1, 2. Olsem ekspiriens bilong wanpela haiskul sumatin i kamapim, ol yangpela inap mekim wanem kain senis?

TONY em sumatin long haiskul, na klostu em bai pinis long skul. Em i no gat papa na em i no gat laik tumas long skul, na long wiken em i save go lukim ol muvi o raun wantaim ol pren. Em i no save kros pait o kisim drak. Em i no gat plen long ol samting em bai mekim long laip bilong em. Em i gat tupela tingting olsem God i stap tru o nogat. Bihain em i bungim tupela marit Witnes na em i kamapim ol askim bilong em. Ol i givim em 2-pela buklet—The Origin of Life—Five Questions Worth Asking na Was Life Created?

² Taim tupela marit i go bek lukim Tony, tingting bilong em i senis. Em i rit na stadi planti long ol dispela buklet. Em i tok: “I luk olsem i gat God i stap.” Tony i tok orait long mekim Baibel stadi, na isi isi tingting bilong em long laip i senis. Pastaim em i no gutpela sumatin long skul, tasol bihain em i kamap gutpela sumatin tru. Prinsipol bilong skul i save olsem Tony i kisim nupela bilip, na em tu i kirap nogut long senis i kamap long Tony. Em i tokim Tony: “Bikpela senis tru i kamap long pasin na skul wok bilong yu. Ating dispela i kamap bikos yu poromanim ol Witnes Bilong Jehova, laka?” Tony i tok yes na em i autim tok long prinsipol. Em i winim haiskul na long nau em i mekim wok painia oltaim na stap  olsem kongrigesen sevan. Em i amamas tu olsem long nau em i gat gutpela Papa tru, em Jehova.—Sng. 68:5.

3. Jehova i laik bai ol yangpela i mekim wanem?

³ Ekspiriens bilong Tony i soim klia olsem Jehova i tingim tru yupela ol yangpela. Em i laik bai yupela i amamas na stap gut. Olsem na em i tok: “Taim yu stap yangpela yet, tingim Bikpela Man Bilong Wokim yu.” (Ekl. 12:1) Long nau, i hatwok long mekim olsem. Tasol yu inap mekim. God inap helpim yu long taim yu yangpela yet na long laip olgeta bilong yu. Tingim skul yumi inap kisim long stori bilong lain Israel i kisim Graun Bilong Promis na stori bilong Devit i go pait long Goliat.

4, 5. Yumi kisim wanem skul long stori bilong lain Israel i pait na kisim graun bilong Kenan na stori bilong Devit i pait long Goliat? (Lukim ol piksa long kirap bilong stadi.)

⁴ Taim lain Israel i go klostu long Graun Bilong Promis, God i no tokim ol long mekim trening bilong pait, nogat. (Lo 28:1, 2) Em i tokim ol long bihainim tok bilong em na trastim em. (Jos. 1:7-9) Long tingting bilong ol man, dispela kain edvais i no stret long kain taim olsem! Tasol dispela em nambawan gutpela edvais bikos Jehova i helpim ol manmeri bilong em long winim planti pait na daunim lain Kenan. (Jos. 24:11-13) Tru tumas, yumi mas i gat bilip bambai yumi inap bihainim tok bilong God. Kirap long bipo yet na i kam inap long nau, oltaim bilip i save kamapim gutpela samting.

⁵ Goliat em strongpela soldia, na em i longpela inap olsem 2.9 mita, na em i gat olgeta tul bilong pait. (1 Sml. 17:4-7) Devit i gat 2-pela samting we inap helpim em: katapel na bilip bilong em long God Jehova. Long tingting bilong ol man i sot long bilip, i luk olsem Devit i longlong. Tasol tingting bilong ol i kranki olgeta! Goliat yet i bihainim longlong pasin.—1 Sml. 17:48-51.

6. Yumi bai stori moa long wanem samting?

⁶ Stadi i kamap paslain i stori long 4-pela samting we i mekim yumi amamas na yumi pilim olsem laip bilong yumi i gat as bilong en. Em ol dispela samting: kisim kaikai bilong strongim bilip, amamas long ol gutpela pren God i givim, putim ol gutpela mak yumi laik winim, na amamas long fridom bilong yumi olsem ol manmeri bilong God. Yumi ken stori moa long ol dispela samting, na yumi bai skelim sampela stiatok bilong Buk Song sapta 16.

7. (a) Bilipman i save mekim wanem? (b) Taim Devit i tok “hap skel,” dispela i makim wanem samting? (c) Devit i pilim olsem wanem long “hap skel” bilong em?

⁷ Bilipman i save bilip long God na bihainim tingting bilong God long olgeta samting em i mekim. Em i larim God i stiaim em na em i redi long bihainim tok bilong God. (1 Kor. 2:12, 13) Devit i stap gutpela piksa long dispela pasin. Em i singim song olsem: “Jehova em i hap skel bilong mi, na em i olsem kap bilong mi.” (Sng. 16:5) Taim Devit i tok “hap skel,” dispela i makim olsem em i pas gut wantaim God na em i tingim God olsem ples hait bilong em. (Sng. 16:1) Dispela i mekim na Devit i tok: “Mi belgut tru.” Yes, Devit i belgut tru bikos em i pas gut wantaim God.—Ritim Buk Song 16:9, 11.

8. Yu inap mekim wanem ol samting na bai yu stap belgut tru?

⁸ Sapos ol man i tingim tasol amamas na mani kago, ol i no inap stap belgut olsem Devit. (1 Tim. 6:9, 10) Wanpela brata long Kanada i tok: “Sapos yumi laik i stap belgut tru, yumi no ken tingting tasol long kisim ol samting, nogat. Yumi mas givim ol samting long God Jehova, em Man bilong givim olgeta gutpela presen.” (Jems 1:17) Yes, sapos yu  bilip long Jehova na mekim wok bilong em, laip bilong yu bai i gat mining na yu bai belgut tru. Olsem wanem yu inap strongim bilip bilong yu? Yu mas lusim sampela haptaim long ritim Baibel, skelim ol samting God i wokim, na tingim tingim ol pasin bilong em, olsem pasin bilong em long laikim yu.—Rom 1:20; 5:8.

9. Olsem Devit i bin mekim, yu ken mekim wanem na bai Tok Bilong God inap stretim tingting na pasin bilong yu?

⁹ God i stap olsem Papa na em i laikim tru yumi, na sampela taim em i save stretim pasin kranki bilong yumi. Devit i amamas long God i givim tok bilong stretim em. Em i tok: “Mi bai litimapim nem bilong Jehova, long wanem, em i givim mi gutpela tingting. Long nait, tingting i stap insait tru long mi i save skulim mi.” (Sng. 16:7) Yes, em i tingim na skelim tingting bilong God, na em i redi long bihainim na stretim tingting na pasin bilong em yet. Taim yu bilip na mekim ol dispela samting, yu tu bai laikim God moa yet na oltaim yu bai redi long bihainim tok bilong em. Na tu, bilip bilong yu bai kamap strong moa. Christin em sista bilong yumi, na em i tok: “Taim mi mekim wok painimaut na skelim na tingim ol samting mi ritim, mi pilim olsem Jehova i tingim mi stret na raitim dispela tok!”

10. Olsem Aisaia 26:3 i tok, wanem blesing bai painim man husat i bihainim tingting bilong God?

¹⁰ Sapos yu tingim na skelim tingting bilong God, yu bai kisim savetingting na dispela bai stiaim tingting yu holim long ol samting i kamap long nau na ol samting bai kamap long bihain. Bilong wanem God i givim yu savetingting? Em i laik bai yu skelim gut ol samting i bikpela samting long laip bilong yu, mekim ol gutpela disisen, na bilip olsem gutpela samting tru bai kamap bihain! (Ritim Aisaia 26:3.) Joshua, brata bilong yumi long Amerika, em i tok: “Sapos yumi pas gut wantaim Jehova, oltaim yumi bai holim stretpela tingting.” Dispela tok em i tru olgeta, na yumi bai i stap belgut tru!

11. Devit i tok yumi mas mekim wanem bilong kisim ol gutpela pren?

¹¹ Ritim Buk Song 16:3. Devit i save long rot bilong kisim ol gutpela pren. Em i kisim bikpela “amamas” long bung wantaim ol manmeri i laikim tru Jehova. Baibel i kolim ol olsem “ol manmeri holi” bikos ol i bihainim pasin i klin na i stret. Narapela man bilong raitim song i holim wankain tingting long ol pren bilong em. Em i tok: “Mi pren bilong olgeta man i save pret long yu na bilong ol man i save bihainim ol tok bilong yu.” (Sng. 119:63) Olsem yumi stori pinis long stadi i kamap paslain, yu tu inap kisim planti gutpela pren namel long ol manmeri husat i stap daun long Jehova na bihainim tok bilong em. Ol dispela pren inap i gat kain kain krismas.

12. Wanem samting i mekim na Devit na Jonatan i kamap ol gutpela pren?

¹² Devit i no poromanim ol wankrismas tasol, nogat. Yu inap tingim wanpela “man i gat nem” husat i kamap gutpela pren bilong em? Nem bilong em Jonatan. Stori bilong pasin pren bilong tupela em wanpela naispela stori tru i stap long Baibel. Yu save tu olsem Jonatan i gat 30 krismas taim Devit i bon? Wanem samting i mekim na tupela i kamap gutpela pren? Tupela i bilip long God, rispektim tru narapela narapela, na lukim pasin bilong narapela narapela long strongim bel taim ol i pait long ol birua bilong God.—1 Sml. 13:3; 14:13; 17:48-50; 18:1.

13. Olsem wanem yu inap kisim planti moa pren? Stori long wanpela eksampel.

¹³ Olsem Devit na Jonatan, yumi tu inap “amamas” long ol manmeri i laikim tru Jehova na ol i soim klia olsem ol i bilip long em.  Kiera em wanpela sista husat i mekim wok bilong God inap planti yia, na em i tok: “Mi gat ol pren long planti hap bilong graun, na ol i bilong kain kain sindaun na kalsa.” Taim yu bihainim kain pasin olsem, yu bai pilim tru olsem Tok Bilong God na spirit bilong em i gat strong bilong kamapim pasin wanbel.

14. (a) Wanem samting inap helpim yu long putim ol gutpela mak yu inap winim? (b) Sampela yangpela i pilim olsem wanem long putim mak ol inap winim long sait bilong bilip?

¹⁴ Ritim Buk Song 16:8. Devit i holim wanpela tingting tasol long mekim wok bilong God. Yu tu bai i stap belgut tru sapos yu holim wanpela tingting tasol long mekim wok bilong Jehova, na tingim laik bilong em taim yu putim ol mak yu laik winim. Steven em wanpela brata bilong yumi. Em i tok: “Taim mi winim wanpela mak na skelim ol senis mi mekim, dispela i helpim mi long i stap belgut.” Wanpela yangpela brata long Jemani i mekim wok long narapela ples na em i tok: “Taim mi kamap lapun na skelim gen laip bilong mi, mi no inap amamas sapos mi luksave olsem mi bihainim laik bilong mi yet tasol.” Mipela i laik bai yu holim wankain tingting olsem dispela brata. Yusim ol presen bilong yu long givim ona long God na helpim ol narapela. (Gal. 6:10) Putim ol mak yu laik winim long sait bilong bilip, na beten askim Jehova long helpim yu long winim ol dispela mak. Em i save amamas long bekim ol kain beten olsem.—1 Jon 3:22; 5:14, 15.

15. Yu inap putim wanem ol mak bilong winim? (Lukim blok “Sampela Mak Bilong Winim.”)

¹⁵ Yu inap putim wanem ol mak? Yu ken putim mak long yusim toktok bilong yu yet taim yu bekim tok long miting, mekim wok painia, o go long Betel. Yu ken traim long lainim narapela tokples na putim mak long mekim wok autim tok long narapela ples. Barak em wanpela fultaim sevan, na em i tok: “Taim mi kirap long moningtaim na mi givim olgeta strong bilong mi long Jehova, dispela i save givim bikpela amamas tru long mi.”

16. Devit i pilim olsem wanem long ol stretpela lo bilong Jehova?

¹⁶ Ritim Buk Song 16:2, 4. Olsem yumi skelim long stadi i kamap paslain, ol stretpela lo na ol stiatok bilong God i helpim yumi long i stap fri. Ol dispela lo i kirapim  yumi long laikim gutpela pasin na heitim pasin nogut. (Amo. 5:15) Devit i tok Jehova em “Man i As bilong olgeta gutpela samting.” Dispela i makim tu stretpela pasin. Devit i wok strong long bihainim gutpela pasin bilong God, na em i heitim ol pasin i nogut tru long ai bilong God. Wanpela em pasin bilong lotuim ol giaman god, em pasin i mekim ol man i kamap doti na i tekewe glori we i stret long Jehova i kisim.—Ais. 2:8, 9; Rev. 4:11.

17, 18. (a) Devit i tok wanem long ol manmeri i bihainim ol lotu giaman? (b) Long nau, ol manmeri i mekim wanem na “hevi bilong ol . . . i go bikpela”?

¹⁷ Long taim bilong ol bilipman long bipo, lotu giaman i kirapim ol manmeri long mekim pasin pamuk i nogut tru. (Hos. 4:13, 14) Ol manmeri i tingting tasol long inapim laik bilong ol yet. Amamas bilong ol i stap sotpela taim tasol. Devit i tok: “Ol manmeri i save bihainim ol arapela god, hevi bilong ol bai i go bikpela.” Na tu, ol i mekim nogut tru long planti pikinini na kilim ol i dai. (Ais. 57:5) Jehova i heitim tru dispela pasin! (Jer. 7:31) Sapos yu stap long dispela taim bipo, yu bai amamas tru sapos papamama bilong yu i bilip na bihainim tok bilong Jehova.

¹⁸ Long nau tu, ol lotu giaman i no gat tok long olgeta kain pasin pamuk. Tasol wankain hevi i painim ol lain long bipo bai painim ol manmeri long nau sapos ol i inapim laik bilong ol yet. (1 Kor. 6:18, 19) Ating yu luksave olsem ol manmeri yet i mekim na “hevi bilong ol . . . i go bikpela.” Olsem na yupela ol yangpela i mas putim yau long Papa bilong yupela long heven. Yupela i mas bilip olsem gutpela samting bai kamap sapos yupela i bihainim tok bilong em. Tingim: Amamas bai stap sotpela taim tasol, na hevi bai stap longpela taim moa. (Gal. 6:8) Joshua em yumi stori pinis long em, em i tok: “Yumi inap yusim fridom bilong yumi long mekim olgeta kain samting yumi laik mekim, tasol yumi no inap belgut sapos yumi mekim ol pasin i no stret.”

19, 20. Wanem ol blesing bai painim ol yangpela husat i bilip na bihainim tok bilong Jehova?

¹⁹ Jisas i tokim ol disaipel olsem: “Sapos yupela i holimpas tok bilong mi, orait yupela i disaipel tru bilong mi, na yupela bai save long tok i tru, na tok i tru bai mekim yupela i kamap fri.” (Jon 8:31, 32) Yumi kamap fri na yumi no stap kalabus long lotu giaman, pasin bilong sakim tok, na ol bilip giaman. Na tu, yumi bai “kisim dispela pasin bilong i stap fri i nambawan tru olsem bilong ol pikinini bilong God.” (Rom 8:21) Long nau yet, yu inap i stap fri sapos yu ‘holimpas tok bilong Krais.’ Yu bai “save long tok i tru” na bihainim long laip bilong yu.

²⁰ Ol yangpela, amamas long fridom em God i givim long yupela. Bihainim savetingting long hau yu yusim fridom bilong yu, na yu inap kisim gutpela sindaun long bihain. Wanpela yangpela brata i tok: “Sapos yu yusim gut fridom bilong yu taim yu yangpela yet, dispela bai helpim yu taim yu laik mekim ol bikpela disisen long sait bilong painim gutpela wok mani, marit, o stap singel inap sampela haptaim.”

21. Olsem wanem yu inap wokabaut yet long rot i bringim yu i go long “laip em i laip tru”?

²¹ Long nau, ol man i tok ol i gat gutpela sindaun, tasol ol tu i bungim hevi na gutpela sindaun bilong ol i pinis hariap. Yumi no save long wanem samting bai kamap tumora. (Jems 4:13, 14) Olsem na mobeta yumi bihainim savetingting na wokabaut yet long rot i bringim yumi i go long “laip em i laip tru”—laip oltaim. (1 Tim. 6:19) God i no fosim yumi long wokabaut long dispela rot. Yumi yet i mas mekim disisen. Tingim Jehova olsem “hap skel” bilong yu. Amamas long planti “gutpela samting” em i givim long yu. (Sng. 103:5) Yu mas bilip tru olsem em inap mekim yu i stap “belgut” na “amamas inap oltaim oltaim.”—Sng. 16:11.