Nkamboonzi Nituyanda Bwaami bwaLeza?
Naakalenga mpuli yakusaanguna, Mulengi wesu ulaazina lyakuti Jehova nguwe wakali Mweendelezi aalikke. Wakali kweendelezya bantu munzila yaluyando. Wakababambila muunzi mubotu mumuunda waEdeni kuchitila kuti bantu bakkale mumo. Alubo wakabapa chakulya chiingi. Kuyungizya waawo, wakabapa mulimu. (Matalikilo 1:28, 29; 2:8, 15) Bantu bakali kuyookkala muluumuno nikunga bakazumanana kuzumina kweendelezegwa aaLeza.
Mpuli yakusaanguna yakakaka kweendelezegwa aaLeza
Bbayibbele lyaambuula atala awumwi mungelo wakapapila, wakazooyitwa kuti Saatani Dyabbulosi wakabukila bweendelezi bwaLeza. Saatani wakaamba kuti bantu balakonzya kuliponena kabateendelezegwi aaLeza. Chuusisya nchakuti, bazyali besu bakusaanguna, Adamu aEva bakaswiilila kubeja kwaSaatani mpawo bakakaka kweendelezegwa aaLeza.—Matalikilo 3:1-6; Ciyubunuzyo 12:9.
Kusala kutayendelezegwa aaLeza nkwaakachita Adamu aEva kwakapa kuti basweekelwe aachilongezyo chakukkala muParadayizi aanyika akupona kukabe kutamani kabamaninide. (Matalikilo 3:17-19) Kusala kwabo kwakapa kuti bana mbibakazoozyala banjile mumapenzi. Bbayibbele lyaamba kuti, akaambo kakuti Adamu wakabisya “cibi mbocakanjila munyika . . . alufwu kwiinda mucibi.” (Baroma 5:12) Kutamaninina kwabantu kwakapa kuti ‘bayendelezye bamwi munzila iibeetela mapenzi.’ (Mukambausi 8:9) Muliimwi nzila, kulyeendelezya kwabantu kuyungizya mapenzi.
MPUBWAKASAANGUNINA BWEENDELEZI BWABANTU
Nimrodi wakapapila Jehova
Bbayibbele litondeezya kuti mweendelezi wakusaanguna aanyika nguNimrodi. Wakapapila bweendelezi bwaJehova. Kuzwa chiindi, beendelezi balikubelesya zyuuno zyabo munzila iitali kabotu. Kwaminyaka iisika ku3 000 yayinda, Mwaami Solomoni wakaamba kuti: “Ndakabona misozi yabaabo badyaamininwa, pele kwakanyina wakubaumbulizya. Aabo ibakali kubadyaaminina bakalijisi nguzu.”—Mukambausi 4:1.
Nikuba mazubaano tulikuswaanana aamapenzi. Mu2009 Bbuku lyaUnited Nations lyakaamba kuti: “Mfulumende zilikukachilwa kweendelezya alubo nzizyo zilikupa kuti mapenzi avule loko munyika.”
CHIINDI CHAKUBWEZA NTAAMU!
Bantu bayanda mweendelezi uulikabotu. Alubo eezi nzizyo nzyaakatusyomezya Mulengi wesu.
Nikuba kuti mfulumende zyabantu zyaba aachiindi kazilikweendelezya pesi zyakachilwa kumaninsya mapenzi ngibaswaana bantu
Leza wakabikka Bwaami naakuti mfulumende itazoogwisye mfulumende zyoonse ziliwo alubo Bwaami oobu “buyakwiima nji mane kukabe kutamani.” (Daniele 2:44) Bwaami oobu mbubo bukombelwa aamaKristu. (Matayo 6:9, 10) Pesi Leza teenguwe pe utakayendelezye mfulumende eeyi. Wakasala umwi muntu kuti akayendelezye mfulumende eeyo. Ngwani ngwaakasala Leza kuti abe mweendelezi?
