1-2. Nkamboonzi chimwi chiindi nitubonaanga Jehova tazisanduli pe nkombyo zyesu?

 “KOBOTELWA kapati muli Jehova, eelyo walo uyookupa nzyouyanda moyo wako.” (Int. 37:4) Eechi nchisyomezyo chibotu kaka! Pesi tweelede kulangilila kuti Jehova atupe zintu zyoonse na nzitumukumbila mpawaawo? Nkamboonzi nitukonzya kulibuzya mubuzyo ooyu? Atulange zyiimo zitobela. Muchizi uutakwetwe ulikukombela kunjila Chikolo chaBakambawusi baBwaami. Kwayinda minyaka myiingi pesi tanatambwa pe. Umwi mukwesu uuchikula wakumbila Jehova kuti amugwasye kuti apone kubulwazi bubi loko mbwalaabo kuchitila kuti achite zyiingi mumbungano. Pesi bulwazi bwakwe taakwe nibwamana pe. Bazyali bachiKkristu baliikukombela kuti mwanaabo akkale kali mukasimpe. Pesi mwanaabo wasala kusiya Jehova.

² Amwi anduwe wakali wakumbila Jehova kuti akuchitile chimwi chintu, pesi taakwe nwaakachijana pe chintu eecho. Amwi eezi zyakapa kuti ubonaanga Jehova tazisanduli pe nkombyo zyako pesi usandula zyabamwi. Naakuti amwi wakayeeya kuti kuli chimwi chintu chibi nchwaakachita. Umwi muchizi uutegwa Janice b wakalimvwa munzila iili oobu. Muchizi Janice amulumaakwe bakakomba kuli Jehova kabakumbila kuti bakabelekele kuBbeteli. Wakaamba kuti: “Ndakali aachoonzyo chakuti tulafwambaana kwiitwa kuBbeteli.” Pesi kwakayinda minyaka myiingi mpuli eeyi kayitayitidwe pe kuBbeteli. Janice wakaamba kuti: “Ndakalikataazikene, ndakayeeya kuti amwi kuli chimwi chintu nchindakachita chakamunyemya Jehova. Ndakali ndakomba kuli Jehova kandimubuzya kuti ndiyanda kuyoobelekela kuBbeteli, pesi ndakali kulibuzya kuti, nkamboonzi Jehova natanasandula nkombyo yangu?”

3. Tulalanga-langaanzi muchiiyo eechi?

 ³ Chimwi chiindi, tulakonzya kubonaanga Jehova taziswiilili pe nkombyo zyesu. Nibaba bakombi bakwe bachiindi basyomeka ambabo bakali kulimvwa munzila iikozyenie. (Job. 30:20; Int. 22:2; Hab. 1:2) Niinzi chikonzya kupa kuti ube aachoonzyo chakuti Jehova ulazisandula nkombyo zyako? (Int. 65:2) Kuti tukonzye kusandula mubuzyo ooyu, atusaangune kusandula mibuzyo iitobela: (1) Niinzi nzitulangilila kuzwa kuli Jehova? (2) Jehova uyanda kuti tuchiteenzi? (3) Nkamboonzi nikuyandikana kuti tuchinche zintu nzitukombela?

4. Kweendelana alugwalo lwa Jeremiya 29:​12, Jehova utusyomezyaanzi?

⁴ Jehova utusyomezya kuti ulaziswiilila nkombyo zyesu. (Bala Jeremiya 29:12.) Leza wesu ulabayanda bakombi bakwe basyomeka nkinkaako, tasinki matwi pe chiindi nibakomba. (Int. 10:17; 37:28) Nikuba oobo, tazyaambi kuti ulatupa zintu zyoonse nzitukumbila. Chimwi chiindi nga kwayandikana kuti tulindile kusikila tukanjile munyika mpya kuti tuzoojane zimwi zintu nzitumukumbila.

5. Niinzi Jehova nzyalanga chiindi naswiilila nkombyo zyesu? Pandulula.

⁵ Jehova ulanga kuti zintu nzitumukumbila zyeendelana biyeni amakanze aakwe. (Is. 55:​8, 9) Makanze aakwe aambi ngakuti nyika izule bantu babotelwa alubo bajisini kabeendelezegwa aanguwe. Pesi Saatani wakaamba kuti bantu balazwidilila kuti kabalyeendelezya. (Matl. 3:​1-5) Kuti Jehova atondeezye kuti Dyabbulosi ulabeja, wakazumizya bantu kuti balyeendelezye. Pesi lino bweendelezi bwabantu bulikupa kuti tuswaane mapenzi miingi mazubaano. (Muk. 8:9) Tulizi kuti Jehova taagwisyi pe mapenzi woonse ngituswaana aachiindi eechino. Kuti waagwisya, bamwi balakonzya kubonaanga bweendelezi bwabantu bulikabotu loko akuti bulakonzya kumaninsya mapenzi.

6. Nkamboonzi nitweelede kuba aachoonzyo chakuti zintu nzyachita Jehova uzichita munzila iiluleme alubo yaluyando?

⁶ Jehova ulakonzya kusandula nkombyo zyesu munzila zisiyene-siyene. Muchikozyano, chiindi Mwaami Hezekkiya naakachiswa loko, wakakombelezya Jehova kuti amugwasye kuti apone. Jehova wakamuswiila mpawo wakamuponia. (2 Bam. 20:​1-6) Pesi mwaapostoli Pawulu naakakombelezya Jehova kuti amugwisye “muumvwa munyama,” amwi wakali kuchiswa, pesi Jehova taakwe naakaligwisya pe penzi eelyo. (2 Kor. 12:​7-9) Alubo yeeya chikozyano chamwaapostoli Jakkobo aPetro. Boonse kabali babili, bakali kuyanda kujayigwa aMwaami Herodi. Bamumbungano bakakombela Petro, kulakonzeka kuti bakamukombela anguwe Jakkobo. Nikuba oobo, Jakkobo wakajayigwa mpawo Petro wakanununwa munzila yachigambyo. (Mil. 12:​1-11) Tulakonzya kulibuzya kuti, ‘Nkamboonzi Jehova naakafutula Petro alikke akusiya Jakkobo?’ Bbayibbili talyaambi pe. c Tweelede kuba aachoonzyo chakuti Jehova ‘taciti zitaluleme’ pe. (Dt. 32:4) Alubo tulizi kuti boonse, Petro aJakkobo bakali kutambulika kuli Jehova. (Chi. 21:14) Chimwi chiindi, nkombyo zyesu zilakonzya kutasandulwa munzila njitwali kulangilila. Pesi akaambo kakuti chiindi choonse Jehova uchita zintu ziluleme amunzila yaluyando, tatung’ung’uni pe kuti nkamboonzi nasandula nkombyo zyesu munzila njasandulaayo.—Job 33:13.

7. Niinzi nchituteelede kuchita alubo nkamboonzi?

⁷ Tatweelede kweezyanisya zyiimo zyesu azyabamwi. Muchikozyano, tulakonzya kukumbila Jehova kuti atugwasye aachimwi chintu pesi chintu eecho teetwachijana pe. Mukuya  kwachiindi, kuti twazooziba kuti umwi wakakumbila chintu eecho mpawo wachijana, tulakonzya kuyeeya kuti amwi Jehova wakamusandula. Eezi nzizyo zyakachitika kumuchizi uutegwa Anna. Wakakombela kuti mulumaakwe, Matthew, apone kubulwazi bwakkensa. Aachiindi nchicheecho, kwakali bachizi babili bakali bakomena, bakali aakkensa ambabo. Anna wakakombela Matthew abachizi aaba kaziswa aansi aamoyo. Bachizi aaba babili bakapona mpawo mulumaakwe wakamusiya. Kumasaangunino, Anna wakali kuyeeya kuti amwi Jehova nguwe wanjilila kuti bachizi aaba bapone. Kuti kakuli oobo, nkamboonzi naakatasandula nkombyo zyakwe zyakuti mulumaakwe apone? Nisimpe, tatuzi pe kuti niinzi chakapa kuti bachizi aaba bapone. Nchituzi nchakuti Jehova uzoowamanisya mapenzi woonse ngituswaana alubo ulaachiyandisyo chakubusya bakombi bakwe bakafwa.—Job. 14:15.

8. (a) Kweendelana alugwalo lwa Isaya 43:​2, Jehova utugwasya biyeni? (b) Kukomba kutugwasya biyeni chiindi nituli mumapenzi? (Yebela vidiyo itii, Kukomba Kupa Kuti Tulisimye.)

⁸ Jehova unootugwasya chiindi choonse. Akaambo kakuti Jehova nguTaata siluyando, tabotelwi pe chiindi natubona katuli mumapenzi. (Is. 63:9) Pesi tatukwabilili pe kumasunko woonse ngituswaana, aali mbuli milonga naakuti mabanga-banga aamulilo. (Bala Isaya 43:2.) Nikuba oobo, wakatusyomezya kuti ulatugwasya kuti ‘twiinde’ mulingawo. Alubo unootugwasya kuti tukkale katumukomba. Jehova utupa muuya wakwe uusalala kuti utugwasye kuti tulisimye. (Lk. 11:13; Flp. 4:13) Eezi zipa kuti tube aachoonzyo chakuti chiindi choonse Jehova unootugwasya azintu nzituyandikana kuchitila kuti tulisimye akuti tukkale katusyomeka kulinguwe. d

9. Kweendelana alugwalo lwa Jakkobo 1:​6, 7, nkamboonzi nitweelede kuba aachoonzyo chakuti Jehova ulatugwasya?

⁹ Jehova uyanda kuti tumusyome. (Heb. 11:6) Chimwi chiindi, tulakonzya kubonaanga masunko ngituswaana mayumu loko. Alubo tulakonzya kusaanguna kubonaanga Jehova takonzyi pe kutugwasya. Pesi Bbayibbili litusyomezya kuti kwiinda munguzu zyaLeza, tulakonzya “kutanta bwaanda.” (Int. 18:29) Kwiinda kuti tuzumbuuzye, tulakonzya kukomba kuli Jehova katuli aalusyomo lwakuti ulazisandula nkombyo zyesu.—Bala Jakkobo 1:​6, 7.

10. Amba chikozyano chitondeezya mbutukonzya kuchita kweendelana ankombyo zyesu.

¹⁰ Jehova uyanda kuti tuchite kweendelana ankombyo zyesu. Muchikozyano, mukwesu ulakonzya kukomba kuli Jehova kuti amugwasye kuti ajane ofu kumulimu kuchitila kuti anjile muswaangano wabbooma. Jehova nga ulayisandula biyeni nkombyo yakwe? Ulakonzya kupa kuti mukwesu ooyu abe aachibindi chakuti akaambuule aabbosi wakwe. Pesi mukwesu ooyu weelede kuti ayinke akakumbile kuli bbosi wakwe. Ulakonzya kukumbila kwaziindi zyiingi kusikila amuzumizye. Mukwesu ulakonzya kukumbila kuti achinchaane awumwi ngwabelekaawe. Alubo kuti kazikonzeka, ulakonzya kukumbila ofu mpawo abuzye bbosi wakwe kuti atazoomubbadali pe mumazuba ngatanooli aamulimu.

11. Nkamboonzi nituteelede kuteya mulenga kuzintu nzitukombela?

¹¹ Jehova uyanda kuti tukombe kulinguwe chiindi choonse atala azintu nzituyanda. (1 Tes. 5:17) Jesu wakaamba kuti chimwi chiindi nkombyo zyesu zilakonzya kutola chiindi kuti zizoosandulwe. (Lk. 11:9) Utamani manguzu pe! Kkala kukomba kazizwa aansi aamoyo. (Lk. 11:​1-7) Kuti twayinkilila kunembo katuli kukombela chimwi chintu, nga twapa kuti Jehova abone  kuti zintu nzituli kukombela zilayandikana. Alubo nga tulikutondeezya kuti tuli aalusyomo lwakuti ulatugwasya.

12. (a) Nguuli mubuzyo ngutukonzya kulibuzya atala azintu nzitukumbila alubo nkamboonzi? (b) Kujana twachita biyeni kuti tutondeezye kuti tulamulemeka Jehova atala azintu nzitukombela? (Langa kabbokesi kati, “ Zintu Nzindikombela Zitondeezya Kuti Ndilamulemeka Na Jehova?”)

¹² Kuti zintu nzitwakombela teetwazijana, tulakonzya kulibuzya mibuzyo iitatu. Wakusaanguna, ‘Ndili kukombela zintu zili nzizyo na?’ Chiindi chiingi, nga tubonaanga tulizizi zintu nzituyanda, pesi zintu eezyo zilakonzya kutugwasya kwachiindi chifwiifwi biyo. Kuti katuli kukombela limwi penzi, penzi lyesu lilakonzya kubambululwa munzila iisiyene anjitunga twakombela katubonaanga njiyo iilikabotu. Alubo zimwi zintu nzitukombela nga tazyeendelani pe akuyanda kwaJehova. (1 Joh. 5:14) Muchikozyano, tulakonzya kuyeeya atala achikozyano chabazyali baambwa musule. Bakali bakombela kuti mwanaabo akkale kali mukasimpe. Kubonekaanga nzibakakumbila zilikabotu. Pesi Jehova tatusungilizyi pe kuti tumukombe. Uyanda kuti toonse kuswaanizya abana besu tulisalile biya kuti tumukombe. (Dt. 10:​12, 13; 30:​19, 20) Nzibakonzya kuchita bazyali aaba, nkukumbila Jehova kuti abagwasye kuti bayiisye mwanaabo munzila yakuti ayande Jehova akuti abe mweenzinyina.—Tus. 22:6; Ef. 6:4.

13. Kweendelana alugwalo lwa Mahebberu 4:​16, Jehova utugwasya biyeni? Pandulula.

¹³ Mubuzyo wachibili, ‘Eechi nchiichiindi na chakuti Jehova asandule nkombyo zyangu?’ Tulakonzya kubonaanga nkombyo zyesu zyeelede kusandulwa chakufwambaana. Pesi Jehova ulichizi chiindi chilikabotu chakutugwasya. (Bala Mahebberu 4:16.) Kuti teetwajana nzitwakumbila aachiindi nchituyanda, tulakonzya  kubonaanga Jehova tayandi pe kutupa. Pesi kuli Jehova nga tachinasika pe chiindi chakuti atugwasye. Muchikozyano, tulakonzya kuyeeya atala amukwesu uuchikula wakali wakumbila kuti Jehova amuponie kubulwazi bwakwe. Kaansinga Jehova wakamuponia munzila yachigambyo, Saatani wakali kukonzya kwaamba kuti mukwesu ooyu ulikwiinkilila kunembo kukomba Jehova akaambo kakuti wakaponesegwa. (Job 1:​9-11; 2:4) Kuyungizya aali zeezi, Jehova wakachibikka kale aambali chiindi chakuti azoomaninsye kuchiswa koonse. (Is. 33:24; Chi. 21:​3, 4) Nituchilindila chiindi eecho, tatulangilili kuti Jehova atuponie munzila yachigambyo. Nkinkaako, mukwesu ooyu ulakonzya kukumbila Jehova kuti amupe manguzu aluumuno lwamumizeezo kuti alisimye akuti ayinkilile kunembo kubelekela Leza kasyomeka.—Int. 29:11.

14. Wayiyaanzi kuchikozyano chaJanice?

¹⁴ Atubweede lubo kuchikozyano chaJanice, wakakombela kuti akabelekele kuBbeteli. Nikwakayinda minyaka iili 5, wakazoomvwisisisya kuti Jehova wakali wayisandula nkombyo yakwe munzila iisiyene anjaakali kuyeeyela. Wakaamba kuti: “Jehova wakabelesya mweenya ooyu chiindi nindakali kulindila kuti andiyiisye akuti andigwasye kuti ndibe muKkristu uulikabotu. Ndakayungizya kumusyoma. Ndakasaanguna kubala akuyanduulisisya chiindi choonse. Ndakeelede kubotelwa nkaambo buntu oobu, tabukwe ndaba pe kuti zyiimo zyangu zilibiyeni.” Mukuya kwachiindi, Janice amulumaakwe bakazootambwa kuti babeleke mumulimu wabbazu. Kalikuyeeya zyakachitika musule, Janice wakaamba kuti: “Jehova wakasandula nkombyo zyangu munzila njindakatali kuyeeyela pe. Zyakanditolela chiindi kuti ndibone bubotu bwansandulo yakwe, pesi ndilamulumba Jehova akaambo kakuti wakanditondeezya luyando akundifwida luzyalo.”

15. Nkamboonzi chimwi chiindi nikuyandikana loko kuti tutabi aantanganana atala azintu nzitukombela? (Langa pikicha.)

 ¹⁵ Mubuzyo wachitatu, ‘Ndeelede kukombela chimwi chintu na chisiyene achindakakombela?’ Nikuba kuti kulikabotu kuti tuzwe aantanganana chiindi nitukomba, pesi tulakonzya kutazwa aantanganana loko kuchitila kuti tuzibe nzyayanda Jehova kuti tuchite. Atubweede lubo kuchikozyano chamuchizi uutakwetwe wakali kukombela kunjila Chikolo chaBakambawusi baBwaami. Muchizi ooyu wakali kuyanda kuti anjile chikolo kuchitila kuti ayinke kuliimwi ndawu kuyanda basikugwasilizya. Chiindi nalikwiinkilila kunembo kukombela kuti anjile chikolo eecho, ulakonzya kukumbila Jehova kuti amugwasye kubona iimwi myeenya kuchitila kuti ayungizye mumulimu wakwe. (Mil. 16:​9, 10) Ulakonzya kuchita kweendelana ankombyo yakwe kwiinda mukukumbila mulangizi wabbazu kuti amubuzye mbungano iili aafwiifwi iiyanda mapayona biingi. Naakuti ulakonzya kulembela kuwofesi yamutabi kakumbila kuti bamubuzye ndawu iiyanda basikupupulula biingi. e

16. Tweelede kuba aachoonzyo chanzi?

¹⁶ Mbuli mbutwayiya, tulakonzya kuba aachoonzyo chakuti Jehova ulazisandula nkombyo zyesu munzila yaluyando alubo iiluleme. (Int. 4:3; Is. 30:18) Chimwi chiindi nkombyo zyesu zilakonzya kusandulwa munzila njitutayeeyeli pe. Pesi Jehova tasinki matwi pe chiindi nitukomba. Jehova utuyanda loko alubo tazootulekelezyi pe. (Int. 9:10) Atwiinkilile kunembo kusyoma “mulinguwe ziindi zyoonse,” katumubuzya zyoonse zizwa aansi aamyoyo yesu nitukomba.—Int. 62:8.