CHIIYO 23
Jehova Ulakugwasya Chiindi Nulendeledwe
“Jehova ulaafwaafwi abaabo boonse bamwiita.”—INT. 145:18.
LWIIMBO 28 Ikumvwana a Jehova
ZITAYIIGWE *
1. Nkamboonzi bakombi baJehova chimwi chiindi nibalimvwa kabalendeledwe?
CHIMWI chiindi, biingi besu ngatwalimvwa katulendeledwe. Bamwi balimvwa kabalendeledwe kwachiindi chiniini biyo pesi bamwi balimvwa kabalendeledwe kwachiindi chilamfu. Chimwi chiindi tulakonzya kulimvwa katulendeledwe nikuba katuli aakati kabantu. Bamwi balakonzya kulendelelwa kuti balongela kuliimwi mbungano. Bamwi ngabalendelelwa kuti bakukkala kundawu iili kule ababbululu babo. Bamwi balalendelelwa akaambo kakuti nga bakafwidwa ababbululu babo. Alubo bamwi bachili bapya mukasimpe balakonzya kulendelelwa akaambo kakukazigwa naakuti kupenzegwa abampuli abeenzinyina batakombi Jehova.
2. Njiili mibuzyo njitutasandule?
2 Jehova ulazibona zyiimo nzituswaana alubo ulazimvwisisisya. Chiindi nulendeledwe, ba aachoonzyo chakuti Jehova ulizi mbulimvwa alubo ulaachiyandisyo chakukugwasya. Pesi Jehova utugwasya biyeni? Kujana twachita biyeni kuti tutalendelelwi loko? Nga tulabagwasya biyeni bakombima balimvwa kabalendeledwe? Mibuzyo eeyi ilasandulwa muchiiyo eechi.
JEHOVA ULAANDABA ANDISWE
Jehova wakatuma mungelo kuti akabuzye Eliya kuti teenguwe pe alikke mukombi wakwe wakali wasyaala (Langa fuka 3)
3. Jehova wakatondeezya biyeni kuti wakali aandaba aEliya?
3 Jehova ulaandaba abakombi bakwe boonse alubo uyanda kuti kababotelwa. Ulaafwiifwi kuli umwi awumwi wesu alubo zilamuchisa chiindi natubona katukataazikene. (Int. 145:18, 19) Muchikozyano, Jehova wakamubikkila maanu mupolofita wakwe Eliya. Eliya wakapona chiindi zintu nizyakali ziyumu. Achiindi nchicheecho, bakombi baJehova bakali kupenzegwa. Alubo Jezebbeli wakali kuyanda kujeya Eliya. (1 Bam. 19:1, 2) Kweelede kuti chimwi chakali kupa kuti Eliya akataazikane nchakuti wakali kubonaanga nguwe alikke mukombi waJehova wakali wasyaala. (1 Bam. 19:10) Leza wakabweza ntaamu chakufwambaana kuti agwasye Eliya. Jehova wakatuma mungelo kuti akabuzye Eliya kuti teenguwe pe alikke mukombi wakwe wakali wasyaala, kwakachili bamwi maIsrayeli bakachili kumukomba.—1 Bam. 19:5, 18.
4. Lugwalo lwa Marko 10:29, 30, lutondeezya biyeni kuti Jehova ulaandaba abakombi bakwe basiya zimwi zintu kuti bamubelekele?
4 Jehova ulizizi kuti kuli zimwi zintu nzitweelede kusiya kuti tumubelekele. Muchikozyano, tweelede kusiya beenzuma batali kabotu akusweekelwa abweenzuma mbutulaabo ababbululu besu batakombi Jehova. Kulakonzeka kuti Petro wakalikataazikene chiindi naakabuzya Jesu kuti: “Twasiya zintu zyoonse akutobela nduwe; aboobo ino ncinzi ncotuyoojana?” (Mt. 19:27) Jesu wakasyomezya basikwiiya bakwe kuti bakombinyina bakali kuyooba mbuli bamumpuli yabo. (Bala Marko 10:29, 30.) Alubo Taateesu wakujulu Jehova ulabagwasya bantu balipedelede kumubelekela. (Int. 9:10) Lino atulange-lange zimwi nzitukonzya kuchita kuti katulendeledwe.
NIINZI NZWEELEDE KUCHITA KUTI KULENDELEDWE?
5. Kubikkila maanu kunzila Jehova njatugwasyaayo kutugwasya biyeni?
5 Yeeya atala aJehova mbalikukugwasya. (Int. 55:22) Kuchita oobo kuyookugwasya kuti utabonaanga uli awulikke pe. Atubone chikozyano chamuchizi uutakwetwe utegwa Carol. * Bamumpuli yakwe teeBakamboni pe. Carol wakaamba kuti: “Kuti ndayeeya atala aJehova mbaakandigwasya chiindi nindakali muchiimo chiyumu, ngandabona kuti tandili andikke pe. Eezi zipa kuti ndibe aachoonzyo chakuti Jehova unoondigwasya chiindi choonse.”
6. Lugwalo lwa 1 Petro 5:9, 10, lubagwasya biyeni aabo balimvwa kabalendeledwe?
6 Yeeya atala aJehova mbalikugwasya bakombinyokwe balendeledwe. (Bala 1 Petro 5:9, 10.) Atubone chikozyano chamukwesu uutegwa Hiroshi waba aaminyaka myiingi kali nguwe aalikke Kamboni mumpuli yabo. Hiroshi wakati: “Umwi awumwi mumbungano uli aamapenzi ngaswaananaawo. Nkinkaako, kuziba kuti toonse tulikuzumanana kubelekela Jehova nikuba katuswaanana aamapenzi kulatusungwaazya andiswe tuli aabamumpuli batali mukasimpe.”
7. Kukomba kukugwasya biyeni?
7 Kkala kuchita zintu zyabukombi. Eezi ziswaanizya kukomba kuli Jehova kumubuzya mbulimvwa. (1 Pet. 5:7) Muchizi uutegwa Massiel wakalimvwa kalendeledwe chiindi naakasala kukomba Jehova nkaambo bamumpuli yakwe teebakali Bakamboni pe. Massiel wakaamba kuti: “Kukomba kuli Jehova nchiimwi chintu chakandigwasya loko chiindi nindakali kulimvwa kandilendeledwe.” Massiel wakayungizya kuti: “Leza ndakali kumubona mbuli Ndeende. Ndakali kukomba kulinguwe chiindi choonse kandimubuzya mbundilimvwa.”
Kuswiilizya kubala kwaBbayibbele kwakalekkodwa aamwi mabbuku kulakonzya kutugwasya chiindi nitulendeledwe (Langa fuka 8) *
8. Kubala Bbayibbele akuyeeyesesya kukugwasya biyeni?
8 Bala Bbayibbele buzuba abuzuba alubo uyeeyesesye atala alwaano luli muBbayibbele lutondeezya kuti Jehova ulakuyanda. Atubone chikozyano chamuchizi utegwa Bianca uulisimya kumajwi aatali kabotu ngabuzigwa abamumpuli yakwe. Bianca wakaamba kuti: “Kubala Bbayibbele akuyeeyesesya atala azintu nzindibala azyakachitikila bakombi baJehova bakaswaanana aachiimo chikozyenie achangu kundigwasya loko.” Bamwi bakombi baJehova bayeeyesesya atala amagwalo abawumbulizya ali mbuli lugwalo lwa Intembauzyo 27:10 a Isaya 41:10. Bamwi baswiilizya zyakalekkodwa zili aawebbusayiti yesu chiindi nibali kulibambila miswaangano naakuti kuswiilizya kubala kwaBbayibbele kwakalekkodwa. Kuchita oobo kubagwasya kuti batalendelelwi loko.
9. Kunjila miswaangano kukugwasya biyeni?
9 Njila miswaangano chiindi choonse. Uyoosungwaazigwa kuti wanjila miswaangano alubo uyoozibana kabotu abakwesu abachizi. (Heb. 10:24, 25) Massiel waambwa aajulu wakaamba kuti: “Nikuba kuti ndakali aabweeme, ndakasala kuti kandinjila miswaangano chiindi choonse akuti kandisandula kumiswaangano. Eezi zyakandigwasya kuti ndizibane aabakwesu abachizi.”
10. Nkamboonzi nitweelede kujana beenzuma mumbungano?
10 Jana beenzuma mumbungano. Mvwanana aabakwesu abachizi bamumbungano kazitakwe ndaba kuti mbapati naakuti mbaniini akuti bazwa kuli. Bbayibbele lyaamba kuti busongo bujanwa “kubantu bacembeede.” (Job. 12:12) Nikuba bachembeede balakonzya kwiiya kuzwa kubakwesu abachizi bachikula. Davida wakali muniini kuli Jonatani pesi bakali kumvwanana loko. (1 Sam. 18:1) Davida aJonatani bakali kusungwaazyania kuti babelekele Jehova nikuba kuti bakali kuswaanana aamapenzi. (1 Sam. 23:16-18) Atumvwe zyakaambwa awumwi muchizi utegwa Irina. Irina nguwe alikke Kamboni mumpuli yabo. Wakati: “Bakwesu abachizi balakonzya kuba mbuli bamumpuli yesu, niimpuli njatupede Jehova.”
11. Niinzi nzitweelede kuchita kuti tujane beenzuma?
11 Teekuba pe kujana beenzuma mumbungano ikapati kuti kuli aabweeme. Muchizi utegwa Ratina wakali aabweeme alubo wakayiya kasimpe nikuba kuti wakali kukazigwa. Ratina wakaamba kuti: “Ndakazoobona kuti ndakali kuyanda kugwasigwa aabakwesu abachizi bamumbungano.” Nisimpe kuti teekuuba pe kubuzya umwi muntu mbulimvwa pesi kuti wamubuzya ziyoopa kuti mumvwanane loko. Bakwesu abachizi balayanda kukugwasya pesi bayanda kuti ubabuzye mbulimvwa kuchitila kuti babone mbubakonzya kukugwasya.
12. Mulimu wakukambawuka utugwasya biyeni?
12 Chimwi chikonzya kutugwasya kuti tujane beenzuma mumbungano, nkuzwa mumulimu wakukambawuka. Carol waambwa ajulu wakati: “Kukkala kandizwa mumulimu wakukambawuka akuchita imwi milimu yabukombi kwakandigwasya kuti ndijane beenzuma biingi. Kwaminyaka myiingi, Jehova ulikundigwasya kabelesya beenzuma aaba.” Kuba aabeenzuma basimide mubukombi kulagwasya nkaambo Jehova ubelesya mbabo kuti batugwasye kulwana aazintu zitukataazya zili mbuli kulendelelwa.—Tus. 17:17.
TONDEEZYA KUTI ULABAYANDA BAMWI BAMUMBUNGANO
13. Nguuli mulimu ngutulaawo toonse mumbungano?
13 Toonse mumbungano tuli aamulimu wakutondeezya bamwi kuti tulabayanda kuchitila kuti kutabi umwi ulimvwa kalendeledwe. (Joh. 13:35) Nzituchita anzitwaambuula zilakonzya kubasungwaazya loko bamwi. Eezi zileendelana azyakaambwa aawumwi muchizi, wakati: “Chiindi nindakayiya kasimpe, bakwesu abachizi bakaba bamumpuli yangu. Teendali kunookonzya pe kuba Kamboni kaansinga teembabo bakandigwasya.” Niinzi nzitweelede kuchita kuti tugwasye aabo bali aabamumpuli batali Bakamboni kuti babone kuti tulabayanda?
14. Niinzi nzweelede kuchita kuti ube mweenzinyina wabantu bachili bapya mumbungano?
14 Yezya kuba mweenzinyina wabantu bachili bapya mumbungano. Eezi tulakonzya kuzichita kwiinda mukubatambula kabotu. (Rom. 15:7) Tweelede kuchita zyiingi kutali kubajuzya luzutu. Tweelede kuba beenzinyina kwiinda mukuchita zintu zipa kuti bweenzuma bwesu ambabo busime. Tondeezya kuti ulaandaba ambabo. Chiindi nwaambuulaabo, yezya kumvwisisisya buyumu-yumu mbubaswaana pesi utabuzyi makani aansiswa. Utabamanikizyi kwaamba zintu nzibataangunukide pe kwaamba. Pesi buzya mibuzyo munzila yabupampu alubo uswiilisisye chiindi nibali kusandula. Muchikozyano, ulakonzya kubuzya kuti bakakajana biyeni kasimpe.
15. MaKristu basimide mubukombi babagwasya biyeni bamwi mumbungano?
15 Mbungano yoonse ilakonzya kusima kuti toonse twatondeezyania luyando, ikapati kuti baalu abamwi basimide mubukombi baba kunembo kutondeezya kuti balabayanda bamwi. Melissa wakayiisigwa kasimpe abayina wakati: “Ndilabalumba bakwesu bakatondeezya kuti bali andaba andime nkaambo bakali kujana chiindi chakubaamwi andime. Balandiswiilila chiindi nindiyanda kwaambuulaabo.” Umwi mukwesu uuchikula utegwa Mauricio wakalendelelwa chiindi muntu wakamuyiisya Bbayibbele naakasiya kasimpe. Wakaamba kuti: “Baalu bakatondeezya kuti balaandaba andime. Nzibakachita zyakandigwasya loko. Bakali kukkala kabaambuula andime. Bakali kwiinka aandime mumulimu wakukambawuka, bakali kundibuzya zintu nzibakali kwiiya muBbayibbele alubo bakali kujana chiindi chakulyookezya andime.” Melissa aMauricio bali kubeleka kabali mumulimu wachiindi choonse.
Kuli umwi mukwesu na naakuti muchizi wamumbungano yanu ngukonzya kutondeezya luyando kwiinda mukujana chiindi chakubaamwi anguwe? (Langa fuka 16-19) *
16-17. Niinzi zimwi nzitukonzya kuchita kuti tugwasye bamwi balimvwa kabalendeledwe?
16 Gwasya bamwi kwiinda mukubachitila zimwi zintu. (Gal. 6:10) Mukwesu utegwa Leo ubeleka kali mumishinali kubusena buli kule abamumpuli yakwe wakaamba kuti: “Chiindi chiingi tulabotelwa kuti umwi muntu watugwasya chiindi nituyanda lugwasyo. Ndichiyeeyede nindakachitikilwa aangozi yamoota, ndakalikataazikene chiindi nindakasika kung’anda. Imwi mpuli yakanditamba kuti tukalyaamwi. Tandichiyeeyede pe kuti twakalyaanzi pesi nzindichiyeeyede nzyakuti bakali kundiswiilizya chiindi nindakali kwaamba mbundakali kulimvwa. Eezi zyakanduumbulizya loko.”
17 Toonse tulabotelwa kubaamwi abakombima kumiswaangano yabbooma ayabbazu akwaambuuzyania atala anzitwayiya kumiswaangano eeyi. Carol waambwa aajulu wakaamba kuti: “Nga ndalimvwa kandilendeledwe ikapati chiindi nindili kumiswaangano yabbooma ayabbazu.” Nkamboonzi nalimvwa oobu? Wakaamba kuti: “Nikuba kuti ngandili aakati kabakwesu abachizi biingi pesi ngandalimvwa kandilendeledwe akaambo kakuti umwi awumwi nga uli abamumpuli yakwe.” Bamwi kulabayumina kuya kumiswaangano yabbooma naakuti yabbazu kuzwa nibafwidwa aamuntu ngubakwetenaawe. Kuli umwi muntu nguzi na uli muchiimo chili boobu? Ulakonzya kumukumbila kuti muzookkalaamwi kumuswaangano uutobela.
18. Kujana twalubelesya biyeni lugwalo lwa 2 Bakorinto 6:11-13?
18 Jana chiindi chakubaamwi abakombinyokwe. Tweelede kujana chiindi chakubaamwi abakwesu abachizi basiyene-siyene ikapati aabo banga balimvwa kabalendeledwe. Tweelede ‘kujula myoyo yesu’ kubakombima balendeledwe. (Bala 2 Bakorinto 6:11-13.) Melissa waambwa aajulu wakaamba kuti: “Twakali kubotelwa loko chiindi bakwesu abachizi nibakali kututamba kumaanda aabo akuti tukaswaye zimwi ndawu katulaamwi.” Kuli umwi na mumbungano yanu ngukonzya kutamba?
19. Muuzyiimo zilibiyeni mutweelede kubaamwi abakombima?
19 Bakombima balakonzya kubotelwa kuti twabatamba ikapati chiindi nibalendeledwe. Muchikozyano, bamwi kulabayumina kubaamwi abamumpuli yabo batali Bakamboni chiindi nibali kusekelela mapobwe ateendelani aaMagwalo. Alubo bamwi ngabalimvwa kabalendeledwe kuti bwasika buzuba bwakafwa bbululu wabo. Kuti twajana chiindi chakubaamwi abakwesu abachizi bali muzyiimo zili boobu ngatuli kutondeezya kuti tulaandaba ambabo.—Flp. 2:20.
20. Majwi ali mulugwalo lwa Matayo 12:48-50 atugwasya biyeni chiindi nitulendeledwe?
20 Kuli zintu zyiingi zipa kuti maKristu balimvwe kabalendeledwe. Pesi tweelede kuba aachoonzyo chakuti Jehova ulizi mbutulimvwa. Alubo ulatugwasya kabelesya bakombima. (Bala Matayo 12:48-50.) Nkinkaako, tweelede kutondeezya kuti tulamulumba Jehova kwiinda mukugwasya bamwi mumbungano. Nikuba kuti twaswaanana aabuyumu-yumu, tatweelede kuyeeya kuti tuli atulikke pe nkaambo Jehova ulaandiswe.
LWIIMBO 46 Twalumba Jehova
^ par 5 Kuli nunga walimvwa kulendeledwe na? Kuti kulimvwa oobo, ba aachoonzyo chakuti Jehova ulizi mbulimvwa alubo uli aachiyandisyo chakukugwasya. Muchiiyo eechi, tulalanga-langa atala azintu nzitukonzya kuchita kuti tutalendelelwi loko. Alubo tulayiya atala ambutukonzya kugwasya bakombima balendeledwe.
^ par 5 Amwi mazina ngitwabelesya akachinchwa.
