Leza Ulaazina Na? Iiyi ulaazina. Wakaamba kuti: “Ndime Jehova. Eeli ndezina lyangu.” (Isaya 42:8) Zina lyaLeza lijanika kwaziindi zisika ku7 000 muBbayibbele. Pesi amwi maBbayibbele akagwisigwa zina lyakuti Jehova mpawo kwakabikkwa zina lyakulemeka litii “Mwaami.” Leza uyanda kuti ube mweenzinyina, ukusungwaazya kuti uyite “zina lyakwe.”​—Intembauzyo 105:1.

Mazina aaJehova Aakulemeka. MuBbayibbele muli mazina aaJehova aakumulemeka mbuuli aakuti “Leza,” “Singuzuzyoonse,” “Mulengi,” “Taata,” “Mwaami” aliti “Mweendelezi wazintu zyoonse.” MuBbayibbele,  muli nkombyo zyiingi zilembedwe zyabantu bakali kukomba kababelesya mazina aaLeza aakulemeka akubelesya zina lyakwe lyakuti Jehova.​—Daniele 9:4.

Leza Ulibiyeni? Leza muuya. (Johane 4:24) Bbayibbele lyaamba kuti taakwe “muntu wakamubona kale Leza.” (Johane 1:18) Pesi Bbayibbele lyaambuula atala ambalimvwa. Bantu balakonzya kumunyemya naakuti ‘kumubotezya.’​—Tusimpi 11:20; Intembauzyo 78:40, 41.

Buntu bwaLeza Bubotu. Leza tasaluuli pe, pesi uyanda bantu boonse. (Milimo 10:34, 35) Alubo nguLeza “siluse alimwi silweetelelo, uutafwambaani kukalala alimwi uuzwide luyando lutamani akasimpe.” (Kulonga 34:6, 7) Kwalino atwaambuule atala abuntu bwaLeza buli 4 buyandikana.

Manguzu. Mbukunga ‘nguLeza Singuzuzyoonse’ ulaanguzu zyakuchita kufumbwa nzyasyomezya.​—Matalikilo 17:1.

Busongo. Taakwe ulaabusongo buli mbuuli bwaLeza. Eezi nzizyo zipa kuti aambwe kuti “ngomusongo alikke.”​—Baroma 16:27.

Ubeteka Chabululami. Chiindi choonse Leza ukkala kachita zintu zibotu. Milimu yakwe “ililondokede” alubo nguLeza “uutaciti zitaluleme.”​—Deuteronomo 32:4.

Luyando. Bbayibbele lyaamba kuti “Leza nduyando.” (1 Johane 4:8) Leza tatondeezyi luyando luzutu pesi we nduyando. Kufumbwa zintu nzyachita ulazichita akaambo kaluyando. Alubo zintu nzyachita zigwasya ndiswe.

Leza Uyanda Kuti Tube Beenzinyina. Leza nguTaateesu siluyando. (Matayo 6:9) Kuti twaba alusyomo mulinguwe tulaba beenzinyina. (Intembauzyo 25:14) Leza uyanda kuti uswene aafwiifwi anguwe kwiinda munkombyo akuti ‘kowaala makatazyo aako oonse kulinguwe, nkaambo ulakubikkila maano.’​—1 Petro 5:7; Jakobo 4:8.

Jesu teeLeza pe. Jesu ulisiyene andiswe nkaambo nguwe alikke wakalengwa aaLeza kumupalama. Akaambo kazeezi Bbayibbele limwaamba kuti mwana waLeza. (Johane 1:14) Naakazwa kulenga Jesu, Jehova wakabelekaamwi amwanaakwe mutaanzi kukulenga zintu zyoonse kali “mubelesi uucibwene.”​—Tusimpi 8:30, 31; Bakolose 1:15, 16.

 Jesu taakwe naakalyaamba kuti nguLeza. Jesu wakaamba kuti: “Ndili mwiiminizi uuzwa [kuli Leza], alimwi walo nguwakandituma.” (Johane 7:29) Chiindi Jesu naakali kubuzya umwi wabasikwiiya bakwe, wakaamba Jehova kuti “Taata alimwi a Bauso” alubo wakati “Leza wangu a Leza wanu.” (Johane 20:17) Chiindi Jesu naakafwa, Jehova wakamubusya kali chilenge chamuuya kujulu, mpawo wakamupa chuuno chabulemu, lino ukkede kukuboko Kwakwe kwalulyo.​—Matayo 28:18; Milimo 2:32, 33.

Kuziba Jesu Kristu Kupa Kuti Uswene Afwiifwi aLeza

Jesu wakaza aanyika kuzooyiisya bantu atala aWisi. Jehova lwakwe naakali kwaamba Jesu wakati: “Ooyu Mwanaangu ngweyandisya. Amumuswiilile.” (Marko 9:7) Jesu umwizi kabotu Leza kwiinda ndiswe. Eezi zyakapa kuti aambe kuti: “Kunyina uumuzyi kabotu Taata ccita Mwana alikke, alimwi ayooyo kufwumbwa Mwana ngwaayanda kuyubunwida.”​—Luka 10:22.

Jesu utondeezya buntu bwaLeza. Jesu wakatondeezya buntu buli mbuuli bwaWisi, wakaamba kuti: “Kufwumbwa ooyo wandibona wamubona awalo Taata.” (Johane 14:9) Jesu wakatobelezya chikozyano chaWisi kwiinda muzintu nzyaakali kwaambuula anzyaakali kuchita alubo eezi zyakapa kuti bantu baze kuli nguwe. Wakati: “Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.” (Johane 14:6) Wakayungizya kuti: “Bakombi bakasimpe [bayookomba] Taata mumuuya amukasimpe, nkaambo mubwini bantu bali boobu mbayandaula Taata kuti bamukombe.” (Johane 4:23) Jehova ukwela bantu bali mbuuli nduwe bali aachiyandisyo chakuziba kasimpe atala anguwe.