1-2. Niinzi zichitika kuti bantu babbabbatizigwa alubo niinzi nzibeelede kulanga-langa bantu bayanda kubbabbatizigwa?

 CHIINDI nitubona bantu bayanda kubbabbatizigwa kabayimvwi kunembo, nga twabamvwa kabali kusandula ajwi limvwika kumibuzyo yakubbabbatizigwa iinga yabuzigwa. Alubo bamumpuli abeenzinyina nga balikubotelwa. Basikubbabbatizigwa nibazwa mumaanzi, nga twabona bantu kabali kukambilila maboko alubo kabali kubotelwa. Munyaka amunyaka, bantu biingi nga babweza ntaamu yakuti babbabbatizigwe babe Bakamboni baJehova Leza.

² Kuti kuli kuyanda kubbabbatizigwa, ulikuchita chintu chili kabotu loko munyika eeyi mbi, nkaambo ‘ulikuyandaula Jehova.’ (Int. 14:1, 2) Chiiyo eechi, chakalembelwa nduwe kakutakwe ndaba kuti uli mupati naakuti uli muniini. Pesi aabo bakabbabbatizigwa kale balakonzya kugwasigwa aachiiyo eechi kuti bayinkilile kunembo kabakomba Jehova kukabe kutamani. Kwalino, atusaangune kulanga-langa twaambo tutatu tupa kuti tubelekele Jehova.

3. Nkamboonzi bakombi baJehova nibayanda kasimpe abululami? (Intembauzyo 119:128, 163)

³ Jehova wakalayilila bakombi bakwe kuti: “Amuyandisye kasimpe.” (Zek. 8:19) Jesu wakabuzya batobeli bakwe kuti bayande bululami. (Mt. 5:6) Eezi zyaamba kuti muntu weelede kuba aachiyandisyo chakuchita zintu ziluleme, zilikabotu alubo zisalala mumeso aaLeza. Ulakayanda na kasimpe abululami? Tulaachoonzyo chakuti ulaziyanda zintu eezi. Ulaazonda manwa azintu zibi zyoonse. (Bala Intembauzyo 119:128, 163.) Muntu uubeja utobelezya Saatani, mweendelezi wanyika eeyi. (Joh. 8:44; 12:31) Makanze aaSaatani ngakubejelezya  zina lyaJehova Leza lisalala. Kuzwa mumuunda waEdeni, Saatani ulikwaamba makani aakubeja atala aLeza. Ulikupa kuti bantu babonaanga Jehova Mweendelezi uutali kabotu, uuyima bantu zintu zilikabotu. (Matl. 3:1, 4, 5) Manwa aaSaatani atala aJehova, alikupa kuti bantu babe aamaboneno aatali kabotu atala aJehova. Alubo chiindi bantu nibasala ‘kutayanda kasimpe,’ Saatani nga wapa kuti bachite misyobo yoonse yazibi iitaluleme akuti balijate munzila iitali kabotu.—Rom. 1:25-31.

4. Jehova wakazitondeezya biyeni kuti ‘nguLeza wakasimpe’? (Langa chifanikisyo.)

⁴ Jehova ‘nguLeza wakasimpe,’ alubo uyiisya kasimpe aako kubantu bamuyanda. (Int. 31:5) Kuchita oobo, kugwasya bakombi bakwe kuti bateenwi aamanwa aaSaatani. Alubo Jehova uyiisya bakombi bakwe kuti basyomeke akuti bachite zintu ziluleme. Eezi zipa kuti balemekwe abamwi akuti babe aaluumuno lwamumizeezo. (Tus. 13:5, 6) Zyakachitika na eezi kulinduwe kuzwa nwaakasaanguna kwiiya Bbayibbili? Wakayiya atala amalayilile aaJehova kuti agwasya bantu boonse akuti alakugwasya lwako kukugama. (Int. 77:13) Wakasala kuchita zintu Leza nzyaamba kuti zilikabotu. (Mt. 6:33) Alubo uyanda kwiiminina kasimpe kuli kutondeezya kuti Saatani wakali kubeja atala aJehova Leza. Nga ulazichita biyeni?

5. Kujana watondeezya biyeni kuti uyanda kasimpe abululami?

⁵ Ulakonzya kutondeezya kuti towayandi pe manwa aaSaatani akuti uyanda kasimpe kwiinda munzila njuponaayo. Alubo ulakonzya kutondeezya kuti uyanda kuti Jehova abe Mweendelezi wako akuchita zintu nzyaamba kuti zilikabotu. Kujana wazichita biyeni eezi? Kwiinda mukukomba kuli Jehova, kumusyomezya kuti uyanda kuzoomubelekela kwabuumi bwako boonse, mpawo akubbabbatizigwa. Kuyanda kasimpe abululami, nzizyo zipa kuti uyande kubbabbatizigwa.

6. Ntuutuli twaambo tuli muli Intembauzyo 45:4 tupa kuti uyande Jesu Kkristu?

⁶ Niinzi chipa kuti uyande Jesu Kkristu? Ulamuyanda akaambo katwaambo tuli muli Intembauzyo 45:4. (Bala.) Jesu uyanda kasimpe, bululami alubo ulalibombya. Ulamuyanda Jesu akaambo kakuti anduwe ulakayanda kasimpe abululami. Yeeyesesya atala ambaakatondeezya chibindi chiindi naakali  kulwanina kasimpe abululami. (Joh. 18:37) Jesu utondeezya biyeni kuti ulalibombya?

7. Niinzi chitondeezya kuti Jesu ulalibombya?

⁷ Jesu utondeezya kuti ulalibombya kwiinda muzintu nzyachita. Muchikozyano, upa kuti bulemu boonse buye kuli Wisi kutali kulinguwe pe. (Mk. 10:17, 18; Joh. 5:19) Kulibombya kwaJesu kupa kuti uchiteenzi? Kupa kuti umuyande Jesu akutobelezya chikozyano chakwe. Niinzi chipa kuti Jesu alibombye? Ulalibombya akaambo kakuti ulamuyanda Wisi alubo uyanda kutobelezya chikozyano chakwe nkaambo Jehova ulalibombya. (Int. 18:35; Heb. 1:3) Akaambo kakuti Jesu utobelezya buntu bwaJehova munzila iimaninide eezi zipa kuti tumuyande Jesu.

8. Niinzi chipa kuti tuyande Jesu Mwaami wesu?

⁸ Tulamuyanda Jesu kuti abe Mwaami wesu akaambo kakuti Mweendelezi uulikabotu. Jehova lwakwe nguwe wakayiisya Mwanaakwe mbukunga nguwe wakamusala kuti ayendelezye. (Is. 50:4, 5) Jesu wakatondeezya kuti ulaaluyando lwakulipeda. (Joh. 13:1) Akaambo kakuti, Jesu Mwaami wako, weelede kumuyanda. Wakaamba kuti aabo bamuyanda chachoonzyo, balayiswiilila milawu yakwe. (Joh. 14:15; 15:14, 15) Nchilongezyo chipati loko kuba mweenzinyina waMwana waJehova.

9. Kubbabbatizigwa kwaKkristu kukozyenie biyeni akwabatobeli bakwe?

⁹ Umwi mulawu Jesu ngwaakapa batobeli bakwe ngwakuti babbabbatizigwe. (Mt. 28:19, 20) Wakatusiila chikozyano chibotu loko. Kubbabbatizigwa kwaJesu kuli mpukusiyene ambukukozyenie akwabatobeli bakwe. (Langa kabbokesi katii, “ Kubbabbatizigwa kwaJesu Kusiyene Biyeni Akwabatobeli Bakwe?”) Naakabbabbatizigwa, Jesu wakali kutondeezya kuti uyanda kuchita kuyanda kwaWisi. (Heb. 10:7) Munzila iikozyenie, batobeli baKkristu nibabbabbatizigwa nga balikutondeezya kuti balipeda kuti bachite kuyanda kwaJehova Leza. Zintu nzibachita mubuumi zitondeezya kuti bayanda kubikka kuyanda kwaLeza mubusena bwakusaanguna kutali kuyanda kwabo pe. Kwiinda mukuchita zintu eezi, nga balikutobelezya chikozyano chaSimalelaabo.

10. Nkamboonzi kuyanda Jesu nikweelede kupa kuti ubbabbatizigwe?

¹⁰ Ulasyoma kuti Jesu Mwana waJehova akuti nguSimuzyalwaalikke. Ulizi kuti Mwaami wakasalwa aaLeza kuti atweendelezye. Alubo ulizi kuti Jesu ulalibombya akuti utobelezya chikozyano chaWisi munzila iimaninide. Wakayiya atala akuti wakasanina bantu bakali aanzala, wakawumbulizya bakamanide manguzu alubo wakaponia bachiswa. (Mt. 14:14-21) Ulikubona Jesu mbalikweendelezya mbungano yakwe mazubaano. (Mt. 23:10) Alubo ulizi kuti Jesu uyoochita zyiingi naakweendelezya kali Mwaami waBwaami bwaLeza. Kujana watondeezya biyeni kuti ulamuyanda Jesu? Kwiinda mukutobelezya chikozyano chakwe. (Joh. 14:21) Ulakonzya kusaanguna kuzichita eezi kwiinda mukulipeda kuli Jehova akubbabbatizigwa.

11. Nkaakali kaambo kayandikana loko kapa kuti ubbabbatizigwe alubo nkamboonzi?

¹¹ Nkaakali kaambo kayandikana loko kapa kuti tubbabbatizigwe? Jesu wakakaamba mumulawu mupati waLeza, naakati: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse, amanguzu aako woonse.” (Mk. 12:30) Mbubo mbumuyanda na anduwe Leza?

12. Niinzi chipa kuti tuyande Jehova? (Langa chifanikisyo.)

¹² Kuli twaambo twiingi loko tupa kuti tuyande  Jehova. Muchikozyano, wakayiya kuti Jehova ‘nkasensa kabuumi’ akuti nguwe uutupa zipo “zyoonse zimaninide.” (Int. 36:9; Jak. 1:17) Zintu zibotu zyoonse nzitulaazyo, zyakazwa kuli Leza siluyando, nkaambo mwaabi.

13. Nkamboonzi chinunuzyo nichili chipo chibotu loko?

¹³ Chinunuzyo nchipo chibotu loko nchitwakapegwa aaJehova. Nkamboonzi? Yeeyesesya atala akumvwanana kwaJehova aMwanaakwe Jesu. Jesu wakati: “Taata ulandiyanda” alubo wakati: “Ndilamuyanda Taata.” (Joh. 10:17; 14:31) Jehova aJesu bakakkalaamwi kwamabbiliyoni aaminyaka. (Tus. 8:22, 23, 30) Yeeyela atala akuchisa nkwaakamvwa Jehova chiindi naakazumizya Mwanaakwe kuti azooswaane mapenzi akujayigwa. Jehova ulabayanda bantu kuswaanizya anduwe. Eezi nzizyo zyakapa kuti alipede kutupa Mwanaakwe ngwayandisya loko kuti abe chinunuzyo kuchitila kuti tuzoopone kukabe kutamani. (Joh. 3:16; Gal. 2:20) Taakwe kaambo pe kayinda aaka, kapa kuti tuyande Leza.

14. Niinzi nzweelede kuchita kuti ubotezye Jehova?

¹⁴ Ulikuyungizya kuyanda Jehova akaambo kakuti wakayiya zintu zyiingi atala anguwe. Ulaachiyandisyo chakuba mweenzinyina kusikila kukabe kutamani. Alino zilakonzeka eezi. Jehova uyanda kuti uchite zintu zipa kuti abotelwe. (Tus. 23:15, 16) Ulakonzya  kuzichita eezi kwiinda muzintu nzwaambuula anzuchita. Maponeno aako ayelede kutondeezya kuti ulamuyanda chachoonzyo Jehova. (1 Joh. 5:3) Taakwe chintu chiinda eechi pe nchukonzya kuchita mubuumi.

15. Kujana watondeezya biyeni kuti ulamuyanda Jehova?

¹⁵ Kujana watondeezya biyeni kuti ulamuyanda Jehova? Chakusaanguna, nkwiinda mukukomba kulinguwe kuli kumubuzya kuti walipeda kumubelekela. (Int. 40:8) Kuzwa waawo, ulatondeezya kulipeda ooko kwiinda mukubbabbatizigwa. Mbuli mbutwayiya kumasaangunino, kubbabbatizigwa kupa kuti ubotelwe alubo kuyandikana loko mubuumi bwako. Kuti wabbabbatizigwa, nga wasaanguna kuponena Jehova kutali lwako pe. (Rom. 14:8; 1 Pet. 4:1, 2) Eeyi nintaamu mpati alubo ilayandikana. Kubbabbatizigwa kupa kuti upone buumi bulikabotu alubo bunoneezya. Biyeni?

16. Lugwalo lwa Intembauzyo 41:12 lutondeezya kuti Jehova uzoobachitilaanzi bantu bapeda buumi bwabo kuti bamubelekele?

¹⁶ Jehova Mwaabi. Kufumbwa zintu nzitumupa Jehova nga waziboozya lubo kulindiswe kazili zyiingi. (Mk. 10:29, 30) Jehova uyoopa kuti upone buumi bubotu loko munyika eeyi iizwide bubi. Chiindi nwaabbabbatizigwa nga wasaanguna kupona buumi bupya. Alubo weelede kupona buumi oobo kusikila kukabe kutamani. Kwiinkilila kunembo kukomba Jehova kupa kuti luyando lwanu kamuli babili luzumanane. Alubo uzooba aachilongezyo chakupona kukabe kutamani kutafwi pe mbuli Jehova.—Bala Intembauzyo 41:12.

17. Niinzi nzukonzya kuchitila Jehova?

¹⁷ Chiindi nubweza ntaamu yakuti ulipede kuli Jehova akubbabbatizigwa, nga ulikuchitila Jehova chimwi chintu chiyandikana loko. Jehova wakakupa zintu zyoonse zibotu zipa kuti kubotelwa. Alubo Mulengi wajulu anyika, uyanda kuti ulipede kumubelekela kwabuumi bwako boonse. (Job. 1:8; 41:11; Tus. 27:11) Kuti wachita oobo, nga wasala kabotu loko. Kuyanda Jehova nkuko kupa kuti ubbabbatizigwe.

18. Njiili mibuzyo njweelede kulibuzya?

¹⁸ Kujana wawusandula biyeni mubuzyo wakuti, Uzoobbabbatizigwa na? Nduwe weelede kulisandwida mubuzyo ooyo. Pesi kulakonzya kukugwasya kuti walibuzya kuti, ‘Ndilikulindaanzi?’ (Mil. 8:36) Utatulubi pe twaambo tutatu ntutwalanga-langa muchiiyo eechi. Kakusaanguna, kuyanda kasimpe abululami. Libuzye kuti, ‘Ndilayanda na kuzoobona bantu kabali baabwaambuula kasimpe alubo kabachita zintu ziluleme?’ Kaambo kachibili, kuyanda Jesu Kkristu. Libuzye kuti, ‘Ndilayanda na kuti Mwana waLeza abe Mwaami wangu akuti nditobelezye chikozyano chakwe?’ Kaambo kachitatu kayandikana loko, kuyanda Jehova. Libuzye kuti, ‘Ndilayanda na kuchita zintu zibotezya Jehova kwiinda mukusala kumubelekela?’ Kuti wasandula kuti iiyi kumibuzyo yoonse eeyi, nkamboonzi nutanabbabbatizigwa? Uchilindaanzi?—Mil. 16:33.

19. Nkamboonzi nuteelede kuwaya-waya kuti ubbabbatizigwe? Amba chikozyano. (Johane 4:34)

¹⁹ Kuti kuwaya-waya kubweza ntaamu yakuti ubbabbatizigwe, langa-langa chikozyano chakabelesegwa aaJesu. (Bala Johane 4:34.) Jesu wakakozyanisya kuchita kuyanda kwaWisi achakulya. Nkamboonzi? Akaambo kakuti chakulya toonse tulachiyanda. Jesu wakalizi kuti zintu Jehova nzyatubuzya kuti tuchite zigwasya ndiswe. Jehova tayandi pe kuti tuchite zintu zikonzya kutuchisa. Kuchita kuyanda kwaJehova kuswaanizya kubbabbatizigwa. (Mil. 2:38) Nkinkaako, weelede kuba aachoonzyo chakuti kuswiilila mulawu ooyu kugwasya nduwe. Kuti kutawayi-wayi kukulya chakulya chinono nchuyandisya, nkamboonzi nulikuwaya-waya kuti ubbabbatizigwe?

20. Tuyoolanga-langaanzi muchiiyo chitobela?

²⁰ Uchilindaanzi? Bamwi balakonzya kusandula kuti, “Nsinalibambila pe.” Simpe ndyakuti kusala kulipeda kuli Jehova akubbabbatizigwa nchintu chiyandikana loko nchweelede kuchita mubuumi bwako. Nkinkaako, weelede kuyeeyesesya, ulipe chiindi akubeleka changuzu kuti ubweze ntaamu eeyi. Kuti kuli aachiyandisyo chakuyanda kubbabbatizigwa, niinzi nzweelede kuchita kuti ulibambile? Tuyoolanga-langa nkani eeyi muchiiyo chitobela.