Ulilibambilide Na ‘Kuzookona Nyika’?
TOONSE tulangilila kuchiindi aawo nichizoozuzikizigwa chisyomezyo chaJesu chakuti: “Balabotelwa aabo bali aamyoyo iibombede, nkaambo bazookona nyika.” (Mt. 5:5) MaKkristu bananikidwe bazookona nyika kwiinda mukweendelezyaamwi aJesu kujulu kabali baami. (Chi. 5:10; 20:6) MaKkristu biingi mazubaano, balangilila kuzookona nyika akukkala aalinjiyo kukabe kutamani kabamaninide, kabali muluumuno alubo kababotelwa. Kuti zikakonzeke eezi, kuli zintu zyiingi nzibeelede kuyoochita. Atubone zitatu zitobela: kupa kuti nyika ibe paradayizi, kubapa ziyandikana batazoobusigwe akubayiisya alubo ulakonzya kutondeezya lino kuti ulaachiyandisyo chakuyoochita zintu eezi kunembo.
ULILIBAMBILIDE NA KUYOOPA KUTI NYIKA IBE PARADAYIZI?
Chiindi Jehova naakapa bantu mulawu wakuti, “Amuzyalane muvwule, muzuzye nyika akuyeendelezya,” wakali kutondeezya kuti nyika yoonse yakeelede kuba paradayizi. (Matl. 1:28) Bantu boonse bayanda kuzoopona kukabe kutamani beelede kuzooswiilila mulawu ooyu. Nyika tiikasaanguni kayili paradayizi pe akaambo kakuti muunda wa-Edeni tuuchiwo pe. Nkinkaako, kunooli mulimu mwiingi loko wakusalazya ndawu iilikunyonyoonwa lino. Ooyu unooli mulimu mupati loko.
Eezi zituyeezya mulimu ngubakeelede kuchita maIsrayeli nibakabweeda kulimbabo kabazwa kuBbabbiloni. Muunzi wabo wakali waba aaminyaka iili 70 kawuli tongo. Pesi Isaya wakaambilizya kuti Jehova wakali kuyoobagwasya kuti bawuyakulule lubo muunzi wabo. Isaya wakaamba kuti: “Alimwi uyoopa kuti nkanda yakwe ibe mbuli Edeni acibanda cakwe camucimpayuma uyoocipa kuba mbuli muunda wa Jehova.” (Is. 51:3) Kwiinda mukugwasigwa aaJehova, maIsrayeli bakazwidilila kubotya muunzi wabo. Munzila iikozyenie, kwiinda mukugwasigwa aaJehova aabo batakakone nyika bayoozwidilila kubotya nyika. Anduwe ulakonzya kutondeezya lino kuti ulayanda kuyootola lubazu mumulimu ooyu.
Imwi nzila mukonzya kuchita oobo, nkwiinda mukuubamba kabotu muunzi wako. Ulakonzya kusalazya muunzi wako nikuba kuti basimayakilane bako teenzibachita pe. Alubo ulakonzya kugwasilizya kusalazya akubambulula Ng’anda yaBwaami yakulindinywe aNg’anda Iichitilwa Miswaangano. Kuti zyiimo zyako kazizumina, ulakonzya kulembela kuti utole lubazu mukugwasilizya kwachitika mapenzi aalichitikila. Kuti wachita oobo, nga ulikutondeezya kuti ulilibambilide kugwasilizya ooko kuyanda kugwasilizigwa. Libuzye kuti, ‘Ndilakonzya na kuyiila imwi milimu njindikonzya kuzoochita kuti ndazooba aachilongezyo chakupona kukabe kutamani muparadayizi?’
ULILIBAMBILIDE NA KUYOOBAPA NZIBAYANDIKANA BATAZOOBUSIGWE?
Chiindi mwana musimbi waJayirosi naakabusigwa, Jesu wakaamba kuti mwana ooyo apegwe chakulya. (Mk. 5:42, 43) Kulakonzeka kuti teekwakali kuyumu pe kulangania mwana uumwi luzutu wakali aaminyaka iili 12. Pesi tulakonzya kuyeeya atala amulimu mwiingi uutazoobe chiindi Jesu naakuzuzikizya chisyomezyo chakwe chakuti, “bantu boonse bali mutubanda twakuyeezya nibazoomvwa jwi lyakwe.” (Joh. 5:28, 29) Nikuba kuti Bbayibbili talyaambi makani woonse aazintu zitazoochitike, pesi tulaachoonzyo chakuti bantu batazoobusigwe bazooyandikana kugwasigwa kuti bajane chakulya, aakukkala azigogo. Ulakonzya kutondeezya lino kuti ulilibambilide kuzoogwasilizya. Nzezi zimwi nzukonzya kuchita.
Niinzi nzweelede kuchita mazubaano, kuti utondeezye kuti ulilibambilide kuzookona nyika?
Kuti kwaambilizigwa kuti mulangizi wabbazu ulikuswaya mbungano yanu, ulakonzya kumutamba kuti muzoolye aamwi. Alubo kuti bakwesu bali mumulimu wachiindi choonse bakumbilwa kuti basiye milimu yabo naakuti balangilizi bamabazu kabatachili mumulimu wabbazu, ulakonzya kubagwasya kuti bajane aakukkala. Alubo kuti kubusena nkukkala kakuchitilwa muswaangano wabbooma, naakuti muswaangano uuyandikana ulakonzya kulipeda kubeleka kawutanasaanguna muswaangano naakuti nuwamana. Naakuti ulipede kutambula beenzu basika.
ULILIBAMBILIDE NA KUZOOYIISYA BANTU BATAZOOBUSIGWE?
Kweendelana alugwalo lwa Milimu 24:15 tulangilila kuti kuzoobusigwa mabbiliyoni aabantu. Biingi babo mbaabo bakafwa kabatanajana mweenya wakwiiya atala aJehova. Bantu aaba bayoojana mweenya ooyo baakubusigwa. a Bakombi baJehova basyomeka bayootola lubazu mumulimu wakuyiisya. (Is. 11:9) Charlotte, wakakambawuka ku-Europe, South America amu-Africa, uchilangilila aameso aasalala chiindi eechi. Wakaamba kuti: “Ndilangilila chiindi nindiyoobuzya bantu batazoobusigwe kuti ndabala atala awumwi muntu wakapona chiindi, ndikkala kandilibuzya kuti: ‘Kaansinga muntu ooyu wakali waziba Jehova buumi bwakwe bwakali kunoochincha.’ Ndichililangilila aameso aasalala chiindi nindiyoobuzya bantu batakabusigwe zintu nzibatakajanina mweenya wakuziziba kabachipona.”
Nikuba bakombi baJehova basyomeka bakapona chiindi Jesu katanaza aanyika, bayooyiya zintu zyiingi loko. Atuyeeye atala achilongezyo nchituyoobaacho chakupandulwida Daniyele mbubwakazuzikizigwa bupolofita mbwaakalemba pesi katabumvwisisisyi pe. (Dan. 12:8) Alubo tuyoobuzya Rute aNawomi kuti zyalani lyabo mumo mwakazwa Mesiya. Tuyoobotelwa loko kutola lubazu mumulimu wakuyiisya uutakachitwe munyika yoonse kakutachikwe zintu zibi zitupambanisya ziliwo mazubaano.
Kujana watondeezya biyeni lino kuti ulilibambilide kuzootola lubazu mumulimu wakuyiisya bantu batazoobusigwe? Imwi nzila nkubeleka changuzu kuti uyungizye luzibo munzila njuyiisyaayo akukkala kutola lubazu mumulimu wakukambawuka. (Mt. 24:14) Kuti wachembaala naakuti zyiimo kazitakuzumizyi kuchita zyiingi mumulimu wakukambawuka, kubeleka changu nkuchita lino, kutondeezya kuti ulilibambilide kuyiisya bantu batazoobusigwe.
Kulayandikana kuyeeyesesya atala amibuzyo iitobela, Ulikulangilila kuzookona nyika chachoonzyo na? Ulikulangilila kuzoobotya nyika na, kubapa nzibayandikana batazoobusigwe akubayiisya? Ulakonzya kuzitondeezya eezi kuti ulilibambilide kwiinda mukubelesya myeenya yoonse njujana mazubaano kuti uchite milimu iikozyenie aayeeyo iitakakuchitwe twaakukona nyika.
a Langa chiiyo chitii, “Ibapa Bantu Banji Kululama” muNgaziyakulinda yamuSeptember 2022.
