CHIIYO 44
Yinkilila Kunembo Kusimya Bulangilizi Bwako
“Kolangila Jehova.”—INT. 27:14.
LWIIMBO 144 Amubikkile Maano Kubulumbu!
ZITAYIIGWE *
1. Mbuubuli bulangilizi mbwaakatupa Jehova?
JEHOVA wakatupa bulangilizi bubotu loko bwakuzoopona mane kukabe kutamani. Bamwi balangilila kuzoopona kujulu kabali zilenge zyamuuya zitafwi. (1 Kor. 15:50, 53) Tubiingi, tulangilila kuzoopona aanyika mane kukabe kutamani, katubotelwa alubo katutakwe malwazi. (Chi. 21:3, 4) Nikuba kuti tulangilila kuzoopona kujulu naakuti aanyika, toonse tulaabulangilizi bubotu loko.
2. Bulangilizi bwesu buyeeme aali alubo nkamboonzi nitwaamba oobo?
2 Kweendelana ambulibelesedwe muBbayibbili, bbala lyakuti “bulangilizi” lilakonzya kwaamba “kulangilila kuti kuzoochitike chintu chibotu.” Zintu nzitulangilila kunembo nzyachoonzyo nkaambo nguJehova wakasyomezya. (Rom. 15:13) Tulizizi nzyaakatusyomezya alubo nzyaamba ulazizuzikizya. (My. 23:19) Alubo Jehova ulaachiyandisyo amanguzu aakuzuzikizya zintu zyoonse nzyaakasyomezya. Nkinkaako, bulangilizi bwesu tabuyeeme aazintu nzitulombozya pe naakuti muzintu zyakuyeeyela, pesi buyeeme aabukamboni bwachoonzyo.
3. Tulalanga-langaanzi muchiiyo eechi? (Intembauzyo 27:14)
3 Taateesu wakujulu ulatuyanda alubo uyanda kuti tumusyome. (Bala Intembauzyo 27:14.) Kuti twaba aabulangilizi busimide muli Jehova, tulaba aachibindi chakulisimya kumapenzi woonse ngituswaana katubotelwa. Atubone mbubutukwabilila bulangilizi. Tulasaanguna kubona kuti bulangilizi bukozyenie biyeni angobyo angowani, mpawo kumamanino tuzoobona mbutukonzya kubusimya.
BULANGILIZI BULI MBULI NGOBYO
4. Nkamboonzi bulangilizi nibuli mbuli ngobyo? (Mahebberu 6:19)
4 Mulugwalo lwakwe ndwaakalembela maHebberu, mwaapostolo Pawulu wakakozyanisya bulangilizi angobyo. (Bala Mahebberu 6:19.) Akaambo kakuti Pawulu wakali kuvuzya kweenda aabwaato, wakalizi kuti ngobyo zyakali kubelesegwa kubatamika bwaato kuti butatolwi aaguwo. Aali chimwi chiindi naakali mubwaato, kwakaba guwo pati mulwizi. Mpawo wakabona basikweenzya bwaato kabali kuwaala ngobyo mumaanzi kuchitila kuti bwaato butatolwi akuyoowuminina aamabwe. (Mil. 27:29, 39-41) Munzila iikozyenie, bulangilizi bwesu bupa kuti tubatame akuti tutakukulwi pe akuzwa kuli Jehova chiindi nituli muzyiimo ziyumu. Bulangilizi bwesu busimide bupa kuti tulisimye muziindi eezyo ziyumu, nkaambo nga tulizi kuti zintu zizoobota kunembo. Tweelede kuyeeya kuti Jesu wakaamba kuti tuzoopenzegwa. (Joh. 15:20) Nkinkaako, kuyeeyesesya atala azintu zibotu nzyaakatusyomezya Leza, kupa kuti tubatame.
5. Bulangilizi bwakamugwasya biyeni Jesu naakali kuyanda kujayigwa?
5 Bulangilizi bwakagwasya Jesu kuti abatame chiindi naakalangene aalufu. Mubuzuba bwaPentekkoste yamu 33 C.E., mwaapostolo Petro wakabelesya majwi aabupolofita aajanika mubbuku lya-Intembauzyo, aatondeezya chibindi nchaakalaacho Jesu. Wakati: “Ndinookkede kandili aabulangilizi, nkaambo tuzoondisiyi muKabanda alubo tuzoolekeli uusyomeka wako kuti abole. . . . Uzoopa kuti ndikondwe loko kunembo lyako.” (Mil. 2:25-28; Int. 16:8-11) Nikuba kuti Jesu wakalizi kuti uzoofwa, wakali aabulangilizi bwakuti Leza uzoomubusya akupa kuti abotelwe lubo kubaamwi ampuli yaJehova yakujulu.—Heb. 12:2, 3.
6. Umwi mukwesu wakatyeni atala abulangilizi?
6 Bulangilizi mbutulaabo bwakagwasya bakwesu abachizi biingi kuti balisimye. Atubone chikozyano chamukwesu Leonard Chinn wakuEngland. Muchiindi chaNkondo Yanyika Yakusaanguna wakasungwa akaambo kakukaka kutola lubazu muli zyankondo. Kwamyeezi iibili wakabikkwa muchitookesi chakwe aalikke alubo wakazoopegwa milimu iiminia loko. Wakazoolemba kuti: “Zintu zyakandichitikila zyakandigwasya kubona mbubuyandikana bulangilizi kuti tukonzye kulisimya. Zyakachitwa aaJesu, baapostolo, bapolofita azisyomezyo zyaLeza zili muBbayibbili zitupa bulangilizi akutugwasya kuti tulisimye.” Bulangilizi bwakali mbuli ngobyo kuli Leonard, alubo bulakonzya kuba oobo akulindiswe.
7. Masunko abusimya biyeni bulangilizi bwesu? (Baroma 5:3-5; Jakkobo 1:12)
7 Bulangilizi bwesu bulasima kuti twayinda mumapenzi alubo Jehova ulabotelwa kuti twalisimya. (Bala Baroma 5:3-5; Jakkobo 1:12.) Akaambo kakuti twakayinda mumasunko, twakaba aabulangilizi busimide kwiinda mbutwakalaabo katuchisaanguna kutambula kasimpe. Saatani uyanda kuti masunko atumane manguzu, pesi kwiinda mukugwasigwa aaJehova, tulakonzya kulisimya kumapenzi woonse ngituswaana.
BULANGILIZI BULI MBULI NGOWANI
8. Bulangilizi bukozyenie biyeni angowani? (1 Batesalonikka 5:8)
8 Bbayibbili likozyanisya bulangilizi angowani. (Bala 1 Batesalonikka 5:8.) Musoja wakeelede kuzwaata ngowani kuchitila kuti alikwabilile kuzintu zyakali kuwaalwa aasinkondonyina. Munkondo yesu yabukombi, tweelede kukwabilila mizeezo yesu kuzintu ziwaalwa aaSaatani. Saatani utuwaalila masunko alubo uyanda kuti tuyeeye zintu zikonzya kutupambanisya. Mbuli ngowani iikwabilila mutwe wamusoja, bulangilizi bwesu bukwabilila mizeezo yesu kuchitila kuti tukkale katusyomeka kuli Jehova.
9. Niinzi zichitika kuti bantu babula bulangilizi?
9 Bulangilizi bwesu bwakuzoopona mane kukabe kutamani, bupa kuti tubelesye maanu chiindi choonse. Tulakonzya kuluba kuti kuzooba buumi butamani kunembo, kapati kuti bulangilizi bwesu bwazimaana akuti twasaanguna kuyeeya zintu zyanyama. Amuyeeye zyakachitika kumaKkristu bakuKkorinte chiindi. Bakabula lusyomo muchisyomezyo chaLeza chiyandikana, chakuti bafwide bazoobusigwa. (1 Kor. 15:12) Pawulu wakaamba kuti bantu batakwe bulangilizi bwakuzoopona muchiindi chilikunembo, baponena kukkutya ziyandwa aamibili yabo luzutu. (1 Kor. 15:32) Mazubaano, bantu biingi batakwe bulangilizi muzisyomezyo zyaLeza, bachita zyoonse nzibakonzya kuti bapakale kabatanafwa. Pesi iswe tubikka bulangilizi bwesu kubuumi buli kunembo mbwaakatusyomezya Jehova. Bulangilizi bwesu bubeleka mbuli ngowani iikwabilila mizeezo yesu, kuchitila kuti tutasali zyakulikondelezya zipambanisya bweenzuma mbutulaabo aJehova.—1 Kor. 15:33, 34.
10. Bulangilizi kujana bwatukwabilila biyeni kumizeezo iitali yachoonzyo?
10 Ngowani yesu yabulangilizi ilakonzya kutugwasya kuti tutabonaanga kweezya kubotezya Jehova takugwasyi pe. Muchikozyano, umwi ulakonzya kwaamba kuti: ‘Nikuba kuti ndachita biyeni, tandizoofwi ndaba aakati kabantu batazoopone mane kukabe kutamani, nkaambo milawu yaLeza tandiyikonzyi kale pe.’ Amuyeeye Elifazi mweenzinyina waJobu wakuupa-wupa, wakaamba majwi aali aamuzeezo uukozyenie kuli Jobu. Wakaamba kuti: “Ino muntu ngwani kuti asalale?” Alubo wakaamba zitali nzizyo atala aLeza, wakati: “Bona! Bangelo bakwe kunyina nabasyoma pe, alimwi naaba majulu taasalede pe mumeso aakwe.” (Job. 15:14, 15) Ooku nkubeja kusiya mbi! Saatani nguwe wakapa kuti Elifazi aambe majwi aayo, nkaambo ulizi kuti, kuti twabikkila maanu kuzintu zili boobu, bulangilizi bwesu bulazimaana. Utazumizyi mizeezo iili boobu iitali yachoonzyo kuti ikumane manguzu. Bikkila maanu kuzisyomezyo zyaLeza. Baachoonzyo chakuti Jehova uyanda kuti ukajane buumi butamani. Ulilibambilide kukugwasya kuti ukabujane.—1 Tim. 2:3, 4.
YINKILILA KUNEMBO KUSIMYA BULANGILIZI BWAKO
11. Nkamboonzi nitweelede kuba aamoyo mulamfu chiindi nitulindila Jehova kuti azuzikizye zisyomezyo zyakwe?
11 Teekuuba pe kuti tukkale katuli aabulangilizi busimide. Tulakonzya kubonaanga Leza wanonoka. Nikuba oobo, nzila njituchibonaayo chiindi ambachibona Jehova ilisiyene nkaambo Jehova tafwi pe. (2 Pet. 3:8, 9) Uzoowazuzikizya makanze aakwe munzila iilikabotu aachiindi chakwe, kutali aachiindi nchituyeeyela. Niinzi zitatugwasye kuti tukkale katuli aabulangilizi busimide nituchilinda Jehova kuti azuzikizye zisyomezyo zyakwe?—Jak. 5:7, 8.
12. Kweendelana alugwalo lwa Mahebberu 11:1, 6, bulangilizi bulyidilana biyeni alusyomo?
12 Bulangilizi bwesu bulasima kuti twaswena aafwiifwi aJehova, ooyo uutupa bulangilizi. Kwaamba choonzyo, Bbayibbili litondeezya kuti, kuli bulyidilano buliwo aakati kabulangilizi alusyomo. Mbukunga tulangilila kujana zilongezyo, tweelede kuba aalusyomo lwakuti Jehova mpali akuti, “ngusikubapa bulumbu aabo bamuyanduula aamoyo woonse.” (Bala Mahebberu 11:1, 6.) Kuti twasyoma kuti Jehova mpali choonzyo, tatukazumbuuzyi pe kuti uzoozichita zintu zyoonse nzyaakasyomezya. Lino atubone zimwi nzila mutukonzya kusimya bweenzuma bwesu aJehova akusimya bulangilizi bwesu.
Kukomba akuyeeyesesya kupa kuti tube aabulangilizi busimide (Langa fuka 13-15) *
13. Niinzi nzitweelede kuchita kuti tuswene aafwiifwi aLeza?
13 Komba kuli Jehova alubo ubale Jwi lyakwe. Nikuba kuti tatukonzyi pe kumubona Jehova, tulakonzya kuswena aafwiifwi anguwe. Tulakonzya kwaambuula aawe munkombyo katuli aachoonzyo chakuti ulatumvwa. (Jer. 29:11, 12) Tulakonzya kuswiilila Leza kwiinda mukubala Jwi lyakwe akuyeeyesesya atala azintu nzitubala. Chiindi nitubala makani aatondeezya Jehova mbaakakwabilila bantu bakwe basyomeka bachiindi, bulangilizi bwesu bulasima. Zintu zyoonse zili muJwi lyaLeza, “zyakalembelwa kuti tuyiisigwe, kuchitila kuti kwiinda mukulisimya aluumbulizyo luzwa muMagwalo, tube aabulangilizi.”—Rom. 15:4.
14. Nkamboonzi nitweelede kuyeeyesesya atala azintu Jehova nzyaakachitila bamwi?
14 Yeeyesesya atala amakani aatondeezya Jehova mbaakazuzikizya zisyomezyo zyakwe. Yeeya atala azintu Leza nzyaakachitila Abbrahamu aSara. Bakali bakomena zyakuti teezyakachili kuchita pe kuti babe aamwana. Nikuba oobo, Leza wakabasyomezya kuti bakali kuyooba aamwana. (Matl. 18:10) Abbrahamu wakachita biyeni? Bbayibbili lyaamba kuti: “Wakali aalusyomo lwakuti uzooba wisi wazisi zyiingi.” (Rom. 4:18) Nikuba kuti mumaboneno aabantu chiimo chakwe teechakachili kuchita pe, Abbrahamu wakali aachoonzyo chakuti Jehova uzoochizuzikizya chisyomezyo chakwe. Leza taakamusweesya pe mwaalumi ooyu uusyomeka. (Rom. 4:19-21) Makani aali boobu atuyiisya kuti, ziyume zitete Jehova uzoozizuzikizya zisyomezyo zyakwe nikuba kuti chimwi chiindi kulakonzya kubonekaanga takuchikwe bulangilizi.
15. Nkamboonzi nitweelede kuyeeyesesya atala azintu nzyaakatuchitila Leza?
15 Yeeyesesya atala azintu Jehova nzyaakakuchitila iwe lwako. Yeeya atala ambulikugwasigwa akuzuzikizigwa kwazisyomezyo zijanika muJwi lyaLeza. Muchikozyano, Jesu wakasyomezya kuti Wisi uzookupa ziyandikana zyamubuumi. (Mt. 6:32, 33) Jesu wakasyomezya kuti Jehova uzookupa muuya uusalala kuti wawukumbila. (Lk. 11:13) Jehova ulikuchita kweendelana azisyomezyo eezyo. Kweelede nga wayeeya zimwi zisyomezyo zilikuzuzikizigwa mubuumi bwako. Muchikozyano, Jehova wakasyomezya kuti uzookulekelela, uzookuumbulizya akukusanina mubukombi. (Mt. 6:14; 24:45; 2 Kor. 1:3) Kuti twayeeyesesya atala azintu nzyaakatuchitila Leza, nga twaba aachoonzyo chakuti ziyume zitete, zintu nzyaakasyomezya uzoozichita.
AMUBOTELWE AKAAMBO KABULANGILIZI
16. Nkamboonzi bulangilizi nibuli chipo chiyandikana?
16 Bulangilizi bwesu bwakuzoopona kukabe kutamani nchipo chiyandikana loko chizwa kuli Leza. Tulangilila zintu zili kunembo zibotezya, nzituli aachoonzyo kuti zizooba. Bulangilizi bwesu buli mbuli ngobyo, bulatubatamika kuchitila kuti tulisimye kumasunko, kukupenzegwa anitulangene aalufu. Alubo bulangilizi bwesu buli mbuli ngowani, bukwabilila mizeezo yesu kuchitila kuti tukake mizeezo iitali kabotu pesi tukakatile kuzintu zilikabotu. Bulangilizi bwesu bupa kuti tuswene aafwiifwi aLeza alubo butondeezya mbatuyanda Jehova. Kuti bulangilizi bwesu bwasima, tulatantamuka zintu zikonzya kutunjizya mumapenzi.
17. Nkamboonzi bulangilizi bwesu nibupa kuti tubotelwe?
17 Mulugwalo Pawulu ndwaakalembela maKkristu bakuRoma, wakaamba kuti: “Amubotelwe akaambo kabulangilizi.” (Rom. 12:12) Pawulu wakali kubotelwa nkaambo wakalizi kuti, do wayinkilila kunembo kusyomeka, wakali kuzoojana buumi butamani kujulu. Andiswe tulakonzya kubotelwa akaambo kabulangilizi mbutulaabo, nkaambo tuli aachoonzyo chakuti Jehova uzoozizuzikizya zisyomezyo zyakwe. Sintembawuzyo wakalemba kuti: “Ulikkomene ooyo . . . uulangila Jehova Leza wakwe, . . . Ooyo uusyomeka lyoonse.”—Int. 146:5, 6.
LWIIMBO 139 Amweezyeezye Kuti Muli Munyika Mpya
^ Jehova wakatupa bulangilizi bwakuzoopona mane kukabe kutamani. Bulangilizi oobu butupa manguzu alubo butugwasya kuti tulisimye kumapenzi ngituli kuswaana lino. Butugwasya kuti tusyomeke chiindi choonse kufumbwa mapenzi ngituswaana. Bukwabilila mizeezo yesu kuti tutayeeyi zintu zikonzya kutupambanisya. Mbuli mbututabone muchiiyo eechi, twaambo ootu tweelede kupa kuti tusimye bulangilizi bwesu.
^ BUPANDULUZI BWACHIFANIKISYO: Mbuli ngowani mbiikwabilila mutwe wamusoja angobyo mbiibatamika bwaato, bulangilizi bwesu bukwabilila mizeezo yesu alubo bulatubatamika muchiindi chamapenzi. Muchizi ulikukomba kali aachoonzyo chakuti Jehova ulamumvwa. Mukwesu ulikuyeeyesesya atala azisyomezyo Leza nzyaakazuzikizya kuli Abbrahamu. Mukwesu ulikuyeeyesesya atala azilongezyo nzyalikujana.
