Mumuvulo kuseeni mu10 October 2022, masoja bakuRussia bakabbomba madolopo aamu-Ukraine akaambo kakuti bantu baku-Ukraine bakali babbomba bbilichi lijatanizya Crimea a-Russia mumazuba aabili aakali ayinda. Zyakachitika eezi, zyapa kuti bazyapolitikisi baambe kuti Amagedoni yaamba kusika.

•   “Kuzwa nikwakali kweendelezya [Mweendelezi waku-United States] John F. Kennedy achiindi nikwakali kubbombwa loko ku-Cuba taakwe mputwakali twalibona twaba aafwiifwi kuti Amagedoni ichitike. . . . Ndibonaanga kubelesya mabbomba aaya aanyukkiliya kuzoopa kuti Amagedoni ichitike.”—Mweendelezi wa-United States Joe Biden wakaamba majwi aaya mu6 October 2022.

•   “Ndibonaanga nkondo eeyi ilayeta Amagedoni alubo zilikuchitika zilikujeya nyika yoonse.”—Mweendelezi waku-Ukraine Volodymyr Zelensky wakaamba majwi aaya naakabuzigwa atala amapenzi aayetwa akaambo kakubelesya mabbomba aanyukkiliya aba-BBC News mu8 October 2022.

 Kubelesya mabbomba aanyukkiliya nkuko kuzoopa kuti Amagedoni ichitike na? Bbayibbili lityeni?

 Peepe. Bbala lyakuti “Amagedoni” lijanika kamwi biyo muBbayibbili muli Chiyubunuzyo 16:16. Talyaambi nkondo ilaakati kazisi pe, pesi lyaamba nkondo inooliwo aakati kaLeza ‘abaami banyika yoonse.’ (Chiyubunuzyo 16:14) Leza uzoobelesya nkondo ya-Amagedoni kuti amaninsye mfulumende zyabantu.—Daniele 2:44.

 Kuti ujane makani miingi atala akuti nkondo yaAmagedoni izoochitaanzi aanyika, bala chiiyo chiti Ino Nkondo ya Amagedoni Ninzi?

 Peepe. Nikuba kuti beendelezi bazoobelesya mabbomba aanyukkiliya muchiindi chilikunembo, Leza takazumizyi kuti nyika inyonyoonwe pe. Bbayibbili lyaamba kuti:

•   “Nyika inooliko lyoonse mane kukabe kutamani.”—Mukambausi 1:4.

•   “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

 Nikuba oobo, bupolofita bwamuBbayibbili azintu zilikuchitika lino zitondeezya kuti zintu zyaamba kuchincha aanyika. (Mateyo 24:3-7; 2 Timoti 3:1-5) Kuti kuyanda kwiiya nzilyaamba Bbayibbili atala azintu zizoochitika muchiindi chilikunembo kumbila kwiiya Bbayibbili kutabbadali.