwama a a ri ni malembe ya 41 loko a va hosi naswona u fume malembe ya 17 eYerusalema, muti lowu Yehovha a wu hlawuleke+ eka tinyimba hinkwato ta Israyele leswaku a veka vito ra yena kona.+ Vito ra mana wa Rehobuwama a ku ri Nayama wa Muamoni.+
22 Vaaki va Yuda a va endla swilo swo biha emahlweni ka Yehovha+ naswona va n’wi hlundzukise ku tlula vakokwa wa vona hikwalaho ka swidyoho leswi va swi endleke.+
23 Na vona va tiakele tindhawu leti tlakukeke, tiphuphu ni timhandzi ta Axera*+ exintshabyanini xin’wana ni xin’wana lexi tlakukeke+ ni le hansi ka murhi wun’wana ni wun’wana lowukulu.+
24 Nakambe a ku ri ni tinghwavava ta xinuna ta le tempeleni etikweni.+ Vanhu hinkwavo a va endla swilo hinkwaswo swo nyenyetsa ku fana ni matiko lawa Yehovha a ma hlongoleke emahlweni ka Vaisrayele.
25 Hi lembe ra vuntlhanu ra ku fuma ka Hosi Rehobuwama, Hosi Xixaka+ wa Egipta a hlasela muti wa Yerusalema.+
26 A teka xuma endlwini ya Yehovha ni le ndlwini ya hosi.*+ A teka swilo hinkwaswo ku katsa ni switlhangu hinkwaswo swa nsuku leswi Solomoni a swi endleke.+
27 Kutani Hosi Rehobuwama a endla switlhangu swa koporo ku siva leswi tekiweke, a swi nyika tindhuna ta varindzi lava rindzaka nyangwa ya yindlu ya hosi.
28 Nkarhi ni nkarhi loko hosi yi ta endlwini ya Yehovha, varindzi a va swi rhwala, endzhaku ka sweswo a va swi tlherisela endlwini ya varindzi.
29 Matimu ya Rehobuwama hinkwawo ni hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda?+
30 A ku tshama ku ri na nyimpi exikarhi ka Rehobuwama na Yerobuwamu.+
31 Hi ku famba ka nkarhi Rehobuwama a fa a lahliwa ni vakokwa wakwe eMutini wa Davhida.+ Vito ra mana wakwe a ku ri Nayama wa Muamoni.+ Kutani Abiyamu*+ n’wana wakwe a va hosi.
Tinhlamuselo ta le hansi
^ Hi Xiheveru, “un’wana ni un’wana loyi a tsakamiselaka ekhumbini.” I xivulavulelo xa Xiheveru xo nyaja loko ku vulavuriwa hi vavanuna.
^ Vona Tinhlamuselo.
^ Ku nga Yufrata.
^ Vona Tinhlamuselo.
^ Kumbe “ndlwini ya vuhosi.”
^ Vito ra yena rinʼwana i Abiya.
