Bapaizi Bami Bayooleta Zilongezyo Kubantu Boonse
Bapaizi Bami Bayooleta Zilongezyo Kubantu Boonse
“Nywebo muli ‘musyobo uusalidwe, ibapaizi bami, cisi cisalala, iciinga ca Leza cilibedelede’”—1 PE. 2:9.
1. Nkaambo nzi “mulalilo wa Mwami” alimwi ncowiitwa kuti Ciibalusyo, alimwi ujisi mulimo nzi?
MANGOLEZYA mu Nisan 14 mumwaka wa 33 C.E., Jesu Kristo abaapostolo bakwe ibali 12 bakacita Pobwe Lyakwiindilila lyaba Juda ciindi camamanino. Naakamana kutanda Judasi Iskariote sikwaaba, Jesu wakatalisya pobwe liimpene liitwa kuti: “Mulalilo wa Mwami.” (1 Ko. 11:20) Jesu ziindi zyobilo wakaamba kuti: “Kamucita oobu lyoonse kundiibaluka.” Pobwe eeli alimwi lilaitwa kuti Ciibalusyo, nkokuti kwiibaluka Kristo ikukankaizya lufwu lwakwe. (1 Ko. 11:24, 25) Akaambo kakutobela mulawo ooyu, Bakamboni ba Jehova nyika yoonse balacita Ciibalusyo amwaka. Mumwaka wa 2012, Nisan 14 kweelana akkalenda yaba Juda, iyootalika lyaakubbila zuba muli Bwane mu April 5.
2. Ncinzi ncaakaamba Jesu kujatikizya zitondezyo zya Ciibalusyo nzyaakabelesya?
2 Sikwiiya Luka wakaamba ncaakacita Jesu alimwi ancaakaamba kuciindi eeco mutupango tobilo naakati: “Wakabweza mukamu, wakalumba, wakaukomoona akubapa, ulaamba: ‘Eeci ciiminina mubili wangu uuyoopegwa akaambo kandinywe. Kamucita oobu lyoonse kundiibaluka.’ Wakacita mbubonya oobo akunkomeki nobakamana kulya cilalilo, ulaamba, ‘Inkomeki eeyi yiiminina cizuminano cipya iciyeeme abulowa bwangu ibuyootililwa ndinywe.’” (Lk. 22:19, 20) Mbuti baapostolo mbobakeelede kwaateelela majwi aaya?
3. Mbuti baapostolo mbobakali kubumvwa bupanduluzi bwa zitondezyo zya Ciibalusyo?
3 Mbobakali ba Juda, baapostolo bakalizizyi kabotu zipaizyo zyabanyama nzyobakali kupa bapaizi kuli Leza kutempele mu Jerusalemu. Zipaizyo zili boobo zyakali kupegwa kutegwa bakkomanisye Jehova, alimwi izinji zyakali kutondezya kulumba kutegwa balekelelwe zibi. (Le. 1:4; 22:17-29) Aboobo, baapostolo bakali kukonzya kumvwisya kuti Jesu naakaamba kuti mubili wakwe alimwi abulowa zyakali kuyoopegwa akutilwa akaambo kambabo,’ wakali kupandulula kuti wakali kuyooaba buumi bwakwe bulondokede kabuli cipaizyo. Cakali kuyooba cipaizyo cisumpukide kwiinda zipaizyo zyabanyama.
4. Ncinzi Jesu ncaakali kupandulula naakamba kuti: “Inkomeki eeyi yiiminina cizuminano cipya iciyeeme abulowa bwangu”?
4 Mbuti kujatikizya majwi aa Jesu aakuti “Inkomeki eeyi yiiminina cizuminano cipya iciyeeme abulowa bwangu”? Baapostolo bakalibuzyi businsimi bujatikizya cizuminano cipya, icilembedwe mulugwalo lwa Jeremiya 31:31-33. (Amubale.) Majwi aa Jesu atondezya kuti wakali kutalisya cizuminano cipya, calo cakali kuyoonjila mubusena bwacizuminano ca Mulawo Jehova ncaakapangide abana Israyeli kwiinda muli Musa. Sena zizuminano eezyi zyobilo zyakalikozyenye?
5. Nzyintu nzi nzyobakali kulangila bana Israyeli mucizuminano ca Mulawo?
5 Inzya, makanze akalikozyenye. Ciindi Jehova naakapangana cizuminano ca Mulawo abana Israyeli wakabaambila kuti: “Na mwazumina kuswiilila ijwi lyangu akubamba cizuminano cangu, muyooyandika mumeso aangu kwiinda bamasi boonse; nkaambo nyika yoonse njiyangu. Muyoondibeda cisi cabapaizi, musyobo uusalalisya.” (Kul. 19:5, 6) Ino aaya majwi bakali kwaateelela buti bana Israyeli?
CISYOMEZYO CIJATIKIZYA BAPAIZI BAMI
6. Muunzila nzi cizuminano ca Mulawo mocakaba cibeela cacisyomezyo?
6 Bana Israyeli bakali kulimvwisya ibbala lyakuti “cizuminano,” nkaambo Jehova wakalibambide cizuminano cili boobo abamawisi, Nowa alimwi a Abrahamu. (Matl. 6:18; 9:8-17; 15:18; 17:1-9) Mucizuminano eeci kuli Abrahamu, Jehova wakasyomezya kuti: “Mulunyungu lwako zisi zyoonse zyaansi moziyoojana coolwe.” (Matl. 22:18) Cizuminano ca Mulawo cakali cibeela cacisyomezyo eeci. Kwiinda mulincico bana Israyeli bakali kuyooyandika ‘mumeso aa Jehova kwiinda bamasi boonse.’ Nkaambo nzi? Kutegwa ‘babe cisi cabapaizi ca Jehova.’
7. Ino majwi aakuti “cisi cabapaizi” aamba nzi?
7 Bana Israyeli bakalibazyi kabotu bami abapaizi, pele Melkisideke alikke akati kabantu bakaindi nguwakajisi zyuuno zyoonse zyobilo aciindi comwe kwiinda mukuzumizyigwa a Jehova. (Matl. 14:18) Jehova wakapa coolwe kucisi kuti cizyale “cisi cabapaizi.” Mbubwenya majwi aakasololelwa amuuya mbwaakatondezya, eeci cakapa coolwe cakuyumya bapaizi bami, ibami balo bakali kuyooba bapaizi alimwi.—1 Pe. 2:9.
8. Milimo nzi bapaizi basalidwe a Leza njobacita?
8 Mulimo wamwami ngwakulela. Pele ino mupaizi ujisi mulimo nzi? Lugwalo lwa Bahebulayo 5:1 lwaamba kuti: “Mupaizi mupati uuli woonse uubwezyegwa akati kabantu usalilwa kubeleka mulimo wa Leza uugwasya bantu, ikutegwa katuula zipego azipaizyo akaambo kazibi.” Aboobo mupaizi uusalwa a Jehova wiiminina bantu basizibi kuli Leza kwiinda muzipaizyo izyakalembedwe, ikukombelezyezya bantu Kulinguwe. Kulubazu lumwi, mupaizi wiiminina Jehova kubantu, kubayiisya mulawo wa Leza. (Lev. 10:8-11; Malk. 2:7) Munzila eezyi mupaizi uusalwa a Leza ulabeleka kutegwa ayanzanye bantu kuli Leza.
9. (a) Ncinzi cakali kuyandika kutegwa bana Israyeli bacibone cisyomezyo cakuba “cisi cabapaizi”? (b) Nkaambo nzi Jehova ncaakabikka bubambe bwabapaizi akati kabana Israyeli? (c) Ncinzi cakapa bana Israyeli kuti baalilwe kubamba “cisi cabapaizi” kweelana acizuminano ca Mulawo?
9 Aboobo, cizuminano ca Mulawo cakapa bana Israyeli coolwe cakuzyala bapaizi bami ibakali kuyoolongezya “bamasi boonse.” Bulangizi oobu bwakali kukonzyeka buyo kuti batobela ncaakaamba kuti: “Na mwazumina kuswiilila ijwi lyangu akubamba cizuminano cangu.” Sena bana Israyeli ‘nobakaswiilila ijwi lya Jehova’? Inzya, kweelana ambobakali kukonzya. Sena bakali kukonzya kucita oobo cakumaninina? Peepe. (Lom. 3:19, 20) Akaambo kaceeci Jehova wakabikka bubambe bwa bapaizi akati kabana Israyeli, ibutayanzene abami, kutegwa kabatuula banyama akaambo kazibi nzyobakali kucita bana Israyeli. (Lev. 4:1–6:7) Zibi eezyi zyakali kubikkilizya azibi zyabapaizi. (Heb. 5:1-3; 8:3) Jehova wakazitambula zipaizyo, pele tiizyakali kukonzya kubbadela cakumaninina zibi zyabaabo bakali kuzipa. Kweelana acizuminano ca Mulawo, bupaizi tiibwakali kukonzya kuyanzanya cakumaninina nobaba bana Israyeli ibakali kusyomeka kuli Leza. Mwaapostolo Paulo wakacaamba boobu: “Bulowa bwabapoho abwampongo tabukonzyi kugusya zibi pe.” (Heb. 10:1-4) Akaambo kakusotoka Mulawo, bana Israyeli bakasinganizyigwa. (Gal. 3:10) Tiibakali kukonzya kugwasya nyika kabali bapaizi bami muciimo cili boobo.
10. Ino cizuminano ca Mulawo cakajisi mulimo nzi?
10 Sena cisyomezyo ca Jehova cakuti bakali kukonzya kuba “cisi cabapaizi” tiicakali camasimpe? Peepe. Ikuti nobakasolekesya kuswiilila, nobakaba acoolwe eeci, pele kutali kweelana a Mulawo. Nkaambo nzi? (Amubale Bagalatiya 3:19-25.) Kuli baabo ibakatobela Mulawo cakusyomeka, wakabagwasya kuti bazumanane abukombi busalala. Wakagwasya ba Juda kuyeeya nsotoko zyabo alimwi akuti bakali kuyandika cituuzyo cipati kwiinda zituuzyo nzyobakali kupa bapaizi bapati. Mulawo wakali musolozi iwakali kukonzya kubasololela kuli Kristo, naa Mesiya imazyina aapandulula kuti “Uunanikidwe.” Nokuba boobo, ciindi Mesiya naakali kuyoosika, wakali kuyootalisya cizuminano cipya ncaakasinsima Jeremiya. Aabo bakamutambula Kristo bakatambwa kuba cibeela cacizuminano cipya alimwi bakali kukonzya kuba “cisi cabapaizi.” Atubone mbocakali kuyoocitika.
IBALI MUCIZUMINANO CIPYA BABA BAPAIZI BAMI
11. Mbuti Jesu mbwaakaba ntalisyo yabaabo bakali kuyooba bapaizi bami?
11 Mu 29 C.E., Jesu waku Nazareta wakaba Mesiya. Naakajisi myaka yakuzyalwa iili 30, Jesu wakalyaaba kuli Jehova kwiinda mukubbapatizyigwa kutegwa acite mulimo waalubazu ngwaakamupede Jehova. Lino Jehova wakaamba boobu kujatikizya Jesu: “Ooyu Mwanaangu ngweyandisya” mpoonya Jehova wakamunanika kutali amafuta, pele wakamunanika amuuya uusalala. (Mt. 3:13-17; Mil. 10:38) Kunanikwa ooku kwakali kutondezya kuti wakali kuyooba Mupaizi Mupati kuli baabo boonse basyoma alimwi kutegwa akabe Mwami wabo kumbele. (Heb. 1:8, 9; 5:5, 6) Ngonguwe wakali kuyooba ntalisyo yabapaizi bamwi.
12. Ncinzi cakakonzyeka akaambo kacipaizyo ca Jesu?
12 Kali Mupaizi Mupati, ncipaizyo nzi Jesu ncaakali kuyootuula calo cakali kuyoopa kuti aabo basyoma balekelelwe cibi ncobakakona? Mbubwenya mbwaakatondezya ciindi naakatalisya Ciibalusyo calufwu lwakwe, buumi bwakwe bulondokede mbombubo bwakali kuyooba cipaizyo. (Amubale Bahebulayo 9:11, 12.) Kuzwa ciindi naakabbapatizyigwa mu 29 C.E., Jesu kali Mupaizi Mupati, wakasunkwa alimwi wakayiisyigwa kusikila mane naakafwa. (Heb. 4:15; 5:7-10) Naakabusyigwa, wakaunka kujulu akupa mpindu yacipaizyo cakwe kuli Jehova. (Heb. 9:24) Kuzwa leelyo, Jesu wakali kukonzya kubakombelezyezya kuli Jehova aabo ibakali kutondezya lusyomo lwabo mucipaizyo cakwe akubagwasya kuti babelekele Leza kabajisi bulangizi bwakupona kukabe kutamani. (Heb. 7:25) Cipaizyo cakwe alimwi cakali kukonzya kupa kuti cizuminano cipya cikonzyeke.—Heb. 8:6; 9:15.
13. Nzyintu nzi nzyobakali kulangila aabo ibakali mucizuminano cipya?
13 Aabo ibali mucizuminano cipya abalo bakeelede kunanikwa amuuya uusalala. (2 Ko. 1:21) Ba Juda basyomeka alimwi a Bamasi bakali kubikkilizyigwa. (Ef. 3:5, 6) Nzyintu nzi nzyobakali kulangila aabo ibakali mucizuminano cipya? Bakali kuyoolekelelwa ncobeni zibi zyabo. Jehova wakalisyomezyede kuti: “Nzoobalekelela milandu yabo, azyalo zibi zyabo nsikoozooziibalukwa limbi.” (Jer. 31:34) Akaambo kakuti zibi zyabo zyalekelelwa, bakali kuyooba “cisi cabapaizi.” Petro wakaambila Banakristo bananikidwe kuti: “Nywebo muli ‘musyobo uusalidwe, ibapaizi bami, cisi cisalala, iciinga ca Leza cilibedelede, kutegwa mwaambilizye koonse-koonse ibube bubotu’ bwayooyo wakamwiita kuzwa mumudima akumunjizya mumumuni wakwe uutaliboteli.” (1 Pe. 2:9) Aawa Petro wakali kuzubulula majwi aa Jehova ngakaambila bana Israyeli ciindi naakabapa Mulawo mpoonya akwaabelesya ku Banakristo aabo ibali mucizuminano cipya.—Kul. 19:5, 6.
BAPAIZI BAMI BALETA ZILONGEZYO KUBANTU BOONSE
14. Nkookuli bapaizi bami nkobayoobelekela?
14 Nkookuli aabo ibali mucizuminano cipya nkobabelekela? Aanyika, kabali kabunga, balabeleka mbuli bapaizi alimwi abaiminizi ba Jehova kubantu kwiinda ‘mukwaambilizya koonse-koonse ibube bwakwe bubotu’ alimwi balapa cakulya cakumuuya. (Mt. 24:45; 1 Pe. 2:4, 5) Baakufwa akubusyigwa, bayoobeleka antoomwe a Kristo kujulu kabali bami abapaizi. (Lk 22:29; 1 Pe. 1:3-5; Ciy. 1:6) Mwaapostolo Johane wakaasinizya makani aaya mucilengaano ncaakabona zilenge zyamuuya kazili afwaafwi a cuuno ca Jehova kujulu. “[Mu]lwiimbo lupya” lwaamba zya “Mwanaambelele” baimba kuti: “abulowa bwako wakaulila Leza bantu kuzwa kumisyobo yoonse amilaka yoonse amikowa yoonse azisi zyoonse, alimwi wakabapa kuti babe Bwami abapaizi kuli Leza wesu, eelyo bayooba bami ibayoolela nyika.” (Ciy. 5:8-10) Mucilengaano cimbi ncaakabona Johane wakaamba kujatikizya baleli aaba kuti: “Bayooba bapaizi ba Leza aba Kilisito, alimwi bayooba bami balela antoomwe anguwe kwamyaka iili 1,000.” (Ciy. 20:6) Antoomwe a Kristo, baba cisi cabapaizi kutegwa balongezye bantu boonse.
15, 16. Nzilongezyo nzi nzyobayooleta bapaizi bami kubantu?
15 Nzilongezyo nzi iba 144,000 nzyobayooleta kubantu bayookkala anyika? Ciyubunuzyo caandaano 21 cipandulula ba 144,000 kuti munzi wakujulu, Jerusalemu mupya, iwiitwa kuti “imukaintu wa Mwanaambelele.” (Ciy. 21:9) Tupango 2 kusika ku 4 twaamba boobu: “Ndakabona munzi uusalala, Jelusalemu Mupya, kauboola ansi kuzwa kujulu kuli Leza alimwi kaubambidwe kabotu mbuli nabwiinga walisakatizyila mulumaakwe. Mpoonya ndakamvwa jwi pati kuzwa kucuuno cabwami kaliti: ‘Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.’” Eelo kaka eezyi nzilongezyo zibotu kapati! Mbwaanga lufwu talukooyoobako, misozi, kulila, koomoka alimwi akucisa kuyoogusyigwa. Eeci caamba kuti bantu basyomeka bayoolondoka, alimwi bayoomvwana a Leza munzila iimaninide.
16 Lugwalo lwa Ciyubunuzyo 22:1, 2 lulaamba azimwi zilongezyo ziyooboola akaambo kacisi cabapaizi noliti: “Wakanditondezya mulonga wamaanzi aabuumi uubalangala mbuli bbwe libalangala, kaukunka kuzwa kucuuno cabwami ca Leza alimwi aca Mwanaambelele kuya ansi akati [Jerusalemu Mupya] kamugwagwa mupati wamunzi ooyo. Alimwi mumabali oonse obilo aamulonga kwakali zisamu zyabuumi izyakali kuzyala micelo ziindi zili kkumi azibili amwaka, izyakali kuzyala micelo yazyo mwezi amwezi. Alimwi matuvwu aazisamu eezyi akali akuponya masi.” Akaambo kazikozyanyo eezyi, “masi,” naa tubunga twamikwasyi yabantu, tuyoosilikwa cakumaninina kukutalondoka nkobakakona kuzwa kuli Adamu. Ncobeni ‘zyintu zyakaindi ziyoomana.’
BAPAIZI BAMI BAUMANIZYA MULIMO WABO
17. Ncinzi bapaizi bami ncobayoocita mukuya kwaciindi?
17 Myaka 1,000 yamulimo yaakwiinda, bapaizi bami banooli babagwasya bantu kuba bantu balondokede. Kali Mupaizi Mupati alimwi Mwami, Kristo uyoomupa Jehova musyobo wabantu uulondokede. (Amubale 1 Bakolinto 15:22-26.) Bapaizi bami banooli bamanizya mulimo wabo.
18. Ino Jehova uyoobapa mulimo nzi bapaizi bami baakumanizya mulimo wabo?
18 Baakumanizya mulimo ooyu, ino Jehova uyoobapa mulimo nzi? Kweelana alugwalo lwa Ciyubunuzyo 22:5, lwaamba kuti: “Bayooba bami balela lyoonse mane kukabe kutamani.” Ino bayoolela bani? Bbaibbele talitwaambili pe. Pele buumi mbobajisi alimwi aluzyibo ndobajisi mukugwasya bantu batalondokede kubapa kweelela kutambula mulimo uumbi weelela mukuzuzikizya makanze aa Jehova kukabe kutamani.
19. Ino bantu bayoojanika ku Ciibalusyo bayooibalusyigwa nzi?
19 Twaakubungana kutegwa tucite Ciibalusyo calufwu lwa Jesu muli Bwane, April 5, 2012, njiisyo eezyi zyamu Bbaibbele tatweelede kuziluba pe. Mweelwe musyoonto uceede wabananike Banakristo ibacili anyika bayoolya cinkwa citajisi mumena akunywa waini uusubila, kutondezya kuti mbacibeela cacizuminano cipya. Zitondezyo eezyi zya cipaizyo ca Kristo ciyoobayeezya zyoolwe zitaliboteli nzyobajisi alimwi amulimo ngobajisi mukuzuzikizya makanze aa Leza. Toonse atukaswaangane akutondezya kulumba kuli Jehova Leza akaambo kabubambe bwabapaizi bami mbwaakabikka kutegwa alongezye bantu boonse.
SENA MULAKONZYA KUPANDULULA?
․․․․․
Ino ndilili cisyomezyo cabapaizi bami nocakasyomezyegwa ciindi cakusaanguna?
․․․․․
Muunzila nzi aabo ibali mucizuminano cipya mobaba bapaizi bami?
․․․․․
Nzilongezyo nzi bapaizi bami nzyobayooleta kubantu?
[Mibuzyo yaciiyo]
[Cifwanikiso icili apeeji 29]
Bapaizi bami bayooleta zilongezyo zitamani kubantu
