Bakwesu bakuBbeteli, bakabeleka kwachiindi chilamfu kuti bayake station yarediyo yaWBBR kuStaten Island, mudolopo lyaNew York City. Bakasaanguna kukukula ndawu mpawo bakayaka maanda mapati aababelesi alubo bakayaka ng’anda iimbi yakubikkila zibelesyo. Nwaakamana mulimu ooyu, bakwesu bakayanduula zibelesyo zyakali kuyandikana kuchitila kuti basaangune kupupulula aarediyo. Pesi kuli buyumu-yumu bwiingi mbubakeelede kubambulula.

Teekwakali kuuba pe kuti aastation aawa babikke bbusita lyakujata netiwekki. Bbusita eelyo lyakeelede kulampa kwamamita aali 91 mpawo lyaangilizigwe aazisamu zibili zilamfu kwamamita aali 61. Kumasaangunino, bakakachilwa. Kwiinda mukugwasigwa aaJehova, bakwesu aaba bakazoozwidilila. Calvin Prosser wakaliwo nikwakali kubikkwa bbusita eeli wakaamba kuti: “Kaansinga twakazwidilila nitwakeezya kakusaanguna, zyakali kukonzya kupa kuti tulidunde katwaamba kuti, ‘Ndiswe nitwazichita!’” Pesi bakwesu, bakazibona kuti bakazwidilila akaambo kakugwasigwa aaJehova. Nikuba oobo, kuli bumwi buyumu-yumu mbubakaswaana.

Kupupulula kakubelesegwa rediyo yakachili nzila mpya mazuba aayo alubo teekwakali kuuba pe kuti kuulwe zibelesyo zyakali kuyandikana kuti kupupululwe mulumbe. Nikuba oobo, bakwesu bakabelesya station yakali aafwiifwi yakayakidwe aawumwi. Nkinkaako, kwiinda kuti bawule microphone, bakabelesya fooni. MuFebruary bumwi buzuba mansiku, bakwesu bakasala kuti babone kuti zilabeleka na zibelesyo nzibakajana aastation eeyo. Kuti babone kuti station eeyo yakali kubeleka na, kwakali kuyandikana mulumbe wakeelede kupupululwa, nkinkaako, bakwesu bakayimba nyimbo zyaBwaami. Umwi mukwesu wakali aakati kabakwesu aaba bakali kubona kuti ilabeleka na minchina eeyo ngu-Ernest Lowe. Wakaamba  zintu zyamasesya zyakachitika mubuzuba oobo. Wakaamba kuti nibakachili kwiimba, bakafoonenwa aaMubetesi Rutherford. b Mukwesu Rutherford wakabamvwa kabalikwiimba aarediyo kali kuBrooklyn. Alubo kuzwa mpubakali kwiimbila bakwesu aaba kusika kuBrooklyn, kweendwa makkilomita aasika ku 25.

Mukwesu Rutherford wakaamba kuti, “Muumune mulikuchita musindo. Mulikuchitaanga ntungowe tulikulila!” Bakwesu aaba bakaba aabweeme alubo bakayimikizya pulogilamu chakufwambaana, pesi bakali baziba kuti rediyo eeyi yakali kubeleka akuti bakali balibambila kuti basaangune kupupulula.

Mu 24 February 1924, nibakasaanguna kupupulula bakwesu, Mukwesu Rutherford wakapeda station eeyi alubo wakaamba kuti “yakali kuyoobelesegwa mumulimu ngwaakabapa Mwaami Kkristu kuti bachite.” Wakaamba kuti makanze aastation yarediyo eeyi “ngakugwasya bantu boonse kuti bamvwisisisye Bbayibbili akuti babone mbuchiyandikana chiindi nchitulikupona.”

Nibakapupulula kakusaanguna, bakazwidilila loko. Bakombi baJehova bakabelesya pulogilamu eeyi kwaminyaka iili 33 kuti bapupulule mapulogilamu aabo.

MuJuly 1924, Basikwiiya Bbayibbili bakaba aamuswaangano kuColumbus, Ohio. Basikwiiya Bbayibbili bakazwa munyika zisiyene-siyene alubo bakaswiilizya nkani zyakali kupegwa muchi-Arabic, muChikuwa, muchiFrench, muchiGerman, muchiGreek, muchiHungarian, muchi-Italian, muchiLithuanian, muchiPolish, muchiRussian, imwi milaka yamuchiScandinavian amuchi-Ukrainian. Bamwi bakali kuswiilila nkani eezyo aarediyo alubo bakwesu bakachita mabambe aakuti bantu bakali kupupulula makani mupepa twaambo balembe atala ankani zyakali aapulogilamu yamuswaangano ooyu zyakali kupegwa buzuba abuzuba.

Muli Bwane 24 July, bakwesu abachizi bayinda ku 5 000 bakakambawukila bantu bakali kukkala aafwiifwi akwakali kuchitilwa muswaangano. Bakapa bantu mabbuku aasika ku 30 000 alubo bakasaanguna zyiiyo zyaBbayibbili zyiingi. Ngaziyakulinda yakaamba buzuba oobu kuti, “nchipanzi chamuswaangano chinoneezya loko.”

Muli Bwasanu 25 July, muliimwi nkani yakwe, Mukwesu Rutherford wakatondeezya chibindi kwiinda mukubala aamwi makani kalikusola bapati bazikombelo. Wakaamba kuti, bapati bazyapolitikisi, basimacheechi abasimabbizinesi “bakali kukachizya bantu kuti bayiye kasimpe kali atala aBwaami bwaLeza  kakonzya kubafutula.” Alubo wakaamba kuti baalumi aaba bakali kupambanisya loko “akaambo kakuti bakali kubbazu lyaLeague of Nations alubo bakali kwaamba kuti ‘njiyo nzila Leza njalikubelesya kuzulwida bantu.’” Basikwiiya Bbayibbili bakeelede kuba aachibindi chakuti batole mulumbe ooyu kubantu.

Mukuya kwachiindi, chimwi chiiyo chakali muNgaziyakulinda chakaamba kuti: “Muswaangano ooyu wakachitilwa kuColumbus wakasimya lusyomo lwabakwesu abachizi . . . , alubo wakapa kuti babe aabusungu achibindi chakuti bakambawuke nikuba kuti bamwi babakazya. Leo Claus wakanjila muswaangano ooyu wakaamba kuti: “Nwaakamana muswaangano twakali twalibambila kuti tukakambawuke mulumbe ooyu muchilawu chesu.”

Mu-October, Basikwiiya Bbayibbili bakasaanguna kupa bantu makkopi aakapepa kakubala kakali aamulumbe Mukwesu Rutherford ngwaakali wabala naakali kusola bapati bazikombelo. Mukadolopo kaniini kali mu-U.S.A., kategwa Oklahoma, Frank Johnson wakali wamaninsya kupa bantu makkopi aakapepa kakubala alubo wakeelede kulindila bakwesu abachizi kwamaminiti aali 20 kuti bazoomubweze. Wakali kukonzya kunjila mungoozi kuti wayimikila aandawu iiboneka nkaambo baalumi bamudolopo eeli bakalimunyemenede akaambo kakukambawuka nkwaakali kuchita. Mukwesu Johnson wakasala kuti ayube muliimwi cheechi yakali aafwiifwi. Taakwe muntu wakalimo pe mucheechi eeyo, nkinkaako, wakasiya makkopi aakapepa kakubala muBbayibbili lyamukambawusi alubo amwi makkopi wakaasiya aazyuuno. Wakachita eezi kalikufwambaana. Wakachili aamaminiti aambi aakasyeede, nkinkaako, wakachita zintu zikozyenie kumacheechi aambi aabili.

Mukwesu Frank wakabweeda kundawu nkubakeelede kumubwezela bakwesu abachizi. Wakayuba mpuzyakali kunywida mafuta moota kumwi kayuna kuti abone baalumi aabo bakali kumutobela. Baalumi aabo nibakasika teebakamubona pe. Nibakayinda, bakwesu abachizi bakali kukambawukila kubbazu eelyo bakasika kuti bazoomubweze amoota mpawo bakeenda.

Umwi mukwesu ngubakalaawe wakati, “twayinda macheechi aatatu. Aacheechi imwi ayimwi kwali bantu basika ku 50 bayimvwi aanze kunembo aacheechi. Bamwi bali kubala tupepa mpawo bamwi balikututondeezya mukambawusi. Twafwambaana kuzwa aandawu eeyo kuti tutanjili mupenzi! Twamulumba Leza wesu akaambo kakuti watukwabilila akuti watupa busongo bwakuti tukambawukile basinkondoma makani aaBwaami.”

Basikwiiya Bbayibbili bamulizimwi nyika ambabo bakakambawuka kabali aachibindi. KuFrance nkwiili kunyika, mukwesu Józef Krett wakakambawukila bantu bakali kubeleka kumayini bakali kuzwa kuPoland. Wakali kuyanda kupa nkani yakali kuti, “Bafwide Baba Aafwiifwi Kubusigwa.” Chiindi bakwesu abachizi nibakali kupa bantu bamudolopo eelyo tupepa twakutamba, mupayizi wamundawu eeyo wakabuzya bantu mbaakali kunjilaabo cheechi kuti batazumini pe kuyooswiilila nkani eeyo. Pesi nzyaakabuzya bantu kuti bachite, teenzizyo nzibakachita pe. Bantu bayinda ku 5 000 bakaswiilizya nkani eeyo kuswaanizya amupayizi ooyo. Mukwesu Krett wakakumbila mupayizi ooyo kuti azooyiminine nzyasyoma, pesi mupayizi ooyo wakakaka. Niyakamana nkani, Mukwesu Krett wakapa bantu boonse mabbuku ngaakalaawo akaambo kakuti bakali aachiyandisyo chakumvwa zyiingi atala aJwi lyaLeza.—Am. 8:11.

Mukwesu Claude Brown nguwe wakatola makani mabotu mu-Africa kuGold Coast, lino iitegwa Ghana. Bantu biingi bakamvwa kasimpe akaambo kakuti wakali kupa nkani zyiingi alubo wakasiya mabbuku kubantu bamunyika eeyo. John Blankson wakali kuyiila mulimu wazyabusilisi, wakaswiilila imwi nkani yaMukwesu Brown. Naakazwa aakuswiilila nkani eeyo, wakalimvwa kuti lino wajana kasimpe. John Blankson wakaamba kuti, “Kasimpe aaka kakapa kuti ndibotelwe  loko alubo ndakali kukabuzya bantu biingi mbindakali kuswaana kuchikolo.”

John wakali wamvwisisisya kuti njiisyo yabutatu tayizwi muBbayibbili pe. Nkinkaako, bumwi buzuba wakaswaya cheechi ya-Anglican mpawo wakabuzya mupayizi nkani eeyi. Mupayizi ooyo wakamwaanda kalikumupopotela kati: “Tuli muKkristu pe uzwa kuli Dyabbulosi. Bbuda oomuno!”

Naakasika kung’anda, John wakalembela mupayizi lugwalo kalikumubuzya kuti azooyiminine nkani yabutatu aabungene bantu biingi. Mupayizi ooyo wakabuzya John kuti ayinke kumuyiisi kuchitila kuti muyiisi ooyo akamvwisisisye kuti wakali walembela mupayizi na lugwalo chachoonzyo. Muyiisi naakabuzya John, John wakasandula kati:

“Iiyi ndakalemba lugwalo.”

Muyiisi wakabuzya John kuti alembele mupayizi lugwalo lumbi lwakukumbila lulekelelo. Nkinkaako, John wakalemba eezi:

“Muyiisi wandibuzya kuti ndimulembele lugwalo lwakuti mundilekelele, ndililibambilide kulemba lugwalo oolu kuti mwasaanguna kuzumina kuti zintu nzimuyiisya nzyakubeja.”

Muyiisi ooyo wakayoowa mpawo wakabuzya kati, “Blankson, nzizyo na nzuyanda kulemba eezi?”

John wakasandula kati, “Iiyi Muyiisi nzizyo nzindiyanda kulemba.”

Muyiisi ooyo wakati, “Balakwaanda aachikolo eechi kuti uyinkilile kunembo kulikwaamba zintu zitali kabotu pe atala amupayizi ooyu nkaambo mfulumende ilachisumpula chikombelo eechi.”

John wakasandula kati, “Pesi, Muyiisi, . . . kuti kamulikutuyiisya mpawo teetwamvwisisisya pe, nga mwatukasya na kubuzya mibuzyo?”

Pesi muyiisi wakati, “Inee, mulazumizigwa kubuzya.”

Mpawo John wakati, “Muyiisi nzizyo zyakachitika eezi. Mubili-bili wakali kutuyiisya Bbayibbili mpawo ime ndakabuzya mubuzyo. Kuti wakakachilwa kusandula mubuzyo, nkamboonzi ime nindeelede kumulembela lugwalo lwakuti andilekelele?”

Blankson takaandwa pe aachikolo. Alubo taakwe lugwalo pe lwakukumbila lulekelelo ndwaakatola kumupayizi.

Niyakali kufwiinsya zyakachitika mumunyaka ooyu, Ngaziyakulinda yakaamba kuti: “Tulakonzya kwaamba majwi akaambwa aaDavida aakuti: ‘Yebo uyoondipa kuba anguzu zyakulwana munkondo.’ (Int. 18:39) Munyaka ooyu wakatusungwaazya loko nkaambo twakabona Leza mbaakatugwasya mumulimu wakwe . . . Bakombi bakwe basyomeka . . . bakabotelwa nibakali kukambawuka makani mabotu.”

Kumamanino aamunyaka, bakwesu bakazwa aamuzeezo uumbi wakuti kube station yarediyo iimbi. Station eeyo yakayakilwa aafwiifwi adolopo lyaChicago, mu-U.S.A. Station mpya eeyi yakali kwiitwa kuti WORD. MuChitonga yaambwa kuti JWI akaambo kakuti bakali kukambawuka kababelesya Jwi lyaLeza aarediyo. Aachiindi eechi, bakabelesya munchina wakali aanguzu loko wakali kupa kuti bantu bakali kukkala kule loko mbuli kuCanada nkwiili kunyika bamvwe mulumbe waBwaami.

Mumunyaka wa 1925, Jehova wakagwasya bakwesu kuti bamvwisisisye njiisyo mpya iili atala a Chiyubunuzyo chaandaano 12. Akaambo kanjiisyo eeyi mpya, bamwi bakaleka kukomba Jehova. Pesi biingi bakabotelwa nkaambo bakali bamvwisisisya zintu zyakachitika kujulu akuti zibajatikizya biyeni bakombi baLeza bali aanyika.