1, 2. Yu ting ol hevi insait long marit i makim olsem marit i bagarap? Stori long dispela.

 MARIT em presen i kam long Jehova. Marit inap mekim na man i stap amamas moa. Maski i olsem, olgeta marit bai gat ol hevi bilong en. Ating bai i luk olsem ol hevi i no inap pinis, na ating man marit na meri marit bai pilim olsem ol i no pas gut moa olsem long pastaim.

² Yumi no ken kirap nogut sapos marit bilong yumi i gat hevi sampela taim. Tasol ol hevi insait long marit i no makim olsem marit bilong yumi i bagarap. Maski ol marit i gat ol bikpela hevi, ol i bin painim ol rot bilong stretim pasin bilong ol long pas gut wantaim na mekim marit bilong ol i kamap strong moa. Ol i mekim olsem wanem?

3, 4. Sampela taim wanem samting inap kamap long marit?

³ Marit i bringim tupela narapela narapela man na meri i kam pas wantaim, wan wan i gat ol samting em i laikim na ol samting em i no laikim, ol aidia, na ol wei bilong mekim ol samting. Na tu, ating man marit na meri marit i gat narapela narapela bekgraun o kalsa. Sampela haptaim i mas lus na tupela i mas wok strong bambai tupela i ken save gut na kliagut long narapela narapela.

⁴ Bihain long sampela yia, man marit na meri marit inap tingting tasol long ol hevi bilong ol wan wan na i  olsem ol i trip i go longwe long narapela narapela. Ating bai i luk olsem tupela i stap seperet. Wanem samting bai helpim tupela long go klostu moa long narapela narapela?

5. (a) Wanem samting bai helpim Kristen long go klostu moa long poroman marit bilong em? (b) Olsem Hibru 13:4 i tok, yumi mas i gat wanem tingting long marit?

⁵ Jehova i save givim ol nambawan edvais we inap helpim yu na poroman marit bilong yu long go klostu long em na long narapela narapela. (Buk Song 25:4; Aisaia 48:17, 18) Em i tokim yumi: “Olgeta manmeri i mas tingim marit olsem samting i dia tumas.” (Hibru 13:4) Samting yu tingim i dia tumas bai yu givim ona long en. Bai yu lukautim gut na yu no mekim nabaut long en. Jehova i laik bai yumi gat kain tingting olsem long marit.

6. Matyu 19:4-6 i tok wanem long tingting bilong Jehova long marit?

⁶ Jehova i bin kamapim fes marit. Pikinini bilong em, Jisas, i tok: “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong em na pas wantaim meri bilong em, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim.” (Matyu 19:4-6) Kirap long pastaim tru, Jehova i laik bai marit i mas stap oltaim. Em i laik bai ol famili i pas gut na stap amamas na enjoim laip bilong ol wantaim.

7. Olsem wanem man marit na meri marit inap strongim marit bilong ol?

⁷ Tasol ol marit long nau i feisim planti hevi na presa moa winim bipo. Sampela taim ol presa i bikpela tru na ol i ting ol i no inap seivim marit bilong ol, na ol i givap. Tasol taim yumi kliagut long tingting bilong Jehova long marit, dispela inap helpim yumi.—1 Jon 5:3.

8, 9. (a) Long wanem taim yumi mas bihainim tok bilong Jehova long marit? (b) Olsem wanem yumi ken soim olsem marit bilong yumi i samting i dia tumas long yumi?

⁸ Olgeta taim ol tok bilong Jehova long stiaim yumi i gutpela bilong helpim yumi. Olsem yumi bin lukim, em i edvaisim yumi: “Olgeta manmeri i mas tingim marit olsem samting i dia tumas.” (Hibru 13:4; Eklisiastis 5:4) Sapos yumi bihainim ol tok bilong Jehova long stiaim yumi, maski i hatwok, dispela bai helpim yumi.—1 Tesalonaika 1:3; Hibru 6:10.

⁹ Marit bilong yumi i samting i dia tumas long yumi,  olsem na yumi no laik mekim wanpela samting o wanpela tok we inap bagarapim marit. Yumi laik strongim pasin bilong yumi long pas gut moa wantaim poroman bilong yumi. Hau bai yumi mekim olsem?

10, 11. (a) Wanem bikpela hevi i save kamap insait long sampela marit? (b) Wai na wei bilong yumi long toktok long poroman marit i bikpela samting?

¹⁰ I gat kain kain rot we man inap givim bel hevi long poroman marit bilong em. Yumi save olsem ol Kristen i no ken paitim poroman marit bilong ol o mekim wanpela samting bilong givim bagarap long ol. Tasol toktok bilong yumi inap bagarapim bel bilong narapela. Toktok inap kamap olsem samting bilong pait. Wanpela meri i tok: “Man bilong mi i save paitim mi wantaim toktok bilong em. Mi no gat ol mak long skin we bagarap i stap ples klia, tasol oltaim em i save mekim ol tok bilong givim pen, olsem ‘Yu wanpela hevi long mi!’ na ‘Yu yusles meri!’ Ol dispela kain tok i putim mak long bel bilong mi.” Wanpela man marit i tok, oltaim toktok bilong meri bilong em i save daunim em na meri i save kolim kain kain nem long em. Dispela man i tok: “Mi no inap kolim gen ol dispela toktok bilong em long ai bilong ol narapela. Em risen na mi no inap toktok long em na mi save stap long ples wok na wok leit tru na kam long haus. Em seif moa long mekim olsem.” Planti man long nau i save mekim ol tok nogut na ol tok i daunim na givim pen we i save bagarapim bel na tingting bilong narapela.

¹¹ Taim man marit na meri marit i mekim tok i nogutim narapela narapela, dispela i save bagarapim bel na tingting, na longpela taim i save lus bambai bel na tingting i ken kamap orait gen. Em i klia tru olsem Jehova i  no laik bai man marit na meri marit i mekim olsem long narapela narapela. Tasol yu inap mekim tok i bagarapim bel bilong poroman na yu no luksave long dispela. Yu inap pilim olsem yu mekim gutpela pasin long poroman marit bilong yu, tasol poroman marit i pilim olsem wanem? Sapos tok yu mekim i bagarapim bel bilong poroman marit, bai yu redi long senisim dispela pasin?—Galesia 5:15; ritim Efesus 4:31.

12. Wanem samting inap bagarapim pasin bilong man long pas gut wantaim Jehova?

¹² Wei bilong yu long toktok long poroman marit, maski yutupela i stap long pablik ples o long haus, dispela i bikpela samting long Jehova. (Ritim 1 Pita 3:7.) Jems 1:26 i tokim yumi: “Sapos wanpela man i ting em i lotuim God,  tasol em i no bosim gut maus bilong em, orait dispela man i giamanim bel bilong em yet na em i lotu nating tasol.”

13. Wanem narapela rot we wanpela inap bagarapim bel bilong poroman marit bilong em?

¹³ I gat ol narapela rot we tupela marit i mas tingim filings bilong narapela narapela. Olsem, poroman bilong yu bai pilim olsem wanem sapos yu kirap spendim planti taim moa wantaim narapela man o meri? Maski i gat gutpela risen long mekim, olsem long wok autim tok o helpim narapela long wanpela hevi, yu ting dispela inap bagarapim bel bilong poroman marit bilong yu? Wanpela Kristen maritmeri i tok: “Taim mi lukim olsem man bilong mi i save givim bikpela haptaim na tingim narapela sista insait long kongrigesen, dispela i save bagarapim bel bilong mi. Mi pilim olsem mi samting nating.”

14. (a) Yumi kisim wanem skul long wanpela tok i tru long Stat 2:24? (b) Yumi mas givim wanem askim long yumi yet?

¹⁴ Yumi ol Kristen na yumi gat wok long helpim ol papamama bilong yumi na ol bratasista insait long kongrigesen. Tasol taim yumi marit, nambawan wok bilong yumi em long helpim poroman marit bilong yumi. Jehova i tok man marit “bai pas wantaim meri bilong em.” (Stat 2:24) Filings bilong poroman marit bilong yumi i mas stap bikpela samting tru long yumi. Askim yu yet: ‘Mi save givim taim, tingim tru, na laikim poroman marit bilong mi, olsem i stret long mi mas mekim long em?’

15. Wai na marit Kristen i mas sakim pasin bilong pas tumas wantaim wanpela i no poroman marit bilong em?

¹⁵ Sapos yumi wok long pas tumas wantaim wanpela i no poroman marit bilong yumi, dispela bai putim hevi long marit bilong yumi. Ating bel na tingting bilong yumi i stap long em na isi isi yumi kisim filings bilong laikim em. (Matyu 5:28) Dispela filings inap gro na kirapim yu long mekim samting we i no givim ona long marit bilong yu.

16. Baibel i givim wanem tok long marit?

¹⁶ Bihain long Baibel i mekim dispela tok: “Olgeta manmeri i mas tingim marit olsem samting i dia tumas,” em i tok: “Marit i mas i stap klin, long wanem, God bai kotim ol manmeri i mekim pasin pamuk na pasin adaltri.” (Hibru 13:4) Dispela tok “marit,” long tok Grik em “bet bilong marit,” na i makim maritpasin namel long tupela marit. (Provep 5:18) Olsem wanem yumi ken soim rispek long maritpasin na mekim i stap klin?

17. (a) Planti man long nau i gat wanem tingting long pasin adaltri? (b) Ol Kristen i mas i gat wanem tingting long pasin adaltri?

¹⁷ Sampela man long nau i ting sapos ol i no stap gut long poroman marit bilong ol, i no gat rong long dispela. Yumi no ken larim dispela kain tingting i stiaim yumi. Jehova i tokaut klia olsem em i heitim pasin pamuk na pasin adaltri. (Ritim Rom 12:9; Hibru 10:31; 12:29) Sapos yumi slip wantaim wanpela i no poroman marit bilong yumi, yumi mekim doti marit bilong yumi. Yumi soim olsem yumi no rispektim ol lo bilong Jehova, na yumi inap bagarapim pasin pren bilong yumi wantaim em. Olsem na yumi mas abrusim fes samting we inap pulim yumi long insait long pasin adaltri. Dispela i makim tu olsem yumi mas abrusim ol tingting i no stret em yumi gat long narapela man o meri.—Jop 31:1.

18. (a) Wai na pasin adaltri i wankain long pasin bilong lotuim ol god giaman? (b) Jehova i gat wanem tingting long pasin adaltri?

¹⁸ Long Israel bilong bipo, Lo Bilong Moses i tok olsem pasin adaltri em i bikpela sin tru, wankain olsem pasin bilong lotuim ol god giaman i bikpela sin tru. Panismen bilong tupela sin em dai. (Wok Pris 20:2, 10) Hau na pasin adaltri i wankain long pasin bilong lotuim ol god giaman? Sapos wanpela Israel i lotuim ol god giaman, em i brukim  tok promis em i bin mekim long stap gut long Jehova. Sapos em i mekim pasin adaltri, em i brukim tok promis em i bin mekim long stap gut long poroman marit bilong em. (Kisim Bek 19:5, 6; Lo 5:9; ritim Malakai 2:14.) Em i klia tru, long bipo, Jehova i tingim pasin adaltri i bikpela sin tru.

19. Wanem samting i ken helpim yumi long tingting strong long sakim pasin adaltri?

¹⁹ Olsem wanem long nau? Maski yumi no stap aninit moa long Lo Bilong Moses, tingting bilong Jehova long pasin adaltri i no senis. Yumi no inap tru long lotuim ol god giaman, olsem tasol yumi no ken mekim samting na yumi no stap gut long poroman marit bilong yumi. (Buk Song 51:1, 4; Kolosi 3:5) Sapos yumi no sakim ol dispela pasin, yumi no inap givim ona long marit bilong yumi na God bilong yumi, Jehova.—Lukim Futnot 26.

20. Olsem wanem savetingting inap helpim marit?

²⁰ Hau bai yu inap mekim marit bilong yu i kamap strong moa? Baibel i tok: “Long rot bilong savetingting, man i wokim haus, na long rot bilong pasin bilong skelim gut ol samting, em i mekim haus i kamap strong.” (Provep 24:3) Haus inap stap kol na no gat man, o em inap hat, gutpela long stap long en, na stap strong. Na i wankain tu long marit. Man i gat savetingting em bai mekim ol samting bambai marit bilong em i stap strong, stap gut, na i gat amamas.

21. Olsem wanem save inap mekim marit i stap strong moa?

²¹ Baibel i tok moa long dispela haus olsem: “Long rot bilong save, ol rum bilong en bai pulap long olkain gutpela gutpela na naispela samting i dia tumas.” (Provep 24:4) Ol samting yu lainim long Baibel inap mekim marit bilong yu i kamap gutpela moa. (Rom 12:2; Filipai 1:9)  Taim yutupela i ritim Baibel na ol pablikesen wantaim, yupela i ken toktok long hau yupela inap bihainim ol samting yupela i lainim. Painim ol rot long soim pasin laikim na pasin rispek long narapela narapela, na tu, painim ol rot long mekim gutpela pasin na tingim gut narapela narapela. Askim Jehova long helpim yu long kisim ol pasin we bai strongim marit bilong yupela na mekim yu i kamap man o meri em poroman marit bai laikim tru.—Provep 15:16, 17; 1 Pita 1:7.

22. Bilong wanem yumi mas soim pasin laikim, rispek, na givim ona long poroman marit bilong yumi?

²² Yumi mas mekim olgeta samting bilong soim pasin laikim, pasin rispek, na givim ona long poroman marit bilong yumi. Sapos yumi mekim olsem, marit bilong yumi bai kamap gutpela na strong moa. Na bikpela samting moa, yumi bai mekim Jehova i amamas.—Buk Song 147:11; Rom 12:10.