“Dispela snek bilong bipo yet, ol i kolim em Devil na Satan. Em man i save giamanim olgeta manmeri bilong graun.”—Revelesen 12:9.

TOK OL MAN I MEKIM

Sampela man i ting olsem Satan em i no wanpela man i stap tru, nogat, em pasin nogut i stap insait long ol man.

TOK BAIBEL I MEKIM

Satan em i wanpela man i stap tru. Em i wanpela bikhet ensel husat i bin birua long God. Baibel i kolim Satan olsem “hetman bilong dispela graun.” (Jon 12:31) Em i save yusim “ol giaman mirakel” na “giamanim ol man” bilong kamapim laik bilong em.—2 Tesalonaika 2:9, 10.

Baibel i stori long wanpela taim Satan i bin toktok wantaim God long heven. God i bin toktok wantaim Satan, olsem na Satan em i no pasin nogut, long wanem, God i no gat pasin nogut. (Lo 32:4; Jop 2:1-6) I klia tru olsem Satan em wanpela man i stap tru na i no pasin nogut i stap insait long ol man.

BILONG WANEM YU MAS TINGIM DISPELA?

Satan i laik bai yu bilip olsem em i no stap tru, wankain olsem wanpela raskol i haitim em yet na bai ol man i no ken save em i husat tru na em i wok yet long mekim ol pasin nogut bilong em long pasin hait na ol man i no inap painim em. Bilong lukautim yu yet long Satan, pastaim yu mas save olsem em i wanpela man i stap tru tru.

“Tasol yu graun . . . yupela lukaut, long wanem, Satan i kam daun pinis long yupela.”—Revelesen 12:12.

TOK OL MAN I MEKIM

Planti man i ting olsem Satan i stap long paia bilong hel i stap insait tru long graun. Ol narapela i ting em i stap insait long ol man nogut.

TOK BAIBEL I MEKIM

Satan em i wanpela spirit, olsem na em i stap long ples spirit. Insait long sampela haptaim, Satan inap go long hap em God na ol gutpela ensel i stap long en. (Jop 1:6) Tasol long nau, ol i rausim em wantaim ol spirit nogut long hap em God i stap long en na ol i stap hia long graun.—Revelesen 12:12.

Olsem wanem? Dispela i makim olsem Satan i stap long wanpela ples stret long graun? Olsem, ating yu ritim stori olsem taun Pergamum bilong bipo “em ples Satan i stap long en.” (Revelesen 2:13) Tasol tru tru, dispela tok i makim pasin bilong ol man long insait tru long lotuim Satan long dispela taun. Satan i no save stap long wanpela ples stret long graun. Baibel i tok “olgeta kingdom bilong graun” i bilong em.—Luk 4:5, 6.

“Dispela graun olgeta i stap long han bilong Satan.”—1 Jon 5:19.

TOK BAIBEL I MEKIM

Planti man i bihainim pasin giaman bilong Satan na long dispela rot Satan i kontrolim ol. (2 Korin 11:14) Dispela i kamapim klia as na ol man i no inap long stretim ol hevi bilong graun.

Baibel i stori long planti samting nogut moa em Satan na ol narapela bikhet ensel i mekim bilong kontrolim ol manmeri na mekim nogut long ol.—Matyu 12:22; 17:15-18; Mak 5:2-5.

SAMTING YU KEN MEKIM

Yu no ken pret long strong bilong Satan. Bilong yu ken abrusim pasin bilong Satan long kontrolim ol man, yu mas kisim save long olsem wanem em i save giamanim ol manmeri na bai yu “save long ol trik bilong em.” (2 Korin 2:11) Long rot bilong ritim Baibel, yu inap save gut long ol trik bilong Satan na long dispela rot yu inap abrusim ol pasin giaman bilong em.

Rausim olgeta samting bilong mekim wok bilong ol spirit nogut. (Aposel 19:19) Dispela i makim tu ol samting olsem ol paspas, ol buk, ol vidio, ol musik, na ol kompiuta gem we i kirapim ol man long mekim ol wok bilong ol spirit nogut o glasman samting.

Baibel i tok: “Sakim Satan, na em bai lusim yupela na ranawe.” (Jems 4:7) Taim yu bihainim ol gutpela tok bilong Baibel, yu inap lukautim yu yet long ol pasin trik na ol pasin giaman bilong Satan.—Efesus 6:11-18.