Long Disemba 2009, Suprim Kot Bilong Rasia i wokim disisen long tambuim wok bilong ol Witnes Bilong Jehova long Taganrog, Rasia, na ol i kisim Haus Kingdom na ol i tok olsem 34 buk na nius bilong yumi i kamapim ol tok i birua long gavman. Stori bilong dispela samting i stap long Web-sait bilong ol Witnes Bilong Jehova na ol i soim tu ol poto bilong ol Witnes na ol pikinini em ol i kisim hevi long disisen kot i bin mekim.

Sampela mun bihain, Nambawan Ofis Bilong Ol Witnes Bilong Jehova long Rasia i kisim wanpela bokis na wanpela pas i kam long wanpela Witnes famili long Queensland, Australia. Dispela famili i bin lukim ripot bilong disisen em kot i mekim na ol i raitim pas olsem: “Yes Ol Brata, Ol pikinini bilong mipela, em Cody na Larissa, i pilim tru pasin bilong ol pren long Rasia long holimpas bilip taim bikpela hevi i painim ol. Ol i raitim ol kat na ol pas na mipela i putim ol liklik presen em mipela i laik salim i go long ol pikinini long Taganrog. Mipela i laik bai ol i save olsem maski ol i stap longwe tru, i gat ol narapela pikinini em ol tu i lotuim Jehova na ol i tingim ol. Cody na Larissa i salim bikpela pasin laikim i go long ol.”

Taim ol pikinini long Taganrog i kisim ol dispela presen, ol i raitim ol tenkyu pas long dispela famili long Australia. Wanpela Witnes husat i mekim wok long Brens Ofis long Rasia i pilim tru ol tok “ol liklik pikinini” i mekim bilong strongim bel bilong ol narapela, olsem na em i raitim pas i go long Cody na Larissa na em i tok: “Yupela inap tingim bikpela bel hevi em ol pikinini na ol bikpela man tu i pilim taim ol i no mekim wanpela rong na ol i kisim nating panismen. Ol bratasista bilong yumi long Taganrog i no mekim wanpela rong, tasol ol birua i kisim Haus Kingdom bilong ol. Dispela i mekim ol i bel hevi tru. Taim ol i save olsem wanpela long hapsait bilong graun i tingim ol, dispela bai strongim tru bel bilong ol. Tenkyu tru long gutpela pasin bilong yupela long givim ol samting!”—Sng. 8:2.

Yumi hap bilong bikpela lain brata i stap long olgeta hap, na pasin bilong yumi long laikim narapela narapela i helpim yumi long karim olgeta kain hevi. Ol kot i wok long tok pait olsem ol buk na nius bilong ol Witnes Bilong Jehova i kirapim ol man long heitim narapela narapela, tasol ol pikinini bilong yumi i soim olsem ol i tingim sindaun bilong ol narapela maski ol i bilong narapela kantri o lain. Pasin ol i mekim i stret wantaim tok bilong Jisas olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:35.