Mfulumende zyiingi munyika yoonse zyakabikka mulawu wakuti bantu kabatantamukana akuti baleke kubunganaamwi. Bakamboni baJehova balayiswiilila milawu eeyi pesi bakayanduula zimwi nzila zyakuti kabanjila miswaangano yabo kabatalaamwi pe. Kuti bakonzye kuchita oobo, babelesya ma-application aali mbuli Zoom.

 Kuti twiinkilile kunembo katuchita miswaangano yesu, bamuKabunga Keendelezya bakasala kuti mali zisangwa zibelesegwe kuula ma-akkawunti aaZoom. Eezi zyakagwasya loko ikapati kumbungano zitakonzyi kujulisya ma-akkawunti aayo akaambo kakuti aayanda $15 kusika ku$20 naakuti kwiindaawo. Akaambo kakuti mbungano eezi teezyakali kukonzya pe kuula ma-akkawunti aaZoom, bakali kubelesya ma-application atabbadalwi, atakwabilidwe alubo aazumizya bantu bache kuti bajoyine miswaangano. Mbungano zibelesya ma-akkawunti aambunga zilikugwasigwa loko akaambo kakuti ma-akkawunti aayo alikwabililidwe alubo azumizya bantu biingi kuti bajoyine. Kusikila sunu, kuli mbungano zyiinda ku65 000 munyika zyiinda ku170 zilikubelesya ma-akkawunti aaya.

 Mbungano yaKairagi, kuManado kuNorth Sulawesi iili kuIndonesia, yakaleka kubelesya akkawunti iitabbadalwi akusaanguna kubelesya akkawunti yambunga. Mukwesu Hadi Santoso wakaamba kuti: “Nikuba bakwesu abachizi batakwe luzibo lwiingi atala akubelesya minchina yamazubaano, balakonzya kubotelwa aamiswaangano nkaambo ngabajoyina kamwi biyo kutali kujoyina kwaziindi zyiingi.”

 Lester Jijón, Jr., mwaalu kumbungano yaGuayacanes Oeste iili kuGuayaquil kuEcuador, wakaamba kuti: “Akaambo kakuti bakwesu abachizi biingi tabakwe mali pe, teebayinookonzya pe kuti bawule ma-akkawunti aZoom apa kuti mbungano yoonse iikonzye kunjila miswaangano. Pesi akaambo kama-akkawunti aaZoom ngitwakajulilwa ambunga twabukonzya kutamba bamwi kumiswaangano katutayoowi kuti namba yabantu beelede kujoyina ilakkwana.”

 Mukwesu Johnson Mwanza, mwaalu kumbungano yaNgwerere North kuLusaka kuZambia wakaamba kuti: “Bakwesu abachizi biingi bakkala kabaamba kuti ma-akkawunti aaZoom ngitwakajulilwa aambunga apa kuti tuswene aafwiifwi abakombima akuti tubone kuti Jehova ulatuyanda akuti ulaandaba andiswe.”

 Ma-akkawunti aayo awulwa aamali iibelesegwa kuti kwachitika mapenzi aalichitikila. Mali eeyi iizwa kuzipo zyakuliyandila zipegwa kuti zigwasilizye mumulimu wesu uuchitwa munyika yoonse. Zipo eezi zisangwa aajw.org, kuti watyanka aalembedwe kuti donate.jw.org. Tumulumba loko akaambo kakupa amoyo woonse alubo zipo eezi zipa kuti tukonzye kugwasya banga bachitikilwa amapenzi munyika yoonse.—2 Bakorinto 8:14.