1. Niinzi chiyoochitika ikuti ‘waswenaa fwiifwi aLeza’?

JEHOVA ulabayanda aabo bamukomba. Ikuti wakomba Jehova uyookulongezya lino amuchiindi chiza. Bbayibbele lyaamba kuti: “Amuswenenene kuli-Leza, elyo alakwe ulamuswenenena.”—Jakobo 4:8.

2. Kujana twaswena biyeni afwiifwi aLeza, alimwi eezi zipa kuti Leza azichite biyeni nkombyo zyesu?

² Ikuti uswene kuli Leza, weelede kubala Jwi lyakwe akubelesya nzubala. Ikuti wakomba kuli Jehova kweendelana azintu nzyayanda, uyoozisandula akuziswiilila nkombyo zyako. Mwaapostolo Johane wakalemba kuti: “Kaanzambwene nkitujisi kubusyu bwakwe [Leza] nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa. Nkabela na tulizi kuti ulatumvwa, coonse ncotukumbila, tulizi kuti tulijisi zikumbilo nzitwamukumbila.”—1 Johane 5:14, 15.

3-7. Kujana twabujana biyeni busongo buzwa kuli Leza alimwi busongo bwakwe butugwasya biyeni?

³ Kuyungizya waawo, chiindi nuswenaa fwiifwi aLeza uyookupa busongo bwakulanganaa zyiimo zisiyene-siyene mubuumi. Bbayibbele lyaamba kuti: “Pele na nkwali akati kanu uubula busongo, akumbile kuli-Leza.”—Jakobo 1:5.

⁴ Busongo buzwa kuli Leza nga bulakugwasya biyeni? Kamwi kaambo nkakuti bulakonzya kukugwasya kuziba zintu Jehova nzyatayandi. Alubo ulakonzya kuziba kuti nkamboonzi zintu zili boobu nizitali kabotu akuti niinzi nchweelede kuchita kuti uzitantamuke. Luzibo oolu lulakonzya kukukwabilila kumapenzi aalikukataazya bantu biingi. Muchikozyano, kuswiilila lulayo lwaLeza lwakuti tweelede kulijata kabotu kukwabilila bantu baLeza kuti batabi aamada amusokwe, batabi amalwazi aajanika kwiinda mukoonana alimwi batabi aamapenzi mulukwatano naa kulekana.

⁵ Niinzi chimwi busongo buzwa kuli Leza nchibukonzya kukugwasya? Bulakonzya kukugwasya kuti uzwidilile mubuumi. Bulakonzya kukugwasya kuti usale chabusongo mumakani aayandikana aali mbuli kubelesya mali. Uyoobaa zipeekezyo zili kabotu alimwi uyookaka zintu zitagwasyi.

⁶ Busongo buzwa kuli Leza bulakonzya kukugwasya kuti kumvwananaa bamwi bantu. Ulakonzya kubotelwa mumpuli. Ulakonzya kubaa beenzuma bachoonzyo alimwi bantu balakonzya kukulemeka, kuswaanizya abaabo batakombi Leza.

⁷ Kuyungizya waawo, busongo buzwa kuli Leza buyookugwasya kuti ubaamaboneno aali kabotu atala abuumi. Buyookugwasya kuti uzwidilile mumapenzi nguswaana azintu zikukataazya. Alubo, buyookugwasya kuti ubaamaboneno aali kabotu atala abuumi buli kunembo. Kubaa maboneno aali kabotu kuyookugwasya kuti ubaamiyeeyo iili kabotu akuti ubaa buumi buli kabotu.—Tusimpi 14:30; Isaya 48:17.

8. Kukomba Leza kukugwasya kuti utayoowiinzi?

⁸ Kukomba Leza wakasimpe kuyookugwasya  kuti utayoowi zintu zikataazya bantu batakombi Leza. Kuziba kuti bantu bafwide taakwe nchibazi pe, kupa kuti utayoowi bantu bakafwa. Kubaa bulangilizi bwakuti Leza uyoobusya bantu bafwide kupa kuti utakuyoowi pe kufwa. Alimwi kuziba kuti Leza nguSinguzuzyoonse kukugwasya kuti utayoowi balozi naa basondi.—Johane 8:32.

9-11. Mbaani bayookkala muParadayizi alimwi mbaani batakooyookkala mulinjiyo?

⁹ Ikuti waswenaa fwiifwi aLeza tukayoowi buumi buli kunembo. Mbuli mbutwayiiya, Bbayibbele lyakaambilizya atala amapenzi miingi ngitulikubona munyika mazubaano. Jehova utubuzya kuti zintu eezi nzyachiindi chifwiifwi biyo, akuti lino-lino Bwaami bwaLeza buyoochita kuti nyika ikabe paradayizi.—Luka 21:10, 11, 31; 23:43.

¹⁰ Bantu baswenaa fwiifwi aJehova abamukomba mbabo luzutu bayoopona muParadayizi. Bbayibbele lyaamba kuti: “Kaba kaindi kaniini sizibi takooyooba wo; unooyeeya nkwaakabede, pele takooyooba nkuko. Pele babombemyoyo bayoovuba nyika, bayookondwa muluumuno lunji.”—Intembauzyo 37:10, 11.

¹¹ Bantu batayandi kutobela milawu yaLeza iiluleme, bayoonyonyoonwa. (2 BaTesalonika 1:8, 9) Tabachikabiwo pe. Bayoonyonyoonwaamwi aSaatani amadimoni aakwe. (Ciyubunuzyo 20:10, 14) Pesi, bantu bayiiya atalaa Jehova abamukomba bayoobotelwa muParadayizi inoolaanyika.

12. Bbayibbele lyambaanzi atalaa buumi buli kunembo?

¹² Jehova uyoobachitila zintu zibotu bantu boonse bamuyanda! Atubone zintu zyambwaa Jwi lyakwe zilaatalaa Paradayizi inoolaanyika:

• Kuyooba chakulya chiingi loko: “Maila avule ansi, atala lyazilundu.”—Intembauzyo 72:16.

• Maanda mabotu aakukkala: “Bayooyaka maanda akukala mulingao.”—Isaya 65:21.

• Mulimu uubotezya: “Bantu mbensalide bayoongozya milimo yamaanza aabo. Tabakooyoobeleka cabuyo.”—Isaya 65:22, 23.

• Kuchiswa kuyoomana: “Takukooyooba naba omwe akati kabantu banyika uuamba kuti ‘Ndaciswa.’”—Isaya 33:24.

• Bulema buyoomana: “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.”—Isaya 35:5, 6.

• Machise, kulila, lufu ziyooloba: “Nkabela [Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.

• Nkondo ziyoomana: “[Leza] ulalesya inkondo mane kusikila kumamanino aanyika.”—Intembauzyo 46:9.

• Buumi butamani: “Balulami bayookona nyika, bayookala alinjiyo lyoonse.”—Intembauzyo 37:29.

13. Ngwani uukonzya kuchincha nyika eeyi kuti ibe paradayizi alimwi nkamboonzi?

¹³ Bantu tabakonzyi pe kuchita zintu zili boobo, pesi Jehova ulaamanguzu akuchita kufumbwa nchaamba kuti uyoochichita. Taakwe chintu chikonzya kumukachizya kuchita kufumbwa nchayanda kuchita. Bbayibbele lyaamba kuti: “Nkaambo taakwe ijwi ilizwa kuli-Leza ilibula nguzu.”—Luka 1:37.

14. Kujana wachita biyeni kuti weende munzila iitola kubuumi butamani?

¹⁴ Jehova ubelesya Bakamboni bakwe kuti ape bantu munyika yoonse mweenya ‘wakunjila mumulyango uumanikide’ akuti beende munzila iitola kubuumi butamani. Baakati kabantu bazumina kutamba ooku. Kakatila mubukombi bwakasimpe kuti ujane zilongezyo zizwa kuli Jehova kukabe kutamani!—Matayo 7:13, 14.