Mibuzyo Yabasikubala
Kuli chimwi chakulya na nchibakalaacho ma-Israyeli munkanda chitali mana abakanchele?
▪ Kwaminyaka iili 40 kabali munkanda, chiindi chiingi ma-Israyeli bakali kulya mana. (Kul. 16:35) Alubo kwaziindi zibili, Jehova wakabapa bakanchele. (Kul. 16:12, 13; My. 11:31) Nikuba oobo, kuli chimwi chakulya nchibakalaacho nchibakali kulya ma-Israyeli.
Muchikozyano, chimwi chiindi Jehova wakali kuzulwida bakombi bakwe ‘kubusenwa bwakulyookezya’ nkubakali kukonzya kujana chakulya amaanzi. (My. 10:33) Imwi ndawu eeyo ni-Elimu “ooko ikwakali tusensa twamaanzi tuli 12 atukunka tuli 70.” (Kul. 15:27) Bbuku litegwa Plants of the Bible lyakaamba kuti “tukunka ntuto tujanika loko munkanda, . . . alubo bantu nga balya bana batukunka ooto, bajana mafuta azisamu zyakuyasya maanda.”
Kweelede kuti ma-Israyeli bakali bayimikila aakasensa kazibikene kuti Feiran mazubaano. Kasensa aako kajanika muMulonga waFeiran. a Limwi bbuku lyakaamba kuti, “Mulonga ooyu mulamfu kwamakkilomita aali 130 alubo nguumulonga mulamfu loko kwiinda milonga yoonse. Mumbali aamulonga ooyo kuli misamu mibotu loko alubo ulaakati kamilonga iizibikene loko kuSinayi.” Bbuku eeli lyakayungizya kuti, “Kuti muntu weenda kwamakkilomita aali 45 kuzwa mulonga ooyu mpuuswaaninana aalwizi ulasika kuKasensa kaFeiran. Kasensa aaka kuyeeyelwa kuti kanikide kwamamita aali 610 alubo busasa bwako nkalamfu kwamakkilomita aali 4,8. Kasensa aaka kazyungulukidwe aatukunka alubo kwaambwa kuti nkabotu mbuli muunda wa-Edeni. Bantu baba aaminyaka myiingi kabasika kuti bazooyebe tukunka ootu.”
Tukunka tuli mukasensa kaFeiran
Ma-Israyeli nibakali kuzwa mu-Ijipita bakabweza fulawa iikandidwe, zyakukandila fulawa alubo kuyeeyelwa kuti bakabweza zilyo amafuta. Nikuba oobo, zintu eezyo zyakafwaambana kumana. Bantu bakabweza “ambelele alimwi aŋombe, itanga lipati lyabanyama.” (Kul. 12:34-39) Akaambo kakuti zyiimo tazili kabotu pe munkanda, bamwi banyama bakafwa. Bamwi bakali kuligwa ama-Israyeli, bamwi bakapayizigwa nikuba kuli baleza bakubeja. b (Mil. 7:39-43) Nikuba oobo, ma-Israyeli bakali kuvuba bamwi banyama, mbuli mbukwaambidwe mumajwi Jehova ngaakabuzya ma-Israyeli kali kubabuzya atala akucheya lusyomo nkubakalaako naakati: “Bana banu bayooba beembezi munkanda myaka iili 40.” (My. 14:33) Kulakonzeka kuti zivuubwa nzibakalaazyo zyakali kupa kuti bajane malili alubo chimwi chiindi bakali kulya nyama. Pesi tazyaambi kuti banyama mbibakalaabo bakali kukonzya kusanina bantu basika ku3 miliyoni kwaminyaka iili 40. c
Nkuukuli nkubakali kujana chakulya amaanzi aabanyama? d Muchiindi eecho, mvula yakali kuwa alubo masokwe akali kujanika munkanda. Bbuku litegwa Insight on the Scriptures, Voliyumu 1 lyaamba kuti, muminyaka iili 3 500 yayinda “maanzi aakali kujanika mu-Arabbiya akali miingi loko kwiinda maanzi aaliwo lino. Kuvula kwamilonga yakayuminina kutondeezya kuti chiindi mvula yakali kuwa loko nkaambo yakali kuzuzya milonga.” Nikuba oobo, nkanda yakali chimpayuma zyakuti taakwe chakaliwo pe alubo yakali ndawu iiyoosya. (Dt. 8:14-16) Kaansinga Jehova taakachita chigambyo chakuti ma-Israyeli bajane maanzi achakulya, bantu abanyama bakali kunoofwa.—Kul. 15:22-25; 17:1-6; My. 20:2, 11.
Mozesi wakabuzya ma-Israyeli kuti Jehova wakabasanina aamana kuchitila kuti abazibye “kuti teensi cinkwa cilikke ncaponena muntu, pele ulapona amajwi oonse aazwa kumulomo wa Jehova.”—Dt. 8:3.
a Langa Ngaziyakulinda yaChikuwa yamuMay 1, 1992, pp. 24-25.
b Kwaziindi zibili, Bbayibbili lyaambuula atala abanyama bakali kupayizigwa kuli Jehova munkanda. Chiindi chakusaanguna nikwakapayizigwa banyama, mpaachiindi Jehova naakali kusala bapayizi. Alubo chiindi chachibili mpaachiindi nikwakachitwa Pobwe lyaPasika. Zintu eezi zyakachitika mu1512 B.C.E., ma-Israyeli kabali baba aaminyaka iibili kabazwide ku-Ijipiti.—Lev. 8:14–9:24; My. 9:1-5.
c Kumamanino aaminyaka iili 40 kabali munkanda, ma-Israyeli bakabweza banyama biingi kuzwa kubantu mbibakali kuzunda munkondo. (My. 31:32-34) Nikuba oobo, bakayinkilila kunembo kabalya mana kusikila nibakanjila muNyika Yachisyomezyo.—Jos. 5:10-12.
d Taakwe aatondeezya kuti banyama bakali kulya mana, nkaambo Jehova wakabuzizye mu-Israyeli umwi awumwi kuti abweze mana njaakali kukonzya kumaninsya kulya.—Kul. 16:15, 16.
