Bona nzibakaamba bapati bazikombelo atala ankondo ilikuchitika kuUkraine:

•   “Mupati wachikombelo chaRussian Orthodox uutegwa Patriarch Kirill, taakwe nzyakaamba pe atala akunjila changuzu nkuyakachita Russia muUkraine. . . . Chikombelo chakwe chili kuzumanana kwaamba makani aakubeja atala aUkraine alubo Putin ulikubelesya makani aaya kuti aambe kuti nkondo eeyi ilikabotu.”—EUobserver, March 7, 2022.

•   “Patriarch Kirill . . . wakaamba kuti, kunjila nkuyakachita Russia muUkraine kuli kabotu alubo wakayungizya kuti nkondo eeyi njiimwi nzila yakulwana chibi.”—AP News, March 8, 2022.

•   “Mumuvulo, mupati wachikombelo chaUkrainian Orthodox uutegwa Metropolitan Epiphanius I wakuKyiv, wakalongezya bantu bakwe kuti ‘bakalwane aamasoja aaRussia.’ . . . Alubo wakayungizya kuti kujaya masoja aaRussia teechibi pe.”—Jerusalem Post, March 16, 2022.

•   “lswe [tuba Ukrainian Council of Churches and Religious Organizations (UCCRO)] tulaagwasilizya masoja aaUkraine abaabo boonse balikulwanina nyika yesu. Zyoonse nzibalikuchita kuti bakwabilile Ukraine kuzwa kuli sinkondoma tulazilongezya alubo tulabakombela.”—UCCRO a Statement, February 24, 2022.

 Uyeeyaanzi? Ubonaanga zikombelo zilyaamba kuti zitobela chikozyano chaJesu Kristu zyeelede kusungwaazya bantu bazyo kuti baye kunkondo na? Bbayibbele lityeni?

Nzibalikwaamba bazikombelo atala ankondo kuzwa chiindi

 Kuzwa chiindi zikombelo zyalikwaamba kuti kulikabotu kuya kunkondo naakuti kusungwaazya zyankondo, kulubazu lumwi kazili kulwanina luumuno. Kwaminyaka myiingi, Bakamboni baJehova balikukuyubununa kuupa-wupa ooku kwazikombelo. Bona zimwi zikozyano zyaambidwe mumabbuku eesu.

•   Chiiyo chiti “The Crusades—A ‘Tragic Illusion’” chitondeezya kuti chikombelo chaRoman Catholic nchicho chakali kunembo kubantu bakajayigwa chalunya muzina lyaLeza alyaKristu.

•   “Catholic Church muAfrica” yakaamba chikozyano chitondeezya kuti zikombelo teezyakazwidilila pe kumaninsya nkondo nikuba kujayigwa kwabantu.

•   Zyiiyo ziti “Is Religion to Blame?,” “Religion’s Role in Man’s Wars,” achiti “Religion Takes Sides” zipandulula balupati-pati baCatholic, baOrthodox abaProtestant mbubalikusumpula mabazu woonse aanga alikulwana munkondo.

Zikombelo zyachiKristu zyeelede kusumpula nkondo na?

 Nzyaakayiisya Jesu: “Weelede kuyanda simukobonyoko mbubonya mbuli mboliyanda omwini.” (Matayo 22:39) “Amuzumanane kuyanda basinkondonyoko.”—Matayo 5:44-47.

 Nzyaakayiisya Jesu: “Bwami bwangu tabuli bwanyika eeyi. Ikuti Bwami bwangu nobwali bwanyika eeyi, ibabelesi bangu nobalwana kutegwa nditaabwi.” (Johane 18:36) “Boonse aabo babweza panga bayoojaigwa apanga.”—Matayo 26:47-52.

 Yeeya eezi: Kuti teekwakali kuyandikana kuti maKristu balwane kuti bakwabilile Jesu, ubonaanga kuli kamwi kaambo na kanga kalapa kuti balwane? Bala chiiyo chiti “Is War Compatible With Christianity?” kuti ubone kuti maKristu bakusaanguna bakatondeezya biyeni kuti balasyomeka kwiinda mukutobelezya chikozyano chaJesu anjiisyo zyakwe.

Niinzi zitazoochitike kuzikombelo zisumpula nkondo?

 Bbayibbele liyiisya kuti Leza uzoozikaka zikombelo zilyaamba kuti zyiiminina Jesu pesi kazitatobeli njiisyo zyakwe.—Matayo 7:21-23; Tito 1:16.

•   Bbuku lyaCiyubunuzyo litondeezya kuti Leza nguwe ulikupa kuti zikombelo zijaye “boonse buyo ibakajaigwa anyika.” (Ciyubunuzyo 18:21, 24) Kuti uzibe kuti nkamboonzi nikuli oobo, bala chiiyo chiti “Ino Babuloni Mupati Nguni?”

•   Jesu wakatondeezya kuti zikombelo zyoonse Leza nzyatayandi ziyoonyonyoonwa akaambo kamichito mibi njizichita mbuli munsamu uubolede uuzyala michelo iibolede ‘mbuugonkwa akusowelwa mumulilo.’ (Matayo 7:15-20) Bala chiiyo chiti “Mamanino Aabukombi Bwakubeja Ali Afwaafwi!” kuti uzibe kuti eezi ziyoochitika biyeni.

Photo credits, kuzwa kuchimweensi kuya kuchilisyo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images