Bamwi nibakabala lwaano oolu bakayeeya oobo. Pesi mumavesi aaya, kuli baalumi babili basiyene bakawuzikidwe zina lyakuti Mefibboseti. Lino atulange-lange zyakachitika kuti tuyimvwisisisye kabotu nkani eeyi.

Mwaami Sawulu wakali aabana balombe bali 7 abana basimbi babili. Mwanaakwe wakusaanguna wakali kutegwa Jonatani. Mpawo umwi mwanaakwe wakali kutegwa Mefibboseti alubo bayina bakali kutegwa Rizipa. Jonatani wakazooba aamwana mulombe wakali kutegwa Mefibboseti. Eezi zyaamba kuti Mwaami Sawulu wakali aamwana wakali kutegwa Mefibboseti amuzukulu wakawuzikidwe zina eeli.

Mwaami Sawulu wakasaanguna kuzonda bantu bakuGibbiyoni alubo wakali kuyanda kubajaya boonse. Kulakonzeka kuti bantu bakuGibbiyoni biingi bakajayigwa. Eezi teezyakali kabotu pe. Nkamboonzi? Nkaambo muchiindi chaJoshuwa, basilutwe bamalsrayeli bakali basyomezya bantu bakuGibbiyoni kuti teebakali kuyoobanyonyoona pe pesi bakali kuyookkala kabali aaluumuno ambabo.—Jos. 9:3-27.

Chizuminano eecho chakachili kubeleka muchiindi chaMwaami Sawulu. Pesi Mwaami Sawulu wakafutatila chizuminano eecho mpawo wakajeya bamwi bantu bakuGibbiyoni. Eezi zyakapa kuti kube “mulandu wabulowa ali Saulo alimwi aŋanda yakwe.” (2 Sam. 21:1) Davida naakaba mwaami, bantu bakuGibbiyoni bakali basyaala bakaambuulaawe atala ankani eeyi. Davida wakababuzya kuti abachitileenzi kuti mulandu ooyu umane akuti Jehova abalongezye lubo. Bantu bakuGibbiyoni teebakakumbila mali pe pesi bakakumbila bana balombe bali 7 bamuntu ooyo ‘iwakajaya bantu babo’ kuti bakabajaye. (My. 35:30, 31) Davida wakachita kweendelana anzibakakumbila.—2 Sam. 21:2-6.

Chiindi zintu eezi nizyakali kuchitika, Sawulu aJonatani bakali bafwa munkondo pesi mwana waJonatani, Mefibboseti wakachili kupona. Mefibboseti wakalilemene akaambo kakuti wakawa naakachili muniini. Alubo taakwe naakagwasilizya syaayinakulu mukujeya bantu bakuGibbiyoni. Davida wakali wachita chizuminano amweenzinyina Jonatani chakuti wakali kuyoogwasya bana bakwe kuswaanizya aMefibboseti. (1 Sam. 18:1; 20:42) Bbayibbele lyaamba kuti: “Mwami [Davida wakeetelela] . . . Mefibboseti mwana wa Jonatani imwana wa Saulo akaambo kacikonke eeco Davida a Jonatani mwana wa Saulo ncobakakonkezyanya muzina lya Jehova.”—2 Sam. 21:7.

Nikuba boobo, Davida wakachita kweendelana anzibakali bakumbila bantu bakuGibbiyoni. Wakabapa bana babili baSawulu, umwi wakali kutegwa Mefibboseti alubo wakabapa bazukulu baSawulu bali5. (2 Sam. 21:8, 9) Nzyaakachita Davida zyakapa kuti mulandu waganzi umane.

Oolu teelwaano luzutu nkaambo mulawu waLeza wakali kwaamba kuti: “Bana tabeelede kujaigwa akaambo kazibi zyabamausyi.” (Dt. 24:16) Kaansinga bana baSawulu babili abazukulu bakwe bali 5 teebakalikwe mulandu, nikuli Jehova taakazumina pe kuti bajayigwe. Alubo mulawu wakali kuyungizya kwaamba kuti: “Muntu weelede kujaigwa akaambo kacibi cakwe mwini.” Kweelede kuti bana baSawulu abazukulu bakwe bakafwa akaambo kakuti bakagwasilizya Sawulu kujaya bantu bakuGibbiyoni. Nkinkaako, bakafwa akaambo kakuti bakali kubbadala milandu yabo.

Lwaano oolu lutondeezya kuti muntu takonzyi pe kuchita chintu chibi mpawo aambe kuti ndali kuyanda kuchita kweendelana ambundabuzigwa. Kamwi kasimpi kaamba kuti: “Kobotya nzila imwiinda maulu aako, aboobo nzila zyako zyoonse zinooli kabotu.”—Tus. 4:24-27; Ef. 5:15.