MAGWALO alapandulula bukkale buli mbobubede mwalo bantu mobakali kudeluula naa kuyaula zyakusama zyabo. Kucita boobo inga caboneka kuba ceenzu kubantu bamazuba aano, nokuba boobo, kuba Juda cakali kutondezya mbwalimvwa muntu akaambo kakutyompwa, kuusa, kusampuka, kunyema, naa buumba.

Mucikozyanyo, Rubeni “wakadeluula zyakusama zyakwe” ciindi naakabona kuti muzeezo wakwe wakuvwuna mwanookwabo Josefa tiiwakazwidilila akaambo kakuti Josefa wakasambalwa mubuzike. Usyi wabo Jakobo “wakadeluula zyakusama zyakwe” naakasyoma kuti mwanaakwe wajaigwa amunyama. (Matl. 37:18-35) Jobu ‘wakazapaula cikobela cakwe’ ciindi naakaambilwa kuti bana bakwe boonse bajaigwa. (Job. 1:18-20) Mutumwa ‘azikobela zyakwe kazidelukide,’ wakasika ku Mupaizi Mupati Eli akumwaambila kuti bana Israyeli bazundwa munkondo, bana ba Eli bobilo bajaigwa, alimwi akuti bbokesi lyacizuminano lyabwezegwa. (1 Sam. 4:12-17) Ciindi Josiya naakamvwa majwi aa Mulawo naakali kubalwa alimwi akubona zibi nzyobakali kucita bantu, “wakazapaula zyakusama zyakwe.”—2 Bam. 22:8-13.

Ciindi Jesu naakali kubetekwa, Mupaizi Mupati Kayafa “wakazapaula zisani zyakwe zyaatala” naakamvwa mbuli kuti Jesu wasampaula Leza mukwiingula kwakwe. (Mt. 26:59-66) Cilengwa caba Juda cakali kwaamba kuti kufwumbwa muntu iwamvwa izina lya Leza kalisampaulwa wakeelede kuzapaula zisani zyakwe. Nokuba boobo, aumwi muzeezo waba Juda iwakazyibwa nolyakamana kunyonyoonwa Tempele lyaku Jerusalemu, wakali kwaamba kuti “ooyo wamvwa Izina lya Leza kalisampaulwa mazuba aano, tayandiki kuzapaula zisani zyakwe, buyo-buyo zisani zyakwe inga zyayandika kuzapaulwa mutubeela-beela tusyoonto-syoonto.”

Masimpe, cilengwa cakudeluula zisani tiicakajisi mpindu mumeso aa Leza ccita buyo kuti kuusa ooko kakuli kwamasimpe. Nkakaambo kaako Jehova wakaambila bantu kuti ‘badeluule myoyo yabo, kutali zyakusama zyabo, alimwi akupiluka kulinguwe.’—Joel. 2:13.