Cibalo 39

Leza Ulamubikkila Maanu Mwanaakwe

JESU wakalila eelyo mulongwe wakwe Lazaro naakafwa. Sena uyeeya kuti Jehova wakabijilwa eelyo Jesu naakapenga alimwi akufwa?— Ibbaibbele lyaamba kuti Leza ulakonzya ‘kukatazyigwa’ alimwi mane ‘akukalazyigwa’ azintu zicitika.—Intembauzyo 78:40, 41; Johane 11:35.

Sena inga weezyeezya mbocakamucisa Jehova naakali kulangilila Mwanaakwe ngwayanda kafwa?— Jesu wakalisinizyide kuti Leza tanaakali kuyoomuluba pe. Eeco ncecakapa kuti aambe majwi aakwe aakumanizya katanafwa aakuti: ‘Taata, ndabikka buumi bwangu mumaanza aako.’—Luka 23:46.

Jesu wakalisinizyide kuti wakali kuyoobusyigwa, kuti tanaakali kuyoosiigwa ‘mucikkalilo cabafwu,’ naa mucuumbwe. Naakabusyigwa Jesu, imwaapostolo Petro wakazubulula cakalembedwe mu Bbaibbele kujatikizya Jesu, naakati: “Taakamusiya mucikkalilo cabafu, mubili wakwe tiiwakabola pe!” (Milimo 2:31, Ci;  Intembauzyo 16:10) Mubili wa Jesu tiiwakakkala ciindi cilamfwu mucuumbwe kusikila nkoubola akutalika kununka.

Eelyo Jesu naakali anyika, wakabaambila nobaba basikwiiya bakwe kuti tanaakali kuyoofwa kwaciindi cilamfwu. Wakapandulula kuti wakali ‘kuyoojayigwa, pele wakali kuyoobusyigwa mubuzuba bwatatu.’ (Luka 9:22) Aboobo, basikwiiya tiibakeelede kugambwa pe eelyo Jesu naakabusyigwa. Pele sena bakagambwa?— Atubone.

Ciindi cakali kutandila ku 3 kiloko muli Bwasanu kumazuba eelyo Mwiiyi Mupati naakafwa acisamu cakupenzezya. Josefa, mmuntu muvwubi wamu Nkuta Mpati, alimwi usyoma muli Jesu cakusisikizya. Naakamvwa kuti Jesu wafwa, wakaunka kuli Pilato, imweendelezi wa Roma. Wakamulomba kuti agusye mutumba wa Jesu acisamu cakupenzezya akuyoouzikka. Kuzwa waawo, Josefa wakabweza mutumba wa Jesu akuutola kumuunda kwakali cuumbwe, nkokuti ibusena ibuzikkilwa.

Imutumba nowakabikkwa mucuumbwe, kwakakunkulisigwa bbwe lipati kujala kumulyango. Aboobo cuumbwe cakajalwa. Lino bwakali buzuba bwatatu, nkokuti mu Nsondo. Tiilyakaninga pasula pe zuba, aboobo kwakacili kusiya. Aacuumbwe kwakali baalumi bakali kucigadela. Mbapaizi bapati ibakabatuma baalumi aabo. Sena ulikazyi kaambo ncobakacitila boobo?—

Abalo bapaizi bakalaamvwide makani aakuti Jesu wakaambide kuti wakali kuyoobusyigwa. Aboobo ikutegwa basikwiiya bakwe bataubbi mutumba wakwe mpoonya akwaamba kuti Jesu wakabusyigwa, bapaizi bakatuma basikulindila kuti baugadele. Ndilyonya, inyika yakatalika kuzuzuma. Mpoonya kwakaboneka kumweka mumudima. Wakali mungelo wa Jehova! Basikalumamba bakayoowa kapati cakuti bakaile kujilimana cabaalila kweenda. Imungelo wakaunka kucuumbwe akukunkulisya bbwe lyakajalide kumulyango. Icuumbwe cakanyina cintu mukati!

Inzya, cakali mbubwenya mwaapostolo Petro kumbele mbwaakazyi kwaamba kuti: “Oyu Jesu Leza wakamubusya.” (Incito 2:32) Leza wakamubusya Jesu kuzwa kubafwu akumupa mubili uuli mbubwenya mbuli  wooyo ngwaakajisi katana kuboola anyika. Wakabusyigwa kajisi mubili wamuuya mbuli wooyo uujisi bangelo. (1 Petro 3:18) Aboobo ikutegwa bantu bamubone Jesu, wakeelede kubaa mubili wanyama. Sena eeco ncaakacita?— Atubone.

Aciindi eeco izuba lyakalipasude. Basikalumamba bakaluunkide mwabo. Mariya Magadalene abanakazi bambi basikwiiya ba Jesu bakali kweenda kabaya kucuumbwe. Akati kabo bakali kubuzyanya kabati: ‘Ino nguni uuyootukunkulusizya bbwe eeliya lilemu?’ (Marko 16:3) Pele nobakasika kucuumbwe, bakajana ibbwe lyakalikunkulusidwe kale. Alimwi icuumbwe cakanyina cintu mukati! Imutumba wa Jesu wanyama tiiwakaciliko pe! Ndilyonya, Mariya Magadalene wakabalika kuyooyandaula bamwi babaapostolo ba Jesu.

Ibanakazi bamwi bakasyaala mpoona aacuumbwe. Bakatelaika kabati: ‘Ino mutumba wa Jesu waya kuli?’ Ndilyonya kwakaboneka baalumi bobile bakasamide zisani zimweka kapati. Bakali bangelo! Bakaambila banakazi kuti: ‘Ino nkaambo nzi ncomumuyandawida waano Jesu? Wakabusyigwa. Kamuya mufwambaane mukabaambile makani aaya basikwiiya bakwe.’ Inga weezyeezya mbobakalunduka kapati banakazi aabo! Kabali munzila, kwakabaswaanganya mwaalumi umwi. Sena ulimuzyi kuti wakali ni?—

Wakali Jesu, kali amubili wanyama! Awalo wakaambila banakazi kuti: ‘Kamuya mukaambile basikwiiya bangu.’ Ibanakazi aabo bakakkomana kapati. Bakabajana basikwiiya, eelyo bakabaambila kuti: ‘Jesu mmuumi! Twamubona!’ Mariya wabaambila kale ba Petro a Johane kuti mucuumbwe kunyina cintu. Lino bakaunka kucuumbwe mbubwenya mbobona aawa mucifwanikiso. Bakalanga-langa masila oomo Jesu mwaakavwungidwe, pele cakabakatazya kuzyiba cini cakacitika. Bakali kuyandisya kusyoma kuti Jesu wakali muumi alimwi, pele cakali kulibonya kuti tacikonzyeki kucitika.

Aciindi cimbi mubuzuba mboonya oobo bwamu Nsondo, Jesu wakalibonya kuli basikwiiya bakwe bobile ibakali kweenda mumugwagwa uutozya kumunzi wa Emau. Jesu wakeenda alimwi akwaambaula ambabo,  pele kunyina nobakamuzyiba nkaambo tanaakajisi mubili wanyama uuli mbuli ngwaakajisi kusaanguna. Tiibakamuzyiba pe kusikila ciindi Jesu naakalya cakulya akupaila ambabo. Basikwiiya bakakkomana kapati cakuti bakapiluka cakufwambaana kuya ku Jerusalemu imusinzo wamakkilomita manji! Kulangilwa kuti mbocakacitikila buyo eeci nceciindi Jesu naakalibonya kuli Petro kumutondezya kuti Mmuumi.

Mpoonya buzuba oobo mboonya bwamu Nsondo imangolezya, basikwiiya banji bakabungana muŋanda imwi. Imilyango yakalijalidwe. Ndilyonya cakutayeeyelwa, Jesu wakalibonya akati kabo muŋanda! Lino bakazyiba kuti ncobeni Mwiiyi Mupati mmuumi alimwi. Kociyeeyela buyo mbobakakkomene!—Matayo 28:1-15; Luka 24:1-49; Johane 19:38–20:21.

 Kwamazuba aali 40 Jesu wakalibonya mumibili yanyama yiindene-indene ikutegwa abasinizye basikwiiya bakwe kuti wakali muumi. Mpoonya wakaisiya nyika akupilukila kuli Bausyi kujulu. (Incito 1:9-11) Ndilyonya basikwiiya bakatalika kwaambila bantu boonse kuti Leza wakamubusya Jesu kuzwa kubafwu. Neliba leelyo bapaizi nobakabauma alimwi akubajaya bamwi, bakazumanana kukambauka. Bakalizyi kuti ikuti naa bafwa, Leza wakali kuyoobayeeya mbubwenya mbwaakamuyeeya Mwanaakwe.

Elo aabo basikutobela Jesu bakusaanguna bakaliindene kapati kaka abunji bwabantu sunu! Mumasena amwi aamunyika, ibantu inga bayeeya buyo zyabasulwe baa Isita amayi aa Isita aapentedwe aciindi camwaka Jesu naakabusyigwa. Pele kunyina Bbaibbele ncolyaamba aamakani ajatikizya basulwe amayi aabelesyegwa lya Isita. Lyalo lyaamba zyakubelekela Leza.

Tulakonzya kuba mbuli basikwiiya ba Jesu kwiinda mukwaambila bantu kuti Leza wakacita cintu cibotu kapati naakabusya Mwanaakwe. Tatweelede kuyoowa pe, neliba leelyo bantu nobatukonga kutujaya. Ikuti naa twajayigwa, Jehova uyootuyeeya akutubusya mbubwenya mbwaakamubusya Jesu.

Sena tatukkomene kuzyiba kuti Leza ulabayeeya aabo ibamubelekela alimwi mane uyoobabusya kuzwa kubafwu?— Ikuzyiba zintu eezyi kweelede kutupa kuyanda kuzyiba mbotunga twamukkomanisya Leza. Sena ulizyi kuti tulakonzya ncobeni kumukkomanisya Leza?— Atwaabandike makani aaya mucibalo citobela.

Ikusyoma mububuke bwa Jesu kweelede kuyumya bulangizi bwesu alusyomo. Bala Incito 2:22-36; 4:18-20; alimwi a 1 Ba-Korinto 15:3-8, 20-23.

[Cifwanikiso icili apeeji 202]

Ino nkaambo nzi cuumbwe ncocitakwe cintu mukati? Ino ncinzi cacitika?

[Cifwanikiso icili apeeji 205]

Ino uyeeya kuti ba Petro a Johane bakali kuyeeya nzi?

[Cifwanikiso icili apeeji 206]

Aciindi camwaka naakabusyigwa Jesu, ino ncinzi bantu banji ncobayeeya? Pele ino yebo ncinzi ncoyeeya?