1. Niinzi nzitweelede kuchita kuti tubotelwe chachoonzyo alubo nkamboonzi? (Isaya 48:​17, 18)

 NDEENDE wesu wakujulu ulatuyanda alubo uyanda kuti tubotelwe mubuumi lino amuchiindi chilikunembo. (Muk. 3:​12, 13) Wakatulenga katuli aamanguzu aakuchita zintu zigambya, pesi taakwe naakatupa manguzu aakuti tulyeendelezye munzila iizwidilila naakuti manguzu aakuti tulisalile chibotu achibi. (Muk. 8:9; Jer. 10:23) Ulizi kuti, kuti tubotelwe chachoonzyo, tweelede kumubelekela akuti tupone kweendelana amilawu yakwe.—Bala Isaya 48:​17, 18.

2. Saatani uyanda kuti tusyomeenzi, pesi niinzi Jehova nzyaakachita?

² Saatani uyanda kuti tusyome kuti tulakonzya kubotelwa nikuba katuteendelezegwi aaJehova akuti bantu balakonzya kulyeendelezya munzila iizwidilila. (Matl. 3:​4, 5) Kuti atondeezye kuti Saatani mubeji, Jehova wakazumizya bantu kuti balyeendelezye kwachiindi chifwiifwi. Zili aantanganana kuti bweendelezi bwabantu tabulikuzwidilila pe. Nikuba oobo, Bbayibbili lyaambuula atala abaalumi abanakazi biingi bakali kubotelwa akaambo kakuti bakali kubelekela Jehova. Jesu Kkristu nguwe wakali kubotelwa loko kwiinda boonse. Muchiiyo eechi, tulasaanguna kulanga-langa twaambo twakapa kuti asale kubelekela Jehova. Mpawo tulalanga-langa kuti nkamboonzi nitweelede kumukomba Taateesu wakujulu. Kumamanino, tulabona tumwi twaambo tutondeezya kuti nkamboonzi nitusala kubelekela Jehova.

TWAAMBO TWAKAPA KUTI JESU ASALE KUBELEKELA JEHOVA

3. Saatani wakamusyomezyaanzi Jesu alubo Jesu wakasala kuchitaanzi?

³ Naakali aanyika, Jesu wakeelede kusala kuti ngwani ngwaakali kunoobelekela. Muchiindi chifwiifwi Jesu kali wabbabbatizigwa,  Saatani wakamubuzya kuti wakali kunoomupa bwaami boonse bwaanyika kuti wamukomba kamwi biyo. Jesu wakamusandula kuti: “Zwaawa Saatani! Nkaambo kulilembedwe kuti: ‘NguJehova Leza wako nguyelede kukomba alubo nguwe alikke nguyelede kubelekela mulimu uusalala.’” (Mt. 4:​8-10) Nkamboonzi Jesu naakasala oobo? Atubone tumwi twaambo twakapa kuti asale oobo.

4-5. Ntuutuli tumwi twaambo twakapa kuti Jesu asale kubelekela Jehova?

⁴ Kaambo kapati kakapa kuti Jesu asale kubelekela Jehova nkakuti, wakali kumuyandisya loko Wisi. (Joh. 14:31) Mukuyungizya, Jesu ubelekela Jehova akaambo kakuti ulizi kuti kulikabotu kuchita oobo. (Joh. 8:​28, 29; Chi. 4:11) Ulizi kuti Jehova nguwe Kasawu kabuumi akuti ulasyomeka alubo mwaabi. (Int. 33:4; 36:9; Jak. 1:17) Jehova wakali kubuzya Jesu kasimpe chiindi choonse alubo nguwe wakamupa zintu zyoonse nzyaakalaazyo. (Joh. 1:14) Pesi Saatani ulisiyene aJehova, wakapa kuti bantu babisye akuti bafwe. Mubeji uutangala alubo uuliyeeya lwakwe. (Joh. 8:44) Kuziba twaambo toonse ootu, kwakapa kuti Jesu atatobelezyi Saatani mukupapila Jehova.—Flp. 2:​5-8.

⁵ Kamwi kaambo kakapa kuti Jesu asale kubelekela Jehova nkakuti, wakali kulangilila zintu zibotu zyakali kuzooba akaambo kamulimu wakwe. (Heb. 12:2) Wakalizi kuti, ikuti wakkala kasyomeka, wakali kunoopa kuti zina lyaWisi lisalazigwe akupa kuti chibi alufu zitazoobi lubo pe.

TWAAMBO TUPA KUTI JEHOVA AYELELE KUKOMBWA

6-7. Nkamboonzi bantu biingi mazubaano nibatabelekeli Jehova alubo nkamboonzi nitweelede kumukomba?

⁶ Bantu biingi mazubaano tabamubelekeli pe Jehova akaambo kakuti tabanabuziba pe buntu bwakwe bubotu. Alubo tabazizi pe zintu zibotu nzyaakabachitila. Balikozyenie abantu baku-Atene mbaakakambawukila Pawulu. Ambabo teebakamuzi pe Leza.—Mil. 17:​19, 20, 30, 34.

⁷ Pawulu wakapandulwida bantu baku-Atene kuti, Leza wakasimpe “nguupa bantu boonse buumi akuyoya azintu zyoonse.” Wakayungizya kuti: “Nguwe uupa kuti katuli bawumi, katweenda alubo katupona.” Leza, Mulengi “wakalenga muntu uumwi, ooko bantu bazisi zyoonse bakkala aanyika nkubakazwa,” nkinkaako, nguwe alikke ngutweelede kukomba.—Mil. 17:​25, 26, 28.

8. Niinzi Jehova nzyatachiti? Pandulula.

⁸ Mbukunga Mulengi akuti nguwe uulaanguzu kuzintu zyoonse zyakalengwa, Jehova wakali kukonzya kusungilizya bantu kuti bamubelekele. Nikuba oobo, taakwe natazoochite oobo kale pe. Pesi utupa bukamboni butondeezya kuti mpali akuti ulamuyanda umwi awumwi wesu kazizwaansi aamoyo. Uyanda kuti bantu biingi babe beenzinyina kukabe kutamani. (1 Tim. 2:​3, 4) Eezi nzizyo zyakapa kuti Jehova atuyiisye kuchitila kuti andiswe tuyiisye bamwi atala amakanze aakwe akubabuzya atala azintu zibotu nzyatazoochitile bantu. (Mt. 10:​11-13; 28:​19, 20) Wakatubambila mbungano alubo wakachita mabambe aakuti kube balangizi batulangania.—Mil. 20:28.

9. Muunzilaanzi Jehova mwaakatondeezya kuti ulabayanda bantu boonse?

⁹ Luyando lwaJehova lupati lulalibonia munzila njabajataayo aabo batasyomi kuti mpali. Yeeya atala azeezi: Kwaminyaka myiingi, bantu biingi bakalisalila kuchita zintu nzibayeeya kuti zilikabotu akuti nzibi kwiinda kuti baswiilile Jehova. Nikuba oobo, Jehova wakabatondeezya luzyalo kwiinda mukubapa zintu nzibayandikana kuchitila kuti bayinkilile kunembo kabapona akuti babotelwe mubuumi. (Mt. 5:​44, 45; Mil. 14:​16, 17) Akaambo  kanguwe, balakonzya kuba aabeenzinyina, mpuli, bana, milimu akubotelwa mubuumi. (Int. 127:3; Muk. 2:24) Zintu eezi mbukamboni butondeezya kuti Taateesu wakujulu ulabayanda bantu boonse. (Kul. 34:6) Lino atubone tumwi twaambo tupa kuti tusale kubelekela Jehova ambabalongezya aabo basala kumubelekela.

TWAAMBO TUPA KUTI TUSALE KUBELEKELA JEHOVA

10. (a) Nkaakali kaambo kapati kapa kuti tubelekele Jehova? (Mateyo 22:37) (b) Niinzi Jehova nzyaakakuchitila zitondeezya kuti ulaamoyo mulamfu? (Intembauzyo 103:​13, 14)

¹⁰ Mbuli Jesu mbaakali kumuyandisya Wisi, kaambo kapati kapa kuti andiswe tubelekele Jehova nkakuti, tumuyanda loko. (Bala Mateyo 22:37.) Tulimvwa katukwelelwa kuli Jehova chiindi nitwiiya atala abuntu bwakwe. Muchikozyano, atubone Jehova mbatondeezya moyo mulamfu. Ma-Israyeli nibakaleka kumuswiilila, wakabakombelezya kati: “Ndakomba, amuleke nzila zyanu zibi.” (Jer. 18:11) Jehova ulizi kuti tatumaninide pe akuti tuli bulongo biyo. (Bala Intembauzyo 103:​13, 14.) Chiindi nuyeeyesesya atala amoyo mulamfu Jehova ngwalaawo abumwi buntu bwakwe bubotu, tazipi kuti na uyande kumubelekela kukabe kutamani?

11. Ntuutuli tumwi twaambo tupa kuti tusale kubelekela Taateesu wakujulu?

¹¹ Tuyanda kubelekela Jehova akaambo kakuti tulizi kuti kulikabotu kuchita oobo. (Mt. 4:10) Alubo tulizi kuti, ikuti twasyomeka kuli Jehova, zintu zibotu zyiingi zilakonzya kuchitika. Kuti twabelekela Jehova katusyomeka, nga tulikusalazya zina lyakwe, nga tulikupa bukamboni bwakuti Dyabbulosi mubeji alubo eezi zipa kuti Taateesu abotelwe. Alubo kuti twasala kumubelekela Jehova lino, tulaba aabulangilizi bwakuzoopona kukabe kutamani katumubelekela!—Joh. 17:3.

12-13. Twiiyaanzi kuli zyakachitikila Jane aPam?

¹² Nituchili baniini, tulakonzya kusaanguna kumuyanda Jehova alubo luyando oolo nga lwasima loko chiindi nituyabukomena. Atubone zyakachitikila Jane amwanike wakwe Pam. a Nibakasaanguna kwiiya Bbayibbili, Jane wakali aaminyaka iili 11 mpawo Pam wakali aa 10. Nikuba kuti bazyali babo teebakalikwe chiyandisyo pe chakwiiya Bbayibbili, bakabazumizya kuti bayiye Bbayibbili aBakamboni. Pesi bazyali babo, bakababuzya kuti, kumamanino aamviki beelede kunooyinka kuchikombelo chabazyali babo kuchitila kuti bayinkilile kunembo kwiiya. Jane wakaamba kuti, “Nzibakandiyiisya Bakamboni, zyakandigwasya kuti nditabelesyi madrugs akuti nditachiti bwaamu mbuli mbubakali kuchita beenzuma.”

¹³ Nikwakayinda minyaka miche, basimbi aaba bakabbabbatizigwa. Mukuya kwachiindi, bakasaanguna kupayona kumwi kabali kulangania bazyali babo bakali bachembaala. Jane wakaamba mbalimvwa atala azintu zyoonse Jehova nzyaakabachitila, wakaamba kuti: “Ndakayiya kuti Jehova ulabalangania beenzinyina, mbuli mbulwaamba lugwalo lwa 2 Timoti 2:19 lutii, ‘Jehova ulibazi aabo bali kubbazu lyakwe.’” Zili aantanganana kuti chiindi choonse Jehova ulabalangania aabo bamuyanda alubo basala kumubelekela!

14. Zintu nzitwaambuula anzituchita, zigwasilizya biyeni mukusalazya zina lyaJehova kumasampu woonse? (Langa chifanikisyo.)

¹⁴ Tuyanda kugwasilizya kusalazya zina lyaJehova kumasampu woonse. Atubone chikozyano eechi: Atuteedi ulaamweenzinyokwe uulaaluzyalo, mwaabi alubo uulekelela. Bumwi buzuba, wamvwa umwi muntu kalikwaamba  kuti mweenzinyokwe ulaalunya alubo tasyomeki pe. Ulachita biyeni? Ulamwiiminina. Munzila iikozyenie, chiindi Saatani abaabo balaansi aabweendelezi bwakwe nibeezya kupambanisya mpuwo yaJehova kwiinda mukwaamba manwa atala anguwe, nga twaamba kasimpe atala ambabede Jehova alubo ngatwalyiiminina zina lyakwe chabusungu. (Int. 34:1; Is. 43:10) Tutondeezya kuti tuyanda kumubelekela Jehova amoyo wesu woonse kwiinda muzintu nzitwaambuula anzituchita.

15. Nziizili zintu zibotu mwaapostoli Pawulu nzyaakajana naakachincha zipeekezyo zyakwe? (Bafilipi 3:​7, 8)

¹⁵ Tulalipeda kuchincha zipeekezyo nzitulaazyo mubuumi kuchitila kuti tukonzye kubelekela Jehova munzila iitambulika naakuti iizwide. Muchikozyano, mwaapostoli Pawulu wakasala kusiya chuuno nchaakalaacho mubukombi bwachiJuda kuchitila kuti abe mutobeli waKkristu akuti abelekele Jehova. (Gal. 1:14) Akaambo kazeezi, wakali aazintu zibotu zyakamuchitikila mumulimu wakwe alubo wakajana chilongezyo chakuzooyendelezyaamwi aKkristu kujulu. Taakwe naakalisola pe akusala nkwaakachita kuti abelekele Jehova, andiswe tatuzoolisoli pe kuti twasala kubelekela Jehova.—Bala Bafilipi 3:​7, 8.

16. Twiiyaanzi kuli zyakachitikila Julia? (Langa chifanikisyo.)

¹⁶ Kuti kubelekela Jehova twakubikka mubusena bwakusaanguna, tulajana bulumbu lino amuchiindi chilikunembo. Atubone zyakachitikila muchizi uutegwa Julia. Katanayiya kasimpe, wakali mukkwaya yakucheechi kachili muniini. Umwi mwiimbi ulaaluzibo wakachibona chipo nchaakalaacho alubo wakamuyiisya kuti ayungizye luzibo lwakwiimba. Muchiindi chifwiifwi, Julia wakaba mwiimbi ulaampuwo alubo wakali kwiimbila mundawu  zyakazibikene loko zyakalaampuwo. Naakali kuchikolo chakazibikene chiyiisya kwiimba, umwi sichikolonyina wakamukambawukila alubo wakamubuzya kuti Leza ulaazina lyakuti Jehova. Kakutanayinda chiindi, Julia wakasaanguna kwiiya Bbayibbili tubili mumviki. Kuzwa waawo, wakasala kuti abikkile maanu kukubelekela Jehova kutali kuti ayinkilile kunembo azyakwiimba. Kusala ooko teekwakali kuuba pe. Julia wakaamba kuti, “Bantu biingi bakandibuzya kuti ndakali kusaanisya chipo changu, pesi ndakali kuyanda kubelesya chiindi nchindakalaacho kuti ndibelekele Jehova.” Julia ulimvwa biyeni lino akusala nkwaakachita muminyaka yiinda ku 30 yayinda? Julia wakaamba kuti “Ndili aaluumuno mumizeezo alubo ndisyoma kuti Jehova uzoozuzikizya zintu zyoonse ziyandwa aamoyo wangu muchiindi chilikunembo.”—Int. 145:16.

YINKILILA KUNEMBO KUBELEKELA JEHOVA

17. Kuziba kuti mamanino aabwiime bwazintu oobuno abaafwiifwi loko, kubajatikizya biyeni aabo bakasala kubelekela Leza abaabo batanasala kumubelekela?

¹⁷ Tulikupona muchiindi chili aafwiifwi loko amamanino aabwiime bwazintu oobuno. Mwaapostoli Pawulu wakalemba kuti: “Nkaambo ‘muchiindi chifwiifwi biyo,’ alubo ‘ooyo uulikuza uzoosika alubo takoononoka pe.’” (Heb. 10:37) Eezi zitujatikizya biyeni? Chiindi chisyeede chakuti bantu basale kubelekela Jehova nchiche. (1 Kor. 7:29) Kuti katuli twakasala kale kubelekela Leza, tulizi kuti “muchiindi chifwiifwi biyo,” mapenzi aaya azoomana.

18. Jesu aJehova bayanda kuti tuchiteenzi?

 ¹⁸ Jesu wakasungwaazya bantu kuti babe basikwiiya bakwe akuti bayinkilile kunembo kumutobela. (Mt. 16:24) Tweelede kwiinkilila kunembo kubelekela Jehova nikuba kuti twaba aaminyaka myiingi katuli kumubelekela. Tweelede kubeleka changuzu kuti tukkale katupona kweendelana akusala nkutwakachita kuti tumubelekele. Kupona kweendelana akusala nkutwakachita kulakonzya kutuyumina, pesi tulakonzya kujana zilongezyo zyiingi akukkutisikana nikuba lino!—Int. 35:27.

19. Twiiyaanzi kuli zyakachitikila Gene?

¹⁹ Bamwi bayeeya kuti, ikuti babelekela Jehova tabakoobotelwa pe mubuumi. Kuti kuli uuchikula, ubonaanga kuli chintu na nchukonzya kusweekelwa kuti wasala kubelekela Jehova? Umwi mukwesu wachiniini uutegwa Gene wakaamba kuti: “Ndakali kubonaanga kuba Kamboni waJehova kwakali kupa kuti ndisweekelwe zimwi zintu. Kwakali kubonekaanga bana mbindakakomenaabo bakali kubotelwa nibakali kuchita zintu zili mbuli kwiinka kumapaati, kuyandana naakuti kusaana mavidiyo geemu aazyakulwana, kakuli ime ndakeelede kubelesya chiindi changu kumiswaangano akukukambawuka.” Maboneno aaya akapa kuti Gene achiteenzi? Wakaamba kuti, “Ndakasaanguna kuchita zintu nzibakali kuchita basela lyangu alubo ndakabotelwa kwachiindi chifwiifwi. Pesi ndakabona kuti kubotelwa ooku teekwakali kwachoonzyo pe. Ndakasaanguna kuyeeya bubotu buba kuti ndasala kuswiilila nzilyaamba Bbayibbili alubo ndakasala kubelekela Jehova amoyo woonse. Kuzwa aachiindi eecho, ndakabona kuti Jehova wakazisandula nkombyo zyangu.”

20. Tweelede kukanza kuchitaanzi?

²⁰ Sintembawuzyo wakayimbila Jehova kuti: “Ulikkomene muntu ngosala akuswenya kulinduwe kuti akkale mumabuwa aako.” (Int. 65:4) Atukanze kwiinkilila kunembo katubelekela Jehova. Mbuli mbaakaamba Joshuwa, andiswe tulakonzya kwaamba kuti: “Ime abamung’anda yangu tunoobelekela Jehova.”—Jos. 24:15.