1. Ndiilili sunko ndyaakaswaana Josefa alubo wakachitaanzi?

 JOSEFA, mwana waJakkobo wakaswaana sunko pati. Umwi mwanakazi wakamubuzya kuti: “Koona andime.” Mwanakazi ooyo, wakali mwanakazi waPotifara simalelaakwe. Josefa wakakaka koonaawe. Mazubaano, umwi ulakonzya kulibuzya kuti, ‘Nkamboonzi Josefa naakakaka koonaawe?’ Potifara taakaliwo pe alubo Josefa wakali muzike mung’anda eeyi. Mwanakazi ooyu wakali kukonzya kupa kuti buumi bumuyumine Josefa kuti wakaka koonaawe. Nikuba oobo, Josefa taakazumina pe koonaawe. Nkamboonzi? Josefa wakati: “Ino inga ndacitila nzi cibi cipati cili boobu akubisizya Leza?”—Matl. 39:7-12.

2. Josefa wakaziba biyeni kuti kuchita bumambe kwakali kubisizya Leza?

² Josefa wakaziba biyeni kuti Leza wakali kubona bumambe kachili “cibi cipati”? Kabi kwakasyeede minyaka iili 200 kuti Mulawu waMozesi ulembwe, ooyo wakali kwaamba aantanganana kuti: “Utaciti bumambe.” (Kul. 20:14) Josefa wakalizi mbaakali kulimvwa Jehova atala abumambe. Muchikozyano, Josefa wakalizi kuti Jehova wakabambide kuti lukwatano lube aakati kamwaalumi uumwi amwanakazi uumwi. Alubo kulakonzeka kuti wakamvwa atala aJehova mbaakanjilila kwaziindi zibili kuti akwabilile Sara bayinakulu, aabo bakaba mupenzi lyakubwezegwa aawumwi mwaalumi kuti awonaabo. Alubo mukuya kwachiindi, Leza wakanjilila lubo kuti akwabilile Ribbekka, mwanakazi wa-Izaka. (Matl. 2:24; 12:14-20; 20:2-7; 26:6-11) Josefa naakali kuyeeyesesya atala amakani aaya, wakamvwisisisya kuti nchiichili chintu chiluleme achitaluleme mumeso aaLeza. Akaambo kakuti Josefa wakali kumuyanda Leza kuswaanizya abuntu bwakwe bululeme, wakalipeda kupona kweendelana ambubo.

3. Tulalanga-langaanzi muchiiyo eechi?

 ³ Kweelede anduwe ulabuyanda bululami. Pesi toonse tuli aachibi alubo kuti teetwachenjelela, maboneno aanyika aatali kabotu atala abululami alakonzya kutupambanisya. Nkinkaako, muchiiyo eechi tulalanga-langa kuti bululami niinzi akuti butugwasya biyeni. Alubo tulabona zintu zitatu zikonzya kutugwasya kuti tuyande kuchita zintu zibotu nzyayanda Jehova.

4. Ngaali maboneno aatali kabotu bantu biingi ngibalaawo atala abululami?

⁴ Bantu biingi babonaanga muntu uululeme nguulya uulipa kaleza-leza, uusola bamwi alubo uubonaanga ulikabotu kwiinda bamwi. Pesi Leza tabuyandi pe buntu boonse oobu. Jesu naakali aanyika, wakasola bapati bazikombelo nkaambo bakali kulibona kuti baliluleme kwiinda bamwi. (Muk. 7:16; Lk. 16:15) Bululami bwachoonzyo, bulisiyene akulibona kuti uliluleme kwiinda bamwi.

5. Kweendelana anzilyaamba Bbayibbili, bululami niinzi? Amba zikozyano.

⁵ Bululami mbuntu bubotu loko. Bululami chaamba kuchita zintu zilikabotu mumeso aaJehova Leza. MuBbayibbili, bbala lyakuti “bululami” lili aamuzeezo wakupona kweendelana amilawu yaJehova iisumpukide. Muchikozyano, Jehova wakabikka mulawu wakuti basimabbizinesi bakeelede kubelesya “cipimyo ciluzi.” (Dt. 25:15) Bbala lyachiHebberu lyakusaanguna lyakasandululwa kuti “ciluzi” lilakonzya kusandululwa kuti “chiluleme.” Nkinkaako, muKkristu uuyanda uuyanda kuba muntu uululeme mumeso aaLeza, weelede kusyomeka muzintu zyoonse nzyachita mubbizinesi yakwe. Muntu uululeme alubo uuyanda bululami, tabotelwi pe kuti wabona umwi kali kudyaamininwa. Alubo, muntu uuyanda ‘kubotezya Jehova munzila iizwide,’ ulayeeyesesya saansi kuti zintu nzyayanda kusala uyoozibona biyeni Jehova.—Kol. 1:10.

6. Nkamboonzi nitukonzya kubaachoonzyo chakuti Jehova nguwe weelela kutubuzya chibotu achibi? (Isaya 55:8, 9)

⁶ Bbayibbili lyaamba kuti Jehova Nkasensa kabululami. Akaambo kakaambo aaka, waambwa kuti ‘ncikkalilo cabululami.’ (Jer. 50:7) Mbukunga Mulengi, Jehova nguwe alikke ulaacheelelo chakwaamba kuti eechi nchibotu eechi nchibi. Akaambo kakuti ulimaninide, maboneno aakwe atala azintu zibotu azibi alisumpukide kwiinda eesu nkaambo eesu apambanisigwa aakutamaninina achibi. (Tus. 14:12; bala Isaya 55:8, 9.) Nikuba oobo, akaambo kakuti twakalengwa muchikozyano chaLeza tulakonzya kupona kweendelana amilawu yakwe iiluleme. (Matl. 1:27) Alubo tulakuyanda kuchita oobo. Kuyanda Taateesu kupa kuti tubeleke amanguzu eesu woonse kuti tutobelezye chikozyano chakwe.—Ef. 5:1.

7. Milawu iitachinchi-chinchi itugwasya biyeni? Amba zikozyano.

⁷ Kupona kweendelana amilawu yaJehova yakuziba chibotu achibi kulatugwasya. Nkamboonzi? Amuyeeye kuti niinzi zyalikunoochitika kuti bbenki imwi ayimwi yalisalila kuti bulemu bwamali bweelede kuti bube biyeni? Bantu balikunookopana loko. Alubo kuti basichibbadela teebatobelezya milawu iibikkidwe yakulangania bantu bachiswa, bantu biingi balafwa. Mbukunga milawu eeyi iibikkidwe iitachinchi ilatukwabilila, mbiibede amilawu yaLeza yakuziba chibotu achibi, ilatukwabilila.

8. Nziizili zilongezyo nzibayoojana aabo bachita zintu ziluleme?

⁸ Jehova ulabalongezya aabo beezya kupona kweendelana amilawu yakwe. Usyomezya kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:29) Kuchiindi eecho, bantu  bazookkala muluumuno kabajisini alubo kababotelwa nkaambo muntu woonse unoopona kweendelana amilawu yaJehova. Oobu mbubuumi Jehova mbwayanda kuti tupone. Nichoonzyo, umwi awumwi ulaatwaambo tupa kuti ayande kuchita zintu ziluleme. Niinzi nzitweelede kuchita kuti tube aachiyandisyo chakuchita zintu ziluleme? Atulange zintu zitatu.

9. Niinzi chikonzya kutugwasya kuti tube aachiyandisyo chakuchita zintu ziluleme?

⁹ Chakusaanguna: Yanda Ooyo uubikka milawu. Kuti tukonzye kuba aachiyandisyo chakuchita zintu ziluleme, tweelede kuyanda ooyo uuli aacheelelo chakutubuzya kuti nchiichili chintu chibotu achibi. Kuti twayungizya kuyanda Jehova, tulaba aachiyandisyo chakupona kweendelana amilawu yakwe iiluleme. Muchikozyano: Kaansinga Adamu aEva bakali kumuyanda Jehova, nikuli teebakaleka pe kuswiilila mulawu wakwe uululeme ngwakabapede.—Matl. 3:1-6, 16-19.

10. Niinzi nzyaakachita Abbrahamu kuti amuzibe kabotu Jehova?

¹⁰ Tatuyandi kusala munzila yabufuba-fuba mbuli mbaakachita Adamu aEva. Tulakonzya kusala kabotu kuti twayinkilila kunembo kwiiya atala aJehova, twayanda buntu bwakwe bubotu akweezya kumvwisisisya nzila njayeeyaayo. Kuti twachita oobo, luyando lwesu aJehova lulasima. Muchikozyano, Abbrahamu wakali kumuyanda Jehova amoyo wakwe woonse. Nikuba kuti kwakali kumuyumina kumvwisisisya zintu nzyaakali kusala Jehova, Abbrahamu taakapapila pe. Pesi wakeezya kumuziba kabotu Jehova. Muchikozyano, naakaziba kuti Jehova wakali kuyanda kunyonyoona Sodoma aGomora, kumasaangunino Abbrahamu wakayoowa kuti “Mubetesi wanyika yoonse” wakali kuyookukula bantu baluleme aamwi abasizibi. Abbrahamu taakali kuzisyoma pe eezi, nkinkaako, chabulemu wakabuzya Jehova mibuzyo myiingi. Jehova wakatondeezya moyo mulamfu kwiinda mukusandula mibuzyo yakwe yoonse. Kumamanino, Abbrahamu wakazooziba kuti Jehova, ulayilangisisya myoyo yabantu boonse alubo tanyonyooni muntu uululeme aamwi amuntu mubi.—Matl. 18:20-32.

11. Abbrahamu wakatondeezya biyeni kuti ulamuyanda Jehova akumusyoma?

¹¹ Kweelede kuti kwaambuuzyania nkwaakachita Abbrahamu aJehova atala amuunzi waSodoma aGomora kwakamusika aamoyo. Alubo kweelede kuti kwakapa kuti amuyande loko Taateesu akumulemeka kwiinda mbaakali kuchita chiindi. Muminyaka yakatobela, kusyoma Jehova nkwaakali kuchita Abbrahamu kwakasunkwa munzila njumu. Jehova wakamukumbila kuti apayizye mwanaakwe ngwaakali kuyandisya loko Izaka. Pesi Abbrahamu wakali waabumuziba kabotu Leza. Nkinkaako, aachiindi eechi, taakabuzya mibuzyo pe. Abbrahamu wakachita kweendelana ambaakali wamubuzya Jehova. Pesi amuyeeyele kuchisa nkwaakamvwa Abbrahamu chiindi naakali kulibambila kuchita nzyaakali wabuzigwa. Kweelede kuti Abbrahamu wakayeeyesesya atala azintu nzyaakali wayiya atala aJehova. Wakalizi kuti Jehova tachiti chintu chitaluleme naakuti chintu chitatondeezyi luyando. Kweendelana anzyaakaamba mwaapostolo Pawulu, Abbrahamu wakalizi kuti Jehova wakali kuzoomubusya mwanaakwe ngwayandisya Izaka. (Heb. 11:17-19) Alubo Jehova wakali wasyomezya kuti Izaka nguwe wakali kuzooba wisi wachisi, pesi aachiindi eecho, Izaka taakalikwe mwana pe. Abbrahamu wakali kumuyanda Jehova, nkinkaako, wakalizi kuti Jehova wakali kuzoochita zintu ziluleme. Akaambo kalusyomo, Abbrahamu wakaswiilila, nikuba  kuti kwakali kuyumu kuchita oobo.—Matl. 22:1-12.

12. Kujana twamutobelezya biyeni Abbrahamu? (Intembauzyo 73:28)

¹² Kujana twamutobelezya biyeni Abbrahamu? Tulakonzya kumutobelezya kwiinda mukwiiya zyiingi atala aJehova. Chiindi nituchita oobo, tulaswena aafwiifwi anguwe alubo luyando lwesu anguwe lulayungizya. (Bala Intembauzyo 73:28.) Alubo tuyooyungizya kubona zintu mbuli mbazibona Leza. (Heb. 5:14) Eezi ziyootugwasya kuti tukake kuchita zintu zibi nikuba kuti umwi muntu weezya kutoongelezya kuzichita. Tatukazumini pe kuchita zintu zinyemya Taateesu alubo zikonzya kupa kuti tutabi aabweenzuma busimide anguwe. Niinzi zimwi nzitweelede kuchita zitondeezya kuti tulabuyanda bululami?

13. Kujana twatondeezya biyeni kuti tulabuyanda bululami? (Tusimpi 15:9)

¹³ Chachibili: Beleka changuzu mazuba woonse kuti uyungizye kuyanda bululami. Mubili kuti usime, weelede kukkala ku-ekisesayiza buzuba abuzuba. Mbukubede akubululami. Ziyanda kuti tubeleke changuzu kuti tutondeezye kuti tulaziyanda zintu Jehova nzyatubuzya kuti zililuleme. Ooyu mulimu wabuzuba abuzuba. Jehova ulamvwisisisya alubo talangilili kuti tuchite zintu nzitutakonzyi pe. (Int. 103:14) Jehova utusyomezya kuti: “Uyanda yooyo uusungwaala kutobela bululami.” (Bala Tusimpi 15:9.) Kuti katuyanda kuzuzikizya chimwi chipeekezyo chabukombi, nga twabeleka changuzu kuti tuchizuzikizye. Mbutweelede kuchita amukutobela bululami. Jehova ulaamoyo moyo mulamfu, nkinkaako unootugwasya mbichaani-mbichaani kusikila tukakonzye kutondeezya kuti tulabuyanda bululami munzila iizwide.—Int. 84:5, 7.

14. “Chigogo chakukwabilila kaango chabululami” niinzi alubo nkamboonzi nikuyandikana kuti tubaacho?

¹⁴ Chaluyando, Jehova ututondeezya kuti kutobela bululami teemulimu uuminia pe. (1 Joh. 5:3) Pesi kulatukwabilila, nchintu nchituyanda buzuba abuzuba. Yeeya atala azigogo zyankondo nzyaakapandulula mwaapostolo Pawulu. (Ef. 6:14-18)  Nchiichili chilwanisyo chakali kukwabilila moyo wamusoja? ‘Nchigogo chakukwabilila kaango chabululami’ chiiminina zintu Jehova nzyaamba kuti zililuleme. Mbuli chigogo chakukwabilila kaango mbuchikwabilila moyo, milawu yaJehova iiluleme ikwabilila myoyo yesu yakukozyanisya, nkukwaamba muntu ngutubede mukati. Nkinkaako, muzilwanisyo zyesu zyankondo, tweelede kuba aachoonzyo chakuti, tuli aachigogo chakukwabilila kaango chabululami.—Tus. 4:23.

15. Kujana twachizwaata biyeni chigogo chakukwabilila kaango chabululami?

¹⁵ Kujana twachizwaata biyeni chigogo chakukwabilila kaango chabululami? Tulakonzya kuchita oobo kwiinda mukuchita zintu Jehova nzyayanda kuti tuchite muzintu nzitusala buzuba abuzuba. Chiindi nituyanda kusala zintu zyakwaambuula, nyimbo, zyakulikondelezya naakuti mabbuku aakubala, tweelede kusaanguna kulibuzya kuti, ‘Zintu eezi zilandigwasya na? Jehova ulazitambula na? Zisumpula zintu Jehova nzyaamba kuti taziluleme na, ziswaanizya bwaamu, kutangala naakuti kutababikkila maanu bamwi?’ (Flp. 4:8) Kuti zintu nzitusala kazyeendelana akuyanda kwaJehova, nga tuli kukwabilila myoyo yesu kuti itapambanisigwi aazintu zitali kabotu.

16-17. Lugwalo lwa Isaya 48:18 lutugwasya biyeni kuti tubone kuti tulakonzya kupona kweendelana ambayanda Jehova?

¹⁶ Kuli nunga wakataazikana na kuti uzookonzya na kuchita zintu ziluleme chiindi choonse? Kuti kakuli oobo, bona nzyakaamba Jehova muli Isaya 48:18. (Bala.) Jehova utusyomezya kuti bululami bwesu bulakonzya kuba “mbuli mayuwe aamulwizi.” Libone kuyimvwi kumbali aalwizi kulikubona mayuwe aamulwizi kaalikuuma kunkomwe yalwizi kalikujanikizyania. Chiindi nulikubona mayuwe aayo aamulwizi, zilachita na kuti ukataaziikane kuti limwi zuba azoomana? Peepe. Nkaambo nga ulizi kuti mayuwe aayo aba aaminyaka myiingi kaaliwo akuti taazoomani pe.

¹⁷ Bululami bwesu bulakonzya kuba mbuli mayuwe aamulwizi. Biyeni? Kuti kakuli chimwi chintu nchuyanda kusala kuchita, yeeya saansi kuti Jehova uchibona biyeni, mpawo nutazoosale kuchichita. Kufumbwa kuti nzituyanda kusala nziyumu biyeni, Taateesu siluyando, unootugwasya akutupa manguzu aakuti tukkale katuchita zintu ziluleme buzuba abuzuba.—Is. 40:29-31.

18. Nkamboonzi nituteelede kubeteka bamwi kweendelana amaboneno eesu?

¹⁸ Chachitatu: Mulimu wakubeteka usiile Jehova. Chiindi nitweezya kupona kweendelana akuyanda kwaJehova, tatweelede kubeteka bamwi akulibona mbuli bantu baluleme kwiinda bamwi. Kwiinda kuti tutenge bamwi, katubalangilaansi mbuli kuti twakapegwa manguzu akubeteka, tweelede kuziba kuti Jehova ngunguwe “Mubetesi wanyika yoonse.” (Matl. 18:25) Jehova taakatupa mulimu ooyu wakubeteka. Jesu wakaamba kuti: “Amuleke kubeteka kuchitila kuti mutabetekwi pe.”—Mt. 7:1. *

19. Josefa wakatondeezya biyeni kuti Jehova nguwe alikke uuli aamanguzu aakubeteka?

¹⁹ Atubweede lubo kuchikozyano chamwaalumi uululeme uutegwa Josefa. Josefa wakatantamuka chiimbo chakubeteka bamwi, nibaba aabo bakali bamujata munzila iitali kabotu. Bakulana bakwe bakamulwana, bakamuuzya kubuzike alubo bakabejela wisi kuti Josefa wakali wafwa. Minyaka yakatobela, Josefa wakazooba aamwi abamumpuli yakwe. Mbukunga Josefa wakali waba mweendelezi wachisi cha-Ijipita, wakali kukonzya kubeteka  bakulana bakwe munzila yalunya akubakkwichizya. Nikuba kuti bakulana baJosefa bakali kulisola azintu nzibakali bachita, bakali kuyoowa alubo bakali kuyeeya kuti amwi ulakonzya kubachitila zintu nzibakamuchitila. Nikuba oobo, Josefa wakababuzya majwi aakapa kuti batayoowi, wakati: “Mutayoowi pe. Sena mebo ndili mubusena bwa Leza?” (Matl. 37:18-20, 27, 28, 31-35; 50:15-21) Josefa wakalizi kuti Jehova nguwe alikke wakali aamanguzu aakubeteka bakulana bakwe.

20-21. Niinzi nzitweelede kuchita kuti tutaliboni katululeme kwiinda bamwi?

²⁰ Tulakonzya kutobelezya Josefa kwiinda mukusiya mulimu wakubeteka mumaboko aaJehova. Muchikozyano, tatweelede kubonaanga tulizizi zintu zipa kuti bakwesu abachizi bachite zintu munzila njibachitaayo. Tatukonzyi pe kubona zili mumyoyo yabantu pesi Jehova alikke nguwe uulingula “makanze aali mumoyo.” (Tus. 16:2) Ulabayanda bantu boonse bali aamaponeno aasiyene-siyene aziyanza zisiyene. Alubo Jehova utusungwaazya kuti ‘twiijule loko myoyo’ yesu. (2 Kor. 6:13) Tweelede kubayanda loko bakwesu abachizi kutali kubabeteka.

²¹ Nibaba bantu batali Bakamboni tatweelede kubabeteka. (1 Tim. 2:3, 4) Tatweelede kubeteka babbululu besu batali Bakamboni katwaamba kuti, “Tabazoofwi baba Bakamboni pe.” Kuti twachita oobo, nga tulikulisumpula alubo nga tulikulibona katululeme kwiinda mbabo. Jehova ubapede mweenya ‘bantu boonse koonse-koonse’ wakuti basanduke. (Mil. 17:30) Chiindi choonse atuyeeye kuti, kulibona kuti tuliluleme nchitondeezyo chakuti tatululeme pe.

22. Nkamboonzi nwaakanza kuyanda bululami?

²² Kuyanda milawu yaJehova iiluleme, kuyoopa kuti tubotelwe akuti bamwi bayande kutobelezya chikozyano chesu mpawo baswene aafwiifwi aLeza wesu. Tutaleki pe kuba “aanzala anyota yabululami.” (Mt. 5:6) Atube aachoonzyo chakuti Jehova ulazibona zyoonse nzituchita akuti ulabotelwa akweezya nkutuchita mukuchita zintu ziluleme. Chiindi bantu bali munyika eeyi nibali kwiindilila kuchita zintu zitaluleme, tutakataazikani pe. Chiindi choonse atukkale katuyeeya kuti “Jehova ulabayanda baluleme.”—Int. 146:8.