“Ciindi mweenima naakatalika kundinyemena, ndakanyamuka akutalika kumusina. Ndakali kuyanda kumujaya.”—Ba Paul.

“Aŋanda ndilafwambaana kapati kunyema, nokuba kuti kunyina kaambo. Ndakali kuzinyonyoona zintu zyamuŋanda, zidooli zyabana bangu, naa cintu cili coonse ncondajana.”—Ba Marco.

Bunji bwesu tatuli bakali mbuli bantu aaba bobilo. Pele zimwi ziindi toonse tulajana buyumuyumu caboola kukulilesya. Cili boobo akaambo kakuti twakakona cibi kuzwa kumuntu wakusaanguna, Adamu. (Rom. 5:12) Bamwi, mbubwenya mbuli ba Paul alimwi aba Marco, cilabakatazya kulilesya kunyema. Ibamwi cilakonzya kubakatazya kapati kweendelezya mizeezo yabo. Mucikozyanyo, balazumanana kuyeeya zintu zibapa kulibilika naa kutyompwa. Mpoonya bamwi balakonzya kukatazyigwa kapati kukaka cilengwa cakucita bwaamu, kuciindizya kunywa bukoko naa kubelesya misamu iikola.

Aabo batayeendelezyi mizeezo yabo, kulombozya kwabo alimwi amicito yabo balakonzya kunyonganya buumi bwabo. Pele tulakonzya kubutantamuka bukkale oobu. Munzila nzi? Nkwiinda mukuba abube bwakulilesya. Kutegwa tucikonzye kucita boobo, atubandike mibuzyo yotatwe: (1) Ino kulilesya caamba nzi? (2) Nkaambo nzi ncokuyandika kapati? (3) Mbuti mbotukonzya kuba abube buli akati ‘kamucelo wamuuya’? (Gal. 5:22, 23) Mpoonya tulalanga-langa ncotukonzya kucita lwesu kutugama ikuti naa zimwi ziindi tulaalilwa kulilesya.

Muntu uulilesya taciti kufwumbwa caboola kumoyo. Muciindi caboobo, ulalijata kutegwa ataambauli naa kucita zintu munzila iikonzya kumunyemya Leza.

Jesu wakatondezya ncocaamba kulilesya. Ibbaibbele lyaamba kuti: “Naakali kutukilwa, kunyina naakatalika kutukila awalo. Naakali kupenga, kunyina naakatalika kukonga bantu pe, pele wakalyaaba mumaanza aayooyo uubeteka cabululami.” (1Pet. 2:23) Jesu wakakutondezya kulilesya kuli boobu ciindi basikumukazya nobakali kumusampaula ciindi naakali aacisamu cakupenzyezya. (Mt. 27:39-44) Musyule, wakatondezya kulilesya kapati ciindi basololi babukombi babi myoyo nobakasoleka kumujanina kaambo kumajwi aakwe. (Mt. 22:15-22) Alimwi taciliboteli kaka cikozyanyo ncaakasiya Jesu ciindi ba Juda bamwi ibakanyemede nobakabweza mabwe kutegwa bamupwaye! Muciindi cakupilusya cibi, “Jesu wakayuba akuzwa mutempele.”—Joh. 8:57-59.

Sena tulakonzya kuciiya cikozyanyo ca Jesu? Inzya, tulakonzya kusoleka. Mwaapostolo Petro wakalemba kuti: “Kristo lwakwe wakapenga akaambo kandinywe, akumusiila citondezyo kutegwa mwiitobelesye mikondo yakwe.” (1Pet. 2:21) Nokuba kuti tatulondokede, tulakonzya kucitobelesya cikozyanyo ca Jesu cakulilesya. Ino nkaambo nzi ncociyandika kapati kucita boobo?

Tweelede kuba abube bwakulilesya kutegwa tukkomaninwe a Jehova. Nokuba kuti twamubelekela Jehova kwaciindi cilamfwu, cilongwe cesu anguwe cilakonzya kumana ikuti naa katutalijati muzintu nzyotucita alimwi anzyotwaamba.

Amuyeeye kujatikizya Musa, iwakali “mubombe kapati kwiinda bantu boonse ibakali anyika” aciindi eeco. (My. 12:3) Kwamyaka minji wakali kubakkazikila moyo bana Israyeli nobakali kutongooka, pele aciindi cimwi Musa wakaalilwa kulilesya. Wakanyema ciindi nobakatalika kutongooka alimwi kujatikizya penzi lyakubula maanzi. Wakabaambila cabukali kuti: “Amuswiilile lino, nywebo nobazangi! Sena muyanda kuti tumugwisizye maanzi mundomba oomu?”—My. 20:2-11.

Musa wakaalilwa kulilesya. Tanaakamulemeka Jehova Sikupa maanzi munzila yamaleele. (Int. 106:32, 33) Akaambo kaceeci, Jehova tanaakamuzumizya kunjila mu Nyika Yakasyomezyedwe. (My. 20:12) Kulangilwa kuti Musa wakaliyeeya mubuumi bwakwe boonse akaambo kakutalilesya nkwaakacita.—Dt. 3:23-27.

Ino twiiya nzi? Nokuba kuti twali mukasimpe kwaciindi cilamfwu, tatweelede kubasampaula naaceya aabo batulubizyila naa aabo bayandika kululamikwa. (Ef. 4:32; Kol. 3:12) Masimpe, ikuti naa twacembaala, zimwi ziindi cilakatazya kukkazika moyo. Pele amuyeeye kujatikizya Musa. Tatuyandi kuleka kukkomaninwa a Jehova akaambo kakutatondezya bube bwakulilesya. Ncinzi ncotweelede kucita kutegwa tuzumanane kuba abube oobu buyandika kapati?

Amupaile kulomba muuya uusalala. Nkaambo nzi? Akaambo kakuti kulilesya ncibeela camucelo wamuuya wa Leza alimwi Jehova ulabapa muuya wakwe aabo ibamulomba. (Lk. 11:13) Kwiinda mumuuya wakwe, Jehova ulakonzya kutupa nguzu nzyotuyandika. (Flp. 4:13) Alimwi ulakonzya kutugwasya kutegwa tube aazibeela azimbi zyamucelo wamuuya, mbuli luyando, iluyootugwasya kuyumya bube bwesu bwakulilesya.—1Kor. 13:5.

Amucitantamuke cintu cili coonse icikonzya kupa kuti cimukatazye kulilesya. Mucikozyanyo, amwaatantamuke mawebbusaiti aa Intaneti alimwi azyakulikondelezya izijatikizya bukkale bubyaabi. (Ef. 5:3, 4) Alimwi buya, tweelede kucitantamuka cintu cili coonse icikonzya kutusunka kucita cintu cibyaabi. (Tus. 22:3; 1Kor. 6:12) Mucikozyanyo, muntu uufwambaana kuyungwa  mumicito yakutalilemeka ulakonzya kusala kwaatantamukila limwi mabbuku alimwi amafilimu aamba zyaluyando.

Cilakonzya kutuyumina kulutobela lulayo oolu. Nokuba boobo, ikuti twasolekesya, Jehova ulakonzya kutupa nguzu nzyotuyandika kutegwa katulilesya. (2Pet. 1:5-8) Uyootugwasya kweendelezya mizeezo yesu, ŋambawido alimwi azintu nzyotucita. Kutondezya mbwaali aamasimpe makani aaya, ba Paul aba Marco, ibaambwa kumatalikilo aacibalo, boonse bakaiya kutafwambaana kunyema. Alimwi amubone cikozyanyo camukwesu iwakali kufwambaana kunyema ciindi naakali kweenzya mootokala, mane buya akuzwangana abanamutekenya bambi. Ncinzi ncaakacita kujatikizya penzi eeli? Wakaamba kuti: “Ndakali kupaila camoyo woonse buzuba abuzuba. Ndakali kubala zibalo zyaamba kulilesya alimwi akuswata tupango twamu Bbaibbele tugwasya. Nokuba kuti ndali kucita boobu kwamyaka iili mbwiibede, cilandigwasya buzuba abuzuba kulibikkila mbaakani yakusolekesya kubatama. Alimwi ndilafwambaana kunyamuka kutegwa kandeenda cakuliiba.”

Zimwi ziindi toonse tulaalilwa kulilesya. Kuti naa eeco cacitika, cilakonzya kutukatazya kapati kupaila kuli Jehova. Pele eeci nceciindi notweelede kupaila kapati kuli Jehova kutegwa atugwasye. Aboobo mutamuki kupaila kuli Jehova. Amulombe kulekelelwa, lugwasyo alimwi akuba amakanze aakutakwiinduluka kulubizya ooko nkomwacita. (Int. 51:9-11) Jehova takaukaki mupailo wanu uuzwa ansi aamoyo iwakulomba kufwidwa luzyalo. (Int. 102:17) Mwaapostolo Johane utuyeezya kuti bulowa bwa Mwana wa Leza “bulatusalazya kuzibi zyoonse.” (1Joh. 1:7; 2:1; Int. 86:5) Amuyeeye kuti Jehova ukulwaizya babelesi bakwe bantunsi kulekelela cakwiinduluka-induluka. Aboobo tulijisi lusyomo lwakuti awalo ulacita mbubwenya oobo.—Mt. 18:21, 22; Kol. 3:13.

Jehova kunyina naakakkomana ciindi Musa naakaalilwa kulilesya munkanda. Nokuba boobo, wakamulekelela. Alimwi Jwi lya Leza lyaamba kuti Musa wakali mwaalumi uusyomeka kapati ooyo ngotweelede kwiiya. (Dt. 34:10; Heb. 11:24-28) Jehova kunyina naakamuzumizya Musa kunjila mu Nyika Yakasyomezyedwe, pele uyoomuzumizya kupona mu Paradaiso anyika alimwi akumupa buumi butamani. Andiswe tulakonzya kuba abulangizi bwakuyoopona buumi butamani ikuti twazumanana kuba abube oobu ibuyandika kapati, bwakulilesya.—1Kor. 9:25.