1-2. (a) Beendelezi bazisi bayoowambilizyaanzi muchiindi chifwiifwi chili kunembo? (b) Njiili mibuzyo njitutasandule muchiiyo eechi?

YEEYELA beendelezi bazisi kabali baambilizya atala ‘aluumuno akuliiba.’ Bayoolisumpula nkaambo banooyeeya kuti bazwidilila kupa kuti munyika mube lukwabililo. Kuyungizya waawo, banooyeeya kuti balakonzya kumaninsya mapenzi woonse aali munyika. Pesi tabazookonzyi pe kukachizya zintu zitazoochitike kunembo. Nkamboonzi nibatazookachilwe? Bbayibbele lyaamba kuti, “Cakutayeeyela lunyonyooko luyoobasikila cakufwambaana, . . . eelyo tabakafwutuki abuniini pe.”​—1 Tes. 5:3.

² Muchiiyo eechi tulasandula mibuzyo iiyandikana loko yakuti: Niinzi chitakachitike muchiindi ‘chamapenzi mapati’? Jehova uyanda kuti tuzoochiteenzi muchiindi eecho? Alubo ngatulalibambila biyeni kuti tukakkale katusyomeka muchiindi chamapenzi mapati?​—Mt. 24:21.

3. Kweendelana amajwi aali muli Ciyubunuzyo 17:5, 15-18, Jehova uyoomunyonyoona biyeni “Babuloni Mupati”?

³ Bala Ciyubunuzyo 17:5, 15-18. “Babuloni Mupati” uyoonyonyoonwa. Mbuuli mbutwabona kumasaangunino, beendelezi bazisi tabazookonzyi pe kukachizya zintu zitazoochitike aachiindi eecho. Nkamboonzi? Nkaambo “Leza [uyoocibikka]  mumyoyo yabo kuti bazwidilizye muzeezo wakwe.” Nguuli muzeezo wakwe? Kunyonyoona bukombi bwakubeja boonse kuswaanizya aZikombelo Zyakubeja. * Jehova uyoobikka muzeezo wakwe mumyoyo ‘yameja aali kkumi’ “aamunyama uusalala pyu.” Meja aali kkumi ayiminina zisi zyoonse zilaamanguzu muli zyapolitikisi zisumpula ‘munyama,’ chaamba United Nations. (Ciy. 17:3, 11-13; 18:8) Aawo beendelezi bazisi nibaakubukila zikombelo zyakubeja, ziyootondeezya kuti mapenzi mapati asaanguna. Eezi ziyoobayoosya loko bantu boonse.

4. (a) Kubonekaanga niinzi zitakape kuti beendelezi bazisi babukile zikombelo zyakubeja? (b) Ani bantu bakali kunjila zikombelo eezyo balakonzya kuzoochitaanzi?

⁴ Tatuzi pe kuti niinzi chitakape kuti beendelezi bazisi bakabukile Bbabbiloni Mupati. Balakonzya kuyoowamba kuti bazikombelo bali kukachizya kuti munyika mube luumuno akuti bali kuliswaanizya loko muli zyapolitikisi. Kuyungizya waawo, balakonzya kuzooyeeya kuti bazikombelo balikujana bunoti bwiingi loko. (Ciyubunuzyo 18:3, 7) Kubonekaanga teebantu boonse pe bali muzikombelo zyakubeja batazoonyonyoonwe chiindi Bbabbiloni Mupati aakunyonyoonwa. Pesi kubonekaanga beendelezi bazisi bayoonyonyoona zikombelo zyakubeja. Kuti zikombelo eezyo zyanyonyoonwa, bantu bakali kunjila zikombelo eezyo balakonzya kuzoobona kuti bapati bazikombelo teebakabagwasya pe mpawo tabachinoolikwe ndaba pe anzizyo.

5. Jehova wakasyomezyaanzi atala achiindi chamapenzi mapati alubo nkamboonzi?

⁵ Bbayibbele litubuzya kuti kunyonyoonwa kwaBbabbiloni Mupati kunooli kwachiindi chifwiifwi pesi talitubuzyi pe kuti chinooli chifwiifwi biyeni. (Ciy. 18:10, 21) Jehova wakasyomezya kuti ‘uyoowafwiinsya mazuba’ amapenzi mapati kuchitila kuti ‘basale’ bafutuke akuti bukombi bwakasimpe bukafutuke. (Mk. 13:19, 20) Jehova uyanda kuti tuzoochiteenzi muchiindi chamapenzi mapati, chaamba kuzwa Bbabbiloni Mupati aakunyonyoonwa kusikila kunkondo yaArmagedoni?

6. Tweelede kuchitaanzi kutali kuleka kuliswaanizya abukombi bwakubeja luzutu?

⁶ Mbuuli mbutwakabona muchiiyo chakiinda, Jehova uyanda kuti bakombi bakwe bataliswaanizyi pe aBbabbiloni Mupati. Nikuba boobo, eezi zyaamba zyiingi kwiinda kutaliswaanizya abukombi bwakubeja luzutu. Tweelede kuzumanana kusumpula bukombi bwakasimpe. Atubone nzila zibili zikonzya kutugwasya kuti tuchite oobo.

7. (a) Nga tulakakatila biyeni kumilawu yaLeza yakulijata? (b) Kweendelana amajwi aali muli Bahebrayo 10:24, 25, nkamboonzi nikuyandikana kunjila miswaangano kapati mazubaano?

⁷ Chakusaanguna, tweelede kukakatila kumilawu yaJehova yakulijata. Tweelede kutantamuka michito yakutalijata iichitwa aabantu bali munyika. Muchikozyano, tatuyandi kuchita misyobo bwaamu, eezi ziswaanizya kukwatana kwabantu bakozyenie zizo naakuti kutobelezya michito yabo. (Mt. 19:4, 5; Rom. 1:26, 27) Chachibili, tweelede kukkala katunjila miswaangano yambungano. Tunjila miswaangano eeyi muMaanda aBwaami amumaanda abakwesu pesi kuti kakuli kuyumu tulakonzya kunjilila mundawu zisisikene. Kufumbwa zyachitika, tatweelede kuleka kunjila miswaangano yambungano. Tusungwaazigwa kuti tuzumanane kunjila miswaangano “ikapati [mbotubwene] kuti buzuba bwaswena afwaafwi.”​—Bala Bahebrayo 10:24, 25.

8. Mulumbe wesu ulakonzya kuzoochincha biyeni muchiindi chili kunembo?

⁸ Mulumbe ngutukambawukila bantu lino ulakonzya kuzoochincha muchiindi chamapenzi mapati. Lino tuli kukambawuka makani mabotu aBwaami alubo tulikuchita bantu kuti babe basikwiiya. Pesi muchiindi eecho, tulakonzya kuzoowambilizya mulumbe uuyoosya mbuuli chivulamabwe. (Ciy. 16:21) Tulakonzya kuzoowambilizya atala akunyonyoonwa kwanyika yaSaatani. Mukuya kwachiindi, tuyooziba kuti mulumbe ngututanoowambilizye unooli atala anzi akuti tunoowambilizya biyeni. Tuzoobelesya nzila nzitwali kubelesya kukambawuka kwaminyaka yiinda ku100 na naakuti tuzoobelesya zimwi nzila? Tuzoozibona aachiindi eecho. Kufumbwa zitazoochitike, tulaachilongezyo chakuzoowambilizya mulumbe walubeta lwaJehova!​—Ezk. 2:3-5.

9. Mulumbe wesu ulakonzya kuzoopa kuti beendelezi bazisi bamvwe biyeni alubo tulaachoonzyo chanzi?

⁹ Mulumbe wesu ulakonzya kuyoobanyemya beendelezi bazisi akupa kuti bayande kutukasya. Tulangilila kuti Jehova uyootugwasya mbuuli mbaatugwasya mumulimu wesu wakukambawuka mazubaano. Tusyoma kuti Jehova uyootupa manguzu kuti tukonzye kuchita mulimu wakwe.​—Mik. 3:8.

10. Kweendelana amajwi aali muli Luka 21:25-28, bantu bayoolimvwa biyeni muchiindi chamapenzi mapati?

¹⁰ Bala Luka 21:25-28. Muchiindi chamapenzi mapati, bantu bayoogamba chiindi nibayoobona kuti zintu tazili kweenda mbuuli mbubakali kuyeeyela pe. Akaambo kakuti kanooli kakusaanguna kuchitika zintu zili boobu munyika, bantu banooli ‘mumacise’ alubo banooyowa kuti balakonzya kunyonyoonwa. (Zef. 1:14, 15) Muchiindi eecho, buumi bulakonzya kuzoobayumina bantu boonse. Alubo kulakonzeka kuti bakombi baJehova ziyoobayumina loko akaambo kakuti tabali banyika. Kulakonzeka kuti tuyoobula zintu ziyandikana mubuumi.

11. (a) Nkamboonzi zisi niziyooyanda kulwana Bakamboni baJehova? (b) Nkamboonzi nituteelede kuyoowa mapenzi mapati?

¹¹ Bantu bakali kunjila zikombelo zitakanyonyoonwe bayoonyema nkaambo Bakamboni  baJehova banooli kabayinkilila kunembo kukomba. Amwi makani aaya ayoozula munyika yoonse kakubelesegwa Intaneti. Zisi amweendelezi wazyo Saatani ziyoonyema akaambo kakuti chikombelo chakasimpe nchicho achilikke chinoosyeede. Ziyoobona kuti zinooli zyakachilwa kunyonyoona bukombi boonse aanyika. Nkinkaako, ziyooyanda kutulwana. Kwiinda mukuchita oobu, zisi zinooli zyaba Gogo wakuchisi chaMagogo. * Zisi ziyoojatana kuti zilwane bantu baJehova. (Ezk. 38:2, 14-16) Tulakonzya kukataazikana atala azitakachitike muchiindi chamapenzi mapati nkaambo tatuzizi kabotu pe zintu zitazoochitike. Nikuba boobo, tatweelede kwaayoowa pe mapenzi mapati. Jehova uyootupa malayilile ayootugwasya kuti tukafutuke. (Int. 34:19) ‘Tuzooimikila akulanga mujulu’ nkaambo tunoozi kuti ‘lufwutuko lwesu lunooswenede afwaafwi.’ *

12. “Muzike uusyomeka alimwi uucenjede” ulikutugwasya biyeni kuti tukakkale katusyomeka muchiindi chili kunembo?

¹² “Muzike uusyomeka alimwi uucenjede” ulikutugwasya kuti tulibambile kukkala katusyomeka muchiindi chamapenzi mapati. (Mt. 24:45) Ulikutugwasya munzila zyiingi loko. Imwi nzila njaakabelesya miswaangano yabbooma njitwakanjila kuzwa mu2016 kusika mu2018. Mumiswaangano eeyi twakayiya zintu zikonzya kutugwasya mbukunga mamanino aswena afwiifwi. Atulange-lange zintu eezyo.

13. Niinzi chinga chilatugwasya kuti tukkale katusyomeka alubo kusyomeka nga kulatugwasya biyeni muchiindi chili kunembo?

¹³ Lusyomo: Muswaangano wabbooma wamu2016 wakali amutwe uti “Kkala Kusyomeka Kuli Jehova!” Aamuswaangano ooyu twakayiya kuti tulakonzya kukkala katusyomeka kuli Jehova kuti twaba abweenzuma busimide anguwe. Twakayeezegwa kuti kukomba amoyo woonse akubala Bbayibbele kulakonzya kupa kuti bweenzuma mbutulaabo aJehova busime. Kuchita oobo kupa kuti tujane manguzu aakuti tukonzye kulisimya kumapenzi ngituswaana. Tweelede kulangilila kuswaanana amasunko miingi loko mbukunga nyika yaSaatani yaamba kumana. Kulakonzeka kuti bantu bayooyinkilila kunembo kutuseka. (2 Pet. 3:3, 4) Eezi zilakonzya kuchitika akaambo kakuti tatutoli lubazu mutwaambo twanyika. Tweelede kukkala katusyomeka lino kuchitila kuti tukakonzye kuzumanana kusyomeka chiindi chamapenzi mapati.

14. (a) Niinzi chitakachitike kubakwesu bazulwida? (b) Nkamboonzi nikuyandikana kuti tukasyomeke achiindi eecho?

¹⁴ Muchiindi chamapenzi mapati, kuli kuchincha kutazoochitike kubakwesu batuzulwida. Bakwesu boonse bananikidwe bachinooli aanyika bazooya kujulu kuchitila kuti bakatole lubazu munkondo yaArmagedoni. (Mt. 24:31; Ciy. 2:26, 27) Eezi zyaamba kuti Kabunga Keendelezya takachinooliwo pe aanyika. Nikuba boobo, bankamu mpati banoobambikene. Kuyoosalwa bakwesu beelela aakati kambelele zimwi kuti bazulwide. Kuyooyandikana kuti tutondeezye kuti tulasyomeka kwiinda mukuswiilila malayilile aazwa kuli Leza ngibayootupa bakwesu aaba. Kuti twabaswiilila tuyoofutuka.

15. Niinzi chitugwasya kuti tulisimye alubo nkamboonzi nikuyandikana lino?

 ¹⁵ Kulisimya: Muswaangano wabbooma wamu2017 wakali amutwe uti: “Amuzumanane Mutaleki Pe!” Muswaangano ooyu wakatugwasya kuti tukonzye kulisimya chiindi nituswaanana amasunko. Twakayiya kuti kulisimya takulichitikili pe pesi tweelede kugwasigwa aJehova. (Rom. 12:12) Tweelede kukkala katuyeeya chisyomezyo chaJesu chakuti: “Ooyo uuliyumya kusikila kumamanino uyoofwutulwa.” (Mt. 24:13) Chisyomezyo eecho chipa kuti tube achoonzyo chakuti takwe buyumu-yumu bukonzya kupa kuti tukachilwe kusyomeka. Kuti twalisimya lino, tulaba bantu basimide mapenzi mapati kaatanasika.

16. Niinzi chipa kuti tube achibindi alubo nga tulazumanana biyeni kubaacho?

¹⁶ Chibindi: Muswaangano wabbooma wamu2018 wakali amutwe uti: “‘Utayoowi Pe!’” Muswaangano ooyu wakatugwasya kubona kuti tatubi aachibindi akaambo kazintu nzitukonzya kuchita. Mbuuli mbukuyandikana kusyoma Jehova kuti tulisimye, tweelede kusyoma Jehova kuti tube achibindi. Niinzi chinga chilatugwasya kuti tukkale katusyomeka kuli nguwe? Nkubala Jwi lyakwe buzuba abuzuba akuyeeyesesya kuti Jehova wakabagwasya biyeni bantu bakwe chiindi. (Int. 68:20; 2 Pet. 2:9) Chiindi zisi nizyaakutulwana muchiindi chamapenzi mapati, tweelede kuyooba achibindi akusyoma Jehova kwiinda lino. (Int. 112:7, 8; Heb. 13:6) Kuti twasyoma Jehova, uyootugwasya kuti tube achibindi chiindi Gogo naakutulwana. *

17. Nkamboonzi nituteelede kuyoowa nkondo yaArmagedoni? (Langa chifanikisyo chili achivumbyo.)

¹⁷ Mbuuli mbutwakabona muchiiyo chakiinda, biingi besu twakazyalwa mazuba aakumamanino kaali asaanguna. Alubo tulangilila kuzoofutuka muchiindi chamapenzi mapati. Nkondo yaArmagedoni iyoomaninsya bweende bwazintu oobuno. Nikuba boobo, tatweelede kuyoowa pe. Nkamboonzi? Nkaambo iswe tatukalwani pe munkondo  eeyi pesi Leza uyootulwanina. (Tus. 1:33; Ezk. 38:18-20; Zek. 14:3) Jehova uyootuma Jesu kuti azulwide nkamu yakwe munkondo eeyi. Jesu kalaamwi abananike banooli babusigwa azyuulu-zyuulu zyabangelo bazoolwana aaSaatani amadimoni aakwe azisi zyoonse.​—Dan. 12:1; Ciy. 6:2; 17:14.

18. (a) Jehova wakatusyomezyaanzi? (b) Lugwalo lwa Ciyubunuzyo 7:9, 13-17 lutugwasya biyeni kuti tube achoonzyo chakuti tuyoofutuka muchiindi chili kunembo?

¹⁸ Jehova wakatusyomezya kuti: “Kunyina cilwanyo cipangilwa kulwana [ndinywe] iciyoozwidilila.” (Is. 54:17) “Nkamu mpati” yabakombi baJehova basyomeka iyoofutuka “mumapenzi mapati.” Bayooyinkilila kunembo kababelekela Leza. (Bala Ciyubunuzyo 7:9, 13-17.) Niinzi chipa kuti tube achoonzyo chakuti tuyoofutulwa muchiindi chili kunembo? Bbayibbele lyaamba kuti “Jehova ulabakwabilila bantu basyomeka.” (Int. 31:23) Bantu bayanda Jehova akumukomba bayoobotelwa kubona kali kupa kuti zina lyakwe lisalala lilemekwe.​—Ezk. 38:23.

19. Tuyoojana chilongezyo chanzi muchiindi chili kunembo?

¹⁹ Atuteedi lugwalo lwa 2 Timoteyo 3:2-5 lwachinchwa kuti lupandulule mbubayooba bantu chiindi Saatani amadimoni aakwe nibaakugwisigwa, ubonaanga luzoobapandulula biyeni? (Langa kabbokesi kati “ Mbubazooba Bantu Muchiindi Eecho.”) Mukwesu George Gangas, * wakabeleka muKabunga Keendelezya wakati: “Nyika iyoobota loko bantu boonse baakukomba Jehova luzutu! Lino-lino muzooba achilongezyo chakupona munyika mpya. Muzoopona kufumbwa kuti Jehova kaachipona. Tuzoopona kukabe kutamani.” Eechi nchilongezyo chipati loko!