Ino zyeelelo zyakulilemeka ninzi? Mbukkale bubotu alimwi buyandika kapati. Bwalo bubikkilizya kulekelela, lwaanguluko, kusyomeka, luyando, kulemeka buumi alimwi akulilesya. Aboobo, zyeelelo zyesu zyakulilemeka zilajatikizya mbotulilemeka, zyintu nzyotulombozya, zilongwe zyesu alimwi amalailile ngotupa bana besu. Nokuba kuti zyeelelo zyakulilemeka zilayandika kapati, pele zyayaansi.

Mu 2008, basikuvwuntauzya baku United States bakabuzya-buzya bakubusi banji kujatikizya mbobazibona zyeelelo zyakulilemeka. Mumuteende wiitwa kuti The New York Times, ba David Brooks bakaamba kuti: “Cilatyompya kapati kubona mbokutaluzi kuyeeya alimwi akwaambaula kwabakubusi aaba mumakani aakulilemeka. Banji bakaamba kuti kujata bamakaintu alimwi akujaya kulilubide, pele kunze lyazibi zipati eezyi, kunyina nobakayeeya kuti zyintu mbuli kweenzya mootokala kokoledwe, kubbida kucikolo naa kweena mulongwe akwalo kulilubide.” Mukubusi umwi wakaamba kuti: “Tandibikkili kapati maano kujatikizya cintu cibi naa cibotu.” Banji bakaamba kuti: ‘Kuti cintu cimwi kacili kabotu, kocita  kweelana amoyo wako mbouyanda.’ Sena kuyeeya kuliboobo nkwabusongo?

Moyo wamuntu, nokuba kuti ulijisi luyando alimwi aluzyalo, pele alimwi ‘uleena alimwi ulijisi bulwazi bukaka kupona.’ (Jeremiya 17:9) Bube oobu bubyaabi ibwakasinsimwa mu Bbaibbele bwakutalilemeka bulalibonya kapati munyika eeyi iyaabucinca. Ibbaibbele lyaamba kuti: ‘Kumazuba aamamanino bantu bayooba basikuliyanda, basikulidunda, basikulisumpula, batajisi luyando lwakuzyalwa andulo, bakali, batayandi bubotu, bayandisya zyakulikondelezya kwiinda kuyandisya Leza.’—2 Timoteyo 3:1-5.

Twaambo tuli boobu tweelede kutupa kwiilingula myoyo yesu, muciindi cakwiile kucita ncoiyanda. Masimpe ngakuti, Bbaibbele cakusalazya lyaamba kuti: “Uusyoma moyo wakwe mwini mufwuba-fwuba.” (Tusimpi 28:26) Mbubwenya mbuli kkampasi, moyo wesu weelede kubambululwa kweelana azyeelelo ziluleme kutegwa zitugwasye. Ino inga twazijana kuli zyeelelo zili boobu? Banji basyoma Bbaibbele nkaambo lilasyomeka alimwi lililuzi.

Zyeelelo zyamu Bbaibbele zilatondezya kuti zyakabambilwa kugwasya bantu. Amulange-lange zikozyanyo eezyi zitobela, mbuli luyando, luzyalo, bwaabi, alimwi akusyomeka.

Kuyanda bamwi.

Bbuku limwi lyaamba kuti: “Ikuti mwaiya kuba aluyando, nkokuti muyooba aalukkomano.” Kwaamba masimpe, tuyandika luyando. Kuti kakunyina luyando, tatukonzyi kulujana lukkomano lwini-lwini.

Nzyolyaamba Bbaibbele: “Amulisamike luyando, nkaambo ncecaanzyo calukamantano cilondokede.” (Bakolose 3:14) Nguwenya mulembi wamajwi aamu Bbaibbele aaya, alimwi wakaamba kuti: “Kuti . . . kanditajisi luyando, ndili wabuyo.”—1 Bakolinto 13:2.

Luyando oolo lweelede kweendelezyegwa anjiisyo, kutali luyandisisyo lwakoonana. Luyando luli boobo lutupa kugwasya beenzu ibali mumapenzi, kakunyina kuyeeya kupegwa bulumbu. Mulugwalo lwa 1 Bakolinto 13:4-7 tubala kuti: “Luyando lulakkazyika moyo alimwi luli aluzyalo. Luyando talukwe bbivwe, talulidundi, talulisumpuli, talukwe cisapi, talulibikkili buyo maano lwini, talukalali, talubikkilili. Talukkomanini kutalulama, pele lukkomanina kasimpe. Lulajatila zyintu zyoonse, lulasyoma zyintu zyoonse, . . . lulaliyumya muzyintu zyoonse.”

Kuti mumikwasyi kakunyina luyando luli boobu, nkokuti boonse balapenga, kwaambisya bana. Ba Monica bakalemba kuti ciindi nibakali bana, bakali kupenzyegwa mumizeezo alimwi akutundululwa. Bakaamba kuti: “Tiindakali kuyandwa, alimwi ndakanyina bulangizi buli boonse.” Kumane nibakajisi myaka yakuzyalwa iili 15, bakalongela kuli bakaapanyina, Bakamboni ba Jehova.

Ba Monica bakaamba kuti: “Mumyaka yobilo njindakakkala abakaapa, nokuba kuti ndakali aansoni, bakandiyiisya kuba aaluyando alimwi akubikkila maano bamwi. Bakandigwasya kuba mukaintu uujisi bulemu.” Lino ba Monica balikkomene mulukwatano lwabo, balo abalumi babo alimwi abana babo botatwe balatondezya luyando kuli bamwi kwiinda mukubakambaukila mulumbe wamu Bbaibbele.

Kuyandisya lubono ngusinkondo waluyando uutalibonyi, walo uupa bantu banji kusyoma  kuti kuba aazyintu zinji zyakumubili alimwi akulikkomanisya nzezyeelelo ziyandika kapati. Pele, kanji-kanji buvwuntauzyi butondezya kuti bantu beelede buyo kuba amali masyoonto kutegwa bakkomane. Alimwi buya, bantu bayandisisya zyintu zyakumubili bayandaula kutakkomana, ikaambo Bbaibbele nkolizuminizya. Lugwalo lwa Mukambausi 5:10 lutwaambila kuti: “Muntu uuyandisya mali takonzyi kukuta mali, ayooyo uuyandisya imbono takonzyi kukuta impindu. Eci acalo ncabuyo.” Alimwi Bbaibbele lyaamba kuti: “Ibukkale bwanu butabi bwakuyandisya mali pe.”—Bahebulayo 13:5.

Luzyalo alimwi abwaabi.

Cibalo cimwi cakalembwa abamucibeela civwuntauzya bukkale alimwi ambobalimvwa bantu icaku Yunivesiti yaku California mu United States, cakaamba kuti: “Sena nicatali kabotu nicali kukonzyeka kuula lukkomano lutamani? Kaambo kali mumubuzyo ooyu nkakuti kufwumbwa kuti cintu ncimwaula muulila muntu umbi, pele kutali kuyanda kulikkomanisya pe nkokuti muzeezo ooyu tauli wakuyeeyela buyo.” Ino eeci caamba nzi? Caamba kuti kupa kulakkomanisya kwiinda kupegwa.

Nzyolyaamba Bbaibbele: “Kupa kulakkomanisya kapati kwiinda kutambula.”—Milimo 20:35.

Kanji-kanji, nzila mbotu yakupa alimwi iitugwasya kapati, nkulyaaba kubelesya ciindi anguzu zyesu. Mucikozyanyo, ba Karen bakabona bakaintu bamwi alimwi abana babo basimbi bobilo kabakkede mumootokala iwakaimvwi kaulibonya mbuli kuti ulabambwa. Aabo bakaintu alimwi amwanaabo umwi bakali kuyanda kuyootanta ndeke, pele mootokala wakabafwida munzila, mpoonya ayalo takisi njobakalomba kuti ibanyamune yakamuka. Ba Karen bakalisungula kubabweza amootokala wabo, nokuba kuti kubbuwa lyandeke kwakali kweendwa maminiti aali 45 kuzwa mpobakabede, bakakuzumina kulyaaba kwabo. Nobakali kupiluka ba Karen, bakajana kuti mwana umwi wabakaintu mbobakatola kubbuwa lyandeke ucikkede mumootokala nguwenya ooyo iwakaimvwi.

Aboobo wakaamba kuti: “Balumi bangu bayaabuboola kundicinga.”

Ba Karen bakaingula kuti: “Cabota kuti uli kabotu. Mebo nduunka kuyoosalazya ku Ŋanda ya Bwami.”

Mukaintu ooyu wakabuzya kuti: “Sena muli Bakamboni ba Jehova?”

Ba Karen bakaingula kuti “Inzya,” mpoonya mubandi wakatalisyigwa.

Nokwakainda nsondo zisyoonto buyo, ba Karen bakatambula kagwalo kaakkompyuta. Majwi aakali mukagwalo aaka akali aakuti: “Mebo alimwi abaama tucikuyeeya kulyaaba nkomwakacita. Alimwi tulamulumba kapati, nkaambo twakeenda buyo kabotu! Mwanookwesu wakatwaambila kuti muli Bakamboni ba Jehova, calo cipandulula kaambo ncomwakatondezyela luzyalo kulindiswe. Baama abalo Mbaakamboni, pele mebo tandicisungweede. Pele ndilatalika kubikkila maano ino-ino.” Ba Karen bakakkomana kapati kuzyiba kuti bakacikonzya kugwasya basyominyina bobilo. Bakaamba kuti: “Ndakalila.”

Imulembi wazyina lya Charles D. Warner wakalemba kuti: “Kugwasya muntu ncecintu ciinda kubotu ncotukonzya kucita mubuumi.”  Cili boobo akaambo kakuti Leza tanaakalenga bantu kuti babe basyaacivwulemwangu, pele kuti kabatondezya bube bwakwe bubotu.—Matalikilo 1:27.

Kusyomeka.

Bube oobu bulayandika kapati kubantu boonse. Kutasyomeka kupa bantu kulibilika, kutasyomana, alimwi takupi kukamantana.

Ncolyaamba Bbaibbele: “Ngwani uukonzya kusekelezegwa mucilao cako?” Ibwiinguzi mbwakuti, ‘Ngooyo uuenda cakulondoka uuamba lusinizyo mumoyo wakwe.’ (Intembauzyo 15:1, 2) Masimpe, kusyomeka kwini-kwini, mbubwenya mbuli bube bumbi mbotwabandika kale, mbube mbwajisi muntu. Oobu bube bulatondezyegwa akaambo kakuyanda kugwasya ikutali kujana mpindu.

Sena muli bayeeyede ba Christina, ibakajana cipulasitiki cakajisi mali? Moyo wabo tiiwakali wakuyanda kuvwuba pe, pele wakali wakuyanda kukkomanisya Leza. Aboobo, ibakasweekelwa mali nobakapiluka, bakabaambila kuti mali aabo ajanika. Bakakkomana kapati akaambo kakusyomeka kwaba Christina. Abalo basikubalemba mulimo bakakkomana cakuti kumbele ba Christina bakabasumpula akubapa cuuno caatala kapati. Eelo kaka majwi aali mulugwalo lwa 1 Petulo 3:10, alasyomeka naati: ‘Kufwumbwa ooyo uuyanda buumi akubona mazuba mabotu weelede kuujata mulomo wakwe kukwaamba lweeno!’

Zyeelelo zyakulilemeka zijanika mu Bbaibbele zitondezya luyando lwini-lwini ndwajisi Mulengi wesu kulindiswe, nkaambo zyeelelo eezyi zitupa kucikonzya ‘kweenda munzila zyabantu babotu.’ (Tusimpi 2:20; Isaya 48:17, 18) Kuti twabutobela busolozi oobo, tuyootondezya kuti tulamuyanda Mulengi wesu alimwi tuyoojana zilongezyo zinji. Mubwini, Bbaibbele lyaamba cisyomezyo eeci cakuti: “Bamba inzila yakwe, lino ulakusumpula kuti ukone nyika, nkabela uyoobona lunyonyooko lwabasizibi.”—Intembauzyo 37:34.

Eelo kaka bayoolongezyegwa kapati aabo bapona kweelana azyeelelo zyamu Bbaibbele, ikupona munyika yaluumuno munoonyina bubi buli boonse! Kwaamba masimpe, tweelede kuzilanga-langa zyeelelo zyaambidwe mu Bbaibbele.