EKSAMPEL BILONG PAPAMAMA BILONG MI

Long 1957, papamama bilong mi i lusim Itali na ol i go stap long Kindersley, long Saskatchewan, Kanada. Bihain liklik, ol i kisim save long tok i tru, na tok i tru i kamap nambawan samting long laip bilong mipela. Mi inap tingim bek taim mi liklik boi, sampela taim mi save autim tok wantaim famili bilong mi long de olgeta, so mi save mekim pani na tok mi kirap mekim wok painia taim mi gat 8-pela krismas!

Papamama i no gat planti mani, tasol ol i stap gutpela eksampel long pasin bilong lusim ol samting ol i gat na bai ol i ken lotuim Jehova. Olsem, long 1963, ol i salim ol samting bilong ol na bai ol i ken kisim inap mani long go long wanpela intenesenel kibung long Pasadena, California, long Amerika. Long 1972, mipela i muv i go stap long Trail, British Columbia, long Kanada—em i stap inap 1,000 kilomita longwe—bilong helpim wok bilong autim gutnius long ol manmeri i mekim tokples Itali long dispela hap. Papa i mekim wok olsem wanpela klina. Em i tok nogat long kisim ol promosen long ples wok na bai em i ken putim tingting olgeta long mekim wok bilong Jehova.

Mi tenkyu long papamama i stap gutpela eksampel long mi na 3-pela bratasusa bilong mi. Eksampel bilong ol em faundesen bilong trening mi kisim long mekim wok bilong Jehova, na mi kisim wanpela bikpela skul olsem: Sapos mi painim Kingdom pastaim, Jehova bai lukautim mi.—Mat. 6:33.

MI KIRAP INSAIT LONG FULTAIM SEVIS

Long 1980, mi maritim Debbie em wanpela naispela sista na em i putim tingting olgeta long winim ol mak bilong bilip. Mitupela i laik insait long fultaim sevis, so tripela mun bihain long weding bilong mipela, Debbie i kirap mekim wok painia. Wanpela yia bihain long mipela i marit, mipela i muv i go long wanpela liklik kongrigesen i nidim helpim, na mi kirap mekim wok painia tu.

 I no longtaim, mipela i bel hevi na mipela i tingting long muv i go long narapela hap. Tasol pastaim mipela i toktok wantaim wasman sekit. Long gutpela pasin, em i tok stret long mipela olsem: “Yupela yet i mekim ol samting i go hatwok. Yupela i wok long tingim tasol ol hatwok yupela i feisim. Tasol i gutpela moa sapos yupela i tingim ol gutpela samting i kamap.” Mipela i nidim tru dispela edvais. (Sng. 141:5) Mipela i hariap long bihainim dispela edvais na i no longtaim mipela i luksave olsem tru tumas, planti gutpela samting i kamap. Sampela long kongrigesen i laik mekim bikpela wok moa bilong Jehova, dispela i makim tu ol yangpela na sampela em ol poroman marit bilong ol i no Witnes. Dispela em wanpela bikpela skul mipela i bin kisim. Mipela i lain long putim tingting long ol gutpela samting i kamap na wetim Jehova long stretim ol hevi. (Mai. 7:7) Mipela i kisim bek amamas bilong mipela na ol samting i kamap orait.

Ol tisa long fes painia skul bilong mipela i bin mekim wok misineri long ol narapela kantri. Taim ol i soim mipela ol piksa na stori long ol hatwok ol i feisim na ol blesing ol i kisim, dispela i mekim na mipela tu i laik kamap misineri. So mipela i mekim disisen long putim mak long kamap ol misineri.

Bilong winim dispela mak, long 1984 mipela i lusim British Columbia, em longwe winim 4,000 kilomita, na muv i go stap long Quebec em ples we ol manmeri i save mekim tokples Frans. So mipela i mas lain long nupela kalsa na tokples. Narapela hevi mipela i bungim em planti taim mipela i sot long mani. Wanpela taim mipela i kaikai ol poteto tasol em wanpela fama i larim mipela i kisim long fam bilong em. Debbie i save kukim ol poteto long kain kain stail na kaikai i swit tru! Maski i gat ol hatwok, mipela i putim tingting long sanap strong na amamas yet. Mipela i luksave olsem Jehova i lukautim mipela.—Sng. 64:10.

Wanpela taim, mipela i kisim fon kol em mipela i no bin ekspektim. Mipela i kisim invatesen long go wok long Kanada Betel. Pastaim mipela i bin aplai long go long Skul Gileat, so mipela i gat tupela tingting long go long Betel. Tasol mipela i tok orait long go long Betel. Taim mipela i go kamap long hap, mipela i askim Brata Kenneth Little em wanpela brata long Brens Komiti long dispela taim olsem, “Olsem wanem long ol Gileat aplikesen bilong mipela?” Em i tok: “Long taim stret, yumi ken stori moa long dispela.”

Wanpela wik bihain, dispela samting i kamap; ol i invaitim mi na Debbie long go long Skul Gileat. So  nau mipela i mas mekim wanpela disisen. Brata Little i tokim mipela: “Maski yu mekim wanem disisen, sampela taim yu inap ting olsem i gutpela yu makim narapela samting. I no olsem wanpela disisen i gutpela moa winim narapela; Jehova i ken blesim tupela disisen wantaim.” So mipela i ekseptim invatesen bilong go long Gileat, na insait long ol yia i go pinis, mipela i luksave olsem edvais bilong Brata Little i stret. Planti taim mipela i save givim dispela wankain edvais long ol narapela em ol i mas wokim disisen long wanem asainmen ol bai mekim.

LAIP BILONG MIPELA OLSEM OL MISINERI

Mipela i amamas tru olsem mipela i insait long grup bilong 24 sumatin bilong namba 83 klas bilong Skul Gileat i kamap long Brooklyn, New York, long Epril 1987. Brata Ulysses Glass na Jack Redford i go pas long skulim mipela na i gat ol narapela tisa tu. Faivpela mun bihain, mipela i grediuet long Septemba 6, 1987. Ol i salim mipela i go long Haiti wantaim John na Marie Goode.

Long 1962, gavman bilong Haiti i rausim ol misineri long hap, so ol i no salim moa ol Gileat misineri i go long hap. Tripela wik bihain long mipela i grediuet, mipela i kirap mekim wok misineri long wanpela liklik kongrigesen long Haiti we i gat 35 pablisa na em i stap longwe long ol ples maunten. Mipela i yangpela na mipela i no gat planti ekspiriens, na mipela yet i stap long haus misineri. Ol manmeri long hap i stap rabis, na planti bilong ol i no save long rit. Long taim mipela i nupela misineri yet, mipela i ekspiriensim ol pait i kamap insait long kantri, ol man i laik daunim gavman, ol man i kukim ol banis, na ol saiklon.

 Mipela i kisim planti skul long ol bratasista long Haiti em ol i sanap strong na amamas yet. Planti bilong ol i karim ol hevi, tasol ol i laikim tru Jehova na wok autim tok. Wanpela lapun sista i no save long rit, tasol long tingting em inap kolim tok bilong klostu 150 skripsa. Ol dispela samting i kamap i strongim mipela long givim bel yet long autim gutnius bilong Kingdom na tokim ol manmeri olsem dispela gavman tasol bai pinisim olgeta hevi. Mipela i amamas tru long lukim ol fes Baibel stadi bilong mipela i kamap ol painia oltaim, ol painia salim, na ol elda.

Taim mipela i stap long Haiti, mi bungim Trevor em wanpela yangpela misineri bilong lotu Momon na mipela i stori wantaim long Baibel sampela taim. Planti yia bihain, mi kisim wanpela pas i kam long em, em samting mi no ting bai kamap. Em i tok: “Mi bai kisim baptais long neks kibung sekit! Mi laik kam bek long Haiti na mekim wok olsem painia salim long seim ples we mi mekim wok misineri bilong lotu Momon.” Na tru tumas, inap planti yia em na meri bilong em i bin mekim olsem.

GO LONG YUROP NA BIHAIN AFRIKA

Ol i salim mipela i go mekim wok misineri long wanpela hap bilong Yurop we isi isi gavman i wok long rausim tambu ol i putim long ol wok lotu bilong yumi long hap. Long 1992, mipela i go kamap long Ljubljana, Slovenia, em klostu long hap we papamama bilong mi i kamap bikpela long en paslain long ol i muv i go long Itali. Long dispela taim, woa i stap yet long sampela hap long Yugoslavia bilong bipo. Ol brens long Vienna long Ostria na ol ofis long Zagreb long Kroesia na Belgrade long Serbia, ol i lukautim wok autim tok long dispela hap. Tasol nau wan wan ripablik bai i gat Betel ofis bilong ol yet.

So mipela i mas lainim gen nupela tokples na kalsa. Ol asples i save tok, Jezik je težek mining bilong en “Dispela tokples i hatwok.” Na dispela tok em i tru! Mipela i laikim tru pasin bilong ol bratasista long stap gut long Jehova na redi long bihainim ol senis i kamap insait long oganaisesen, na mipela i lukim olsem Jehova i blesim ol. Yes, mipela i lukim gen olsem long olgeta taim Jehova i save stretim ol hevi long taim stret na em i mekim long gutpela pasin. Mipela i lainim planti samting long Slovenia, na ol skul mipela i kisim long bipo i helpim mipela long sanap strong yet na karim ol hevi long dispela ples.

 Tasol i gat planti senis em mipela i mas mekim yet. Long yia 2000, ol i salim mipela i go long Kot-Diwa long Wes Afrika. Na bihain long Novemba 2002, woa i kamap insait long kantri so ol i salim mipela i go long Siera Leon. Woa i stap long Siera Leon inap 11-pela yia na woa i pinis nau tasol. Mipela i mas lusim Kot-Diwa hariap, na i no isi long mekim olsem. Tasol ol skul mipela i kisim i helpim mipela long holimpas amamas bilong mipela.

Mipela i putim tingting olgeta long helpim ol manmeri em ol i laik save long tok i tru na helpim ol bratasista em ol i karim hevi bilong woa inap planti yia. Ol i no gat planti samting bilong skin, tasol ol i laik serim ol samting ol i gat wantaim mipela. Wanpela sista i givim sampela klos long Debbie. Taim Debbie i surik long kisim ol klos, dispela sista i tok: “Long taim bilong woa, ol bratasista long ol narapela kantri i helpim mipela. Nau em taim bilong mipela long helpim yupela.” Mipela i putim mak long bihainim eksampel bilong ol.

Bihain, mipela i go bek long Kot-Diwa, tasol hevi bilong wok politik i kirapim gen ol pait insait long kantri. So long Novemba 2004, mipela i kalap long helikopta na lusim dispela hap na mipela i kisim tasol 2-pela beg em hevi bilong ol inap 10 kilogram. Mipela i slip long floa bilong wanpela beis bilong ol ami bilong Frans, na long neks de mipela i go long Swiselan. Taim mipela i go kamap long brens long 12 klok samting long biknait, Brens Komiti na ol tisa bilong Ministerial Trening Skul na ol meri bilong ol i welkamim mipela. Ol i hagim mipela, givim mipela kaikai ol i kukim pinis, na givim mipela planti soklet bilong Swiselan. Mipela i pilim tru pasin laikim bilong ol.

Inap liklik haptaim, ol i salim mipela i go long Gana na bihain mipela i go bek long Kot-Diwa taim ol samting i kamap orait liklik. Taim mipela i mas ranawe i go long ol narapela ples na mekim wok long hap, gutpela pasin bilong ol bratasista i helpim mipela long sanap strong na karim ol dispela hevi. So mitupela Debbie i pasim tok olsem maski ol bratasista insait long oganaisesen bilong Jehova i save mekim pasin laikim long olgeta taim, mipela i no ken tingim dispela olsem liklik samting tasol. Tru tumas, ol hevi mipela i karim i stap olsem gutpela trening bilong mipela.

GO LONG MIDEL IS

Long 2006, mipela i kisim wanpela pas i kam long wol hetkota we i toksave we i tokim mipela olsem mipela i kisim nupela asainmen long Midel Is. So mipela i mas lain gen long ol nupela hevi, ol nupela tokples, na ol kalsa tu. I gat planti samting long lainim long dispela kantri we wok politik na lotu i bikpela samting long ol manmeri. Mipela i laikim tru ol bratasista i save mekim ol narapela narapela tokples long ol kongrigesen, na mipela lukim pasin bilong ol long stap wanbel na bihainim daireksen i kam long oganaisesen. Mipela i laikim tru ol bratasista bikos planti bilong ol i sanap strong na karim hevi bilong pasin birua long ol wanfamili, ol wanskul, ol wanwok, na ol neiba bilong ol.

Mipela i go long 2012 spesel kibung long Tel Aviv, Israel. Dispela kibung em fes taim lain bilong Jehova i mekim kain bikpela bung olsem long dispela kantri; laspela taim kain bung olsem i bin kamap em long Pentikos, 33 C.E. Mipela i no inap tru lusim tingting long dispela spesel kibung!

Insait long ol yia i go pinis, ol i salim mipela i go visitim wanpela kantri we gavman i tambuim wok bilong yumi long en. Mipela i kisim sampela litresa i go  na insait long wok autim tok long hap na mipela i go long ol kibung sekit tu. Long olgeta hap, ol soldia i holim ol gan i sanap i stap na blokim ol rot, tasol mipela i pilim seif taim mipela i bihainim savetingting na raun wantaim sampela pablisa.

GO BEK LONG AFRIKA

Long 2013, mipela i kisim asainmen bilong go wok long brens long Kinshasa, Kongo, em wanpela bikpela kantri i luk nais tru, tasol i gat hevi bilong stap rabis na planti taim ol woa i kamap insait long kantri. Pastaim mipela i tok, “Mipela i save long Afrika; mipela i redi.” Tasol i gat planti samting moa em mipela i mas lainim long hap, na moa yet taim mipela i raun i go long ol ples we ol i no wokim yet ol rot na ol bris. Mipela i lukim planti gutpela samting i kamap, olsem pasin bilong ol bratasista long i no givap na holimpas yet amamas bilong ol, laikim tru wok autim tok, na wok strong long go long ol miting na ol kibung sekit, maski i gat hevi bilong mani insait long kantri. Mipela i lukim olsem wok bilong Kingdom i kamap bikpela long hap bikos Jehova i sambai long ol na blesim hatwok bilong ol. Ol yia we mipela i insait long fultaim sevis long Kongo i skulim mipela long planti bikpela samting, na mipela i kisim tu planti pren em ol i olsem famili bilong mipela.

Long pinis bilong 2017, mipela i kisim narapela asainmen bilong go long Saut Afrika. Dispela em fes taim mipela i wok long wanpela bikpela brens, na Betel asainmen bilong mipela em asainmen mipela i no bin mekim bipo. Yes, i gat planti samting tru em mipela i mas lain gen long mekim, tasol ol skul mipela i kisim long bipo i helpim gut mipela. Mipela i laikim tru ol bratasista em ol i sanap strong na karim hevi inap planti yia. Na em nais tru long lukim olgeta insait long Betel famili i wok gut wantaim na stap wanbel, maski ol i bilong kain kain skin kala na kalsa. I klia tru olsem Jehova i blesim lain bilong em na helpim ol long stap bel isi taim ol i kisim nupela pasin na bihainim ol stiatok bilong Baibel.

Long ol yia i go pinis, mitupela Debbie i kisim planti naispela asainmen, lain long ol narapela narapela kalsa na ol tokples. Maski mipela i bin karim planti hevi, oltaim mipela i pilim gutpela pasin laikim bilong Jehova long rot bilong oganaisesen bilong em na bikpela lain brata bilong yumi. (Sng. 144:2) Mipela i bilip tru olsem trening mipela i kisim long fultaim sevis i helpim mipela long mekim gut moa wok bilong Jehova.

Mi tenkyu tru long papamama i mekim bikpela long mi na skulim mi gut, na tu, mi tenkyu long sapot bilong gutpela meri bilong mi Debbie, na long ol gutpela eksampel bilong ol wanbilip insait long bikpela lain brata bilong yumi. Taim mi na Debbie i tingim ol samting mipela bai wok yet long mekim, mipela i tingting strong long wok yet long kisim ol gutpela skul i kam long Nambawan Bikpela Tisa bilong yumi.