Jesu wakaiya bube bwalo ibwakamugwasya kumbele kuba cikozyanyo cibotu cakuba mubelesi mubotu abaabo mbaakabeleka limwi anyika. Mbuti mbotukonzya kugwasyigwa kucikozyanyo ca Jesu? Kwiinda mukubikkila maano kwiiya cikozyanyo cakwe, tulakonzya kubona njiisyo zyotatwe izikonzya kutugwasya kubeleka kabotu abamwi. Njiisyo eezyi zilatugwasya kapati kusumpula luumuno alimwi akubeleka kabotu abamwi.

Similimo mubotu cakulicesya ulababikkila maano babelesinyina alimwi kunyina nalisumpula. Jesu wakaiya kulicesya kuli boobo kuli Bausyi. Nokuba kuti Jehova alikke nguweelela kwiitwa kuti Mulengi, wakali kuyanda kuti bamwi bazyibe mulimo mupati Mwanaakwe alimwi similimonyina ngwaakabeleka. Tulakabona kaambo aaka mumajwi aaya ngaakaamba Leza: “Atulenge muntu mucinkozya cesu.” (Matl. 1:26) Cakutadooneka, Jesu wakakulumba kapati kulicesya kwa Jehova mumakani aaya.—Int. 18:35.

Ciindi naakali anyika, Jesu wakatondezya kulicesya kuli boobo. Naakali kulumbaizyigwa akaambo kazintu nzyaakacita, wakagamika kulumbaizya ooko kuli yooyo iweelede. (Mk. 10:17, 18; Joh. 7:15, 16) Jesu wakasumpula luumuno abasikwiiya bakwe alimwi wakali kubabona kuti mbalongwe ikutali bazike. (Joh. 15:15) Mane buya wakasanzya maulu aabo kutegwa abayiisye ciiyo cijatikizya kulicesya. (Joh. 13:5, 12-14) Andiswe tweelede kubabikkila maano basimilimoma muciindi cakubikka nzyotuyanda swebo mubusena bwakusaanguna.  Ciindi ‘notulemekana’ alimwi akutabikkila maano kujatikizya uutiilumbaizyigwe, nzinji zikonzya kuzuzikizyigwa.—Rom. 12:10.

Muntu uulicesya ulizyi kuti, “ikuti kakuli basikulaya banji kulaba kuzwidilila.” (Tus. 15:22) Tacikwe makani aluzyibo ndotujisi naa zintu nzyotukonzya kucita, tweelede kuyeeya kuti kunyina muntu uuzyi zyoonse. Awalo Jesu wakaamba kuti kuli zintu zimwi nzyaatakazyi. (Mt. 24:36) Alimwi wakali kubikkila maano kuzintu basikwiiya bakwe batalondokede nzyobakazyi naa nzyobakali kuyeeya. (Mt. 16:13-16) Nkakaambo kaako basimilimonyina bakali kwaanguluka kuba antoomwe anguwe. Mbubwenya buyo, notulicesya akuyeeya kuti tatuzizyi zyoonse, alimwi akuswiilila mizeezo yabamwi, tuyoosumpula luumuno alimwi caantoomwe ‘kuyooba kuzwidilila.’

Cilayandika ikapati kubaalu kumwiiya Jesu mumakani aaya ciindi nobabelekela antoomwe. Beelede kuyeeya kuti lyamiswaangano yabaalu, muuya uusalala ulakonzya kukulwaizya kufwumbwa mwaalu kwaamba kaambo kamwi ikakonzya kugwasya kabunga kabaalu kusala kabotu. Ikuti lyamiswaangano yabo baalu kabakulwaizya muuya uupa kuti boonse baanguluke kutola lubazu, nkokuti antoomwe bayoosala zintu ziyoogwasya mbungano yoonse.

Similimo mubotu ulanyoneka ciindi nabeleka abasimilimonyina. Tazumanani kuti lyoonse zintu kazicitwa kweelana ambwayanda. Masimpe Jesu wakajisi zyoolwe zinji zyakulangilila kunyoneka kwa Bausyi. Mucikozyanyo, Jehova wakamutuma kuyoonununa bantu kucisubulo calufwu ncobakeelede kupegwa.—Joh. 3:16.

Jesu wakali kunyoneka ciindi nokwakali kuyandika kucita boobo. Amuyeeye mbwaakagwasya mukaintu muna Fonike, nokuba kuti wakatumidwe kubamuŋanda ya Israyeli. (Mt. 15:22-28) Alimwi wakali kunyoneka kujatikizya nzyaakali kulangila kuli basikwiiya bakwe. Ciindi mulongwe wakwe Petro naakamukaka aabuleya, Jesu wakalilibambilide kumulekelela. Kumbele, wakapa Petro mikuli mipati. (Lk. 22:32; Joh. 21:17; Mil. 2:14; 8:14-17; 10:44, 45) Cikozyanyo ca Jesu cilatondezya kabotu-kabotu kuti tweelede ‘kutondezya bantu boonse kunyoneka kwesu’ kwiinda mukutakakatila kuzintu nzyotuyanda.—Flp. 4:5.

Alimwi kunyoneka kuyootukulwaizya kuba bantu bacinca kweelana abukkale kutegwa tubeleke muluumuno abantu baindene-indene. Jesu wakabeendelezya kabotu bantu ibakali afwaafwi anguwe cakuti basinkondonyina basimunyono  bakamutamikizya kuba “mweenzinyina wabasimutelo abasizibi” aabo ibakali kuswiilila kumulumbe wakwe. (Mt. 11:19) Mbubwenya mbuli Jesu, sena andiswe inga twazwidilila kubelekela antoomwe abamwi? Mukwesu Louis, iwabeleka kwaciindi cili mbocibede mumulimo wakweendeenda alimwi aa Beteli, kabeleka abantu bazwa mubukkale bwiindene-indene wakati: “Kubelekela antoomwe abantu batalondokede cili mbuli kuyaka bwaanda kubelesya zitina zyansaizi ziindene-indene. Mbwaanga zitina ziliindene-indene, kuyandika kusolekesya kapati kutegwa bwaanda bukonzye kulibonya kabotu kakunyina kubbenda. Alimwi ndilasolekesya kucinca kutegwa ndicikonzye kubeleka muluumuno abamwi kutegwa mulimo ucitwe.” Eelo kaka tauliboteli muuya ooyu!

Ino ndilili notukonzya kutondezya muuya wakubelekela antoomwe mumbungano motuzulilwa? Tulijisi coolwe cakucita boobo ciindi notuli mukabunga kesu kamulimo wamumuunda. Tulakonzya kubeleka abasikumwaya ibajisi mikuli yamukwasyi iindene-indene ayesu naa mbotwiindene limwi ciimo. Sena inga twasolekesya kunyoneka kwiinda mukucinca mbotubeleka naa kulibambila kubelesya nzila yakukambauka njobakkomanina kutegwa abalo babe alukkomano lunji mumulimo?

Similimo mubotu ‘ulilibambilide kwaabana zintu abamwi.’ (1Tim. 6:18) Ciindi naakali kubeleka ambali a Bausyi, Jesu weelede kuti wakabona kuti Jehova tanaakali kusisa zintu. Jehova “naakabamba julu,” Jesu ‘wakaliko’ alimwi wakali kukonzya kwiiya kulinguwe. (Tus. 8:27) Kumbele, Jesu kumugama calukkomano wakabaambila basikwiiya bakwe ‘zintu nzyaakamvwa’ kuli Bausyi. (Joh. 15:15) Tulakonzya kwiiya cikozyanyo ca Jehova kwiinda mukubaambila basimilimoma zintu nzyotwakaiya. Masimpe, similimo mubotu kunyina nasola kweendelezya bamwi kwiinda mukubasisa zintu nzyobeelede kuzyiba naa izikonzya kubagwasya. Ulakkomana kwaambila bamwi zintu zibotu nzyaakaiya.

Alimwi tulakonzya kubakulwaizya basimilimoma. Sena tacitukkomanisyi ciindi bamwi nobabikkila maano kukusolekesya kwesu alimwi akutulumba kuzwa ansi amoyo? Jesu wakajana ciindi cakwaambila basimilimonyina bube bubotu mbwaakabona mulimbabo. (Amweezyanisye Matayo 25:19-23; Luka 10:17-20.) Mane buya wakabaambila kuti bakali kuyoocita “milimo mipati kwiinda” njaakacita. (Joh. 14:12) Busiku katanafwa, wakabalumbaizya baapostolo bakwe basyomeka ulaamba: “Nywebo ndinywe mwakakatila kulindime mumapenzi aangu.” (Lk. 22:28) Amweezeezye buyo majwi aakwe mbwaakabasika amoyo alimwi akubakulwaizya kuzumanana kuubeleka mulimo! Ikuti naa andiswe katubakulwaizya basyomima, mubwini bayookkomana alimwi cakutadooneka bayooyaambele mumulimo wabo.

Mukwesu umwi wazina lya Kayode wakati: “Similimo mubotu tayandiki kuba muntu uulondokede buya pe, pele upa bamwi kukkomana alimwi upa kuti cuube-ube kubeleka mulimo abaabo mbali limwi.” Sena muli similimo uuli boobo? Ambweni mulakonzya kubalomba babelesinyoko Banakristo kutegwa bamwaambile mbobayeeya kujatikizya ndinywe mumakani aaya. Ikuti kabakkomana kubeleka andinywe, mbubwenya basikwiiya ba Jesu mbobakali kukkomana kubeleka anguwe, mulakonzya kulimvwa mbwaakaamba mwaapostolo Paulo kuti: “Tuli basimilimonyoko kutegwa mukondwe.”—2Kor. 1:24.