YU KIRAP NOGUT long askim i stap long fran pes bilong dispela magasin? Sampela i kirap nogut long dispela askim, tasol planti man i gat tupela tingting na ol i ting God em i man nogut o nogat. Bilong wanem?

Sampela husat i karim hevi long ol bikpela disasta i askim: “Bilong wanem God i larim ol dispela samting i kamap? Em i no tingim yumi? O em i man nogut?”

Ol narapela i kamapim wankain askim olsem taim ol i ritim Baibel. Ol i ritim ol stori long Baibel olsem stori bilong Noa na Bikpela Tait, na ol i tingting, ‘Bilong wanem God bilong pasin laikim i kilim i dai olgeta dispela manmeri? Em i man nogut?’

Sampela taim yu save tingting long ol kain askim olsem? O yu hatwok long bekim askim bilong ol man husat i ting God em i man nogut? Sapos olsem, tingim wanpela narapela askim we inap helpim yu.

Yumi heitim ol pasin nogut bikos yumi inap skelim na save long wanem samting i stret na wanem samting i no stret. Dispela i mekim na yumi no wankain long ol animal. Krieta bilong yumi i wokim yumi i “kamap olsem [em] yet.” (Stat 1:27) Wanem insait bilong dispela tok? Dispela tok i makim olsem God i inapim yumi long kamapim ol gutpela pasin bilong em, stretpela pasin bilong em, na tingting bilong em long wanem samting i stret na wanem samting i no stret. Tingim: Sapos God yet i inapim yumi long save long wanem samting i stret na wanem samting i no stret na yumi save heitim pasin bilong mekim nogut long narapela, orait dispela i makim olsem God i heitim dispela pasin tu!

Baibel i strongim dispela tingting olsem sapos yumi heitim pasin nogut, orait God i mas heitim tru dispela pasin, God i tok: “Ol pasin bilong mi na tingting bilong mi i winim tru ol pasin bilong yupela na tingting bilong yupela.” (Aisaia 55:9) Tasol sapos yumi tok God em i man nogut i olsem yumi tok pasin na tingting bilong yumi i winim bilong God, a? I gutpela long kisim sampela save moa paslain long yumi tok olsem. Ating bai yumi no askim olsem God em i man nogut o nogat, tasol bai yumi askim, wai na sampela pasin bilong em i mekim na i luk olsem em i man nogut. Bilong helpim yumi, yumi ken skelim dispela tok “pasin nogut” i makim wanem samting stret.

Taim yumi kolim wanpela man olsem man nogut, yumi skelim em olsem em i gat ol tingting nogut long ol samting em i mekim. Man nogut em man husat i amamas long lukim ol narapela i kisim bagarap na em i no tingim pen na hevi ol i karim. Olsem, wanpela papa husat i save stretim pikinini bilong em bikos em i save amamas long bagarapim bel bilong pikinini, em i man nogut. Tasol papa husat i stretim pikinini bilong givim skul long em o bilong lukautim em, em i gutpela man. Planti taim ol man i no save kliagut long astingting bilong ol man i mekim samting, na em i isi long kisim tingting kranki long ol.

Yumi ken skelim tupela as na sampela man i ting olsem God em i man nogut—ol bikpela disasta yumi lukim long nau, na ol strafe em God i bin givim long ol man em Baibel i stori long en. Yu ting ol dispela bagarap i kamapim klia olsem God em i man nogut?