1. Mbuuli mbukupandulwidwe muli Baefeso 6:10-13, njiili imwi nzila iiwumbulizya iitondeezya Jehova mbali aandaba andiswe? Pandulula.

IMWI nzila iiwumbulizya iitondeezya Jehova mbali aandaba andiswe tubakombi bakwe, nkwiinda mukutugwasya kuti tulwane basinkondoma. Basinkondoma bapati nguSaatani amadimoni. Jehova ulatuchenjezya atala abasinkondoma aaba alubo utupa zintu nzituyanda kuti tubalwane. (Bala Baefeso 6:10-13.) Tulakonzya kuzwidilila kumukazya Dyabbulosi, kuti twazumina kugwasigwa aaJehova akumusyoma amoyo woonse. Tulakonzya kuba aalusyomo luli mbuuli lwaPawulu. Wakalemba kuti: “Ikuti Leza kalaandiswe, ino nguni uukonzya kutulwana?”—Rom. 8:31.

2. Tulalanga-langaanzi muchiiyo eechi?

² Mbutuli maKristu bakasimpe, tatukwe ndaba loko pe aSaatani amadimoni. Pesi tuli aandaba akwiiya atala aJehova akumukomba. (Int. 25:5) Nikuba boobo, tweelede kuziziba nzila Saatani nzyabelesya. Nkamboonzi nitweelede kuziziba? Kuchitila kuti atatweeni. (2 Kor. 2:11; makani aamunsi) Muchiiyo eechi, tulalanga-langa nzila mpati Saatani amadimoni njibabelesya kweena bantu. Alubo tulabona mbutukonzya kuzwidilila mukubalwana.

3-4. (a) Zyachidimoni ziswaanizyaanzi? (b) Izibinkene biyeni njiisyo yakusyoma zyachidimoni?

³ Nzila mpati Saatani amadimoni njibabelesya kweena bantu, nkusyoma zyachidimoni. Bantu bachita zyachidimoni baamba kuti balakonzya kuziba naakuti kweendelezya zintu  bantu nzibatakonzyi kweendelezya amanguzu aabo. Muchikozyano, bamwi baamba kuti balakonzya kuziba zilikunembo kwiinda mukusonda naakuti kulanga-langa bweende bwanyenyeezi azimwi zintu zyamujulu. Bamwi balakonzya kuchitaanga baambuula aabantu bafwide. Bamwi bachita zyabulozi, zyamasalamusi alubo baamba kuti balakonzya kutumina bamwi ziposo. *

⁴ Njiisyo yakusyoma zyachidimoni izibinkene biyeni? Nikwakachitwa kuyanduulisisya muzisi zili 18 kuLatin America azili kuCaribbean, kwakajanika kuti aakati kabantu batatu, uumwi usyoma zyamasalamusi, bulozi alubo bantu aaba basyoma kuti bantu balakonzya kwaambuula aamyuuya yabantu bafwide. Alubo muzisi zili 18 muAfrica kwakachitwa kumwi kuyanduulisisya. Kwakajanika kuti aakati kabantu babili, uumwi usyoma kuti bulozi mpubuli. Nkinkaako, kufumbwa nkutukkala tweelede kulikwabilila kuti tutasyomi zyachidimoni. Kuyungizya waawo, Saatani ulikweena bantu “nyika yoonse.”—Ciy. 12:9.

5. Jehova uzibona biyeni zyachidimoni?

⁵ Jehova ‘nguLeza wakasimpe.’ (Int. 31:5) Uzibona biyeni zyachidimoni? Ulazizonda! Jehova wakabuzya maIsrayeli kuti: ‘Takweelede kujanwa akati kanu muntu uumpa mwanaakwe musankwa naakuti musimbi mumulilo, mung’anga, simasalamusi, sibusangu, mulozi, simabibo, muntu uubuzya makani kubang’anza, simaloto naakuti muntu uubuzya makani kubafu. Nkaambo kufumbwa muntu uuchita zintu eezi nchisesemyo kuli Jehova.’ (Dt. 18:10-12) MaKristu tabacheendelezegwi aaMulawu Jehova ngwaakapede maIsrayeli. Nikuba boobo, tulizi kuti uzibona biyeni zyachidimoni akuti tanachincha pe.—Malk. 3:6.

6. (a) Saatani uzibelesya biyeni zyachidimoni kuti apenzye bantu? (b) Kweendelana amajwi aali muli Mukambausi 9:5, nkaakali kasimpe kali atala achiimo chabafwide?

⁶ Jehova ulatuchenjezya atala azyachidimoni nkaambo ulizi kuti njinzila Saatani njabelesya kupenzya bantu. Saatani ubelesya zyachidimoni kuti asumpule kubeja kwakwe kwakuti bafwide balapona kuli bumwi busena. (Bala Mukambausi 9:5.) Alubo Saatani ubelesya zyachidimoni kuti bantu bayoowe akuti batabi beenzinyina baJehova. Makanze aakwe ngakuti bantu bachita zyachidimoni basyome myuuya mibi kutali Jehova.

7. Jehova utubuzyaanzi?

⁷ Mbuuli mbutwabona, Jehova utubuzya nzitweelede kuchita kuchitila kuti tuteenwi aaSaatani amadimoni. Atubone zimwi nzila nzitukonzya kubelesya kuti tulwane Saatani amadimoni.

8. (a) Njiili nzila mpati iitugwasya kuti tulwane myuuya mibi? (b) Majwi aali muli Intembauzyo 146:4, akuyubununa biyeni kubeja kwaSaatani kuli aatala abafwide?

⁸ Bala Jwi lyaLeza akuyeeyesesya nzubala. Eeyi niinzila mpati njitukonzya kubelesya kuti tutantamuke kubeja kusumpulwa aamyuuya mibi. Jwi lyaLeza lili mbuuli panga libosya liyubununa njiisyo zyakubeja zisumpulwa aaSaatani. (Ef. 6:17) Muchikozyano, Jwi lyaLeza liyubununa makani aakubeja aakuti bafwide balakonzya kwaambuula aabantu bachipona. (Bala Intembauzyo 146:4.) Alubo  lituyeezya kuti Jehova nguwe alikke uukonzya kutubuzya ziyoochitika kunembo. (Is. 45:21; 46:10) Kubala Jwi lyaLeza akuyeeyesesya nzitubala chiindi achiindi, kutugwasya kuti tutasyomi makani aakubeja aasumpulwa aamyuuya mibi akuti twaazonde.

9. Njiili michito iili aachakuchita azyachidimoni njitweelede kutantamuka?

⁹ Utachiti zintu ziswaanizya zyachidimoni. Mbutuli maKristu bakasimpe, tatuchiti chintu nichiba chimwi chili aachakuchita azyachidimoni. Muchikozyano, tatwiinki kubang’anza naakuti kweezya kwaambuula aabantu bafwide. Mbuuli mbutwakayiya muchiiyo chakayinda, tatuliswaanizyi muziyanza zichitwa mumalilwe zizwa kunjiisyo yakubeja yakuti bafwidwe balapona kuli bumwi busena. Alubo tatubelesyi bweende bwanyenyeezi azimwi zintu zyamujulu abasimaloto kuti tuzibe ziyoochitika kunembo. (Is. 8:19) Tulizi kuti michito yoonse eeyi itunjizya mumapenzi alubo ipa kuti tubelekelaamwi aSaatani amadimoni.

10-11. (a) Niinzi nzibakachita bamwi mumwaanda wamunyaka wakusaanguna nibakayiya kasimpe? (b) Kweendelana amajwi aali muli 1 Bakorinto 10:21, nkamboonzi nitweelede kutobelezya chikozyano chamaKristu bakusaanguna alubo kujana twazichita biyeni?

¹⁰ Tantamuka zintu ziswaanizya masalamusi. Bamwi bantu bakuEfeso, mumwaanda wamunyaka wakusaanguna, bakali kuchita zintu zyachidimoni. Pesi nibakayiya kasimpe, bakachita chintu chigambya. Tubala kuti: “Bantu banji akati kabasimasalamuzi bakabungika mabbuku aabo akwaaumpa bantu boonse kabalangilila.” (Mil. 19:19) Mabbuku aabo aazyamasalamusi akali kudula loko. Pesi bakaatenta biya kutali kwaapa bamwi naakuti kwaawuzya. Bantu aaba bakali lipedelede kuleka kubelekaamwi amyuuya mibi nkaambo bakali kuyanda kubotezya Jehova kutali kuyeeyesesya mbaakali kudula mabbuku aayo.

¹¹ Kujana twachitobelezya biyeni chikozyano chamaKristu bamumwaanda wamunyaka wakusaanguna? Tunooli twachita chabusongo  kuti twasiya zintu zyoonse zili aachakuchita amasalamusi, kuti katuli aazyo. Zintu eezi ziswaanizya kuzwaata bulungu, ntetelelo naakuti zimwi nzibalisunga bantu kuti balikwabilile kumyuuya mibi.—Bala 1 Bakorinto 10:21.

12. Njiili mibuzyo njitweelede kulibuzya atala azyakulikondelezya nzitusala?

¹² Langa-langa zintu nzulikondelezyaazyo. Libuzye kuti: ‘Ndiyandisya kubala mabbuku, mamagazini naakuti zimwi zijanika aaIntaneti zili atala amasalamusi na? Nyimbo nzindiswiilila, ma-movie, ma-show aamuTV ngindiyebela amavidiyo gemu ziswaanizya zyamasalamusi na? Zyakulikondelezya nzindisala ziswaanizya zyachidimoni na mbuuli ma-vampire, basangu naakuti manguzu aayinda manguzu aabantu? Zitondeezya kuti masalamusi azipuku nzintu zinoneezya na? Pesi eezi tazyaambi kuti zyakulikondelezya zyoonse bantu nzibalipangila, ziswaanizya zintu zyachidimoni. Nusala zyakulikondelezya, yezya kusala zikugwasya kuti utantamuke zintu zyoonse Jehova nzyazonda. Tuyanda kuti tukkale katuli “amanjezeezya aasalala” mumeso aaLeza wesu.—Mil. 24:16. *

13. Niinzi nzituteelede kuchita?

¹³ Tantamuka kwaambuula makani aali atala amadimoni. Munkani eeyi, tweelede kutobelezya chikozyano chaJesu. (1 Pet. 2:21) Katanaza aanyika, Jesu wakali kukkala kujulu alubo wakazi zintu zyiingi loko atala aSaatani amadimoni. Pesi taakali kwaambuula twaambo tuli atala azyakachitwa aamyuuya eeyo mibi. Jesu wakali kuyanda kuba kamboni waJehova kutali kuba mwiiminini waSaatani. Mbuuli  Jesu, tatuyandi kwaambuula makani aali atala azichitwa aamadimoni. Pesi mumajwi eesu tweelede kutondeezya kuti ‘myoyo yesu iladuntaana akaambo kachintu chibotu,’ chaamba kasimpe.—Int. 45:1.

14-15. (a) Nkamboonzi nituteelede kwiiyoowa myuuya mibi? (b) Mbuubuli bumboni butondeezya kuti Jehova ulikubakwabilila bantu bakwe mazubaano?

¹⁴ Utayiyoowi pe myuuya mibi. Munyika eeyi mbi, tulakonzya kuchitikilwa zintu zibi. Ngozi zyamumugwagwa, kuchiswa naakuti lufu, zilakonzya kutuchitikila katutayeeyeli pe. Pesi tweelede kuyeeya kuti myuuya eeyi mibi njiyo na iipa kuti zintu eezi zichitike? Bbayibbele lyaamba kuti “ziindi zyamapenzi akucitikilwa zintu zitalangilwi,” zilakonzya kuchitika kumuntu woonse. (Muk. 9:11) Jehova wakatondeezya kuti uli aamanguzu miingi kwiinda madimoni. Muchikozyano, Leza taakamuzumizya pe Saatani kuti ajaye Jobu. (Job. 2:6) Muchiindi chaMozesi, Jehova wakatondeezya kuti uli aamanguzu miingi kwiinda bapayizi bakuEgepita, bakali kuchita zyamasalamusi. (Kul. 8:18; 9:11) Nikwakayinda chiindi kujulu, Jehova wakapa Jesu manguzu aakuzunda Saatani amadimoni, mpawo bakawaalilwa aanyika. Muchiindi chilikunembo, bayoowaalilwa mumugodi uutagoli alubo tabachikakonzyi pe kweena bantu.—Ciy. 12:9; 20:2, 3.

¹⁵ Kuli bumboni bwiingi butondeezya kuti Jehova ulikubakwabilila bantu bakwe mazubaano. Yeeya zitobela: Tulikukambawuka akuyiisya bantu kasimpe munyika yoonse. (Mt. 28:19, 20) Kuchita oobo kwapa kuti tuyubunune milimu mibi yaDyabbulosi. Kaansinga Saatani ulakonzya kwiimikizya mulimu ooyu nikuli wakachita oobo, pesi takonzyi pe. Nkinkaako, tatweelede kwiiyoowa pe myuuya mibi. Tulizi kuti “meso aa Jehova alalanga-langa munyika yoonse kutegwa atondezye nguzu zyakwe ikugwasya baabo bamusyoma camoyo woonse.” (2 Mak. 16:9) Kuti twazumanana kusyomeka kuli Jehova, madimoni taazootuzundi pe.

16-17. Amba chikozyano chitondeezya mbukuyandikana kuba aachibindi kulwana amyuuya mibi.

¹⁶ Ziyanda chibindi kuti tukonzye kulwana  amyuuya mibi kapati chiindi beenzuma ababbululu besu nibatukazya. Pesi Jehova ulabalongezya bantu batondeezya chibindi chili boobu. Atubone chikozyano chamuchizi Erica uukkala kuGhana. Erica wakali aaminyaka iili 21 naakasaanguna kwiiya Bbayibbele. Akaambo kakuti wisi wakali mupayizi uuchita zyamasalamusi, Erica wakali kulangililwa kuti aliswaanizye mutunsiya-nsiya tuswaanizya kulya nyama yakali kupayizigwa kumizimu yamasyaaninakulu. Pesi Erica naakakaka, bamumpuli yakwe bakazibona kuti kwakali kutalemeka baleza babo. Alubo bakali kusyoma kuti baleza babo balakonzya kubeetela mapenzi.

¹⁷ Bamumpuli yaErica bakali kumusungilizya kuti aliswaanizye mutunsiya-nisya twabo pesi taakazumina pe nikuba kuti zyakapa kuti azwe aang’anda. Bamwi Bakamboni bakakkalaawe mumpuli zyabo. Jehova wakamulongezya Erica nkaambo wakajana mpuli mpya yabakombinyina, bakaba mbuuli bakulana abanike bakwe. (Mk. 10:29, 30) Nikuba kuti babbululu bakwe bakamukaka akutenta zintu zyakwe pesi wakakkala kasyomeka kuli Jehova, wabbabbatizigwa alubo lino ngupayona wachiindi choonse. Taayoowi pe madimoni. Kaambuula atala abamumpuli yakwe, waamba kuti: “Buzuba abuzuba, ndikombela kuti bamumpuli yesu bajane zilongezyo ziba akaambo kakuziba Jehova alwaangunuko ndubakonzya kujana kuti bakomba Leza wesu uuli aaluyando.”

18. Nziizili zilongezyo nzitujana akaambo kakusyoma Jehova?

¹⁸ Eezi tazyaambi kuti toonse tuyooswaana masunko aali boobu. Nikuba boobo, toonse tweelede kulwana aamyuuya mibi akusyoma Jehova. Kuchita oobo kupa kuti tujane zilongezyo zyiingi alubo tatukazumini kweenwa amakani aaSaatani aakubeja. Alubo tatukazumizyi kuti kuyoowa madimoni kutukachizye kukomba Jehova. Kwiinda zyoonse, kuchita oobo kupa kuti tusimye bweenzuma mbutuli aabo Jehova. Sikwiiya Jakkobo wakalemba kuti: ‘Amulibombye kuli Leza. Amumukazye Dyabbulosi eelyo ulamuchija. Amuswene kuli Leza, eelyo anguwe ulaswena kulindinywe.’—Jak. 4:7, 8.