1-2. (a) Nkamboonzi nitukonzya kuba aachoonzyo chakuti chiindi nituswaana mapenzi nga tatuli aatulikke pe? (b) Tulalanga-langaanzi muchiiyo eechi?

 NITUSWAANA mapenzi mayumu, tulakonzya kubonaanga tulisweekede mulusaka luyoosya lupati katuli aatulikke. Nikuba oobo, chiindi nituswaana mapenzi nga tatuli aatulikke pe. Taateesu, siluyando wakujulu, taboni mapenzi ngituswaana kupela pe, pesi utusyomezya kuti ulatugwasya kuti twaazunde. Jehova usyomezya mukombi wakwe umwi awumwi uusyomeka kuti: “Ndilakugwasya.”—Is. 41:10.

² Muchiiyo eechi, tulalanga-langa Jehova mbatugwasya kwiinda (1) mukutuzulwida, (2) mukutupa nzituyandikana, (3) mukutukwabilila (4) amukutuumbulizya. Jehova utusyomezya kuti, tatulubi pe nikuba kuti twaswaana mapenzi aali biyeni. Tatulekelezyi pe. Nkinkaako, tatuli aatulikke pe.

JEHOVA ULATUZULWIDA

3-4. Jehova utuzulwida biyeni? (Intembauzyo 48:14)

³ Bala Intembauzyo 48:14. Jehova talangilili kuti tulizulwide. Ubazulwida biyeni bakombi bakwe basyomeka mazubaano? Imwi nzila njabelesya kuti abazulwide, nkwiinda mukubelesya Bbayibbili. (Int. 119:105) Kabelesya Jwi lyakwe, Jehova ulatugwasya kuti tusale kabotu akuti tube aabuntu bupa kuti tubotelwe loko mubuumi lino amuchiindi chilikunembo. a Muchikozyano, utuyiisya kuti tutabaangili nkoto bamwi, tusyomeke muzintu zyoonse nzituchita akuti tubayande bamwi kazizwaansi aamoyo. (Int. 37:8; Heb. 13:18; 1 Pet. 1:22) Kuti twatondeezya  buntu oobu, nga twaba bazyali balikabotu, bakwetene balikabotu abeenzinyina balikabotu.

⁴ Mukuyungizya, Jehova wakapa kuti muJwi lyakwe kulembwe atala abantu bakali mbuli ndiswe alubo bakaswaana mapenzi aakozyenie angituswaana. (1 Kor. 10:13; Jak. 5:17) Chiindi nitubala atala azintu zyakabachitikila bantu aaba akubelesya zyiiyo nzitujana, tulakonzya kugwasikana munzila zibili. Yakusaanguna, nga twabona kuti tatuli aatulikke pe nkaambo kuli bamwi bakali muzyiimo zikozyenie anzituswaana alubo bakakonzya kulisimya. (1 Pet. 5:9) Yachibili, nga twayiya mbutukonzya kulisimya kumapenzi ngitulikuswaana ambutukonzya kukkala katubotelwa.—Rom. 15:4.

5. Mbaani Jehova mbabelesya kuti batuzulwide munzila iitola kubuumi?

⁵ Alubo Jehova wakachita mabambe aakuti bakombima batuzulwide. b Muchikozyano, balangizi bamabazu bakkala kabaswaya mbungano kuti batusungwaazye. Nkani nzibapa zisimya lusyomo lwesu alubo zitugwasya kuti tukkale katujisini. (Mil. 15:40–16:5) Baalu ambabo nga babeleka changuzu kuti bagwasye sikupupulula umwi awumwi kuti akkale aafwiifwi aJehova. (1 Pet. 5:​2, 3) Bazyali bayiisya bana babo kuti bayande Jehova alubo nga babayiisya kusala munzila yabusongo akuti babe aabuntu bulikabotu. (Tus. 22:6) Alubo bachizi basimide mubukombi nga bagwasya bachizi bachili baniini kwiinda mukuba chikozyano chilikabotu kulimbabo, mukubapa malayilile akubasungwaazya.—Tit. 2:​3-5.

6. Niinzi nzitweelede kuchita kuti tugwasikane anzila Jehova njatuzulwidaayo?

⁶ Jehova wakachita lubazu lwakwe kwiinda mukutupa zintu nzituyanda kuchitila kuti tusale kabotu akuti tubotelwe mubuumi. Kujana twatondeezya biyeni kuti tulamulumba Jehova akaambo kazintu nzyaakatuchitila? Tusimpi 3:​5, 6 yaamba kuti: “Kosyoma Jehova amoyo wako woonse, utasyomi maano aako omwini pe.” Kuti twachita oobo, Jehova ‘ulalulamika nzila zyesu,’ nkukwaamba kuti, ulatugwasya kuti tutaswaani mapenzi miingi akuti tubotelwe mubuumi. Tulamulumba Jehova akaambo kakuti utuzi kabotu alubo ulatuyanda zyakuti umwi awumwi umupa malayilile aayandikana!—Int. 32:8.

JEHOVA ULATUPA NZITUYANDIKANA

7. Jehova utupa biyeni nzituyandikana? (Bafilipi 4:19)

⁷ Bala Bafilipi 4:19. Aajulu aakutuzulwida mubukombi, Jehova ulakulongezya kubeleka changuzu nkutuchita kuti tujane chakulya, zyakuzwaata andawu yakukkala. (Mt. 6:33; 2 Tes. 3:12) Nikuba kuti zili mulindiswe kuti tukataazikane atala azintu nzituyandikana, pesi Jehova utusungwaazya kuti tutakataazikani zyiindilide pe atala azintu eezi. (Mt. 6:25) Nkamboonzi? Akaambo katuti Taateesu tabalekelezyi pe bakombi bakwe basyomeka chiindi nibayanda lugwasyo. (Mt. 6:8; Heb. 13:5) Tulakonzya kumusyoma chakumaninina chiindi naamba kuti ulakonzya kutupa ziyandikana.

8. Jehova wakamugwasya biyeni Davida?

⁸ Atubone Jehova mbaakagwasya Davida. Davida naakali kuchija Mwaami Sawulu, Jehova wakamupa nzyaakali kuyandikana kuswaanizya azyabaalumi mbaakalaabo. Naakali kuyeeyesesya atala aJehova mbaakamulangania, Davida wakaamba kuti: “Ndakali mwana lino ndacembaala, nokuba boobo tandinabwene mululami wakalekelezyegwa, nobaba bana bakwe kabalombelela cakulya.” (Int. 37:25) Mbuli mbaakachita kuli Davida, kulakonzeka kuti anduwe wakabona Jehova kali kukupa nzuyandikana munzila yaluyando naakuti kali kupa  bakwesu abachizi nzibayandikana muziindi zyamapenzi.

9. Jehova ubagwasya biyeni bakombi bakwe mazubaano kuti baswaana mapenzi aalichitikila? (Langa zifanikisyo.)

⁹ Alubo Jehova ubapa nzibayandikana bantu bakwe nikwachitika penzi. Muchikozyano, nikwakaba bbalangwe mumwaanda wamunyaka wakusaanguna, maKkristu bazwa kumasena aasiyene-siyene bakatumizya bakombinyina zintu nzibakali kuyandikana. (Mil. 11:​27-30; Rom. 15:​25, 26) Ambabo bakombi baLeza mazubaano, balabagwasya bakombinyina nibaswaana mapenzi. Nikwachitika penzi lilichitikila, Jehova nga wabelesya bakombi bakwe kuti bagwasye bakombinyina bakkala mundawu eeyo yachitika penzi azintu ziyandikana zili mbuli chakulya, maanzi, zyakuzwaata amisamu yabusilisi. Bakwesu bachita zyamayake aambunga, nga bayakulula maanda aabakwesu abachizi aanga anyonyooka aMaanda aaBwaami. Bakombi baJehova nga bafwambaana kubawumbulizya akubasungwaazya aabo banga basweekelwa myuunzi yabo naakuti banga bafwidwa babbululu babo kababelesya Bbayibbili. c

10-11. Wayiyaanzi kuli zyakachitikila Borys?

¹⁰ Jehova ubapa nzibayandikana bantu nikuba aabo batamukombi. Munzila iikozyenie, tuyanduula myeenya yakubatondeezya luzyalo aabo batali bakombima. (Gal. 6:10) Kuti twachita oobo, nga tuli kubagwasya kuti bayiye zyiingi atala andiswe akuti bayiye zyiingi atala aJehova. Atubone zyakachitikila Borys mupati  wachikolo uukkala ku-Ukraine. Nikuba kuti Borys teeKamboni waJehova pe, pesi wakali kukkala kabajata munzila yaluzyalo alubo wakali kuzilemeka nzibasyoma Bakamboni bakali kwiiya aachikolo eecho. Borys naakasala kuti achije kundawu nkwaakali kukkala akaambo kakuti kwakali nkondo, bakombima bakamugwasya. Nikwakayinda chiindi, Borys wakanjila Chiyubulusyo chalufu lwaKkristu. Naakali kuyeeya zyakamuchitikila wakati: “Bakamboni bakanditondeezya luzyalo alubo bakandilangania kabotu. Ndilabalumba Bakamboni baJehova.”

¹¹ Andiswe tulakonzya kutobelezya Taateesu silweetelelo kwiinda mukutondeezya kuti tulabayanda aabo bayanda lugwasyo kazitakwe ndaba kuti mbakombima na naakuti pe. (Lk. 6:​31, 36) Tulangilila kuti kubeleka changuzu nkutuchita kuti tuyande bantu kuzoopa kuti bantu aabo bazoobe basikwiiya baKkristu. (1 Pet. 2:12) Kazitakwe ndaba akuti basala kubelekela Jehova na naakuti pe, tulabotelwa akaambo kakuti tunooli twabagwasya.—Mil. 20:35.

JEHOVA ULATUKWABILILA

12. Jehova usyomezya kuti uzoobakwabilila biyeni bakombi bakwe? (Intembauzyo 91:​1, 2, 14)

¹² Bala Intembauzyo 91:​1, 2, 14. Mazubaano, Jehova utusyomezya kuti ulatukwabilila kuzintu zikonzya kupambanisya bweenzuma mbutulaabo anguwe. Tamuzumizyi pe Saatani kuti apambanisye bukombi bwakasimpe. (Joh. 17:15) Alubo “mapenzi mapati” naazoosaanguna, tuli aachoonzyo chakuti Jehova uzootugwasya kuti tuzookkale katuli aalusyomo lusimide alubo uzootufutula.—Chi. 7:​9, 14.

13. Jehova umukwabilila biyeni umwi awumwi wesu?

¹³ Jehova umukwabilila biyeni umwi awumwi wesu? Jehova wakatupa Bbayibbili kuchitila kuti tuzibe zintu zilikabotu azitali kabotu. (Heb. 5:14) Chiindi nitubelesya malayilile aali muJwi lyaLeza, nga twalikwabilila kuzintu zikonzya kupambanisya bweenzuma mbutulaabo aJehova alubo nga twakonzya kusala munzila iilikabotu iipa kuti tubotelwe. (Int. 91:4) Mukuyungizya, Jehova ulatukwabilila kabelesya mbungano. (Is. 32:​1, 2) Kujana chiindi chakubaamwi abaabo bayanda Jehova abapona kweendelana amalayilile aakwe, kulatusungwaazya alubo kupa kuti tutantamuke zintu zibi.—Tus. 13:20.

14. (a) Nkamboonzi Jehova natatukwabilili kumapenzi woonse? (b) Lugwalo lwa Intembauzyo 9:10 lutusyomezyaanzi? (Langa makani aamunsi.)

¹⁴ Chimwi chiindi, Jehova wakali kukwabilila bakombi bakwe kuti batalichisi naakuti batajayigwi. Nikuba oobo, taakali kubakwabilila pe chiindi choonse. Chimwi chiindi, tulakonzya kuchitikilwa “zintu zitalangilwi.” (Muk. 9:11) Alubo Jehova wakazumizya bakombi bakwe kuti bapenzegwe naakuti bajayigwe kuchitila kuti atondeezye kuti Saatani mubeji. (Job. 2:​4-6; Mt. 23:34) Jehova uchichita oobo nikuba mazubaano. Nikuba kuti Jehova ulakonzya kutaagwisya mapenzi ngituswaana, tulaachoonzyo chakuti taakwe natazoobalekelezye pe aabo bamuyanda. d—Int. 9:10.

JEHOVA ULATUUMBULIZYA

15. Nkombyo, Jwi lyaLeza abakombima zituumbulizya biyeni? (2 Bakkorinte 1:​3, 4)

¹⁵ Bala 2 Bakkorinte 1:​3, 4. Chimwi chiindi nga twawusa, twakataazikana naakuti nga twamana manguzu. Amwi uli muchiimo chipa kuti ukataazikane lino, alubo chipa kuti umvwe kuli aawulikke. Kuli uukonzya kumvwisisisya mbulikumvwa na? Jehova ulakumvwisisisya, tamvwi kuchisa kupela nkutunga tulikumvwa pesi ‘ulatuumbulizya mumapenzi eesu woonse.’ Biyeni? Kuti twakombelezya Jehova munkombyo, ulatupa “luumuno  lwaLeza lwiinda kumvwisisisya koonse.” (Flp. 4:​6, 7) Alubo tulawumbulizigwa kuti twabala majwi aaJehova aali muBbayibbili. MuBbayibbili, Jehova utubuzya mbatuyanda, utuyiisya kuba basongo alubo utupa bulangilizi. Tulasungwaazigwa chiindi nituli kumiswaangano yambungano, chiindi nitwiiya atala azintu zisungwaazya zijanika muBbayibbili. Alubo chiindi nitulaamwi abakwesu abachizi, tulawumbulizigwa.

16. Wayiyaanzi kuli zyakachitikila Nathan aPriscilla?

¹⁶ Kuti tubone Jehova mbatuumbulizya ambatusungwaazya kabelesya Jwi lyakwe, atubone zyakachitikila Nathan aPriscilla bakkala ku-United States. Muminyaka yakayinda, bakalongela kundawu yakali kuyandikana basikupupulula biingi. Nathan wakaamba kuti, “Twakali kusyoma kuti Jehova wakali kuyootulongezya akaambo kakubeleka changuzu.” Nikuba oobo, nibakasika kundawu eeyo, bakasaanguna kuchiswa-chiswa akuswaana penzi lyamali. Mpuli eeyi, yakabweeda kulimbabo alubo penzi lyamali teelyakamana pe. Nathan wakaamba kuti, “Ndakalikataazikene kuti nkamboonzi Leza naakatatugwasya mbuli mbutwakali kuyeeyela. Alubo ndakasaanguna kuyeeyela kuti amwi kuli chimwi chintu chibi nchindakachita.” Mukuya kwachiindi, Nathan aPriscilla bakazoobona kuti Leza taakabalekelezya pe chiindi nibakali kuyanda lugwasyo. Nathan wakaamba kuti, “Muchiindi eecho chiyumu, Bbayibbili lyakaba mweenzuma musongo. Lyakatusungwaazya akutuzulwida.” Wakayungizya kuti, “Kubikkila maanu kunzila Jehova njaakatugwasyaayo kuti tulisimye kubuyumu-yumu oobu, kwakapa kuti tutabikkili maanu kupenzi nditwakalaalyo. Pesi kwakapa kuti tulibambile kuyooswaanana aaziindi ziyumu kunembo katuli aalusyomo.

17. Muchizi uutegwa Helga wakawumbulizigwa biyeni? (Langa chifanikisyo.)

¹⁷ Bakwesu abachizi balakonzya kutuumbulizya kababelesya zimwi nzila. Bazichita biyeni? Atubone chikozyano chaHelga uukkala kuHungary. Kwaminyaka myiingi, wakali  kuswaana buyumu-yumu bwakali kupa kuti akataazikane akuti alimvwe katagwasyi. Pesi kuti wayeeya zyakachitika, nga wabona Jehova mbaakamuumbulizya kabelesya mbungano. Wakaamba kuti: “Jehova wakali kundigwasya naakali kubona kuti ndimanide manguzu akaambo kamulimu, kulangania mwanaangu naakali kuchiswa kuswaanizya aamwi mapenzi ngindakali kuswaana. Buzuba abuzuba kwaminyaka iili 30 yayinda, wakakkala kazuzikizya chisyomezyo chakwe chakuti ulanduumbulizya. Ukkala kandisimya kabelesya majwi aasungwaazya aazwa kubakombima. Ndikkala kanditambula mameseji, tukkaadi naakuti kulumbwa chiindi nindiyanda kusungwaazigwa.”

18. Kujana twabawumbulizya biyeni bamwi?

¹⁸ Tulaachilongezyo chakutobelezya Leza wesu kwiinda mukuumbulizya bamwi. Kujana twazichita biyeni? Tulakonzya kubaswiilisisya katuli aamoyo mulamfu, kwaambuulaabo munzila iiwumbulizya akubagwasya kuti bajane nzibayandikana. (Tus. 3:27) Tuleezya kuumbulizya bantu boonse baswaana mapenzi, kuswaanizya abaabo batali bakombi baLeza. Kuti basimayakilane besu bafwidwa, bachiswa naakuti bakataazikana, tulabaswaya, tulabaswiilisisya akubabuzya majwi aasungwaazya aali muBbayibbili. Kuti twatobelezya Jehova, ‘Leza siluumbulizyo loonse,’ tulakonzya kuumbulizya bakombima akugwasya aabo batakombi Leza kuti bayande kwiiya zyiingi atala anguwe.—Mt. 5:16.

JEHOVA UNOOTUGWASYA CHIINDI CHOONSE

19. Niinzi Jehova nzyatuchitila, alubo kujana twamutobelezya biyeni?

¹⁹ Jehova ulaandaba abaabo bamuyanda. Tatulekelezyi pe chiindi nituli mubuyumu-yumu. Mbuli muzyali ulaaluyando mbalangania mwanaakwe, anguwe Jehova ulatulangania. Ulatuzulwida, ulatupa nzituyandikana, ulatukwabilila alubo ulatuumbulizya. Tutobelezya Taateesu siluyando wakujulu chiindi nitubagwasya akubasungwaazya aabo bali mubuyumu-yumu. Munyika eeyi, tulakonzya kuswaana buyumu-yumu azintu zipa kuti tuuse. Pesi tuli aachoonzyo chakuti, Jehova unoolaandiswe. Jehova usyomezya umwi awumwi wesu kuti: “Utayoowi pe, nkaambo ndilaanduwe.” (Is. 41:10) Chisyomezyo eechi, chipa kuti tube aachoonzyo chakuti Jehova unoolaandiswe. Tatuli aatulikke pe!