1. Katanafwa mwaapostoli Petro, wakazulwidwa kuti achiteenzi?

 MWAAPOSTOLI Petro wakabelekela Jehova kasyomeka kwaminyaka myiingi. Wakali kweendaamwi aJesu mumulimu wakukambawuka. Wakazoosaanguna kukambawuka mundawu zyakali kukkala bantu bakatali maJuda. Alubo wakazoobeleka kali umwi wamukabunga keendelezya. Chiindi Petro naakaziba kuti wakali waba aafwiifwi kufwa, Jehova wakamupa mulimu mwiingi loko. Kuzwa kuma62 C.E., kusika kuma64 C.E., Petro wakazulwidwa kuti alembe Magwalo aabili, 1 Petro a2 Petro. Petro wakali kusyoma kuti, nikuba kuti wafwa, magwalo ngaakalemba akali kuzoogwasya maKkristu.—2 Pet. 1:​12-15.

2. Nkamboonzi magwalo aaPetro naakalembwa aachiindi cheelede?

² Petro wakazulwidwa kulemba magwalo chiindi bakombinyina nibakali kuswaana “mapenzi aasiyene-siyene.” (1 Pet. 1:6) Bantu babi bakali kweezya kuyiisya bantu njiisyo zyakubeja akubasungwaazya kuti batalijati kabotu mumbungano. (2 Pet. 2:​1, 2, 14) MaKkristu bakali kukkala muJerusalema bakali kulangilila “mamanino aazintu zyoonse,” nkukwaamba kuti masoja aakuRoma akali abaafwiifwi kuti anyonyoone muunzi waJerusalema. (1 Pet. 4:7) Zilaantanganana kuti magwalo aaPetro akagwasya maKkristu kuti babone nzibakali kukonzya kuchita kuti balisimye kumapenzi ngibakali kuswaana akuti balibambile mapenzi ngibakali kuzooswana kunembo. b

3. Nkamboonzi nikuyandikana kuti tulange-lange magwalo aaPetro?

³ Nikuba kuti Petro wakalembela maKkristu bakusaanguna  magwalo aaya, pesi Jehova wakapa kuti magwalo aayo abikkwe muJwi lyakwe kuti atugwasye andiswe. (Rom. 15:4) Tulikupona munyika iilaabantu batalijati kabotu alubo tulikuswaana mapenzi aakonzya kupa kuti kutuyumine kukomba Jehova. Alubo lino-lino tuzooswaana mapenzi mapati aayinda ngibakaswaana maJuda. Mumagwalo aabili aaPetro, tujana ziyeekezyo ziyandikana loko. Ziyeekezyo eezyo zitugwasya kuti tukkale katulindila buzuba bwaJehova, tuzunde penzi lyakuyoowa bantu akuti tuyandane loko abakombima. Alubo ziyeekezyo eezi zigwasya baalu kuti bazwidilile kweembela butanga.

4. Kweendelana alugwalo lwa 2 Petro 3:​3, 4, niinzi chikonzya kumaninsya lusyomo lwesu?

⁴ Tupona aabantu batabusyomi pe bupolofita buli muBbayibbili. Basikukazya balakonzya kutuseka akaambo kakuti twaba aaminyaka myiingi katulindila mamanino aanyika eeyi. Bamwi baamba kuti taakwe naatazoosike pe mamanino. (Bala 2 Petro 3:​3, 4.) Kuti twamvwa bantu mbitukambawukila, mbitubelekaabo naakuti bamumpuli kabaamba makani aaya, lusyomo lwesu lulakonzya kucheya. Petro wakaamba zintu zikonzya kutugwasya.

5. Niinzi zikonzya kutugwasya kuti tukkale katuli aamaboneno aalikabotu chiindi nitulindila mamanino aanyika eeyi? (2 Petro 3:​8, 9)

⁵ Kulakonzya kubonekaanga Jehova ulikunonoka kunyonyoona nyika eeyi mbi. Majwi ngaakaamba Petro, alakonzya kutugwasya kuti tukkale katuli aamaboneno aalikabotu akutuyeezya kuti nzila njachibonaayo chiindi Jehova ilisiyene ambutuchibona. (Bala 2 Petro 3:​8, 9.) Minyaka iili 1 000 ili mbuli buzuba bumwi kuli Jehova. Jehova ulaamoyo mulamfu, tayandi pe kuti anyonyoone nikuba muntu uumwi. Buzuba bwakwe nibwazoosika, nyika eeyi izoonyonyoonwa. Tuli aachilongezyo chipati chakuti tubelesye chiindi chesu chasyaala kuti tukambawukile bantu bazisi zyoonse.

6. Niinzi nzitukonzya kuchita kuti tukkale ‘katuyeeyesesya kubawo’ kwabuzuba bwaJehova? (2 Petro 3:​11, 12)

⁶ Petro wakatusungwaazya kuti ‘tuyeeyesesye kubawo’ kwabuzuba bwaJehova. (Bala 2 Petro 3:​11, 12.) Biyeni? Kuti kazichita, buzuba abuzuba tuyeeyesesye atala azilongezyo nzituzoojana munyika mpya. Libone kuli kuyoya moya uulikabotu, kulya chakulya chiyaka mubili, kutambula babbululu bako banga balikubusigwa akuyiisya bantu bakafwa chiindi loko bupolofita bwamuBbayibbili kabutanazuzikizigwa. Kuyeeyesesya atala azintu eezi kulakonzya kukugwasya kuti ukkale kulindila akuti ube aachoonzyo chakuti mamanino azoosika. Kwiinda mukuba “aaluzibo oolu” atala alyajuunza lyesu, ‘tatukapambulwi pe’ abayiisi bakubeja.—2 Pet. 3:17.

7. Kuyoowa bantu kupa kuti tuchiteenzi?

⁷ Mbukunga tulizi kuti buzuba bwaJehova bwaba aafwiifwi, tuyanda kuchita zyoonse nzitukonzya kuti tukambawukile bamwi makani mabotu. Chimwi chiindi tulakonzya kukachilwa kuchita oobo. Nkamboonzi? Nkaambo ngatulikuyoowa bantu. Eezi zyakachitika kuli Petro. Mubusiku Jesu katanafwa, Petro wakakaka kuti wakali umwi wabasikwiiya baJesu alubo kwaziindi zyiingi wakaamba kuti tamuzi pe Jesu. (Mt. 26:​69-75) Mukuya kwachiindi, Petro wakazoolizunda penzi lyakuyoowa bantu alubo wakazoolemba kuti: “Mutaziyoowi pe nzibayoowa naakuti kukataazikana.” (1 Pet. 3:14) Majwi aaPetro atondeezya kuti andiswe tulakonzya kuzunda penzi lyakuyoowa bantu.

8. Niinzi chikonzya kutugwasya kuti tuzunde penzi lyakuyoowa bantu? (1 Petro 3:15)

⁸ Niinzi chikonzya kutugwasya kuti tuzunde  penzi lyakuyoowa bantu? Petro utubuzya kuti: “Amusalazye Kkristu mbuli Mwaami mumyoyo yanu.” (Bala 1 Petro 3:15.) Eezi ziswaanizya kuyeeyesesya atala achuuno amanguzu ngalaawo Mwaami wesu Kkristu Jesu. Kuti kuyoowa kukambawukila bamwi makani mabotu chiindi nwaajana mweenya, yeeya Mwaami wesu. Mubone kalikweendelezya kujulu kazyungulukidwe aangilozi zyiingi loko. Utalubi kuti Jesu ‘ulaamanguzu woonse kujulu aanyika,’ akuti unooli “[aandiswe] mazuba woonse kusikila kumamanino aabwiime bwazintu.” (Mt. 28:​18-20) Petro wakatusungwaazya kuti ‘chiindi choonse katulibambilide’ kubuzya bamwi atala azintu nzitusyoma. Ulayanda na kukambawuka kumulimu, kuchikolo naakuti kufumbwa mpuwajana mweenya? Yeeya mbukonzya kuzichita mpawo ulibambile nzuyoowamba. Kombela kuba aachibindi alubo usyome Jehova kuti ulakugwasya kuti utayoowi bantu.—Mil. 4:29.

9. Aali chimwi chiindi, Petro wakakachilwa biyeni kutondeezya luyando? (Langa pikicha.)

⁹ Petro wakayiya mbakonzya kutondeezya bamwi luyando. Wakaliwo chiindi Jesu naakaamba kuti: “Ndilikumupa mulawu mupya wakuti muyandane. Mbuli mbundakamuyanda, andinywe amuyandane.” (Joh. 13:34) Nikuba oobo, Petro wakakachilwa kutondeezya bamwi luyando chiindi naakakaka kulya aabakombinyina  bakatali maJuda. Mwaapostoli Pawulu wakaamba kuti nzyaakachita Petro nkuupa-wupa. (Gal. 2:​11-14) Petro wakazumina kululamikwa mpawo wakabambulula. Mumagwalo aakwe aabili, Petro wakasimya kaambo kakuti tatweelede kujinkila kukwaamba kuti tulabayanda bakwesu abachizi pesi tweelede kuzitondeezya.

10. Niinzi zikonzya kutugwasya kuti tube ‘aaluyando lwabuzyalwama lutali lwakuupa-wupa’? Pandulula. (1 Petro 1:22)

¹⁰ Petro wakaamba kuti tweelede kutondeezya bakombima ‘luyando lwabuzyalwama lutali lwakuupa-wupa.’ (Bala 1 Petro 1:22.) Tuba aaluyando oolu kwiinda “mukuswiilila kasimpe.” Kasimpe aaka kaswaanizya njiisyo yakuti “Leza tasaluuli pe.” (Mil. 10:​34, 35) Tatukonzyi pe kwaamba kuti tulawuswiilila mulawu waJesu wakuti tuyandane kuti katusaluula bantu bakutondeezya luyando mumbungano. Nichoonzyo kuti tulakonzya kumvwanana loko abamwi kwiinda mbutuchita kuli bamwi mbuli mbaakachita Jesu. (Joh. 13:23; 20:2) Pesi Petro ulikutuyeezya kuti tubeleke changuzu kuti tutondeezye bakwesu abachizi boonse ‘luyando lwabuzyalwama’ nkaambo bali aakati kampuli yesu.—1 Pet. 2:17.

11. ‘Kubayanda loko bamwi kazizwa aansi aamoyo’ kuswaanizyaanzi?

¹¹ Petro wakatusungwaazya kuti ‘tuyandane loko kazizwa aansi aamoyo.’ Mulugwalo oolu, mabala aakuti ‘kuyandana loko’ aswaanizya kuyanda bamwi nikuba kakuli kuyumu kuchita oobo. Muchikozyano, niinzi nzukonzya kuchita kuti mukombinyokwe wakunyemya naakuti wakuchitila zintu zikuchisa loko? Zili mulindiswe biya kuti tuyande kubweedezya kutali kutondeezya luyando. Pesi Petro wakayiya kuzwa kuli Jesu kuti kubweedezya takumubotezyi pe Leza. (Joh. 18:​10, 11) Petro wakalemba kuti: “Mutabweedezyi chibi kuchibi naakuti kutukila akutukila. Pesi amubweedezye kwiinda mukulongezya.” (1 Pet. 3:9) Kuti katubayanda loko bamwi, tulabafwida luzyalo alubo tulabajata munzila iilikabotu nibaba aabo bakatunyemya.

12. (a) Kubayanda loko bamwi kupa kuti tuchiteenzi? (b) Wakanza kuchitaanzi mbuli mbukutondeezedwe muvidiyo itii, Amucikwabilile Cipego Citaliboteli Calukamantano?

¹² Mulugwalo lwakwe lwakusanguna, mwaapostoli Petro wakabelesya majwi ayeendelana aakuti “amuyandane loko.” Luyando luli boobu taluvimbi zibi ziche luzutu pesi luvumba “zibi zyiingi.” (1 Pet. 4:8) Kweelede kuti Petro wakayeeya chiiyo nchaakayiisigwa aaJesu muminyaka yakali yayinda chakali atala akulekelela. Aachiindi eecho, kweelede kuti Petro wakali kubonaanga wakali muntu uulekelela chiindi naakaamba kuti wakali kuzoolekelela mukombinyina kwaziindi “zili musanu azibili.” Pesi Jesu wakamuyiisya kuti alekelele kusikila “kuziindi zili 77,” nkukwaamba kuti wakeelede kulekelela chiindi choonse. (Mt. 18:​21, 22) Kuti kakukuyumina kubelesya malayilile aaya, utamani manguzu pe. Chimwi chiindi bakombi baJehova boonse ngakwabayumina kuti balekelele bamwi akaambo kakuti tabamaninide pe. Chintu chiyandikana loko nchakuti ubweze ntaamu yakuti ulekelele mukombinyokwe akuti ubambe luumuno anguwe. c

13. Niinzi chikonzya kupa kuti kubayumine baalu kuti basungwaazye bakwesu abachizi?

¹³ Kweelede kuti Petro taakaziluba pe nzyaakamubuzya Jesu kali wabusigwa. Jesu wakabuzya Petro kuti: “Yembela tubelele twangu.” (Joh. 21:16) Kuti kuli mwaalu, ulizi kuti malayilile aaya alabeleka akulinduwe. Chimwi chiindi, kulakonzya kumuyumina mwaalu kuti  achite mulimu ooyu uuyandikana loko. Baalu beelede kusaanguna kupa bamumpuli zyabo nzibayandikana kumubili, kupa kuti muntu woonse mumpuli amvwe kayandwa akugwasya mpuli zyabo kuti ziswene aafwiifwi aJehova. Alubo beelede kutola lubazu mumulimu wakukambawuka akulibambila zipanzi zyamiswaangano yambungano, yamabazu ayabbooma. Bamwi baalu bali mumakkomiti aakwaambuuzyania aabasilisi alubo bamwi balagwasilizya mudipatimenti lyakuyaka mayake aambunga. Kwaamba choonzyo, baalu bakkala kabajisikini.

14. Niinzi chikonzya kusungwaazya baalu kuti beembele butanga? (1 Petro 5:​1-4)

¹⁴ Petro wakasungwaazya baalunyina kuti: “Amweembele butanga bwaLeza.” (Bala 1 Petro 5:​1-4.) Kuti kuli mwaalu, tulizi kuti ulabayanda bakwesu abachizi akuti ulayanda kubagwasya muzintu zyabukombi. Chimwi chiindi, ulakonzya kujatikana naakuti kukatala zyakuti ulakonzya kukachilwa kuchita mulimu ooyu. Niinzi nzukonzya kuchita? Buzya Jehova mbulimvwa. Petro wakalemba kuti: “Kuti umwi muntu wabeleka, achite oobo mbuli kuti ubelesya manguzu aazwa kuli Leza.” (1 Pet. 4:11) Kulakonzeka kuti bakwesu abachizi balikuswaana mapenzi aatakonzyi pe kumana munyika eeyi. Pesi utalubi kuti “mweembeli mupati,” Jesu Kkristu ulakonzya kubagwasya kwiinda nzukonzya kuchita. Jesu ulakonzya kuzichita eezi lino amunyika mpya. Leza uyanda kuti baalu bayande bakombinyina, babeembele akuti babe “zikozyano kubutanga” kupela.

15. Umwi mwaalu ubweembela biyeni butanga bwaLeza? (Langa pikicha.)

¹⁵ William waba aachiindi chilamfu kali mwaalu. Ulizi mbukuyandikana kweembela butanga. Kkorona niyakasaanguna-saanguna, William abaalunyina bakakanza kuti bafonene sikupupulula umwi awumwi mutubunga twabo twakukambawuka mviki amviki. Wakaamba kaambo kakali kupa kuti bachite oobo, wakati: “Bakwesu abachizi biingi bakali kukkala aabalikke aang’anda alubo bakali kukonzya kuyeeya zintu zyakali kukonzya kubapambanisya mubukombi.” Kuti mukombinyina waswaana limwi penzi, Mukwesu William ulaswiilisisya kali aamakanze aakubona zintu zimukataazya ampayanda lugwasyo. Kuzwa waawo, ngawayanduula zikonzya kugwasya mukombinyina  ikapati mavidiyo aajanika aawebbusayiti yesu. William wakati: “Mulimu wakweembela butanga uyandikana loko lino kwiinda chiindi. Mbuli mbutubeleka changuzu kuti tugwasye bantu kuti bayiye atala aJehova, andiswe tweelede kubeleka changuzu kuti tweembele butanga, katugwasya bakwesu abachizi kuti bakkale kabali mukasimpe.”

16. Nga tulazibelesya biyeni zyiiyo nzitwayiya kuzwa mumabbuku aaPetro?

¹⁶ Twalanga-langa zyiiyo ziche biyo kuzwa mumagwalo aabili ngaakazulwidwa kulemba Petro. Amwi kuli mpuwabona mpuyelede kubambulula. Muchikozyano, zilachita na kuti uyeeyesesye atala azilongezyo nzuyoojana munyika mpya? Walibikkila chipeekezyo na chakuti ukambawuke kumulimu, kuchikolo naakuti aachiindi nwaajana mweenya? Kuli mpuwabona na mpukonzya kubambulula kuti utondeezye kuti ubayanda loko bakwesu abachizi? Nibaalu, mwakanza kweembela butanga bwaJehova kamuliyandila na? Kuti walilanga-langa munzila eeyi, ulakonzya kubona mpuyelede kubambulula pesi utamani manguzu pe. “Mwaami ulaaluzyalo,” alubo uyookugwasya kuti ubambulule. (1 Pet. 2:3) Petro wakatusungwaazya kati: “Leza . . . uzoomaninsizya lwiiyo lwanu. Uzoomusimya, uzoomupa manguzu, uzoomuzyatika.”—1 Pet. 5:10.

17. Tuzoojanaanzi kuti twakakatila akuzumizya Jehova kuti atuyiisye?

¹⁷ Aali chimwi chiindi, Petro wakali kulimvwa kateeleli pe kubaamwi aMwana waLeza. (Lk. 5:8) Pesi kwiinda mukugwasigwa aaJehova aJesu, Petro wakakakatila kuba mutobeli waKkristu. Eezi zyakapa kuti Petro ajane “chilongezyo chipati chakunjila muBwaami butamani bwaMwaami wesu aMufutuli, Jesu Kkristu.” (2 Pet. 1:11) Kwaamba choonzyo, eechi nchilongezyo chipati loko! Anduwe kuti wakakatila mbuli Petro akuzumizya Jehova kuti akuyiisye, uyoojana buumi butamani. Uyoojana ‘bulumbu bwalusyomo lwako, nkukwaamba lufutuko lwako’.—1 Pet. 1:9.