CHIIYO 40
Niinzi Nzitweelede Kuchita Kuti Leza Atubone Katuli Bantu Basalala?
Yeeyela umwi mwanakazi kalikulungisizya mwanaakwe kuti ayinke kuchikolo. Ulamusanzya akumuzwaatika yunifoomu iitakwe doti. Kuchita oobu, kugwasya mwana ooyo kuti atajatwi malwazi alubo kutondeezya kuti bazyali bakwe balaandaba anguwe. Munzila iikozyenie, Ndeendeesu siluyando Jehova, uyanda kuti tusalale kumubili amukulijata. Kusalala kugwasya ndiswe alubo kupa kuti Jehova alemekwe.
1. Tweelede kuchitaanzi kuti tusalale?
Jehova utubuzya kuti: “Mweelede kusalala.” (1 Petro 1:16) Tweelede kusalala kumubili amunzila njitulijataayo. Kusalala kumubili kuswaanizya kusamba, kwaacha zigogo zyesu, kusalazya aamuunzi amoota zyesu. Alubo tulakonzya kusalazya Maanda aaBwaami. Kuti twasalala kumubili, tupa kuti Jehova alemekwe.—2 Bakorinto 6:3, 4.
2. Niinzi nzitweelede kutantamuka kuti tusalale?
Bbayibbele lyaamba kuti “atulisalazye kuzintu zyoonse zisofwaazya mubili amuuya.” (2 Bakorinto 7:1) Eezi zyaamba kuti tweelede kubeleka changuzu kuti tutantamuke zintu zisofwaazya mibili amizeezo yesu. Zintu nzituyeeya zyeelede kubotezya Jehova, nkinkaako, tweelede kutantamuka mizeezo iitali kabotu. (Intembauzyo 104:34) Alubo tweelede kubeleka changuzu kuti twaambuule majwi aalikabotu.—Bala Bakolose 3:8.
Niinzi chimbi chikonzya kutugwasya kuti tusalale kumubili amukulijata? Zimwi zintu zilakonzya kusofwaazya mibili yesu. Nkinkaako, tatweelede kufwepa polya, lubange amisamu iikola iitazumizigwi. Kuti twaleka kuchita zintu eezi, tulapona buumi bulikabotu alubo nga twatondeezya kuti tulachilemeka chipo chabuumi. Alubo tuleezya kubeleka changuzu kuti tukkale katusalala mukulijata kwiinda mukutantamuka michito iitali kabotu iili mbuli kusaanisya zizo zyakoonana akweebela ponogilafu. (Intembauzyo 119:37; Baefeso 5:5) Teekuuba pe kuzunda michito eeyi, pesi Jehova ulakonzya kutugwasya kuti twiizunde.—Bala Isaya 41:13.
YIYA ZYIINGI
Bona kusalala kumubili mbukupa kuti Jehova alemekwe ambutukonzya kuzunda michito iitali kabotu.
3. Kusalala kumubili kupa kuti Jehova alemekwe
Tulakonzya kuziba maboneno ngalaawo Jehova atala akusalala kuti twalanga-langa milawu njaakapede maIsrayeli. Bala Kulonga 19:10 a 30:17-19, mpawo musandule mibuzyo iitobela:
-
Mavesi aaya atondeezya kuti Jehova ukubona biyeni kusalala kumubili?
-
Nziizili zintu zikonzya kukugwasya kuti ukkale kusalala kumubili?
Ziyanda kubeleka changuzu kuti tukkale katusalala. Tulakonzya kukkala katusalala kazitakwe ndaba kuti tukkala kuli akuti tulaamali iilibiyeni. Mweebele KAVIDIYO, mpawo musandule mubuzyo uutobela.
-
Muunzilaanzi kwiinka aazintu zisalala mumulimu wakukambawuka nikupa kuti bantu balemeke Jehova?
4. Zunda michito iitali kabotu
Jehova ulakonzya kutugwasya kuti tuzunde michito iitali kabotu
Kuti kufwepa naakuti kubelesya misamu iikola iitazumizigwi, ulakonzya kukumvwisisisya mbukuli kuyumu kusiya michito eeyi. Niinzi chikonzya kukugwasya? Bona michito iitali kabotu mbiikonzya kukupambanisya. Bala Matayo 22:37-39, kuzwa waawo, mwaambuuzyanie atala akufwepa naakuti kubelesya misamu iikola iitazumizigwi mbukupambanisya . . .
-
bweenzinyina mbwalaabo muntu aJehova
-
bamumpuli abeenzinyina bamuntu ooyo
Yanduula nzila njukonzya kuzunda michito iitali kabotu. * Mweebele KAVIDIYO.
Bala Bafilipi 4:13, mpawo musandule mubuzyo uutobela:
-
Kujana kwakugwasya biyeni kukomba, kubala Bbayibbele akunjila miswaangano kuti uzunde michito iitali kabotu?
5. Lwana mizeezo amichito iitali kabotu
Bala Bakolose 3:5, mpawo musandule mibuzyo iitobela:
-
Tuzizi biyeni kuti ponogilafu, kusendelana mameseji aayetela muzeezo wakoonana akusaanisya zizo zyakoonana zilamusesemya Jehova?
-
Ubonaanga zilagwasya na kuti Jehova atubuzye kuti tusalale munzila njitulijataayo? Nkamboonzi?
Bona mbukonzya kuzunda penzi lyamizeezo iitali kabotu. Mweebele KAVIDIYO.
Jesu wakabelesya chikozyano chitondeezya kuti tweelede kusala munzila iilikabotu kuti tukkale katusalala munzila njitulijataayo. Bala Matayo 5:29, 30, mpawo musandule mubuzyo uutobela:
-
Jesu taakalikwaamba kuti tweelede kulichisa biya pe pesi wakali kwaamba kuti tweelede kubweza ntaamu. Niinzi nzyayelede kuchita muntu kuti atantamuke mizeezo iitali kabotu? *
Kuti kolikubeleka changuzu kuti uzunde michito iitali kabotu, Jehova ulabotelwa akubeleka changuzu nkulikuchita. Bala Intembauzyo 103:13, 14, mpawo musandule mubuzyo uutobela:
-
Kuti kulaamichito iitali kabotu njuyanda kuleka, kujana mavesi aaya akugwasya biyeni kuti ubeleke changuzu kuzunda michito eeyo?
Kuyuminwa kuleka michito iitali kabotu teekukachilwa pe!
Nkuuba kulibuzya kuti, ‘Ndakachilwa me, ndiyanda kusiyanaazyo.’ Muchikozyano, kuti muntu uulikuchijaana walebwa mpawo wawa, tazyaambi kuti wasyaala pe naakuti abweede lubo musule akasaangune lubo kuchijaana. Munzila iikozyenie, kuti kwakuyumina kuleka muchito uutali kabotu tazyaambi kuti tuchizoofwi wawuzunda pe. Alubo tazyaambi kuti kubeleka changuzu nkuwakachita takugwasyi pe. Kuyuminwa kuleka muchito uutali kabotu teekukachilwa pe. Utateyi mulenga. Jehova uyookugwasya kuti uzunde michito iitali kabotu.
BAMWI BAAMBA KUTI: “Zyakaba muganzi eezi. Tandikonzyi pe kuleka.”
-
Nduululi lugwalo ndukonzya kubalila muntu ooyo lutondeezya kuti kwiinda mukugwasigwa aaJehova ulakonzya kuzunda muchito uutali kabotu?
CHIFWIINSYO
Tulakonzya kubotezya Jehova kuti twasalala kumubili, mumizeezo amukulijata.
Mibuzyo Yakwiindulula
-
Nkamboonzi nikuyandikana kuti tukkale katusalala?
-
Kujana twachitaanzi kuti tusalale kumubili?
-
Niinzi chikonzya kutugwasya kuti tusalale mumizeezo amukulijata?
YANDUULISISYA
Niinzi nzweelede kubelesya zipa kuti ukkale kusalala nikuba kutakwe mali nyingi?
Bona zintu zikonzya kukugwasya kuti uzunde penzi lyakufwepa.
“Mbomukonzya Kuleka Kufweba” (Sinsimuka!, May 2010)
Bona bubi bweetwa akaambo kaponogilafu.
“Ponogilafu Ilikabotu Na Naakuti Nimbi?” (Ngaziyakulinda, August 1, 2013)
Bona umwi mwaalumi mbaakazunda penzi lyakweebela ponogilafu.
“Ndakabeleka Changuzu Kuti Ndizunde Penzi Eeli” (Ngaziyakulinda No. 4 2016)
^ “Mbomukonzya Kuleka Kufweba,” chiiyo eechi chijanika aachipanzi chitii Yanduulisisya muchiiyo eechi, chipandulula zintu nzweelede kuchita kuti uzunde michito iitali kabotu.
^ Kuti ubone mbukonzya kuzunda penzi lyakusaanisya zizo zyakoonana, langa chiiyo chitii, “Kujana Ndalizunda Biyeni Penzi Lyakusaanisya Zizo Zyakoonana?” mubbuku litegwa Mibuzyo Iibuzigwa Aabachikula—Nsandulo Zigwasya, Voluyumu 1, chaandaano 25.
