MUBUZYO 7
Kujana Ndachita Biyeni Kuti Ndoongelezegwa Kuti Ndoonane Awumwi Muntu?
KUJANA WACHITA BIYENI?
Yeeya eezi: Twaambo aChileleko, bali amyeezi iibili kabayandana pesi Twaambo uchitaanga bakazibana chiindi loko. Buzuba abuzuba basendelana mameseji akufoonenana, chimwi chiindi umwi katanajinsya zyayanda kwaamba umwi ngawaziziba kale kuti uyanda kutyeni. Pesi, Chileleko uyanda kuti bachite zyiinda aawo.
Mumyeezi eeyi iibili kabayandana Twaambo aChileleko, bakali kujatana maboko akumyontana luzutu. Twaambo tayandi kuti bachite zyiinda aawo. Pesi tayandi kuti baleke kuyandana aChileleko. Taakwe muntu umutondeezya luyando mbuuli Chileleko. Twaambo ukkala kalibuzya kuti, ‘Chileleko nguwangu . . . ’
Kaansinga nduwe ulimuchiimo eechi, walikunoochita biyeni?
YEEYA SAANSI!
Koonana nchipo Leza nchapede bantu bakwetene luzutu. Koonana kamutana kwatana nkubelesya chipo eechi munzila iiteelede. Kuli mbuuli kubweza chigogo chipya nchwakapegwa akuchikkolobbesya
Kuti weezya kusotoka kuzwa akaluli kang’anda ulakonzya kulichisa. Nkinkaako, kutyola milawu yamuBbayibbele mbuuli wakuti: “Amulilesye kubwaamu,” kulakonzya kutunjizya mumapenzi.—1 BaTesalonika 4:3.
Nziizili mpindu nzitukonzya kujana kuti twasotoka mulawu ooyu? Bbayibbele lyaamba kuti: “Sibwaamu ulabisizya mubili wakwe mwini.” (1 BaKorinto 6:18) Niinzi chitondeezya kuti majwi aaya ngachoonzyo?
Basikuyanduulisisya bakajana kuti bachikula bakaswaanizigwa mumakani azyakoonana bakajana mpindu zitobela:
-
KULISOLA. Bachikula bakaswaanizigwa mumakani azyakoonana kabatanakwata naakuti kukwatwa bakazoolisola kunembo.
-
KUTASYOMANA. Bachikula bakaswaanizigwa mumakani azyakoonana kabatanakwatana ngabalibuzya kuti, ‘Ndime andikke na ndakoonanaawe?’
-
KUUSA. Basimbi bayanda balombe bakonzya kubakwabilila kutali balombe bayanda kuti boonane aabo. Alubo balombe tababayandi pe basimbi bafwambaana kuzumina koongelezegwa mumakani azyakoonana.
-
Simpe ndyakuti: Kuti woonana amuntu kutana kwata naakuti kukwatwa ngawalyuubula. (BaRoma 1:24) Tuyelede kusofwaazya mubili wako nkaambo ulayandikana!
Tondeezya kuti ulalilemeka kwiinda ‘mukulilesya kubwaamu.’ (1 BaTesalonika 4:3) Kuti wazookwata naakuti kukwatwa uyoobotelelwa koonana amuntu ngukwetenaawe. Alubo tukalisoli, tukawusi naakuti kulimvwa kutakwabililidwe, mbuuli bantu boonana kabatana kwatana.—Tusimpi 7:22, 23; 1 BaKorinto 7:3.
UYEEYAANZI?
-
Zilachita na kuti muntu ukuyanda achite zintu zikonzya kukunyongania kumubili amumizeezo?
-
Zilachita na kuti muntu ukuyanda ape kuti uchite zintu zikonzya kunyongania bweenzinyokwe aLeza?—BaHebrayo 13:4.
