Ol Man i Askim . . .

▪ “Planti manmeri i go sindaun long wanpela ples long Frans, long wanem, ol i bilip olsem wanpela bikpela bagarap bai kamap . . . Ol i bilip olsem graun bai bagarap na pinis long Disemba 21, 2012, em pinis bilong 5,125 yia long kalenda bilong lain Maya bilong bipo.”​—⁠BBC News.

Ol lida bilong lotu, ol man i tok ol i saientis, na ol saveman bilong nau em ol i save tokaut long ol samting bai kamap bihain, ol i tok graun bai bagarap na pinis olgeta, tasol tru tru graun bai i stap oltaim. Yes, graun bai i no inap bagarap long 2012. Olsem na dispela graun yumi stap long en bai stap yet long 2012 na em bai stap yet inap oltaim oltaim.

Baibel i tokim yumi olsem: “Ol manmeri i save dai na nupela lain i save kamap na senisim ol. Tasol graun i no save senis. Oltaim em i stap olsem tasol.” (Saveman 1:⁠4) Na tu, tingim tok bilong Aisaia 45:​18, em i tok: “[God] i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en. Em i save tok olsem, ‘Mi wanpela tasol mi Bikpela, na i no gat narapela god moa i stap.’ ”

Tingim, sapos wanpela gutpela papa i lusim bikpela haptaim long wokim toi bot bilong pikinini man o toi haus bilong pikinini meri bilong em, yu ting em bai bagarapim ol dispela samting bihain tasol long em i givim long ol olsem presen? Em bai mekim pasin nogut tru sapos em i mekim olsem, a? Long wankain pasin, God i wokim graun bambai ol manmeri i ken i stap amamas long en. God i tokim namba wan man na meri, Adam na Iv olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” Na bihain, “God i lukim olgeta dispela samting i gutpela, na em i amamas tru.” (Stat 1:​27, 28, 31) God i tingim yet samting em i tingting pinis long kamapim long dispela graun; em i no inap larim wanpela samting i bagarapim graun. Jehova i tingim ol tok promis bilong em na i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​—⁠Aisaia 55:⁠11.

Tasol em laik bilong Jehova long “bagarapim ol man i wok long bagarapim graun.” (Revelesen 11:18) Long Baibel em i tok promis olsem: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”​—⁠Sindaun 2:​21, 22.

Wanem taim dispela samting bai kamap? I no gat wanpela man i save. Jisas i tok: “I no gat wanpela man i save long dispela de o dispela aua, ol ensel long heven i no save, na Pikinini tu i no save, Papa tasol i save.” (Mak 13:32) Ol Witnes Bilong Jehova i no kolim wanem taim stret God bai bagarapim ol man nogut. Em tru olsem ol i luksave long “sain” bilong dispela haptaim bilong pinis, na ol i bilip olsem yumi stap nau long haptaim em Baibel i kolim olsem “taim bilong las de,” tasol ol i no inap save long wanem taim stret “pinis” bai kamap. (Mak 13:​4-8, 33; 2 Timoti 3:⁠1) Ol i save tru olsem Papa bilong ol long heven na Pikinini bilong em, ol tasol i save long dispela samting.

Long nau, ol Witnes Bilong Jehova i givim bel tru long autim tok bilong gutnius bilong Kingdom Bilong God, em dispela gavman i stap long heven na em bai bosim na kamapim Paradais long graun, na ‘ol stretpela man bai i kisim graun na bai ol i stap oltaim long en.’​—⁠Song 37:⁠29.

[Piksa Kredit Lain long pes 10]

Image Science and Analysis Laboratory, NASA-Johnson Space Center