Kuba aaluzyalo “nkulibikka muchiimo chamuntu naakuti nkuchisa nkutumvwa chiindi umwi muntu naasikilwa penzi.” Dokotela waboongo uutegwa Rick Hanson wakati: “Tuzyalwa katuli aaluzyalo.”

LIBUZYE KUTI: Nkamboonzi bantu nibakalengwa kabali aaluzyalo kusiyana abanyama? Bbayibbele litondeezya kuti Leza wakalenga bantu muchikozyano chakwe. (Matalikilo 1:26) Eezi zyaamba kuti tulakonzya kutondeezya bube bulikabotu mbuuli bwaLeza. Nkinkaako, chiindi bantu nibafwida bamwi luzyalo nga balikutondeezya bube bwaMulengi wabo Jehova Leza ulaaluzyalo.—Tusimpi 14:31.

Luzyalo lupa kuti Leza atabotelwi chiindi nabona bantu kabali mumapenzi. Kalyaambuula atala amapenzi ngibakaswaana maIsrayeli chiindi nibakali mubuzike kuEgepita anibakali munkanda kwaminyaka iili 40, Bbayibbele liti: “Mumapenzi abo oonse wakapenga alakwe.” (Isaya 63:9) Majwi aaya atondeezya kuti Leza wakali kwaabona mapenzi ngibakali kuswaana alubo wakali kwaamvwa machise aabo. Wakati: “Ndizi buusu bwabo mbobubede.” (Kulonga 3:7) Alubo wakayungizya kwaamba kuti, ‘woonse uumuguma ulaguma imboni yaliso lyangu.’ (Zekariya 2:8) Leza tabotelwi pe kubona bantu kabali kutupenzya.

Chimwi chiindi tulakonzya kubonaanga Leza takonzyi kutumvwisisisya, pesi Bbayibbele lyaamba kuti: “Leza mupati kwiinda myoyo yesu, alimwi ulizi zintu zyoonse.” (1 Johane 3:19, 20) Leza utuzi kwiinda mbutulizi. Alubo ulizizi zyiimo zyesu, nzituyeeya ambutulimvwa. Nabona katuli mumapenzi ulatufwida luzyalo.

 Nzilyaamba Bbayibbele

• “Uyooita, nkabela Jehova uyoovuwa; wakwiila buyo, uyooamba kuti, Mpendi.”—ISAYA 58:9.

• “Nkaambo ndizi miyeeyo yangu njinjeeya aandinywe, mbwaamba Jehova. Njemiyeeyo yakuleta [luumuno NW], teensi miyeeyo yamapenzi pe. Njanda kumupa bubotu mbumukonzya kulangila kumamanino. Lino muyoondiita, muyoosika kundikomba, nkabela njoomuswiilila.”—JEREMIYA 29:11, 12.

• “Bika misozi yangu munsazi yako. Sa tiilembedwe mubbuku lyako?”—INTEMBAUZYO 56:8.

Kuziba kuti Leza ulaaluzyalo, kujana kwatugwasya biyeni kuti tulisimye chiindi nituli mumapenzi? Bona zyakachitikila Maria, wakati:

“Chiindi mwanaangu ulaaminyaka iili 18 naakafwa akaambo kakuchiswa bulwazi bwakkensa kwaminyaka iibili, buumi bwakandiyumina nkaambo ndakabonaanga Leza wakandilekelezya. Nizyakachitika eezi, ndakamunyemena Jehova nkaambo taakamuponia pe mwanaangu.

“Nikwakiinda minyaka iili 6, umwi mweenzuma wamumbungano yesu wakandiswiilila chiindi nindakali kumubuzya mbundakali kulimvwa. Wakandiswiilila kwachiindi chilamfu katandinjili munkanwa, kuzwa waawo wakandibalila 1 Johane 3:19, 20, itii: ‘Leza mupati kwiinda myoyo yesu, alimwi ulizi zintu zyoonse.’ Wakandibuzya kuti Jehova ulizi mbutulimvwa chiindi nituli mumapenzi.

“Nikuba kuti mweenzuma wakeezya kundigwasya pesi kwakandiyumina kuti ndileke kumunyemena Leza. Kuzwa waawo, ndakabala Intembauzyo 94:19, yaamba kuti: ‘Miyeeyo minji iikataazya na yaata mumoyo wangu, kuumbulizya kwako nkokundikondezya.’ Ndakamvwa mbuuli kuti vesi eeyi yakalembelwa ndime. Kuzwa waawo, ndakaangunuka kuti ndibuzye Jehova zyakali kundikataazya nkaambo ndakaziba kuti ulandiswiilila akuti ulandiyanda.”

Kulawumbulizya kuziba kuti Leza ulituzi akuti uliibona nzila njitulimvwaayo chiindi nituli mumapenzi. Nkamboonzi mapenzi naali miingi oobu? Mapenzi ngituswaana ninsamu iizwa kuli Leza na? Leza uzoowamana na mapenzi atukataazya? Mibuzyo eeyi iyoosandulwa muzyiiyo zitobela.