Planti man i tok ol i bilip long God. Tasol taim yu askim, God em i husat, bai yu kisim kain kain bekim. Sampela man i tok, God i hatpela jas, em i tingting tasol long givim panismen long ol man long toktok na pasin nogut ol i mekim. Ol narapela i tok, God i save laikim na fogivim ol man maski ol i mekim wanem samting. Na sampela i bilip olsem God i stap longwe na em i no tingim yumi. Ol dispela tingting i pait wantaim, olsem na planti i ting olsem i hatwok long save God em i husat.

Yu ting em i bikpela samting? Yes, taim yu save gut long God dispela bai mekim na laip bilong yu i gat as tru bilong en. (Aposel 17:26-28) Taim yu go klostu long God, em bai laikim na helpim yu. (Jems 4:8) Na bikpela samting moa, taim yu gat stretpela save long God dispela bai opim rot long yu kisim laip oltaim.—Jon 17:3.

Hau bai yu inap save long God? Tingim wanpela yu save gut long em, olsem wanpela gutpela pren. Pasin pren bilong yupela i kirap olsem wanem? Ating yu save long nem bilong em, pasin bilong em, ol samting em i laikim na i no laikim, ol samting em i mekim pinis na ol plen bilong em, na planti narapela samting. Ol dispela infomesen i mekim na yu pas gut long dispela pren—yu kisim save long em.

Long wankain pasin, yumi ken kisim save long God taim yumi skelim ol dispela samting:

• WANEM NEM BILONG GOD?

• EM I GAT WANEM OL PASIN?

• GOD I MEKIM PINIS WANEM SAMTING?

• GOD BAI MEKIM WANEM?

• HAU PASIN BILONG KISIM SAVE LONG GOD BAI HELPIM YU?

Dispela nius i kamapim ol bekim bilong Baibel long ol dispela askim. Ol dispela atikol bai helpim yu long kisim save long God i husat, na taim yu pas gut wantaim em hau bai dispela i helpim yu.