1. Nkamboonzi nitweelede kwiiya kuzwa kubantu bachembeede?

 TOONSE tuyandikana kugwasigwa kuchitila kuti tukonzye kusala munzila iilikabotu. Tulakonzya kugwasigwa aabaalu abamwi maKkristu basimide mubukombi. Kuti kabali bapati loko kulindiswe, tatweelede kubonaanga malayilile aabo taachibeleki pe mazubaano. Jehova uyanda kuti twiiye kubantu bachembeede. Akaambo kakuti bakapona chiindi, bazi zintu zyiingi alubo bakaswaana zintu zyiingi mubuumi. Nkinkaako, bali aaluzibo lwiingi, balamvwisisisya alubo bali aabusongo.—Job. 12:12.

2. Tulalanga-langaanzi muchiiyo eechi?

² Muchiindi chakalembwa Bbayibbili, Jehova wakali kubelesya bachembeede basyomeka kuti basungwaazye akuzulwida bakombi bakwe. Muchikozyano, wakabelesya Mozesi, Davida amwaapostoli Johane. Baalumi aaba bakapona muziindi zisiyene alubo zyiimo zyabo zyakalisiyene. Kabali baba aafwiifwi kuti bafwe, bakabapa malayilile aabusongo bachikula. Umwi awumwi wabaalumi aaba, wakali kusimya kaambo katondeezya mbukuyandikana kuswiilila Leza. Jehova wakapa kuti malayilile ngibakaamba alembwe muBbayibbili kuchitila kuti twiiye kuzwa kulimbabo. Nikuba kuti tuli bapati naakuti tuli baniini, toonse tulakonzya kugwasigwa kuti twalanga-langa malayilile aabo. (Rom. 15:4; 2 Tim. 3:16) Muchiiyo eechi, tulalanga-langa majwi aakumamanino ngibakaamba baalumi aaba batatu azyiiyo nzitukonzya kujana kumalayilile aayo.

“MUZOOPONA KWACHIINDI CHILAMFU”

3. Njiili milimu Mozesi njaakali kubeleka ?

³ Mozesi wakabelekela Jehova amanguzu aakwe woonse kwabuumi bwakwe boonse. Wakali mupolofita, wakali mubetesi, wakali mupati wamasooja alubo wakali mulembi. Mozesi wakayiya zintu zyiingi loko kuzwa kuzintu zyakamuchitikila mubuumi.  Wakazulwida chisi chama-Israyeli kuzwa kubuzike ku-Ijipita alubo wakalibonena chantongola meso zigambyo nzyaakachita Jehova. Jehova wakabelesya Mozesi kuti alembe mabbuku aakusaanguna aali 5, Intembauzyo 90 alubo kuyeeyelwa kuti a Intembauzyo 91. Alubo kulakonzeka kuti nguwe wakalemba bbuku lyaJobu.

4. Mbaani mbaakasungwaazya Mozesi alubo nkamboonzi?

⁴ Kali wabaafwiifwi kufwa, kali aaminyaka iili 120, Mozesi wakabunganizya ma-Israyeli boonse kuti abayeezye atala azintu nzibakabona Jehova kalikubachitila. Kabachikula, bamwi ma-Israyeli bakabona zitondeezyo zyiingi azigambyo nzyaakachita Jehova ambaakanyonyoona bantu baku-Ijipita. (Kul. 7:​3, 4) Bakabona Jehova kali kwaanzaania maanzi muLwizi Lusalala alubo bakayinda aanyika njumu. Alubo bakabona Jehova kali kunyonyoona Faro amasooja aakwe woonse. (Kul. 14:​29-31) Munkanda, Jehova wakakwabilila ma-Israyeli akubalangania. (Dt. 8:​3, 4) Ma-Israyeli bakali baba aafwiifwi kuti banjile muNyika Yachisyomezyo, nkinkaako, katanafwa Mozesi wakali kuyanda kubasungwaazya. a

5. Majwi aakumamanino ngaakaamba Mozesi katanafwa aali muli Detoronomi 30:​19, 20 akali kubapa choonzyo chanzi ma-Israyeli?

⁵ Niinzi Mozesi nzyaakaamba? (Bala Detoronomi 30:​19, 20.) Wakayeezya chisi chama-Israyeli kuti bakali kulangilila buumi bubotu kunembo. Kwiinda mukulongezegwa aaJehova, ma-Israyeli bakali kuyookkala kwachiindi chilamfu munyika Jehova njaakabasyomezezye. Alubo nyika eeyo yakali mbotu kayili mbolezi. Mozesi wakayipandulula munzila eeyi, wakati: “Maanda azwide zintu zyoonse zibotu nzutabelekede pe amigodi yamaanzi njutasyide pe amyuunda yamisaansa amisamu yama-olifa njutabyede pe.”—Dt. 6:​10, 11.

6. Nkamboonzi Leza naakazumizya zimwi zisi kuti zizunde chisi cha-Israyeli?

⁶ Alubo Mozesi wakabapa nchenjezyo ma-Israyeli. Kuti bayinkilile kunembo kabakkala munyika eeyo yambolezi, ma-Israyeli bakeelede kuswiilila milawu yaJehova. Mozesi wakababuzya kuti “amusale buumi” kwiinda mukuswiilila Jehova “akukakatila kulinguwe.” Nikuba oobo, ma-Israyeli teebakamuswiilila pe Jehova. Nkinkaako, Leza wakazumizya bantu baku-Asiriya abakuBbabbiloni kuti babazunde akubatola kubuzike.—2 Bam. 17:​6-8, 13, 14; 2 Mak. 36:​15-17, 20.

7. Twiiyaanzi kumajwi aakaambwa aaMozesi? (Langa chifanikisyo.)

⁷ Twiiyaanzi? Kuswiilila kulatufutula. Mbuli ma-Israyeli bakali baba aafwiifwi kuti banjile muNyika Yachisyomezyo, andiswe twaba aafwiifwi loko kuti tunjile munyika mpya njitwakasyomezegwa aaLeza. Lino-lino, nyika izooba paradayizi lubo. (Is. 35:1; Lk. 23:43) Dyabbulosi amadimoni aakwe tabachinooliwo pe. (Chi. 20:​2, 3) Takuchinoolikwe zikombelo zyakubeja pe. (Chi. 17:16) Mfulumende zyabantu tazichinoobadyaamizyi pe bantu . (Chi. 19:​19, 20) Alubo basikupapila tabanoolimo pe muparadayizi. (Int. 37:​10, 11) Bantu boonse batanooli muparadayizi, banooswiilila milawu yaJehova alubo banooli aaluumuno. Bantu boonse banooyandana alubo banoosyomana. (Is. 11:9) Tuchilangilila aameso aasalala chiindi eecho. Kuti twamuswiilila Jehova tuyoopona kukabe kutamani katuli muparadayizi.—Int. 37:29; Joh. 3:16.

8. Chisyomezyo chabuumi butamani chakamugwasya biyeni umwi mumishinali? (Juda 20, 21)

⁸ Kuti twayinkilila kunembo katuyeeyesesya atala achisyomezyo chaLeza chabuumi butamani, zilakonzya kutugwasya kuti tumuswiilile nikuba katuswaanana aamapenzi. (Bala Juda 20, 21.) Alubo chisyomezyo eechi chilakonzya  kutugwasya kuti tulwane kutamaninina kwesu. Umwi mukwesu waba aaminyaka myiingi kali mumishinali mu-Africa, wakapandulula kuti wakali kukkala kasunkwa kuti achite chimwi chintu chitamubotezyi pe Jehova. Wakaamba kuti: “Nindakali kuyeeyesesya atala akuti, kuti teendaswiilila Jehova, tandizookonzyi pe kupona kukabe kutamani muparadayizi. Eezi zyakandigwasya kuti ndiinkilile kunembo kandilwana penzi lyangu akumubuzya Jehova kwiinda munkombyo kuti andigwasye. Kwiinda mukugwasigwa aaJehova ndakakonzya kulizunda penzi eelyo.”

“UYOOZWIDILILA”

9. Ngaali mapenzi ngaakaswaana Davida mubuumi bwakwe?

⁹ Davida wakali mwaami wabakombi baJehova alubo wakali kusyomeka kuli Leza. Wakali mwiimbi, wakali situpeto, wakali musooja alubo wakali mupolofita. Davida wakaswaana mapenzi miingi mubuumi bwakwe. Kwaminyaka myiingi, wakeelede kuyuba nkaambo Mwaami Sawulu wakali kuyanda kumujaya. Naakaba mwaami, Davida wakeelede kuchija lubo kuti atajayigwi akaambo kakuti mwanaakwe Abbisalomu wakali kuyanda kumubwezela bwaami. Nikuba kuti Davida wakaswaana buyumu-yumu bwiingi akuti kuli nzyaakali kukachilwa kuchita, wakatondeezya kuti ulasyomeka kuli Leza kusikila naakafwa. Jehova wakamupandulula kuti “mwaalumi weendelana aamoyo wangu.” Kulayandikana kuti twaaswiilile majwi aabusongo ngaakaamba Davida.—Mil. 13:22; 1 Bam. 15:5.

10. Nkamboonzi Davida naakapa mwanaakwe Solomoni malayilile katanaba mwaami?

¹⁰ Davida wakamupa malayilile mwanaakwe Solomoni nkaambo nguwe wakali kuzooba mwaami wama-Israyeli. Jehova wakasala Solomoni kuti ayake tempele oomo bakombi bakwe mubakali kuzookombela Jehova. (1 Mak. 22:5) Kwakali mulimu mwiingi wakaswaanizidwe alubo Solomoni wakeelede kugwasigwa aaJehova kuti akonzye kuzulwida chisi chama-Israyeli. Niinzi Davida nzyaakabuzya Solomoni? Atubone.

11. Kweendelana alugwalo lwa 1 Bami 2:​2, 3, ngaali malayilile Davida ngaakapa Solomoni alubo niinzi zitondeezya kuti kwakali kuyandikana kuti Solomoni aswiilile malayilile aayo? (Langa chifanikisyo.)

¹¹ Niinzi Davida nzyaakaamba? (Bala 1 Bami 2:​2, 3.) Davida wakabuzya mwanaakwe kuti, kuti waswiilila Jehova wakali kuyoozwidilila mubuumi. Kwaminyaka myiingi, Jehova wakamupa zintu zibotu zyiingi Solomoni alubo wakamugwasya munzila zyiingi. (1 Mak. 29:​23-25) Wakayaka tempele bbotu alubo wakalemba mabbuku miingi aamuBbayibbili alubo amwi majwi aakwe alajanika mulaamwi mavesi aamuBbayibbili. Solomoni wakaba aampuwo akaambo kaluzibo abunoti mbwaakalaabo. (1 Bam. 4:34) Pesi mbuli mbaakamubuzizye Davida, Solomoni wakali kukonzya kuzwidilila kuti waswiilila Jehova Leza. Chuusisya nchakuti, mukuya kwachiindi, Solomoni wakazookomba baleza bakubeja. Jehova taakaziyanda pe nzyaakachita Solomoni  alubo wakaleka kumupa busongo bwakuti ayendelezye bantu munzila iilikabotu.—1 Bam. 11:​9, 10; 12:4.

12. Twiiyaanzi kumajwi aakaambwa aaDavida?

¹² Twiiyaanzi? Kuswiilila kupa kuti tuzwidilile. (Int. 1:​1-3) Jehova taakwe naakatusyomezya kuti ulatupa mpuwo abunoti mbuli mbaakabede Solomoni. Pesi kuti twamuswiilila Leza, ulatupa busongo bukonzya kutugwasya kuti tusale munzila iilikabotu. (Tus. 2:​6, 7; Jak. 1:5) Malayilile aakwe alakonzya kutuzulwida munkani zyamilimu, lwiiyo, zyakulikondelezya amali. Kubelesya busongo buzwa kuli Leza, kulakonzya kutukwabilila kuti tutapambanisyi bweenzuma mbutulaabo anguwe akuti tuzoojane buumi butamani. (Tus. 2:​10, 11) Tulakonzya kuba aabeenzuma balikabotu. Alubo tulakonzya kujana malayilile aakonzya kutugwasya kuti tubotelwe mumpuli zyesu.

13. Niinzi zyakagwasya Carmen kuti azwidilile mubuumi?

¹³ Carmen uuzwa kuMozambique wakali kubonaanga lwiiyo lwaajulu lulakonzya kupa kuti azwidilile mubuumi. Nkinkaako, wakayinka kuyunivesiti mpawo wakali kwiiya zyamayake. Wakalemba kuti: “Ndakali kuziyanda nzindakali kwiiya. Pesi zyakali kupa kuti ndibelesye chiindi chiingi amanguzu miingi. Ndakalinoonga ndili kuchikolo kuzwa aa 7:30 kuseeni kusika aa 6:00 goko. Kwakali kundiyumina kuti ndinjile miswaangano alubo bweenzuma aJehova bwakasaanguna kutontola. Nindakayeeyesesya, ndakabona kuti ndakali kweezya kubelekela basimalelo babili.” (Mt. 6:24) Carmen wakakomba atala achiimo chakwe mpawo wakayanduulisisya mumabbuku eesu. Wakazooyungizya kuti: “Nindakazwa aakugwasigwa aabaalu abaama, ndakasala kuti ndisiyane aazyayunivesiti mpawo ndibelekele Jehova mumulimu wachiindi choonse. Eezi zyakandigwasya kuti ndisale zintu zyakandibotezya loko mubuumi alubo tandilisoli pe akusala nkundakachita.”

14. Nkaakali kaambo Mozesi aDavida nkibakasimya mumajwi aabo?

¹⁴ Mozesi aDavida bakali kumuyanda Jehova alubo bakalizi mbukwakali kuyandikana kumuswiilila. Majwi aakumamanino ngibakaamba kabatanafwa, akali aakusungwaazya bamwi kuti batobelezye chikozyano chabo kwiinda mukukakatila kuli Jehova Leza wabo. Baalumi aaba kabali babili bakachenjezya bakombi baLeza kuti baleka kumuswiilila Jehova taakali kuyoobalongezya pe. Malayilile ngibakaamba achibeleka nikuba mazubaano. Muminyaka myiingi  yakazootobela, umwi mukombi waJehova anguwe wakapandulula mbukuyandikana kukkala katusyomeka kuli Leza.

“TAAKWE CHINTU CHINDIPA KUKONDWA LOKO”

15. Nziizili zintu nzyaakalibonena aameso mwaapostoli Johane?

¹⁵ Johane wakali mwaapostoli wakali kuyandwa loko aJesu Kkristu. (Mt. 10:2; Joh. 19:26) Johane wakasindikila Jesu mumulimu wakwe waanyika. Wakabona zigambyo nzyaakachita Jesu alubo wakakkala kasyomeka kuli Jesu muzyiimo ziyumu. Wakabona Jesu kali kujayigwa alubo wakamubona kali wabusigwa. Alubo wakabona mbungano yachiKkristu kayili kukomena. Johane wakapona kwaminyaka myiingi alubo wakabona makani mabotu kaali kukambawukwa “kuzilenge zyoonse aansi aajulu.”—Kol. 1:23.

16. Mbaani bagwasigwa aamakani aali mumagwalo aaJohane?

¹⁶ Kumamanino aabuumi bwakwe, Johane wakaba aachilongezyo chakulemba Jwi lyaLeza. Wakalemba “Chiyubunuzyo chaJesu Kkristu.” (Chi. 1:1) Wakalemba Bbuku lyaMakani Mabotu lyiitwa aazina lyakwe. Alubo wakalemba magwalo aatatu. Mulugwalo lwakwe lwachitatu, Johane wakali kulembela mwanaakwe wamubukombi uusyomeka uutegwa Gayo. (3 Joh. 1) Muchiindi eecho, kweelede kuti Johane wakali aabana biingi bamubukombi. Nzyaakalemba Johane kali wachembaala zili kubagwasya batobeli baJesu nikuba mazubaano.

17. Kweendelana a 3 Johane 4, niinzi chakali kupa kuti Johane abotelwe?

¹⁷ Niinzi Johane nzyaakalemba? (Bala 3 Johane 4.) Mulugwalo lwakwe lwachitatu, Johane wakaamba kuti wakali kubotelwa loko chiindi naakali kubona bakwesu abachizi kabali kuswiilila Leza. Muchiindi Johane naakalemba lugwalo lwakwe lwachitatu, bamwi bakali kuyiisya makani aakubeja alubo bakali kupa kuti mumbungano kube kutamvwanana. Nikuba oobo, bamwi bakayinkilila kunembo ‘kabeenda mukasimpe.’ Bantu aabo bakali kuswiilila Jehova alubo bakali kwiinkilila kunembo kweenda “kweendelana amilawu yakwe.” (2 Joh. 4, 6) MaKkristu basyomeka aaba, bakapa kuti Johane aJehova babotelwe loko.—Tus. 27:11.

18. Twiiyaanzi kumajwi aakaambwa aaJohane?

¹⁸ Twiiyaanzi? Kusyomeka kupa kuti tubotelwe. (1 Joh. 5:3) Muchikozyano, tulabotelwa kuti twaziba kuti tulikuchita zintu zibotezya Jehova. Jehova ulabotelwa chiindi natubona katutantamuka zintu zibi akuswiilila milawu yakwe. (Tus. 23:15) Ngilozi zilabotelwa kujulu. (Lk. 15:10) Alubo tulabotelwa chiindi nitubona bakwesu  abachizi kabayinkilila kunembo kabasyomeka nikuba chiindi nibalikupenzegwa naakuti nibasunkwa kuti bachite chintu chitali kabotu. (2 Tes. 1:4) Nyika yaSaatani niyazoonyonyoonwa, tuzoobotelwa loko akaambo kakuti tunoozi kuti twakakkala katusyomeka kuli Jehova.

19. Rachel wakatyeni atala akuyiisya bamwi kasimpe? (Langa chifanikisyo.)

¹⁹ Tulabotelwa chiindi nituyiisya bamwi atala aJehova. Rachel uukkala kuDominican Republic, wakaamba kuti nchilongezyo chipati loko kuyiisya bamwi atala aLeza wesu Jehova. Rachel wakagwasya bantu biingi kuti baze mubukombi bwakasimpe. Wakaamba kuti: “Kulandiyumina kupandulula kubotelwa nkundibaako chiindi nindibona bana bangu mukasimpe kabali kukomena mukuyanda Jehova, kabali kwiiya kumusyoma chakumaninina anibeezya kuchincha maponeno aabo kuti bamubotezye. Kubotelwa nkundibaako tandikonzyi pe kukweezyanisya aakubeleka nkundakachita kuti ndibagwasye kuti baze mukasimpe.”

JANA ZYIIYO KUMAJWI AAKUMAMANINO AABAALUMI BASYOMEKA

20. Tukozyenie biyeni aMozesi, Davida aJohane?

²⁰ Mozesi, Davida aJohane bakapona muziindi zisiyene andiswe alubo bakali muzyiimo zisiyene azyesu. Pesi kuli mputukozyenie ambabo. Bakali kukomba Leza wakasimpe mbuli ndiswe. Bakali kukomba kuli Jehova, bakali kumusyoma alubo bakali kulangilila kulinguwe kuti abazulwide mbuli ndiswe. Mbuli baalumi aaba, andiswe tuli aachoonzyo chakuti Jehova ulabalongezya aabo bamuswiilila.

21. Jehova uzootulongezya biyeni kuti twaswiilila malayilile aakaambwa aaMozesi, Davida aJohane?

²¹ Nkinkaako, atuswiilile majwi aakumamanino aakaambwa aabakwesu bachembeede, kwiinda mukuswiilila milawu yaJehova. Kuti twachita oobo, tuyoozwidilila chachoonzyo muzintu zyoonse nzituchita. Tuzoowongola chaamba ‘kuzoopona kwachiindi chilamfu’ alubo tuzoopona kukabe kutamani. (Dt. 30:20) Kumamanino, tuzoobotelwa akaambo kakuti tunooli twabotezya Taateesu wakujulu siluyando, uuzuzikizya zisyomezyo zyoonse munzila njitutayeeyeli pe.—Ef. 3:20.