SAPOS bekim bilong yu em yes, orait dispela i kamapim narapela askim olsem: Yu ting pasin bilong yumi inap mekim God i amamas o bel hevi? Sampela saveman bilong bipo i tok, nogat. Ol i tok, i no gat wanpela man inap stiaim tingting bilong God, olsem na God i no inap amamas o bel hevi. Tasol Baibel i skulim yumi olsem Jehova i save mekim pasin sori na em i tingim tru ol samting yumi save mekim. Skelim ol tok i stap long Song 78:​40, 41.

Song 78 i stori long ol samting Jehova i bin mekim long lain Israel bilong bipo. Bihain long Jehova i bin kisim bek dispela lain long wok kalabus long Isip, em i tok em bai stap God bilong ol. Em i tok promis olsem sapos ol i bihainim ol lo bilong em, ol bai stap “lain manmeri” bilong em, na long rot bilong ol em bai kamapim ol samting em i tingting pinis long mekim. Ol manmeri i orait long dispela na ol i go insait long kontrak bilong Lo. Orait, olsem wanem? Ol i bin bihainim tok promis ol i bin mekim?​—⁠Kisim Bek 19:​3-8.

Man bilong raitim song i tok: “Planti taim ol i bikhet na ol i sakim tok bilong em long ples drai.” (Ves 40) Ves i kamap bihain i tok moa: “Ol i no lusim pasin bilong traim God.” (Ves 41) Man bilong raitim song i kamapim klia olsem ol i no bin lusim pasin bikhet. Dispela pasin bikhet i bin kirap taim lain Israel i stap long ples drai nating, bihain tasol long God i bin kisim bek ol long Isip. Ol manmeri i kirap toktok planti long God na sutim tok long em olsem em i no redi long helpim na lukautim ol. (Namba 14:​1-4) Wanpela buk bilong ol man bilong tanim Baibel i tok olsem dispela tok “ol i bikhet na ol i sakim tok bilong em,” ol inap “tanim tu olsem ‘bel bilong ol i pas strong na ol i no laik harim tok bilong God’ o ‘ol i tok “Nogat” long God.’ ” Maski i olsem, Jehova i save marimari long ol manmeri bilong em na lusim rong bilong ol taim ol i kamapim klia olsem ol i tanim bel tru. Tasol bihain ol i save go bek long ol olpela pasin bilong ol na bikhet gen, na ol i mekim olsem i go i go.​—⁠Song 78:​10-19, 38.

Lain Israel i save hambak na senisim nabaut tingting bilong ol, na Jehova i pilim olsem wanem taim ol i bikhet long em? Ves 40 i tok: “Ol i mekim em i bel hevi.” Narapela Baibel i tok olsem ol i “mekim ol samting bilong givim bel hevi long em.” Wanpela dikseneri bilong Baibel i tok: “Mining bilong dispela tok i makim olsem pasin bilong ol Hibru i nogut tru na i kamapim bel pen​—⁠olsem pasin bilong wanpela bikhet pikinini i no save bihainim tok.” Olsem wanpela bikhet pikinini i mekim papamama bilong em i bel hevi, ol bikhetlain Israel i “mekim [God] i kros tru long ol,” olsem mekim em i bel hevi.​—Ves 41.

Yumi inap kisim wanem skul long dispela song? I gutpela tru long save olsem Jehova i save laikim tru ol man i lotuim em na em i no givap hariap long ol. Na long wankain taim tu, i gutpela long tingim olsem Jehova i save pilim ol samting long bel, na ol pasin bilong yumi inap mekim em i amamas o bel hevi. Taim yu save long dispela samting, dispela i mas mekim wanem long yu? Olsem wanem? Dispela i save kirapim yu long bihainim stretpela pasin?

Yumi no ken bihainim ol pasin nogut na mekim Jehova i bel hevi, nogat, yumi mas makim stretpela rot bilong bihainim na mekim Jehova i amamas. Na dispela em samting Jehova i laik ol man i lotuim em i mas mekim, em i tok: “Pikinini bilong mi, yu mas kisim gutpela tingting na save na bai mi belgut tru.” (Sindaun 27:11) Em i gutpela samting tru long yumi mekim gut bel bilong Jehova, na i no gat narapela gutpela samting moa yumi inap mekim.