CHIIYO 5
Tulayinka Andinywe
“Tuyanda kuunka andinywe, nkaambo twamvwa kuti Leza ulaandinywe.”—ZEK. 8:23.
LWIIMBO 26 Mwakali Kucitila Ndime
ZITAYIIGWE *
Bambelele zimbi (“bantu bali kkumi”) bachibona kachili chilongezyo kukombaamwi abananikidwe (‘muJuda’) (Langa fuka 1-2)
1. Niinzi Jehova nchaakaamba chili kuchitika mazubaano?
JEHOVA wakaamba kuti mazubaano “bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” (Zek. 8:23) ‘MuJuda’ waambwa aawa wiiminina maKristu bananikidwe aamuuya uusalala. Alubo bategwa “iba Israyeli ba Leza.” (Gal. 6:16) “Bantu bali kkumi” bayiminina maKristu balaabulangilizi bwakuzoopona aanyika kukabe kutamani. Balizi kuti Jehova ulikulongezya kabunga aaka kabananikidwe alubo bachibona kachili chilongezyo kukombaamwi ambabo.
2. Munzilaanzi “bantu bali kkumi” ‘mubayinkaamwi’ abananikidwe?
2 Nikuba kuti lino tazichiti pe kuziba mazina amaKristu boonse bananikidwe bachili aanyika, * pesi bantu balaabulangilizi bwakupona aanyika balakonzya ‘kwiinkaamwi’ abananikidwe. Biyeni? Bbayibbele lyaamba kuti “bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” Lugwalo oolu lwaamba atala amuJuda uumwi. Pesi bbala lyakuti “andinywe” alyakuti “ulaandinywe” aamba bantu biingi. Eezi zyaamba kuti muJuda waambwa teemuntu umwi pe pesi wiiminina kabunga kabananikidwe. Aabo batananikidwe beendaamwi amuJuda kwiinda mukubelekela Jehova kabalaamwi amaKristu bananikidwe. Nikuba boobo, tababoni maKristu bananikidwe mbuuli basololi, nkaambo balizi kuti Jesu nguwe Musololi.—Mt. 23:10.
3. Njiili mibuzyo itasandulwe muchiiyo eechi?
3 Mbukunga kuchili maKristu bananikidwe bachili aanyika, bamwi bantu balakonzya kukataazikana kuti: (1) MaKristu bananikidwe beelede kulibona biyeni? (2) Tweelede kubabona biyeni bantu balya chinkwa akunywa wayini kuChiyubulusyo? (3) Tweelede kukataazikana na atala akuyungizya kwanamba yabantu balya chinkwa akunywa wayini kuChiyubulusyo? Mibuzyo eeyi ilasandulwa muchiiyo eechi.
MAKRISTU BANANIKIDWE BEELEDE KULIBONA BIYENI?
4. Njiili nchenjezyo iijanika muli 1 Bakorinto 11:27-29 maKristu bananikidwe njibeelede kuyeeyesesya, alubo nkamboonzi?
4 MaKristu bananikidwe beelede kuyeeyesesya atala anchenjezyo iijanika muli 1 Bakorinto 11:27-29. (Bala.) Zichitika biyeni kuti muKristu uunanikidwe alye chinkwa akunywa wayini “munzila iteelede” kuChiyubulusyo? Ulakonzya kuzichita kuti walya chinkwa akunywa wayini pesi kataponi kweendelana azyeelelo zyaJehova ziluleme. (Heb. 6:4-6; 10:26-29) MaKristu bananikidwe balizi kuti beelede kukkala kabasyomeka kuti ‘bakajane bulumbu bwakujulu mbwabayitila Leza kwiinda muli Kristo Jesu.’—Flp. 3:13-16.
5. MaKristu bananikidwe beelede kulibona biyeni?
5 Muuya uusalala ugwasya bakombi baJehova kuti kabalibombya kutali kuti kabalisumpula pe. (Ef. 4:1-3; Kol. 3:10, 12) Nkinkaako maKristu bananikidwe tabaliboni kuti balisumpukide kwiinda bamwi. Balizi kuti Jehova tabapi muuya uusalala mwiingi kwiinda bamwi bakombi bakwe. Tabaliboni kuti balaaluzibo lwiingi lwaBbayibbele kwiinda bamwi. Alubo balizi kuti tabakwe cheelelo chakubuzya umwi muntu kuti wakananikwa akuti atalike kulya chinkwa akunywa wayini kuChiyubulusyo. Pesi balalibombya akuzumina kuti Jehova nguwe utamba bantu kuti bayinke kujulu.
6. Kweendelana lugwalo lwa 1 Bakorinto 4:7, 8, maKristu bananikidwe beelede kulibona biyeni?
6 Nikuba kuti maKristu bananikidwe balizi kuti nchilongezyo chipati kutambwa kuzooya kujulu, pesi tabayandi kuti bamwi babasumpule. (Flp. 2:2, 3) Alubo balizi kuti chiindi Jehova naakabananika takwe naakabuzya bamwi bantu pe. Nkinkaako muKristu uunanikidwe tagambi pe kuti umwi muntu katasyomi pe kuti wakananikwa. Ulizi kuti Bbayibbele lyaamba kuti tatweelede kufwambaana kusyoma muntu kuti waamba kuti Leza wakamupa mukuli uuyandikana. (Ciy. 2:2) MuKristu uunanikidwe tayandi kuti bantu bamubikkile maanu, nkinkaako teendi kabuzya bantu kuti wakananikwa alubo talidundi pe atala akunanikwa kwakwe.—Bala 1 Bakorinto 4:7, 8.
7. Niinzi nzibateelede kuchita maKristu bananikidwe alubo nkamboonzi?
7 MaKristu bananikidwe tabaliboni kuti beelede kuliswaanizya abananikenyina luzutu naakuti kupanga kabunga kabo abalikke. Tabayanduuli bamwi maKristu bananikidwe kuchitila kuti baambuule atala akunanikwa kwabo naakuti bapange tubunga twakubala Bbayibbele twabananike luzutu. (Gal. 1:15-17) Kuti bachita oobo kulaba kutamvwanana mumbungano. Alubo nga balikukazyania amuuya uusalala, ugwasya bakombi baLeza kuti babe aluumuno akuti bajatane.—Rom. 16:17, 18.
TWEELEDE KUBABONA BIYENI MAKRISTU BANANIKIDWE?
Tatweelede kubona bananike naakuti bantu batuzulwida mumbunga mbuuli bantu bali ampuwo (Langa fuka 8) *
8. Nkamboonzi nitweelede kuchenjela atala anzila njitubabonaayo bantu balya chinkwa akunywa wayini kuChiyubulusyo? (Langa makani aamunsi.)
8 Tweelede kubabona biyeni bakwesu abachizi bananikidwe? Tazili kabotu kulumbayizya muntu munzila yiindilide nikuba kuti munyina waKristu. (Mt. 23:8-12) Chiindi Bbayibbele nilyaambuula atala abaalu litusungwaazya kuti tutobelezye “lusyomo lwabo” pesi talitubuzyi kuti tubone umwi muntu mbuuli muzulwidi. (Heb. 13:7) Nisimpe kuti Bbayibbele lyaamba kuti bamwi mumbungano beelede “kupegwa bulemu kapati.” Pesi tweelede kubalemeka akaambo kakuti “beendelezya kabotu” alubo babeleka “canguzu mukukanana akuyiisya” kutali akaambo kakuti balinanikidwe. (1 Tim. 5:17) Kuti bananikidwe twabalumbayizya zyiindilide tulapa kuti babe abweeme. * Alubo kwiinda zyoonse, tulapa kuti balisumpule. (Rom. 12:3) Takwe akati kesu uuyanda kuchita chintu chikonzya kupa kuti babunyina baKristu bananikidwe balisumpule.—Lk. 17:2.
9. Nga tulatondeezya biyeni kuti tulabalemeka maKristu bananikidwe?
9 Nga tulatondeezya biyeni kuti tulabalemeka maKristu bananikidwe aaJehova? Tatweelede kubabuzya pe kuti bakananikwa biyeni. Eeyi ninkani njitutakwe cheelelo pe chakwiiziba. (1 Tes. 4:11; 2 Tes. 3:11) Alubo tatweelede kuyeeyela kuti mulumi naakuti mwanakazi, bazyali bakwe naakuti bamwi bamumpuli ambabo balinanikidwe. Muntu tananikwi akaambo kakuti umwi mumpuli wakananikwa. Pesi Leza nguusala. (1 Tes. 2:12) Alubo tatweelede kubuzya mibuzyo ikonzya kunyemya bamwi. Muchikozyano, tatweelede kubuzya mwanakazi wamukwesu uunanikidwe kuti ulimvwa biyeni atala akuzoopona aanyika kukabe kutamani mulumaakwe katawo pe. Pesi tweelede kuziba kuti munyika mpya Jehova uyookkutya “cilenge coonse cipona kwiinda mukucipa ncociyanda.”—Int. 145:16.
10. Tulikwabilila biyeni kuti twaleka ‘kulumbayizya’ bamwi munzila yiindilide?
10 Kuti twaleka kubona maKristu bananikidwe mbuuli kuti balisumpukide nga tuli kulikwabilila. Biyeni? Bbayibbele lyaamba kuti bamwi maKristu bananikidwe balakonzya kukachilwa kuzumanana kusyomeka. (Mt. 25:10-12; 2 Pet. 2:20, 21) Pesi kuti ‘katutabalumbayizyi’ zyiindilide tatuzoochegwi akakole kakutobela bantu bananikidwe, bazibinkene loko naakuti baba achiindi chilamfu kababelekela Jehova. (Jud. 16) Nikuba kuti baleka kusyomeka naakuti baleka kukomba, tuzookkala katusyomeka kuli Jehova alubo tatuzooleki pe kumubelekela.
TWEELEDE KUKATAAZIKANA NA ATALA ANAMBA YABANTU BALYA KUCHIYUBULUSYO?
11. Niinzi chili kuchitika kunamba yabantu balya kuChiyubulusyo?
11 Chiindi, namba yabantu balya kuChiyubulusyo yakali kuseluka. Pesi mazubaano, ilikuyungizya munyaka amunyaka. Tweelede kukataazikana na atala azeezi? Peepe. Atulange-lange kuti nkamboonzi nituteelede kukataazikana.
12. Nkamboonzi nituteelede kukataazikana atala anamba yabantu balya kuChiyubulusyo?
12 “Jehova ulibazyi aabo bazulilwa kulinguwe” naakuti bali kubbazu lyakwe. (2 Tim. 2:19) Kusiyana aJehova, bakwesu babala bantu balya chinkwa akunywa wayini kuChiyubulusyo tababazi pe bantu bakananikwa choonzyo. Nkinkaako namba eeyi iswaanizya bantu bayeeya kuti bakananikwa pesi kabatananikidwe pe. Muchikozyano, bamwi bantu bakali kulya bakazooleka mukuya kwachiindi. Kulakonzeka kuti bamwi balipambanikide muboongo zinga zyapa kuti basyome kuti bazooyendelezya aKristu kujulu. Nkinkaako tatuzi pe kuti mbangane bantu bananikidwe choonzyo bachili aanyika.
13. Bbayibbele lilaamba na kuti mbangane bantu bananikidwe bachinooli aanyika mapenzi mapati nazootalika?
13 Kunooli bananikidwe mumasena miingi chiindi Jesu naatazoosike kuzoobatola kujulu. (Mt. 24:31) Bbayibbele lyaamba kuti mumazuba aakumamanino kunooli bananikidwe bacheede bachinooli aanyika. (Ciy. 12:17) Pesi talyaambi pe kuti banooli bangane bachinooli anyika naazootalika mapenzi mapati.
Tweelede kumubona biyeni muntu ulya kuChiyubulusyo? (Langa fuka 14)
14. Mbuuli mbukutondeezedwe muli Baroma 9:11, 16, niinzi nzitweelede kuziba atala akusalwa kwabananike?
14 Jehova ngusala chiindi chakusala bananike. (Rom. 8:28-30) Jehova wakasaanguna kunanika maKristu kuzwa chiindi Jesu naakabusigwa. Kubonekaanga maKristu bakusaanguna bakasimpe boonse bakalinanikidwe. Muminyaka yakatobela bantu bakali kulyaamba kuti maKristu teebakali kumutobela chakumaninina pe Kristu. Nikuba boobo, muminyaka njiyeeyo, Jehova wakananika bache bakali maKristu bachoonzyo. Bakali mbuuli wiiti yakambwa aJesu kuti yakali kuyookomena mumasokwe. (Mt. 13:24-30) Mumazuba aakumamanino, Jehova ulikwiinkilila kunembo kusala bantu batazooswaanisigwe muli bali 144.000. * Nkinkaako kuti Jehova wasala bamwi babo mamanino kali aba aafwiifwi kusika tatweelede kumusola pe. (Bala Baroma 9:11, 16.) * Tweelede kuchenjela kuti tutabi mbuuli babelesi bakaambwa aJesu muli chimwi chazikozyano zyakwe. Bakang’ung’una atala asimalelo wabo mbakafozya bantu bakatalika goko kubeleka.—Mt. 20:8-15.
15. “Muzike uusyomeka alimwi uucenjede” waambidwe muli Matayo 24:45-47 uswaanizya maKristu bananikidwe boonse na? Pandulula.
15 Teeboonse pe bantu bali abulangilizi bwakuyoopona kujulu bapanga “muzike uusyomeka alimwi uucenjede.” (Bala Matayo 24:45-47.) Jehova aJesu bali kusanina naakuti kuyiisya bantu biingi mazubaano kababelesya bakwesu bache mbuuli mbubakachita chiindi. Mumwaanda wakusaanguna, kwakabelesegwa maKristu bananikidwe bache kuti balembe Magwalo aachiKristu achiGrikki. Mazubaano, kuli maKristu bananikidwe bache balaachilongezyo chakupa bakombi baLeza “cakulya cabo aciindi ceelede.”
16. Chiiyo eechi chakuyiisyaanzi?
16 Niinzi nzitwayiya muchiiyo eechi? Jehova wakasala kupa bantu biingi buumi butamani aanyika pesi wakasala bantu bache batazooyendelezye aJesu kuti bayinke kujulu. Jehova ulongezya bakombi bakwe boonse, ‘muJuda’ kuswaanizya ‘abantu bali kkumi’ alubo uyanda kuti boonse baswiilile milawu yakwe akuti bakkale kabasyomeka. Boonse beelede kulibombya. Boonse beelede kumubelekela kabalaamwi alubo kabajisini. Alubo boonse beelede kubelekela kubamba luumuno mumbungano. Mbutuyabuswena kumamanino, toonse atuzumanane kubelekela Jehova akutobela Kristu mbuuli “tanga lyomwe.”—Joh. 10:16.
^ par 5 Munyaka uuno tuzoochita Chiyubulusyo chalufu lwaKristu muli Bwabili 7 April. Tweelede kubabona biyeni bantu batazoolye chinkwa akunywa wayini? Tweelede kukataazikana na kuti namba yabantu balya yazumanana kuyungizya? Chiiyo eechi chilasandula mibuzyo eeyi alubo chileendelana achiiyo chakazwa muNgaziyakulinda yamuJanuary 2016.
^ par 2 Kweendelana alugwalo lwa Intembauzyo 87:5, 6, muchiindi chili kunembo Leza ulakonzya kuzootondeezya mazina bantu batazooyendelezye aJesu kujulu.—Rom. 8:19.
^ par 8 Langa bbokesi liti “Luyando ‘Talukwe Cisapi’” muNgazi Yamulindizi yamuJanuary 2016.
^ par 14 Nikuba kuti lugwalo lwa Milimo 2:33 lutondeezya kuti maKristu bapegwa muuya uusalala kwiinda muli Jesu pesi Jehova nguunanika bantu.
^ par 14 Kuti ujane zyiingi langa mutwe uuti “Mibuzyo Yabasikubala” uujanika muNgaziyakulinda yaChikuwa yamuMay 1, 2007.
LWIIMBO 34 Kamweenda Kamutakwe Kampenda
^ par 56 BUPANDULUZI BWACHIFANIKISYO: Nkutalemeka kupati kuti bantu bali aamuswaangano babunganina mwiiminini wakumawofesi mapati amukayintu wakwe kuti bababweze mapikicha!
